ಹತ್ತು ಸಾವಿರ ಬುಕಿಂಗ್​ ದಾಖಲಿಸಿದ Mahindra XUV 400; ಡೆಲಿವರಿ ಯಾವಾಗ ಆರಂಭ?

ಬೆಂಗಳೂರು : ಮಹೀಂದ್ರಾ ಆ್ಯಂಡ್​ ಮಹೀಂದ್ರಾ ಕಂಪನಿಯು ಜನವರಿ ತಿಂಗಳ ಆರಂಭದಲ್ಲಿ ಬಿಡುಗಡೆ ಮಾಡಿರುವ ಎಲೆಕ್ಟ್ರಿಕ್​ ಎಸ್​ಯುವಿ Mahindra XUV 400 ಕಾರಿನ ಬುಕಿಂಗ್​ ಆರಂಭಗೊಂಡ ಐದನೇ ದಿನದಲ್ಲಿ 10 ಸಾವಿರಕ್ಕಿಂತಲೂ ಅಧಿಕ ಗ್ರಾಹಕರಿಂದ ಬೇಡಿಕೆ ಪಡೆದುಕೊಂಡಿದೆ. ಈ ಮೂಲಕ ಭಾರತದ ಇವಿ ಕಾರುಗಳ ಕ್ಷೇತ್ರದಲ್ಲಿ ಹೊಸ ಮೈಲುಗಲ್ಲು ಸ್ಥಾಪಿಸಿದೆ. ಸೋಮವಾರ (ಜನವರಿ 30ರಂದು) ಕಂಪನಿಯು ಒಟ್ಟು ಬುಕಿಂಗ್​ ಕುರಿತು ಮಾಹಿತಿ ನೀಡಿದ್ದು, ಏಳು ತಿಂಗಳ ಬಳಿಕ ಡೆಲಿವರಿ ಆರಂಭಿಸುವುದಾಗಿ ಭರವಸೆ ನೀಡಿದೆ.

Mahindra XUV 400 ಕಾರಿಗೆ ಜನವರಿ 26ರಂದು ಬುಕಿಂಗ್ ಆರಂಭಗೊಂಡಿತ್ತು. ಮೊದಲ ದಿನದಂದಲೇ ಕಾರಿಗೆ ಮಿತಿಮೀರಿ ಬೇಡಿಕೆ ವ್ಯಕ್ತಗೊಂಡಿವೆ. ಈ ಮೂಲಕ ಎಕ್ಸ್​ಯುವಿ ಸೆಗ್ಮೆಂಟ್​ನಲ್ಲಿ ಮತ್ತೊಂದು ಯಶಸ್ಸು ಸಾಧಿಸಿದೆ. ಈ ಕಾರಿನ ಆರಂಭಿಕ ಬೆಲೆ 16 ಲಕ್ಷ ರೂಪಾಯಿಗಳಾಗಿದ್ದು ಟಾಪ್ ವೇರಿಯೆಂಟ್​ನ ಎಕ್ಸ್​ಶೋರೂಮ್​ ಬೆಲೆ 19 ಲಕ್ಷ ರೂಪಾಯಿಗಳು. ಮೊದಲ 5000 ಕಾರುಗಳಿಗೆ ಮಾತ್ರ ಈ ಬೆಲೆ ಅನ್ವಯ ಎಂದು ಕಂಪನಿ ಮೊದಲೇ ಹೇಳಿದೆ. ಜತೆಗೆ ಈ ವರ್ಷಾಂತ್ಯಕ್ಕೆ 20 ಸಾವಿರ Mahindra XUV 400 ಕಾರುಗಳನ್ನು ಉತ್ಪಾದಿಸಿ ಗ್ರಾಹಕರಿಗೆ ತಲುಪಿಸುವುದಾಗಿ ತಿಳಿಸಿದೆ.

