ಬೆಂಗಳೂರು : ಜಿಎಸ್ಟಿ ಸಮಿತಿ ಶನಿವಾರ (ಡಿಸೆಂಬರ್17) ಸಭೆ ನಡೆಸಿ ಕೆಲವೊಂದು ಉತ್ಪನ್ನಗಳ ಮೇಲಿನ ಸರಕು ಮತ್ತು ಸೇವಾ ತೆರಿಗೆಯನ್ನು ಕಡಿಮೆ ಮಾಡಿದೆ. ಶೇಕಡಾ 5ರಷ್ಟು ಕಡಿಮೆ ಮಾಡುವ ಪ್ರಸ್ತಾಪವನ್ನು ಸಮಿತಿ ಮುಂದಿಟ್ಟಿದಿದೆ. ಈ ವ್ಯಾಪ್ತಿಗೆ ಆಟೋಮೊಬೈಲ್ ಕ್ಷೇತ್ರದಲ್ಲಿ ಅತಿ ಹೆಚ್ಚು ಬೇಡಿಕೆ ಇರುವ ಕಾಂಪಾಕ್ಟ್ ಎಸ್ಯುವಿಗಳೂ (Compact SUV’s) ಬರಲಿವೆ ಎಂದು ಹೇಳಲಾಗುತ್ತಿದೆ. ಇದರೊಂದಿಗೆ ಈ ಸೆಗ್ಮೆಂಟ್ನ ಕಾರು ಖರೀದಿಗೆ ಮುಂದಾಗಿರುವ ಲಕ್ಷಾಂತರ ಮಂದಿಗೆ ಶುಭ ಸುದ್ದಿ ಲಭಿಸಿದೆ.
ಕಾಂಪಾಕ್ಟ್ ಎಸ್ಯುವಿಗಳಿಗೆ ಪ್ರಸ್ತುತ ಶೇಕಡಾ 20ರಿಂದ 23 ಜಿಎಸ್ಟಿ ಪಾವತಿಸಬೇಕಾಗಿದೆ. ಆದರೆ, ಹೊಸ ನಿಯಮಗಳ ಪ್ರಕಾರ 1500 ಸಿಸಿಗಿಂತ ಕಡಿಮೆ ಸಾಮರ್ಥ್ಯದ ಎಂಜಿನ್ ಹೊಂದಿರುವ, 4000 ಮಿಲಿ ಮೀಟರ್ಗಿಂತ ಕಡಿಮೆ ಉದ್ದ ಹೊಂದಿರುವ ಹಾಗೂ 170 ಮಿಲಿ ಮೀಟರ್ಗಿಂತ ಕಡಿಮೆ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿರುವ ವಾಹನಗಳನ್ನು ಎಸ್ಯುವಿಗಳೆಂದು ಪರಿಗಣಿಸಲಾಗುವುದಿಲ್ಲ. ಹೀಗಾಗಿ ಎಸ್ಯುವಿಗೆ ಹಾಕುವ ಶೇ.20ರಿಂದ 22ರವರೆಗಿನ ಜಿಎಸ್ಟಿ ಅನ್ವಯವಾಗುವುದಿಲ್ಲ. ಹೀಗಾಗಿ ಮಾರುಕಟ್ಟೆಯಲ್ಲಿರುವ ಕೆಲವೊಂದು ಕಾಂಪಾಕ್ಟ್ ಎಸ್ಯುವಿಗಳಿಗೆ ಹೊಸ ನಿಯಮಗಳು ಅನ್ವಯಗೊಂಡರೆ ಅವುಗಳ ದರ ಇನ್ನಷ್ಟು ಅಗ್ಗವಾಗಲಿದೆ. ಗ್ರಾಹಕರ ಮಟ್ಟಿಗೆ ಇದು ಸಂತಸದ ಸುದ್ದಿ.
ಯಾವೆಲ್ಲ ಕಾರುಗಳು?
ಮೇಲಿನ ನಿಯಮದ ಪ್ರಕಾರ ಹ್ಯುಂಡೈ ಕಂಪನಿಯ ವೆನ್ಯು, ಕಿಯಾದ ಸೆಲ್ಟೋಸ್, ಮಾರುತಿ ಸುಜುಕಿ ಬ್ರೆಜಾ ಹಾಗೂ ಮಹಿಂದ್ರಾ ಕಂಪನಿಯ ಎಕ್ಸ್ಯುವಿ 300 ಕಾರಿನ ಜಿಎಸ್ಟಿ ಶೇಕಡಾ 5 ಇಳಿಕೆಯಾಗಲಿದೆ. ಇದರ ನೇರ ಲಾಭ ಗ್ರಾಹಕರಿಗೆ ದೊರೆಯಲಿದೆ.
