ನವ ದೆಹಲಿ: ಸೆಲೆಬ್ರಿಟಿಗಳ ಟ್ವಿಟರ್ ಖಾತೆಗೆ ಬ್ಲ್ಯೂಟಿಕ್ (ಹೆಸರಿನ ಎದುರು ನೀಲಿ ಬಣ್ಣದ ಒಂದು ಮಾರ್ಕ್-Twitter Blue Tick) ಇರುವುದು ಸಾಮಾನ್ಯ. ಹೀಗೆ ತಮ್ಮ ಟ್ವಿಟರ್ ಖಾತೆಗೆ ಬ್ಲ್ಯೂಟಿಕ್ ಪಡೆದಿದ್ದ ಭಾರತದ ಹಲವು ಕ್ರಿಕೆಟ್ ಆಟಗಾರರು, ಸಿನಿತಾರೆಯರು, ರಾಜಕೀಯ ನಾಯಕರು ಈಗದನ್ನು ಕಳೆದುಕೊಂಡಿದ್ದಾರೆ. ಅವರಿಗೆ ನೀಡಿದ್ದ ನೀಲಿ ಬಣ್ಣದ ಮಾರ್ಕ್ನ್ನು ಟ್ವಿಟರ್ ಕಂಪನಿಯೇ ತೆಗೆದುಹಾಕಿದೆ. ಎಲಾನ್ ಮಸ್ಕ್ ಸಿಇಒ ಆದ ಮೇಲೆ ಟ್ವಿಟರ್ನಲ್ಲಿ ಹಲವು ಬದಲಾವಣೆಗಳು ಆಗಿವೆ. ಅದರಲ್ಲಿ ಒಂದು ಈ ಬ್ಲ್ಯೂಟಿಕ್ಗಳಿಗೆ ಹಣ ಪಾವತಿ ಮಾಡುವ ವ್ಯವಸ್ಥೆ. ಭಾರತದಲ್ಲಿ ವೆಬ್ ಟ್ವಿಟರ್ ಬಳಕೆದಾರರು ತಿಂಗಳಿಗೆ 650 ರೂಪಾಯಿ ಮತ್ತು ಮೊಬೈಲ್ ಆ್ಯಪ್ ಬಳಕೆದಾರರು ತಿಂಗಳಿಗೆ 900 ರೂಪಾಯಿ ತುಂಬಿ, ಈ ಬ್ಲ್ಯೂಟಿಕ್ ಸೌಲಭ್ಯವನ್ನು ಉಳಿಸಿಕೊಳ್ಳಬೇಕಾಗಿದೆ. ಹಾಗೇ, ಯಾರಾದರೂ ಬ್ಲ್ಯೂಟಿಕ್ ಪಡೆಯಬೇಕು ಎಂದರೂ ವರ್ಷಕ್ಕೆ/ತಿಂಗಳಿಗೆ ಎಂದು ಇಂತಿಷ್ಟು ಹಣ ಪಾವತಿಸಿ, ಚಂದಾದಾರರು ಆಗಬೇಕು.
ಟ್ವಿಟರ್ ಹೊಸದಾಗಿ ಪರಿಚಯಿಸಿದ ಈ ಹಣ ಪಾವತಿ ವ್ಯವಸ್ಥೆ ನಿಯಮವನ್ನು ಪಾಲಿಸದ ಕಾರಣ ಭಾರತದಲ್ಲಿ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್, ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ, ಕರ್ನಾಟಕ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ, ಪ್ರಿಯಾಂಕಾ ಗಾಂಧಿ ಸೇರಿ ಇನ್ನೂ ಹಲವು ರಾಜಕೀಯ ನಾಯಕರ, ಸಿನಿಮಾ ತಾರೆಯರಾದ ಶಾರುಖ್ ಖಾನ್, ಅಮಿತಾಭ್ ಬಚ್ಚನ್, ಅಲಿಯಾ ಭಟ್, ಕ್ರಿಕೆಟಿಗರಾದ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಮಹೇಂದ್ರ ಸಿಂಗ್ ಧೋನಿ, ಸಚಿನ್ ತೆಂಡೂಲ್ಕರ್ ಸೇರಿ ಅನೇಕಾನೇಕರ ಟ್ವಿಟರ್ ಅಕೌಂಟ್ಗಿದ್ದ ವೆರಿಫಿಕೇಶನ್ ಮಾರ್ಕ್ ಆದ ಬ್ಲ್ಯೂಟಿಕ್ನ್ನು ತೆಗೆದುಹಾಕಲಾಗಿದೆ. ಭಾರತದಲ್ಲಿ ಅಷ್ಟೇ ಅಲ್ಲ, ವಿಶ್ವದ ವಿವಿಧ ದೇಶಗಳ ಇನ್ನೂ ಹಲವು ಗಣ್ಯರ ಟ್ವಿಟರ್ ಅಕೌಂಟ್ ಕೂಡ ಬ್ಲ್ಯೂಟಿಕ್ನ್ನು ಕಳೆದುಕೊಂಡಿದೆ.
