ನವ ದೆಹಲಿ : ಬ್ಯಾಟರಿ ಚಾಲಿತ ವಾಹನಗಳಿಗೆ ದಿನದಿಂದ ದಿನಕ್ಕೆ ಮಾರುಕಟ್ಟೆ ಹೆಚ್ಚಾಗುತ್ತಿದೆ. ಕಂಪನಿಗಳು ಕೂಡ ಅದಕ್ಕೆ ಪೂರಕವಾಗಿ ಹೊಸ ಹೊಸ ಮಾಡೆಲ್ಗಳನ್ನು ಬಿಡುಗಡೆ ಮಾಡುತ್ತಿವೆ. ಇದುವರೆಗೆ ಎಲೆಕ್ಟ್ರಿಕ್ ಕಾರುಗಳ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳದಿದ್ದ ಮಾರುತಿ ಕೂಡ ಆ ನಿಟ್ಟಿನಲ್ಲಿ ಪೈಪೋಟಿ ಒಡ್ಡಲು ಶುರು ಮಾಡಿದೆ. ಈ ಯೋಜನೆಯ ಭಾಗವಾಗಿ ಗ್ರೇಟರ್ ನೊಯ್ಡಾದಲ್ಲಿ ನಡೆಯುತ್ತಿರುವ ಆಟೋ ಎಕ್ಸ್ಪೊದಲ್ಲಿ (Auto Expo 2023) ಕಾನ್ಸೆಪ್ಟ್ ಎಸ್ಯುವಿ ಇವಿಎಕ್ಸ್ ಎಲೆಕ್ಟ್ರಿಕ್ ಕಾರನ್ನು ಬಿಡುಗಡೆ ಮಾಡಿದೆ. ಇದು 2025ರಲ್ಲಿ ಗ್ರಾಹಕರ ಮನೆ ಸೇರಲಿದೆ.
ಕಾನ್ಸೆಪ್ಟ್ ಕಾರಿಗೆ ಇವಿಎಕ್ಸ್ ಎಂದು ಕರೆಯಲಾಗಿದ್ದು, ಕಂಪನಿಯ ಬ್ಯಾಟರಿ ಚಾಲಿತ ಮೊದಲ ಎಸ್ಯುವಿಯಾಗಿದೆ. ಇದು 2025ರಲ್ಲಿ ಭಾರತದ ರಸ್ತೆಗೆ ಇಳಿಯಲಿದೆ ಎಂದು ಕಂಪನಿಯ ಮೂಲಗಳು ತಿಳಿಸಿವೆ.
ಮಾರುತಿ ಸುಜುಕಿ ಬ್ಯಾಟರಿ ಚಾಲಿತ ಕಾರುಗಳು ಉತ್ಪಾದನೆಗೆ 100 ಶತಕೋಟಿ ರೂಪಾಯಿ ಹೂಡಿಕೆ ಮಾಡಲಿದ್ದು, ಅದರಲ್ಲಿ ಇವಿಎಕ್ಸ್ ಎಸ್ಯುವಿ ಕೂಡ ಸೇರಿಕೊಂಡಿದೆ. ಬುಧವಾರ ಪ್ರದರ್ಶನಗೊಂಡ ಈ ಮಾಡೆಲ್ನ ಕಾರಿನಲ್ಲಿ 60ಕಿಲೋ ವ್ಯಾಟ್ನ ಬ್ಯಾಟರಿ ಇರಲಿದ್ದು, ಒಂದು ಬಾರಿ ಚಾರ್ಜ್ ಮಾಡಿದರೆ 550 ಕಿಲೋ ಮೀಟರ್ ಕ್ರಮಿಸುತ್ತದೆ ಎಂದು ಹೇಳಲಾಗಿದೆ.
ಇವಿಎಕ್ಸ್ ಕಾಂಪಾಕ್ಟ್ ಎಸ್ಯುವಿಯಾಗಿದ್ದು, ನಗರದ ಪ್ರಯಾಣ ಹಾಗೂ ಗ್ರಾಮಾಂತರ ಪ್ರದೇಶಕ್ಕೂ ಸೂಕ್ತವಾಗಿದೆ. ಇದರಲ್ಲಿ 4×4 ಸಾಮರ್ಥ್ಯವೂ ಇರಲಿದೆ. ಬಲೆನೊ ಕಾರಿನ ವಿನ್ಯಾಸವನ್ನೇ ಆಧರಿಸಿಕೊಂಡು ಇವಿಎಕ್ಸ್ ಅನ್ನು ನಿರ್ಮಿಸಲಾಗಿದೆ. ಜತೆಗೆ ದೊಡ್ಡ ವೀಲ್ ಬೇಸ್, ಕಡಿಮೆ ಓವರ್ಹ್ಯಾಂಗ್ಸ್, ಸಮಾಧಾನಕರ ಗ್ರೌಂಡ್ ಕ್ಲಿಯರೆನ್ಸ್ ಈ ಕಾರಿನ ಪ್ರಮುಖ ಫೀಚರ್ಗಳಾಗಿವೆ.
ಕಾನ್ಸೆಪ್ಟ್ ಕಾರು ಮಾತ್ರವಲ್ಲದೆ ಮಾರುತಿ ಸುಜುಕಿ ಕಂಪನಿಯು ಒಟ್ಟು 16 ವಾಹನಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಗ್ರಾಂಡ್ ವಿಟಾರ, ಎಕ್ಸ್ಎಲ್6, ಎರ್ಟಿಗಾ, ಬ್ರೆಜಾ, ವ್ಯಾಗನ್ಆರ್ ಈ ಪಟ್ಟಿಯಲ್ಲಿವೆ. ಅದೇ ರೀತಿ ಎಥೆನಾಲ್ ಮೂಲಕ ಓಡುವ (ಫ್ಲೆಕ್ಸ್ ಫ್ಯುಯಲ್) ವ್ಯಾಗನ್ ಆರ್ ಕಾರನ್ನೂ ಅನಾವರಣ ಮಾಡಿದೆ.
ಇದನ್ನೂ ಓದಿ | Auto Expo 2023 | ಟಾಟಾ ಹ್ಯಾರಿಯರ್ ಇವಿ ಆಟೋ ಎಕ್ಸ್ಪೊದಲ್ಲಿ ಅನಾವರಣ, 2024ಕ್ಕೆ ಮಾರುಕಟ್ಟೆಗೆ