ಬೆಂಗಳೂರು: ಟೊಯೋಟಾ ಕಿರ್ಲೋಸ್ಕರ್ ಮೋಟಾಸ್ ಕಂಪನಿಯು ತನ್ನ ಅರ್ಬನ್ ಕ್ರೂಸರ್ ಹೈರಡರ್ ಹೈಬ್ರಿಡ್ (Toyota Urban Cruiser Hyryder) ಕಾರಿನ ಬೆಲೆಯನ್ನು ಏಕಾಏಕಿ 50 ಸಾವಿರ ರೂಪಾಯಿ ಏರಿಕೆ ಮಾಡಿದೆ. ಈ ಎಸ್ಯುವಿ ಕಾರು 2022ರ ಸೆಪ್ಟೆಂಬರ್ನಲ್ಲಿ ಮಾರುಕಟ್ಟೆಗೆ ಇಳಿದಿತ್ತು. ಆ ವೇಳೆ ನಿಗದಿ ಮಾಡಲಾಗಿದ್ದ ಬೆಲೆಯ ಆಫರ್ ಕೊನೆಗೊಂಡಿದ್ದು ಇದೀಗ ಪರಿಷ್ಕೃತ ದರವನ್ನು ಪ್ರಕಟಗೊಳಿಸಿದೆ. ಈ ವೇಳೆ 50 ಸಾವಿರ ರೂಪಾಯಿ ಏರಿಕೆ ಮಾಡಲಾಗಿದೆ. ಪ್ರಸ್ತುತ ಹೈರೈಡರ್ ಹೈಬ್ರಿಡ್ ಕಾರಿನ 15.61 ಲಕ್ಷ ರೂಪಾಯಿಯಿಂದ 19.49 ಲಕ್ಷ ರೂಪಾಯಿ ತನಕವಿದೆ.
ಅರ್ಬನ್ ಕ್ರೂಸರ್ ಹೈರೈಡರ್ ಕಾರಿಗೆ ಈ ಹಿಂದೆ 15.11 ಲಕ್ಷ ರೂಪಾಯಿಂದ ಆರಂಭಗೊಂಡು 18.99 ಲಕ್ಷ ರೂಪಾಯಿ ನಿಗದಿ ಮಾಡಲಾಗಿತ್ತು. ಈ ಕಾರಿನ ಸ್ಟ್ರಾಂಗ್ ಹೈಬ್ರಿಡ್ ಎಸ್, ಜಿ ಮತ್ತು ವಿ ಎಂಬ ಮೂರು ವೇರಿಯೆಂಟ್ಗಳಲ್ಲಿ ಲಭ್ಯವಿತ್ತು. ಇದರಲ್ಲಿ 1.5 ಲೀಟರ್ ಸಾಮರ್ಥ್ಯದ ಅಟ್ಕಿನ್ಸನ್ ಸೈಕಲ್ ಎಂಜಿನ್ ಇದ್ದು, ಪೆಟ್ರೋಲ್ ಎಂಜಿನ್ 91 ಬಿಎಚ್ಪಿ ಪವರ್ ಹಾಗೂ 112 ಟಾರ್ಕ್ ಬಿಡುಗಡೆ ಮಾಡಿದರೆ, ಎಲೆಕ್ಟ್ರಿಕ್ ಮೋಟಾರ್ 79 ಬಿಎಚ್ಪಿ ಪವರ್ ಹಾಗೂ 141 ಎನ್ಎಮ್ ಟಾರ್ಕ್ ಬಿಡುಗಡೆ ಮಾಡುತ್ತದೆ. ಒಟ್ಟಾರೆ 112 ಬಿಎಚ್ಪಿ ಪವರ್ ಸೃಜಿಸುತ್ತದೆ.
ಸ್ಟ್ರಾಂಗ್ ಹೈಬ್ರಿಡ್ ಕಾರಿನಲ್ಲಿ 0.76 ಕಿಲೋ ವ್ಯಾಟ್ನ ಲೀಥಿಯಮ್ ಬ್ಯಾಟರಿಯಿದ್ದು, ಇದರ ನೆರವಿನಿಂದ ಒಂದು ಲೀಟರ್ ಪೆಟ್ರೋಲ್ಗೆ 29.97 ಕಿಲೋ ಮೀಟರ್ ಮೈಲೇಜ್ ಪಡೆಯಲು ಸಾಧ್ಯವಾಗುತ್ತಿತ್ತು. ಮೈಲ್ಡ್ ಹೈಬ್ರಿಡ್ ಎಸ್ಯುವಿ 20.58ರಿಂದ 21.12 ಕಿಲೋ ಮೀಟರ್ ಮೈಲೇಜ್ ಪಡೆಯಲು ಸಾಧ್ಯವಾಗುತ್ತಿತ್ತು. ಇದೇ ವೇಳೆ ಹೈರೈಡರ್ನಲ್ಲಿ ಸಿಎನ್ಜಿ ಅಯ್ಕೆಯನ್ನೂ ತರಲಾಗಿದ್ದು ಇದು 26.6 ಕಿಲೋ ಮೀಟರ್ ಮೈಲೇಜ್ ನೀಡುತ್ತದೆ.
ಇದನ್ನೂ ಓದಿ : Xiaomi Car | ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಗೆ ಇಳಿಸಲಿದೆ ಜನಪ್ರಿಯ ಸ್ಮಾರ್ಟ್ಫೋನ್ ಬ್ರಾಂಡ್ ರೆಡ್ಮಿ!
ಟೊಯೊಟಾ ಹೈರೈಡರ್ ಕಾರು ಟೊಯೋಟಾದ ಹೆಚ್ಚು ಬೇಡಿಕೆಯ ಎಸ್ಯುವಿಯಾಗಿದ್ದು, ತಿಂಗಳಿಗೆ 4000 ಕಾರುಗಳನ್ನು ಮಾರಾಟ ಮಾಡಲಾಗುತ್ತಿದೆ. ಅದೇ ರೀತಿ ಕಾರಿನ ಕಾಯ್ದಿರಿಸುವಿಕೆ ಅವಧಿ 36 ತಿಂಗಳ ತನಕ ಮುಂದುವರಿದಿದ್ದು, ಇದು ಬೇಡಿಕೆಯ ಹೆಚ್ಚಳಕ್ಕೆ ಉದಾಹರಣೆಯಾಗಿದೆ.