ಬೆಂಗಳೂರು: ಟಾಟಾ ಮೋಟಾರ್ಸ್ ತನ್ನ ಸಿಎನ್ಜಿ ಚಾಲಿತ ಪ್ಯಾಸೆಂಜರ್ ಕಾರಉ ಆಲ್ಟ್ರೋಜ್ ಐಸಿಎನ್ಜಿಯ ಬೆಲೆಯನ್ನು ಇತ್ತೀಚೆಗೆ ಘೋಷಿಸಿದೆ. ಆಲ್ಟ್ರೋಜ್ ಐಸಿಎನ್ ಜಿ ಕಾರಿನ ಆರಂಭಿಕ ಬೆಲೆಯು ಭಾರತದ ಎಕ್ಸ್ ಶೋರೂಂ ದರದಂತೆ ರೂ.7.55 ಲಕ್ಷಗಳಿಂದ ಆರಂಭವಾಗಿ ರೂ.10.55 ಲಕ್ಷಗಳ ತನಕ ನಿಗದಿ ಮಾಡಲಾಗಿದೆ. ಆಲ್ಟ್ರೋಜ್ ಐಸಿಎನ್ಜಿ ಕಾರನ್ನು 2023ರ ಆಟೋ ಎಕ್ಸ್ಪೋದಲ್ಲಿ ಬಿಡುಗಡೆ ಅನಾವರಣ ಮಾಡಲಾಗಿತ್ತು. ಇದು ಟಾಟಾ ಮೋಟಾರ್ಸ್ನ ಮೂರನೇ ಸಿಎನ್ಜಿ ಕಾರಾಗಿದೆ. ಆಲ್ಟ್ರೋಜ್ ಕಾರು ಆರು ವೇರಿಯೆಂಟ್ಗಳಲ್ಲಿ ಲಭ್ಯವಿದೆ. ಎಕ್ಸ್ಇ, ಎಕ್ಸ್ಎಂ+, ಎಕ್ಸ್ಎಂ + (ಎಸ್), ಎಕ್ಸ್ಜಡ್, ಎಕ್ಸ್ಝಡ್ + (ಎಸ್), ಮತ್ತು ಎಕ್ಸ್ಝಡ್ + ಒ (ಎಸ್) ಎಂಬ ವೇರಿಯೆಂಟ್ಗಳಲ್ಲಿ ಸಿಗುತ್ತಿವೆ. ಒಪೆರಾ ಬ್ಲೂ, ಡೌನ್ಟೌನ್ ರೆಡ್, ಆರ್ಕೇಡ್ ಗ್ರೇ ಮತ್ತು ಅವೆನ್ಯೂ ವೈಟ್ ಎಂಬ ನಾಲ್ಕು ಬಣ್ಣಗಳಲ್ಲಿ ಲಭ್ಯವಿದೆ.
ಟಾಟಾ ಮೋಟಾರ್ಸ್ ಈ ಹಿಂದೆ ಆಲ್ಟ್ರೋಜ್ ಐಸಿಎನ್ಜಿ ಕಾರನ್ನು 21,000 ರೂಪಾಯಿ ಟೋಕನ್ ಕೊಟ್ಟು ಬುಕಿಂಗ್ ಮಾಡಬಹುದು ಎಂದು ಘೋಷಿಸಿತ್ತು. ಇದೀಗ ಅದರ ದರಪಟ್ಟಿಯನ್ನು ಪ್ರಕಟಿಸಿದೆ. 2020ರ ಜನವರಿಯಲ್ಲಿ ಆಲ್ಟ್ರೋಜ್ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆಗೊಂಡಿತ್ತು. ಅಲ್ಲಿಂದ ಅದು ಯಶಸ್ಸಿನ ಹಾದಿಯಲ್ಲೇ ಸಾಗುತ್ತಿತ್ತು. ಇದೀಗ ಆಲ್ಟ್ರೋಜ್ ಐಸಿಎನ್ಜಿಯನ್ನು ಪರಿಚಯಿಸುವ ಮೂಲಕ ತನ್ನ ಗ್ರಾಹಕರ ವ್ಯಾಪ್ತಿಯನ್ನು ವಿಸ್ತರಿಸುವ ಗುರಿ ಹೊಂದಿದೆ.
ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಪೆಟ್ರೋಲ್ ಮತ್ತು ಡೀಸೆಲ್ ಆಲ್ಟ್ರೋಜ್ ಜತೆ ಹೋಲಿಕೆ ಮಾಡುವುದಾದರೆ ಬಾಹ್ಯ ವಿನ್ಯಾಸವು ಗಮನಾರ್ಹ ಬದಲಾವಣೆಗಳನ್ನು ಮಾಡಲಾಗಿಲ್ಲ. 7.0-ಇಂಚಿನ ಟಚ್ ಸ್ಕ್ರೀನ್, ಡಿಜಿಟಲ್ ಡ್ರೈವರ್ ಡಿಸ್ ಪ್ಲೇ, ಆ್ಯಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್ ಪ್ಲೇ ಆಯ್ಕೆ,, ಆಟೋ ಕ್ಲೈಮೆಟ್ ಕಂಟ್ರೋಲ್ ಮತ್ತಿತರ ಫೀಚರ್ಗಳನ್ನು ಹೊಂದಿದೆ . 16ಇಂಚಿನ ಅಲಾಯ್ ವೀಲ್ಗಳು ಈ ಕಾರಿನಲ್ಲಿವೆ. ಆಲ್ಟ್ರೋಜ್ ಐಸಿಎನ್ಜಿ ಆರು ಏರ್ ಬ್ಯಾಗ್ ಗಳು, ಎಬಿಎಸ್ ವಿತ್ ಇಬಿಡಿ ಮತ್ತು ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ನಂತಹ ಸುರಕ್ಷತಾ ವೈಶಿಷ್ಟ್ಯಗಳನ್ನು ಹೊಂದಿದೆ.
ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್ ಲಿಮಿಟೆಡ್ ಮತ್ತು ಟಾಟಾ ಪ್ಯಾಸೆಂಜರ್ ಎಲೆಕ್ಟ್ರಿಕ್ ಮೊಬಿಲಿಟಿ ಲಿಮಿಟೆಡ್ನ ವ್ಯವಸ್ಥಾಪಕ ನಿರ್ದೇಶಕ ಶೈಲೇಶ್ಚಂದ್ರ ಮಾತನಾಡಿ, ಆರ್ಥಿಕ ಮತ್ತು ಪರಿಸರ ಸ್ನೇಹಿ ಚಾಲನೆಯ ಉದ್ದೇಶದಿಂದ ಗ್ರಾಹಕರು ಪರ್ಯಾಯ ಇಂಧನ ಆಯ್ಕೆಗಳನ್ನು ಬಯಸುತ್ತಿದ್ದಾರೆ. ಸಿಎನ್ಜಿ ಇಂಧನದ ವ್ಯಾಪಕ ಲಭ್ಯತೆಯಿಂದಾಗಿ ಆ ಕಡೆಗೂ ಜನರು ಗಮನ ಹರಿಸುತ್ತಿದ್ದಾರೆ. ಆದರೆ, ಸಿಎನ್ಜಿಯನ್ನು ಆಯ್ಕೆ ಮಾಡಿಕೊಂಡರೆ ಬೂಟ್ ಸ್ಪೇಸ್ ವಿಚಾರದಲ್ಲಿ ರಾಜಿ ಮಾಡಿಕೊಳ್ಳಬೇಕಾದ ಅನಿವಾರ್ಯತೆ ಇತ್ತು. ಈ ಸಮಸ್ಯೆಗೆ ಪರಿಹಾರವೆಂಬಂತೆ ಬೂಟ್ ಸ್ಪೇಸ್ ಕಡಿಮೆಯಾಗದಂತೆ ಸುಧಾರಿತ ತಾಂತ್ರಿಕತೆಯನ್ನು ಅಳವಡಿಸಿಕೊಂಡಿದ್ದೇವೆ. 2022ರ ಜನವರಿಯಲ್ಲಿ ಟಿಯಾಗೊ ಮತ್ತು ಟಿಗೋರ್ನಲ್ಲಿ ಈ ತಾಂತ್ರಿಕತೆಯನ್ನು ಅಳವಡಿಸಿಕೊಂಡೆವು. ಅದೇ ದಿಕ್ಕಿನಲ್ಲಿ ಆಲ್ಟ್ರೋಜ್ ಕೂಡ ಮಾರುಕಟ್ಟೆಗೆ ಇಳಿದಿದೆ ಎಂಬುದಾಗಿ ಹೇಳಿದರು.
ಇದನ್ನೂ ಓದಿ : Altroz CNG : ಟಾಟಾ ಮೋಟಾರ್ಸ್ನ ಆಲ್ಟ್ರೋಜ್ ಸಿಎನ್ಜಿ ಕಾರಿನ ಬಗ್ಗೆ ತಿಳಿದುಕೊಳ್ಳಬೇಕಾದ ಸಂಗತಿಗಳಿವು
ಆಲ್ಟ್ರೋಜ್ ಐಸಿಎನ್ಜಿಯಲ್ಲಿ ಮೈಕ್ರೊ ಸ್ವಿಚ್ ಅಳವಡಿಸಲಾಗಿದ್ದು ಇಂಧನ ತುಂಬಿಸುವ ಸಮಯದಲ್ಲಿ ಕಾರು ಎಂಜಿನ್ ಆಫ್ ಆಗುತ್ತದೆ. ಇದು ಅಪಾಯಕಾರಿ ಸನ್ನಿವೇಶ ಉಂಟಾಗದಂತೆ ನೋಡಿಕೊಳ್ಳುತ್ತದೆ. ಅದೇ ರೀತಿ ಥರ್ಮಲ್ ಇನ್ಸಿಡೆಂಟ್ ಪ್ರೊಟೆಕ್ಷನ್ ಸಿಸ್ಟಮ್ ಕೂಡ ಸೇರಿಸಲಾಗಿದೆ. ಇದು ಅಪಘಾತ ಸಂಭವಿಸಿದ ವೇಳೆ ಸಿಎನ್ಜಿ ಸೋರಿಕೆಯನ್ನು ತಡೆಯುತ್ತದೆ. ಡಿಕ್ಕಿಯಲ್ಲಿ ಅವಳಿ ಸಿಲಿಂಡರ್ಗಳನ್ನು ಇಟ್ಟಿರುವ ಕಾರಣ ಜಾಗದ ಸಮಸ್ಯೆ ಪರಿಹಾರವಾಗಿದೆ. ಲೋಡ್ ಫ್ಲೋರ್ ಅಡಿಯಲ್ಲಿ ವಾಲ್ವ್ಗಳು ಹಾಘೂ ಪೈಪ್ಗಳನ್ನು ರಕ್ಷಿಸುವ ವ್ಯವಸ್ಥೆಯನ್ನೂ ಮಾಡಲಾಗದೆ.