ಬೆಂಗಳೂರು: ಮೊಸಳೆ ನಿಜಕ್ಕೂ ಅಪಾಯಕಾರಿ ಪ್ರಾಣಿ. ಅದು ಕಚ್ಚಿದರೆ ಅದರ ಬಾಯಿಯಿಂದ ಬಿಡಿಸಿಕೊಳ್ಳುವುದು ತುಂಬಾನೇ ಕಷ್ಟ. ಹಾಗಾಗಿಯೇ ಮೊಸಳೆಯೊಂದಿಗೆ ಆಟವಾಡಲು ಹೋಗಬೇಡಿ ಎಂದು ಎಚ್ಚರಿಕೆ ನೀಡಲಾಗುತ್ತಿರುತ್ತದೆ. ಆದರೆ ಇಲ್ಲಿ ಅಜ್ಜನೊಬ್ಬ ಮೊಸಳೆಯೊಂದಿಗೇ ಸರಸ ಆಡಲು ಹೋಗಿ ಸಂಕಷ್ಟಕ್ಕೆ ಸಿಲುಕಿಕೊಂಡಿದ್ದಾನೆ. ಮೊಸಳೆಯನ್ನು ತಬ್ಬಿಕೊಳ್ಳಲು ಹೋದ ಅಜ್ಜನ ವಿಡಿಯೊ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡಿದ್ದು, ವೈರಲ್‌ (Viral Video) ಆಗಿದೆ.
ಇದನ್ನೂ ಓದಿ: Viral Video: ಲೋಹದ ಬೇಲಿಯನ್ನೇ ಮುರಿದು, ನುಗ್ಗಿತು ಬೃಹತ್ ಮೊಸಳೆ; ಇಷ್ಟೊಂದು ಶಕ್ತಿಶಾಲಿಯಾ ಈ ಸರೀಸೃಪ?!
ಮೊಸಳೆಯೊಂದು ನೀರಿನಲ್ಲಿ ಸುಮ್ಮನೆ ಮಲಗಿರುತ್ತದೆ. ಅಲ್ಲಿಗೆ ಬರುವ ಅಜ್ಜ ಹಾಗೂ ಆತನ ಸ್ನೇಹಿತರು ಆ ಮೊಸಳೆಗೆ ಏನಾದರೂ ಮಾಡಬೇಕೆಂದು ನಿರ್ಧರಿಸುತ್ತಾರೆ. ಒಂದು ಬಿಳಿ ಬಟ್ಟೆ ತೆಗೆದುಕೊಂಡು ಅದನ್ನು ದೂರದಿಂದಲೇ ಮೊಸಳೆಯ ಮುಖದ ಮೇಲೆ ಹಾಕುತ್ತಾರೆ. ಮೊಸಳೆಯ ಕಣ್ಣುಗಳೂ ಕೂಡ ಬಟ್ಟೆಯಲ್ಲಿ ಮುಚ್ಚಿಕೊಳ್ಳುತ್ತದೆ. ಆಗ ನಿಧಾನವಾಗಿ ಮೊಸಳೆಯ ಹಿಂದೆ ಬರುವ ಅಜ್ಜ, ಅದನ್ನು ಹಿಂದಿನಿಂದ ತಬ್ಬಿಕೊಳ್ಳಲು ಯತ್ನಿಸುತ್ತಾನೆ. ತಕ್ಷಣಕ್ಕೆ ಎಚ್ಚೆತ್ತುಕೊಳ್ಳುವ ಮೊಸಳೆ ಹಿಂದೆ ತಿರುಗಿ ಅಜ್ಜನ ಕೈಯನ್ನು ಕಚ್ಚಿಬಿಡುತ್ತದೆ. ಅಲ್ಲೇ ಕೆಳಗೆ ಬೀಳುವ ಅಜ್ಜ ಕಾಲಿನಿಂದ ಜೋರಾಗಿ ಮೊಸಳೆಗೆ ಒದೆಯುತ್ತಾನೆ. ಆ ಹೊಡೆತದಿಂದಾಗಿ ಮೊಸಳೆ ಅಜ್ಜನ ಕೈಯನ್ನು ಬಿಟ್ಟು ಸುಮ್ಮನಾಗುತ್ತದೆ. ಆಗ ಅಜ್ಜ ಅಲ್ಲಿಂದ ಕಾಲ್ಕೀಳುತ್ತಾನೆ.
ಇಂಥದ್ದೊಂದು ವಿಡಿಯೊವನ್ನು ಟ್ವಿಟರ್‌ನಲ್ಲಿ ಪೋಸ್ಟ್‌ ಮಾಡಲಾಗಿದೆ. ಮಾರ್ಚ್‌ 15ರಂದು ಪೋಸ್ಟ್‌ ಮಾಡಲಾದ ಈ 36 ಸೆಕೆಂಡುಗಳ ವಿಡಿಯೊವನ್ನು ಈಗಾಗಲೇ 5 ಲಕ್ಷಕ್ಕೂ ಅಧಿಕ ಜನ ವೀಕ್ಷಿಸಿದ್ದಾರೆ. ಅಜ್ಜನ ದುಸ್ಸಾಹಸದ ಬಗ್ಗೆ ನೆಟ್ಟಿಗರು ಹಲವು ರೀತಿಯಲ್ಲಿ ಚರ್ಚೆ ನಡೆಸಲಾರಂಭಿಸಿದ್ದಾರೆ. “ಅಜ್ಜ ಮೊಸಳೆಗೆ ಜಾಕೆಟ್‌ ಹಾಕೋದಕ್ಕೆ ಹೋದರು, ಆದರೆ ಪಾಪ ಆ ಮೊಸಳೆಗೆ ಜಾಕೆಟ್‌ ಇಷ್ಟವಿರಲಿಲ್ಲ”, “ಮೊಸಳೆ ಮುಖದ ಮೇಲೆ ಬಟ್ಟೆ ಇದ್ದಿದ್ದಕ್ಕೆ ಅಜ್ಜ ಬಚಾವ್‌. ಇಲ್ಲದಿದ್ದರೆ ಅಜ್ಜನ ಕಥೆ ಕಷ್ಟವಿತ್ತು” ಎನ್ನುವ ಹಲವಾರು ಕಾಮೆಂಟ್‌ಗಳು ವಿಡಿಯೊಗೆ ಬಂದಿವೆ.