ಟಾಟಾ ಮೋಟಾರ್ಸ್​ನ ನೆಕ್ಸಾನ್ ಇವಿಗೆ ಪೈಪೋಟಿ ನೀಡುವ ಉದ್ದೇಶದಿಂದ Mahindra XUV 400 ಎಲೆಕ್ಟ್ರಿಕ್​ ಕಾರನ್ನು ಮಹೀಂದ್ರಾ ಕಂಪನಿ ಮಾರುಕಟ್ಟೆಗೆ ಇಳಿಸಿದೆ. ಎರಡು ವೇರಿಯೆಂಟ್​ ಹಾಗೂ ಐದು ಬಣ್ಣಗಳಲ್ಲಿ Mahindra XUV 400 ಲಭ್ಯವಿದ್ದು, ಎರಡು ರೀತಿಯ ಬ್ಯಾಟರಿ ಆಯ್ಕೆಗಳನ್ನು ನೀಡಿದೆ. Mahindra XUV 400 ಪ್ರವೇಶದಿಂದಾಗಿ ಭಾರತದ ಎಲೆಕ್ಟ್ರಿಕ್​ ಕಾರು ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿದೆ. ಇದುವರೆಗೆ ಅಗ್ಗದ ಬೆಲೆಗೆ ದೊರೆಯುವ ಎಲೆಕ್ಟ್ರಿಕ್​ ಎಸ್​ಯುವಿ ಎಂದೇ ಕರೆಯಲಾಗುತ್ತಿದ್ದ ನೆಕ್ಸಾನ್​ನ ಓಟಕ್ಕೆ ಸ್ವಲ್ಪ ಅಡಚಣೆಯಾಗುವ ಸಾಧ್ಯತೆಗಳಿವೆ.

ಇದನ್ನೂ ಓದಿ | Mahindra & Mahindra | ಪುಣೆಯಲ್ಲಿ ಹೊಸ ಇವಿ ಕಾರು ಉತ್ಪಾದನಾ ಘಟಕ ಸ್ಥಾಪಿಸಲಿದೆ ಮಹೀಂದ್ರಾ

ಕಡಿಮೆ ಬೆಲೆಗೆ Mahindra XUV 400 ಕಾರಿನಲ್ಲಿ 34.5 ಕಿಲೋ ವ್ಯಾಟ್​ನ ಬ್ಯಾಟರಿ ಬಳಸಲಾಗಿದ್ದು, ಒಂದು ಬಾರಿ ಚಾರ್ಜ್​ ಮಾಡಿದರೆ 375 ಕಿಲೋ ಮೀಟರ್​ ದೂರಕ್ಕೆ ಸಾಗುತ್ತದೆ. ಟಾಪ್​ ಎಂಡ್​ ಕಾರಿನಲ್ಲಿ 39.4 ಕಿಲೋ ವ್ಯಾಟ್​ನ ಬ್ಯಾಟರಿ ಬಳಸಲಾಗಿದ್ದು, ಒಂದು ಬಾರಿ ಪೂರ್ತಿ ಚಾರ್ಜ್ ಮಾಡಿದರೆ 450 ಕಿಲೋ ಮೀಟರ್​ ದೂರ ಪ್ರಯಾಣ ಮಾಡಬಹುದು. ಈ ಕಾರು 8.3 ಸೆಕೆಂಡ್​ಗಳಲ್ಲಿ ಸೊನ್ನೆಯಿಂದ 100 ಕಿಲೋ ಮೀಟರ್​ ವೇಗ ಪಡೆಯುವ ಸಾಮರ್ಥ್ಯ ಹೊಂದಿದೆ. ಅದೇ ರೀತಿ ಇದರ ಗರಿಷ್ಠ ವೇಗ 150 ಕಿಲೋ ಮೀಟರ್​.

Mahindra XUV 400 ಕಾರಿನಲ್ಲಿ ಅತ್ಯಾಧುನಿಕ ಸೇಫ್ಟಿ ಫೀಚರ್​ಗಳನ್ನು ನೀಡಲಾಗಿದೆ. ಜತೆಗೆ ಇಂಟೀರಿಯರ್​ ಹಾಗೂ ಎಕ್ಸ್​ಟೀರಿಯರ್​ ಇವಿ ಲುಕ್​ಗೆ ಪೂರಕವಾಗಿ ತಯಾರಿಸಲಾಗಿದೆ.