ಹೈದರಾಬಾದ್ : ನಾಯಕ ನಿತೀಶ್ ರಾಣಾ (42) ಹಾಗೂ ಯುವ ಬ್ಯಾಟರ್ ರಿಂಕು ಸಿಂಗ್ (46) ಅವರ ಸಮಯೋಚಿತ ಬ್ಯಾಟಿಂಗ್ನ ನೆರವು ಪಡೆದ ಕೋಲ್ಕೊತಾ ನೈಟ್ ರೈಡರ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 47ನೇ ಪಂದ್ಯದಲ್ಲಿ 171 ರನ್ ಬಾರಿಸಿದೆ. ಈ ಮೂಲಕ ಆತಿಥೇಯ ಎಸ್ಆರ್ಎಚ್ ತಂಡದ ಗೆಲುವಿಗೆ 172 ರನ್ಗಳ ಸವಾಲು ಎದುರಾಗಿದೆ.
ಇಲ್ಲಿನ ರಾಜೀವ್ಗಾಂಧಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಕೆಕೆಆರ್ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಮೊದಲು ಬ್ಯಾಟ್ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 171 ರನ್ ಬಾರಿಸಿತು.
ಬ್ಯಾಟಿಂಗ್ ಆರಂಭಿಸಿದ ಕೆಕೆಆರ್ ತಂಡಕ್ಕೆ ರಹಮನುಲ್ಲಾ ಗುರ್ಬಜ್ ವಿಕೆಟ್ ಶೂನ್ಯಕ್ಕೆ ಪತನವಾಗುವ ಮೂಲಕ ನಿರಾಸೆ ಎದುರಾಯಿತು. ಬಳಿಕ ಬಂದ ವೆಂಕಟೇಶ್ ಅಯ್ಯರ್ ಕೂಡ 7 ರನ್ಗೆ ವಿಕೆಟ್ ಒಪ್ಪಿಸವುದರೊಂದಿಗೆ ಇನ್ನಷ್ಟು ಆಘಾತ ಎದುರಾಯಿತು. ಜೇಸನ್ ರಾಯ್ 19 ಎಸೆತಕ್ಕೆ 20 ರನ್ ಬಾರಿಸಿದ ಕಾರಣ ತಂಡದ ಪಾಲಿಗೆ ಉತ್ತಮ ಆರಂಭ ದೊರೆತಂತಾಗಲಿಲ್ಲ.
ನಾಲ್ಕನೇ ಕ್ರಮಾಂಕದಲ್ಲಿ ಆಡಲು ಬಂದ ನಿತೀಶ್ ರಾಣಾ ಹಾಗೂ ಐದನೇ ಕ್ರಮಾಂಕದಲ್ಲಿ ಕಣಕ್ಕೆ ಇಳಿದ ರಿಂಕು ಸಿಂಗ್ ತಂಡಕ್ಕೆ ಆಧಾರವಾದರು. 35 ರನ್ಗಳಿಗೆ ಮೊದಲ ಮೂರು ವಿಕೆಟ್ ನಷ್ಟ ಮಾಡಿಕೊಂಡು ಸಂಕಷ್ಟದಲ್ಲಿದ್ದ ತಂಡಕ್ಕೆ ನೆರವಾದರು. ಆದರೆ, ತಂಡದ ಮೊತ್ತ 96 ಆಗುವಷ್ಟರಲ್ಲಿ ನಿತೀಶ್ ರಾಣಾ ವಿಕೆಟ್ ಒಪ್ಪಿಸಿದರು. ದೊಡ್ಡ ಹೊಡೆತಕ್ಕೆ ಮುಂದಾದ ಅವರು ಕ್ಯಾಚಿತ್ತು ನಿರ್ಗಮಿಸಿದರು. ವಿಂಡೀಸ್ ದೈತ್ಯ ಆಂಡ್ರೆ ರಸೆಲ್ (15 ಎಸೆತಕ್ಕೆ 24 ರನ್) ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರೂ ದೀರ್ಘ ಇನಿಂಗ್ಸ್ ಕಟ್ಟಲು ಅವರಿಗೆ ಸಾಧ್ಯವಾಗಲಿಲ್ಲ.
ವಿಕೆಟ್ಗಳು ಪತನಗೊಳ್ಳುತ್ತಿದ್ದ ನಡುವೆಯೂ ರಿಂಕು ಸಿಂಗ್ ಸಮಯೋಚಿತ ಬ್ಯಾಟಿಂಗ್ ಮಾಡಿದ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ನೆರವಾದರು. ಆದರೆ, ನಾಲ್ಕು ರನ್ಗಳ ಕೊರತೆಯಿಂದ ಐಪಿಎಲ್ನಲ್ಲಿ ಎರಡನೇ ಅರ್ಧ ಶತಕ ಬಾರಿಸಲು ಸಾಧ್ಯವಾಗದೇ ನಿರಾಸೆ ಎದುರಿಸಿದರು.
ಸುನೀಲ್ ನರೈನ್ 1 ರನ್ ಬಾರಿಸಿದರೆ, ಶಾರ್ದೂಲ್ ಠಾಕೂರ್ 8 ರನ್ಗಳಿಗೆ ಸೀಮಿತಗೊಂಡರು. ಕೊನೆಯಲ್ಲಿ ಅನುಕೂಲ್ ರಾಯ್ 7 ಎಸೆತಗಳಿಗೆ 13 ರನ್ ಬಾರಿಸಿದರು. ವೈಭರ್ ಅರೋರಾ 2 ರನ್ ಬಾರಿಸಿದರು.
ಎಸ್ಆರ್ಎಚ್ ತಂಡದ ಪರ ಮಾರ್ಕೊ ಜಾನ್ಸೆನ್ ಹಾಗೂ ಟಿ ನಟರಾಜನ್ ತಲಾ 2 ವಿಕೆಟ್ ಉರುಳಿಸಿದರು. ಭುವನೇಶ್ವರ್ ಕುಮಾರ್, ಕಾರ್ತಿಕ್ ತ್ಯಾಗಿ, ಏಡೆನ್ ಮಾರ್ಕ್ರಮ್ ಹಾಗೂ ಮಯಾಂಕ್ ಮಾರ್ಕಂಡೆ ತಲಾ ಒಂದು ವಿಕೆಟ್ ಉರುಳಿಸಿದರು.