ವೆನ್ಯು ಕಾರಿನಲ್ಲಿ ಪೆಟ್ರೋಲ್ ಹಾಗೂ ಡೀಸೆಲ್ ಎಂಜಿನ್ ಆಯ್ಕೆಗಳಿವೆ. ಡೀಸೆಲ್ ಎಂಜಿನ್ 1,493 ಸಿಸಿ ಸಾಮರ್ಥ್ಯ ಹೊಂದಿದೆ. ಪೆಟ್ರೋಲ್ನಲ್ಲಿ 998 ಸಿಸಿ ಹಾಗೂ 1,197 ಸಿಸಿಎ ಎರಡು ಆಯ್ಕೆಗಳಿವೆ. ವೆನ್ಯು ಕಾರು 3,995 ಮಿಲಿ ಮೀಟರ್ ಉದ್ದವಿದ್ದು, 190ರಿಂದ 195 ಎಂಎಮ್ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿದೆ. ಕಿಯಾ ಸೊನೆಟ್ ಕೂಡ ಇಷ್ಟೇ ಗಾತ್ರವನ್ನು ಹೊಂದಿದ್ದು 1.0 ಹಾಗೂ 1.2 ಲೀಟರ್ನ ಪೆಟ್ರೋಲ್ ಎಂಜಿನ್ ಹೊಂದಿದೆ.
ಮಾರುತಿ ಸುಜುಕಿ ಬ್ರೆಜಾ ಕಾರು 1,492 ಸಿಸಿಯ ಎಂಜಿನ್ ಹೊಂದಿದ್ದು, 3,995 ಮಿಲಿ ಮೀಟರ್ ಉದ್ದವಿದೆ. ಗ್ರೌಂಡ್ ಕ್ಲಿಯರೆನ್ಸ್ 200 ಮಿಲಿ ಮೀಟರ್ನಷ್ಟಿದೆ. ಟಾಟಾ ನೆಕ್ಸಾನ್ 1,497 ಸಿಸಿ ಡೀಸೆಲ್ ಹಾಗೂ, 1,199 ಸಿಸಿ ಪೆಟ್ರೋಲ್ ಎಂಜಿನ್ ಹೊಂದಿದೆ. ಇದು 3,993 ಮೀಟರ್ ಉದ್ದವಿದ್ದು 209 ಮಿಲಿಮೀಟರ್ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿದೆ. ಮಹೀಂದ್ರಾ ಎಕ್ಸ್ಯುವಿ 300 ಕಾರು 1,497 ಸಿಸಿಯ ಡೀಸೆಲ್ ಹಾಗೂ 1,199 ಸಿಸಿಯ ಪೆಟ್ರೋಲ್ ಎಂಜಿನ್ ಹೊಂದಿದೆ. ಇದು 180 ಮಿಲಿ ಮೀಟರ್ ಗ್ರೌಂಡ್ ಕ್ಲಿಯರೆನ್ಸ್ ಹೊಂದಿದ್ದು 3,995 ಮಿಲಿ ಮೀಟರ್ ಉದ್ದವಿದೆ.
ಇನ್ನೂ ಇಲ್ಲ ಸ್ಪಷ್ಟತೆ
48ನೇ ಜಿಎಸ್ಟಿ ಕೌನ್ಸಿಲ್ ಸಭೆಯಲ್ಲಿ ಈ ಬಗ್ಗೆ ಸೂಚನೆ ಸಿಕ್ಕಿರುವ ಹೊರತಾಗಿಯೂ ಸ್ಪಷ್ಟತೆ ಇಲ್ಲ. ಈ ಮೇಲಿನ ಕಾರುಗಳು ಹೊಸ ನಿಯಮಗಳಿಗೆ ಹತ್ತಿರ ಇದೆ. ಆದಾಗ್ಯೂ ಗ್ರೌಂಡ್ ಕ್ಲಿಯರೆನ್ಸ್ ವಿಚಾರಕ್ಕೆ ಬಂದಾಗ ಸ್ಲಪ ಅಧಿಕವಾಗಿದೆ. ಕೌನ್ಸಿಲ್ ಈ ಬಗ್ಗೆ ಸ್ಪಷ್ಟತೆ ಕೊಟ್ಟ ಬಳಿಕ ದರಪಟ್ಟಿಯನ್ನು ಕಂಪನಿಗಳು ನಿಗದಿ ಮಾಡಬಹುದು.
ಇದನ್ನೂ ಓದಿ | EV Bike | ಶೀಘ್ರ ರಸ್ತೆಗೆ ಪ್ಯೂರ್ ಇವಿ ಕಂಪನಿಯ ಇಕೊಡ್ರಿಫ್ಟ್ ಎಲೆಕ್ಟ್ರಿಕ್ ಬೈಕ್