ನವ ದೆಹಲಿ: ಭಾರತೀಯ ಸೇನೆ ಖರೀದಿಸಲು ಬಯಸುವ ವಾಹನಗಳು ಹೆಚ್ಚು ಗಟ್ಟಿಮುಟ್ಟಾಗಿರಬೇಕು ಹಾಗೂ ಎಂಥದ್ದೇ ಪರಿಸ್ಥಿತಿಯಲ್ಲಿ ಕಾರ್ಯನಿರ್ವಹಿಸಲು ಸೂಕ್ತವಾಗಿರಬೇಕಾಗುತ್ತದೆ. ಟಾಟಾ ಸಫಾರಿ, ಮಾರುತಿ ಸುಜುಕಿ ಜಿಪ್ಸಿ, ಫೋರ್ಸ್ ಗೂರ್ಕಾ, ಟಾಟಾ ಕ್ಸೆನಾನ್ನಂಥ ವಾಹನಗಳು ಸೇನೆಯಲ್ಲಿವೆ. ಅದಕ್ಕೀಗ ಹೊಸ ಸೇರ್ಪಡೆ ಮಹೀಂದ್ರಾ ಸ್ಕಾರ್ಪಿಯೊ ಕ್ಲಾಸಿಕ್. ಸೇನೆಯಿಂದ ತಮಗೆ 1,740 ಕಾರುಗಳಿಗೆ ಬೇಡಿಕೆ ಬಂದಿದೆ ಎಂಬುದಾಗಿ ಕಂಪನಿಯು ಮಾಹಿತಿ ನೀಡಿದೆ.
ಸೇನೆಗೆ ಕೊಡುವ ಕಾರುಗಳಲ್ಲಿ ಯಾವೆಲ್ಲ ಫೀಚರ್ಗಳು ಇರುತ್ತವೆ ಎಂಬುದನ್ನು ಮಹೀಂದ್ರಾ ಕಂಪನಿಯು ಹೇಳಿಲ್ಲ. ಭದ್ರತೆಯ ದೃಷ್ಟಿಯಿಂದ ಈ ರೀತಿ ಮಾಡಲಾಗುತ್ತಿದೆ ಎಂದು ಕಂಪನಿ ಹೇಳಿದೆ. ಆದರೆ, ಗ್ರಾಹಕರ ಮೆಚ್ಚುಗೆ ಗಳಿಸಿರುವ ಮಹೀಂದ್ರಾ ಸ್ಕಾರ್ಪಿಯೊ 2.2 ಲೀಟರ್ ಎಂಜಿನ್ ಹೊಂದಿದ್ದು, 130 ಬಿಎಚ್ಪಿ ಪವರ್ ಹಾಗೂ 300 ಎನ್ಎಮ್ ಟಾರ್ಕ್ಯೂ ಬಿಡುಗಡೆ ಮಾಡುತ್ತದೆ. ಇದರಲ್ಲಿ ಆಟೋಮ್ಯಾಟಿಕ್ ಗೇರ್ಬಾಕ್ಸ್ಗಳ ಆಯ್ಕೆಯಿಲ್ಲ. ಇದರ ಕೆಲವು ಆಯ್ದ ವೇರಿಯೆಂಟ್ಗಳಲ್ಲಿ 4×4 ಡ್ರೈವ್ ಆಯ್ಕೆಯೂ ಇದೆ.
ಸ್ಕಾರ್ಪಿಯೊ ಹಾಗೂ ಬೊಲೆರೊ ಮಹೀಂದ್ರಾ ಕಂಪನಿ ಆರಂಭದಿಂದಲೂ ಬೇಡಿಕೆ ಉಳಿಸಿಕೊಂಡು ಬಂದಿರುವ ಎಸ್ಯುವಿಗಳಾಗಿವೆ. ದಕ್ಷಿಣ ಆಫ್ರಿಕಾ, ಭೂತಾನ್, ನೇಪಾಳಕ್ಕೆ ಸ್ಕಾರ್ಪಿಯೊ ಕಾರುಗಳನ್ನು ರಫ್ತು ಮಾಡಲಾಗಿದೆ. ಅದೇ ರೀತಿ ಇತ್ತೀಚೆಗೆ ಶ್ರೀಲಂಕಾದ ಪೊಲೀಸ್ ಇಲಾಖೆಗೂ 175 ಸ್ಕಾರ್ಪಿಯೊಗಳನ್ನು ತಯಾರಿಸಿಕೊಟ್ಟಿತ್ತು.
ಇದನ್ನೂ ಓದಿ | Mahindra Thar 4×2 | ಹೊಸ ಮಹೀಂದ್ರಾ ಥಾರ್ನ ಬೆಲೆ ಎಷ್ಟು ಗೊತ್ತಾ? ಏನಿದು 4X2?