ಭಾರತದ ಪ್ರಖ್ಯಾತ ನಟ ಆರ್‌.ಮಾಧವನ್ ಮಗ ವೇದಾಂತ್‌ ಮಾಧವನ್(16) ಸ್ವಿಮಿಂಗ್‌ನಲ್ಲಿ ಅಪೂರ್ವ ಸಾಧನೆ ಮಾಡಿದ್ದಾರೆ. ಡ್ಯಾನಿಶ್‌ ಓಪನ್‌ 2022 ಸ್ವಿಮಿಂಗ್‌ ಚ್ಯಾಂಪಿಯನ್‌ಶಿಪ್‌ನಲ್ಲಿ ಭಾಗವಹಿಸಿ ಚಿನ್ನದ ಪದಕ ತನ್ನದಾಗಿಸಿಕೊಂಡಿದ್ದಾರೆ. ಈ ಸಂತಸದ ವಿಷಯವನ್ನು ನಟ ಮಾಧವನ್ ತಮ್ಮ ಇನ್ಸ್‌ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವೇದಾಂತ್‌ ಮಾಧವನ್ ಕೊರಳಿಗೆ ಚಿನ್ನದ ಪದಕ ತೊಡಿಸುತ್ತಿರುವ ವೀಡಿಯೋ ಸಮಾಜಿಕ ಜಾಲತಾಣದಲ್ಲಿ ವೈರಲ್‌ ಅಗಿದೆ.
800ಮಿ. ಸ್ವಿಮಿಂಗ್‌ ಚ್ಯಾಂಪಿಯನ್‌ಶಿಪ್‌ನಲ್ಲಿ ವೇದಾಂತ್‌ ಮಾಧವನ್ 8:17.28 ನಿಮಿಷಗಳಲ್ಲಿ ಪೂರ್ಣಗೊಳಿಸಿ ಪ್ರಥಮ ಸ್ಥಾನ ಪಡೆದಿದ್ದಾರೆ. ಈ ಹಿಂದೆಯೂ ಹಲವು ಚ್ಯಾಂಪಿಯನ್‌ಶಿಪ್‌ನಲ್ಲಿ ಭಾಗವಹಿಸಿ ಬೆಳ್ಳಿ ಹಾಗೂ ತಾಂರದ ಪದಕವನ್ನು ಜಯಿಸಿದ್ದಾರೆ.
ವೇದಾಂತ್‌ ಅವರ ಈ ಸಾಧನೆ ಉಳಿದವರಿಗೆ ಪ್ರೇರಣಾದಾಯಕವಾಗಿದೆ. ಈ ನಡುವೆ ಆರ್‌.ಮಾಧವನ್ ಕೂಡ ಉಳಿದ ಸ್ಟಾರ್‌ ನಟರಿಗೆ ಮಾದರಿಯ ತಂದೆಯಾಗಿದ್ದಾರೆ.
ಕಳೆದ ಡಿಸೆಂಬರ್‌ನಲ್ಲಿ ಕೋವಿಡ್‌ ಕಾರಣದಿಂದ ಭಾರತದಲ್ಲಿ ಬಹುತೇಕ ಸ್ವಿಮಿಂಗ್‌ ಪೂಲ್‌ಗಳನ್ನು ಮುಚ್ಚಲಾಗಿತ್ತು. ವೇದಾಂತ್‌ಗೆ ಸ್ವಿಮಿಂಗ್‌ ಕೋಚಿಂಗ್‌ ಕೊಡಿಸುವ ಕಾರಣದಿಂದ ಮಾಧವನ್ ಕುಟುಂಬ ಸಮೇತರಾಗಿ ದುಬೈಗೆ ಪ್ರಯಾಣಿಸಿದ್ದರು. ಮಾದವನ್‌ ಹಾಗೂ ವೇದಾಂತ್‌ ಅವರ ಪರಿಶ್ರಮಕ್ಕೆ ಈಗ ಪ್ರತಿಫಲ ದೊರಕಿದೆ.
ಆರ್‌ ಮಾಧವನ್ ತಮ್ಮ ಇನ್ಸ್‌ಟಾಗ್ರಾಂ ಪೋಸ್ಟ್‌ನಲ್ಲಿ ವೇದಾಂತ್‌ ಅವರ ಈ ಸಾಧನೆಗೆ ಕಾರಣರಾದ ಕೋಚ್‌ ಪ್ರದೀಪ ಅವರಿಗೆ ನಟ ಮಾಧವನ್ ಕೃತಜ್ಞತೆ ತಿಳಿಸಿದ್ದಾರೆ. ಆಶೀರ್ವದಿಸಿದ ಎಲ್ಲರಿಗೂ ಹಾಗೂ ದೇವರಿಗೆ ಪ್ರಣಾಮಗಳನ್ನು ಸಲ್ಲಿಸಿದ್ದಾರೆ.