ಸಾಮಾನ್ಯವಾಗಿ ಯಾವುದೇ ಕ್ಷೇತ್ರದ ಗಣ್ಯರ ಹೆಸರಲ್ಲಿ ವಿವಿಧ ನಕಲಿ ಅಕೌಂಟ್ಗಳು, ಅವರ ಅಭಿಮಾನಿಗಳು ಸೃಷ್ಟಿಸುವ ಟ್ವಿಟರ್ ಅಕೌಂಟ್ಗಳು ಜಾಸ್ತಿ ಇರುತ್ತವೆ. ಹೀಗಾಗಿ ನಿರ್ದಿಷ್ಟ ಆ ಗಣ್ಯರ ಅಧಿಕೃತ ಖಾತೆಗೆ ಬ್ಲ್ಯೂಟಿಕ್ ನೀಡುವ ಮೂಲಕ ಅಥಂಟಿಕೇಶನ್ ಮಾಡಲಾಗುತ್ತಿತ್ತು. ಯಾರ ಅಕೌಂಟ್ಗೆ ಈ ಬ್ಲ್ಯೂಟಿಕ್ ಇರುತ್ತದೆಯೋ ಅದು ಅವರ ನಿಜವಾದ ಟ್ವಿಟರ್ ಅಕೌಂಟ್ ಎಂಬುದು ಖಾತರಿ ಆಗುತ್ತಿತ್ತು. ಎಲಾನ್ ಮಸ್ಕ್ ಅವರು ಟ್ವಿಟರ್ ಖರೀದಿ ಮಾಡುವುದಕ್ಕೂ ಮೊದಲು ಈ ನೀಲಿ ಟಿಕ್ ಪಡೆಯಲು ಅನುಸರಿಸಬೇಕಾದ ನಿಯಮಗಳು ಬೇರೆ ಇದ್ದವು. ಆದರೆ ಎಲಾನ್ ಮಸ್ಕ್ ಸಿಇಒ ಆದ ಬಳಿಕ ಕ್ರಮಗಳು ಬದಲಾಗಿವೆ. ನೀಲಿಟಿಕ್ ಪಡೆಯಲು ಚಂದಾದಾರಿಕೆ ಪಡೆಯುವುದನ್ನು ಅವರು ಕಡ್ಡಾಯ ಮಾಡಿದ್ದಾರೆ. ಹೀಗೆ ಹೊಸ ನಿಯಮದ ಪ್ರಕಾರ ಯಾರೆಲ್ಲ ಇನ್ನೂ ಹಣ ತುಂಬಿಲ್ಲವೋ, ಅವರ ಟ್ವಿಟರ್ ಅಕೌಂಟ್ನ ಬ್ಲ್ಯೂಟಿಕ್ ತೆಗೆದುಹಾಕಲಾಗಿದೆ.
ಇದನ್ನೂ ಓದಿ: Twitter: ಇನ್ನು ಟ್ವಿಟರ್‌ನಿಂದಲೂ ಬಳಕೆದಾರರು ಹಣ ಗಳಿಸಬಹುದು! ಎಲಾನ್ ಮಸ್ಕ್ ಹೇಳಿದ್ದೇನು?