ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಇನ್‌ಸ್ಟಾಗ್ರಾಂನಲ್ಲಿ ವೈರಲ್‌ (Viral Video) ಆಗಬೇಕು ಎನ್ನುವುದು ಅನೇಕರ ಕನಸಾಗಿಬಿಟ್ಟಿದೆ. ಅದಕ್ಕೆಂದು ನಾನಾ ಸರ್ಕಸ್‌ಗಳನ್ನೂ ಮಾಡಿಬಿಡುತ್ತಾರೆ. ಅದೇ ರೀತಿ ಇಲ್ಲೊಬ್ಬ ವ್ಯಕ್ತಿ ರೀಲ್ಸ್‌ ಮಾಡುತ್ತಿದ್ದಾನೆ. ಕಾಲನ್ನು ನಾಯಿ ಕಚ್ಚಿ ಎಳೆಯುತ್ತಿದ್ದರೂ ಲೆಕ್ಕಿಸದೆ ರೀಲ್ಸ್‌ ಮಾಡಿರುವ ಈ ವ್ಯಕ್ತಿಯ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡಿದ್ದು, ಭಾರೀ ಸುದ್ದಿಯಲ್ಲಿದೆ.
ರೆನಾಲ್ಡೊ ಸೋರೆಸ್ ಹೆಸರಿನ ವ್ಯಕ್ತಿ ಇನ್‌ಸ್ಟಾಗ್ರಾಂನಲ್ಲಿ ಇಂಥದ್ದೊಂದು ವಿಡಿಯೊ ಹಂಚಿಕೊಂಡಿದ್ದಾನೆ. ಅದರಲ್ಲಿ ಅವನು ಮ್ಯೂಸಿಕ್‌ ಒಂದಕ್ಕೆ ಹೆಜ್ಜೆ ಹಾಕಿದ್ದಾನೆ. ಚಪ್ಪಾಳೆ ಹೊಡೆಯುವ ಸ್ಟೆಪ್‌ ಇರುವ ಆ ನೃತ್ಯ ಮಾಡುವಾಗ ಅಲ್ಲೇ ಇದ್ದ ನಾಯಿಯೊಂದು ಆತನ ಬಲಗಾಲನ್ನು ಹಿಡಿದುಕೊಂಡು ಬಲವಾಗಿ ಕಚ್ಚಿದೆ. ಆತ ನೃತ್ಯ ಮಾಡುತ್ತಾ ಅದೆಷ್ಟೇ ಮುಂದೆ ಹೋದರೂ ಬಿಡದ ನಾಯಿ ಕಾಲನ್ನು ಕಚ್ಚುತ್ತಾ ಆತನ ಜತೆಯಲ್ಲೇ ಬಂದಿದೆ. ಆತನ ರೀಲ್‌ ಮುಗಿದರೂ ನಾಯಿ ಮಾತ್ರ ಕಚ್ಚುವುದನ್ನು ಬಿಟ್ಟಿಲ್ಲ.
ಇದನ್ನೂ ಓದಿ: Viral Video: ರೀಲ್ಸ್‌ ಮಾಡಲು ನವಿಲು ಹಿಡಿದು, ಎಲ್ಲ ಗರಿ ಕಿತ್ತು ಕ್ರೌರ್ಯ ಮೆರೆದ ವ್ಯಕ್ತಿ; ಇಲ್ಲಿದೆ ವಿಡಿಯೊ
ಈ ರೀಲ್‌ನಲ್ಲಿ ಜನರು ರೆನಾಲ್ಡೊ ಅನ್ನು ನೋಡುವುದಕ್ಕಿಂತ ಹೆಚ್ಚಾಗಿ ನಾಯಿಯನ್ನೇ ನೋಡಿದ್ದಾರೆ. ನಾಯಿ ಅಷ್ಟು ಜೋರಾಗಿ ಕಚ್ಚುತ್ತಿದ್ದರೂ ಲೆಕ್ಕಿಸದೆ ನೃತ್ಯ ಮಾಡುತ್ತಿರುವ ನಿಮಗೆ ಏನೆಂದು ಹೇಳಬೇಕು ಎಂದು ಅನೇಕರು ಪ್ರಶ್ನಿಸಲಾರಂಭಿಸಿದ್ದಾರೆ. “ಈ ರೀತಿ ಮಾಡುವುದನ್ನು ಹುಚ್ಚು ಅನ್ನುತ್ತಾರೆ” ಎಂದು ಕೆಲವರು ಬೈದಿದ್ದಾರೆ. “ರೀಲ್‌ ಮಾಡುವುದನ್ನು ಬಿಟ್ಟು ಮೊದಲು ನಿಮ್ಮ ಕಾಲಿನ ಬಗ್ಗೆ ಗಮನ ಕೊಡಿ” ಎಂದು ಅನೇಕರು ಬುದ್ಧಿ ಮಾತು ಹೇಳಿದ್ದಾರೆ.
ಈ ವಿಡಿಯೊವನ್ನು ಮಾರ್ಚ್‌ 21ರಂದು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾಗಿದೆ. ಅಂದಿನಿಂದ ಇಂದಿನವರೆಗೆ ವಿಡಿಯೊ ಭಾರೀ ಪ್ರಮಾಣದಲ್ಲಿ ವೈರಲ್‌ ಆಗಿದೆ. 1.7 ಲಕ್ಷಕ್ಕೂ ಅಧಿಕ ಮಂದಿ ವಿಡಿಯೊವನ್ನು ಲೈಕ್‌ ಮಾಡಿದ್ದಾರೆ. ಸಾವಿರಾರು ಜನರು ವಿಡಿಯೊವನ್ನು ಇತರರೊಂದಿಗೆ ಹಂಚಿಕೊಂಡಿದ್ದಾರೆ. ಒಟ್ಟಿನಲ್ಲಿ ರೆನಾಲ್ಡೊ ಜತೆ ಆತನಿಗೆ ಕಚ್ಚಿನ ನಾಯಿ ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಫೇಮಸ್‌ ಆಗಿದೆ.