ಗೋವು ಅಷ್ಟು ಬೇಗ ಕೆರಳುವುದಿಲ್ಲ. ಮನುಷ್ಯರ ಮೇಲೆ ಗೂಳಿ ದಾಳಿ ಮಾಡುವುದು ಸಾಮಾನ್ಯ ಆದರೆ ಹಸು ದಾಳಿ ಅದರಲ್ಲೂ ವ್ಯಘ್ಯವಾಗಿ ದಾಳಿ ಮಾಡುವುದು ತೀರ ಅಪರೂಪ. ಆದರೆ ಇಲ್ಲೊಂದು ಹಸು, ತನಗೆ ತೊಂದರೆ ಕೊಟ್ಟವನ ನೀರಿಳಿಸಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ನೋಡಿದ ಜನ, ‘ಆ ವ್ಯಕ್ತಿಗೆ ತಕ್ಕ ಶಾಸ್ತಿ’ ಆಯಿತು ಎಂದಿದ್ದಾರೆ.
ಅಲ್ಲೊಂದು ದೊಡ್ಡದಾದ ಕಲ್ಲಿನ ಗೋಡೆ ಬಳಿ ಹಸುವೊಂದು ನಿಂತಿದೆ. ಆ ಹಸುವಿನ ನಾಲ್ಕೂ ಕಾಲುಗಳಿಗೆ ಹಗ್ಗ ಕಟ್ಟಿ, ಅದನ್ನು ಒಬ್ಬ ವ್ಯಕ್ತಿ ಹಿಡಿದುಕೊಂಡಿದ್ದಾನೆ. ಆತ ದಾರ್ಷ್ಟ್ಯದಿಂದ ತನ್ನ ಚಪ್ಪಲಿ ಇರುವ ಕಾಲಿನಿಂದ ಹಸುವಿನ ಹೊಟ್ಟೆಗೆ ಒದ್ದು, ಅದರ ಬಾಲವನ್ನು ಸುರುಳಿ ಸುತ್ತಿ ಕೈಯಲ್ಲಿ ಹಿಡಿದುಕೊಳ್ಳುತ್ತಾನೆ. ಆ ಹಸು ಅಲ್ಲಿಂದ ಸ್ವಲ್ಪ ಮುಂದೆ ಹೋಗುತ್ತದೆ. ಕೂಡಲೇ ತಿರುಗಿ ಅವನ ಮೇಲೆ ದಾಳಿ ಮಾಡುತ್ತದೆ. ಆ ವ್ಯಕ್ತಿಯನ್ನು ನೆಲಕ್ಕೆ ಕೆಡವಿ, ಅವನಿಗೆ ತನ್ನ ಕೊಂಬಿನಲ್ಲಿ ಹಾಯ್ದಿದ್ದಲ್ಲದೆ ನೆಲಕ್ಕೆ ಬಿದ್ದ ಅವನನ್ನು ಸರಿಯಾಗಿ ತುಳಿದುಹಾಕಿದೆ. @gharkekalesh ಎಂಬ ಟ್ವಿಟರ್ ಅಕೌಂಟ್ನಲ್ಲಿ ಶೇರ್ ಆದ ವಿಡಿಯೊ 74,000 ವೀವ್ಸ್ ಪಡೆದುಕೊಂಡಿದ್ದರೆ, 3400ಕ್ಕೂ ಹೆಚ್ಚು ಜನ ಲೈಕ್ಸ್ ಮಾಡಿದ್ದಾರೆ.
ಹಸು ಪ್ರಾರಂಭದಲ್ಲಿ ಶಾಂತವಾಗಿಯೇ ಇತ್ತು. ಯಾವಾಗ ಆ ವ್ಯಕ್ತಿ ಅದರ ಬಾಲವನ್ನು ಗಟ್ಟಿಯಾಗಿ ಹಿಡಿದು, ಸುರುಳಿ ಸುತ್ತಿದನೋ, ಆಗ ಅದು ಕ್ರೋಧಗೊಂಡಿದೆ. ನೆಟ್ಟಿಗರಂತೂ ಸಖತ್ ಖುಷಿಪಟ್ಟಿದ್ದಾರೆ. ಅವನ ಯೋಗ್ಯತೆಗೆ ತಕ್ಕ ಪಾಠ ಕಲಿತ. ಹಸು ಮಾಡಿದ ಕೆಲಸದಿಂದ ನಮಗೆ ಸಂತೋಷವಾಯಿತು, ತೃಪ್ತಿಯಾಯಿತು ಎಂದೇ ಅನೇಕರು ಕಮೆಂಟ್ ಮಾಡಿದ್ದಾರೆ.