ಬೆಂಗಳೂರು: ವನ್ಯ ಮೃಗಗಳಿಂದ ಯಾವಾಗಲೂ ದೂರವೇ ಇರಬೇಕು. ಅದರಲ್ಲಿ ಹುಲಿ, ಸಿಂಹದಂತಹ ಪ್ರಾಣಿಗಳೆಂದರೆ ಪ್ರತಿಯೊಬ್ಬರಿಗೂ ಭಯ ಇದ್ದೇ ಇರುತ್ತದೆ. ಆದರೆ ಇಲ್ಲೊಬ್ಬ ವ್ಯಕ್ತಿ ಅದೇ ಹುಲಿಯೊಂದಿಗೆ ಆಟವಾಡುತ್ತಿದ್ದಾನೆ. ಹುಲಿಯ ಕಿವಿಗೇ ಮಸಾಜ್‌ ಮಾಡಿರುವ ವಿಡಿಯೊವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ಭಾರೀ ವೈರಲ್ (Viral Video) ಆಗಿದೆ.
ಕೋಡಿ ಅಂಟ್ಲೆ ಹೆಸರಿನ ವ್ಯಕ್ತಿ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಇಂಥದ್ದೊಂದು ವಿಡಿಯೊವನ್ನು ಹಂಚಿಕೊಂಡಿದ್ದಾರೆ. ಮಿರ್ಟಲ್ ಬೀಚ್ ಸಫಾರಿಯಲ್ಲಿ ಪ್ರಾಣಿಗಳನ್ನು ನೋಡಿಕೊಳ್ಳುವವನೊಬ್ಬ ಹುಲಿಯನ್ನು ಅಲ್ಲಿನ ಸರೋವರದ ಬಳಿ ಕರೆದುಕೊಂಡು ಹೋಗುತ್ತಾನೆ. ಅಲ್ಲಿಗೆ ತೆರಳಿದ ತಕ್ಷಣ ಆತ ಹುಲಿಯ ಎರಡೂ ಕಿವಿಗಳಿಗೆ ಹಿಂಬದಿಯಿಂದ ಕೈ ಹಾಕಿ ಮಸಾಜ್‌ ಮಾಡಲಾರಂಭಿಸುತ್ತಾನೆ. ಅದನ್ನು ತುಂಬಾನೇ ಇಷ್ಟ ಪಡುವ ಹುಲಿ ಎರಡೂ ಕಣ್ಣುಗಳನ್ನು ಮುಚ್ಚಿಕೊಂಡು ಮಸಾಜ್‌ ಅನ್ನು ಆನಂದಿಸುತ್ತದೆ!
ಇದನ್ನೂ ಓದಿ: Viral Video : ದೆಹಲಿ ಮೆಟ್ರೋದಲ್ಲೇ ಹೇರ್ ಸ್ಟ್ರೈಟ್ನರ್ ಬಳಸಿದ ಯುವತಿ, ವಿಡಿಯೊ ವೈರಲ್!
ಹುಲಿ ಈ ರೀತಿ ಮಸಾಜ್‌ ಅನ್ನು ಆನಂದಿಸುವಾಗ ಮುದ್ದಾಗಿ ಕಾಣಿಸಿಕೊಳ್ಳುತ್ತದೆ. ಯಾರಿಗಾದರೂ ಒಮ್ಮೆ ಅದನ್ನು ಎತ್ತಿಕೊಂಡು ಮುದ್ದಾಡೋಣ ಎನ್ನಿಸುವಷ್ಟು ಸುಂದರವಾಗಿ ಕಾಣಿಸುತ್ತದೆ. ಆತ ಮಸಾಜ್‌ ಮಾಡುವುದನ್ನು ನಿಲ್ಲಿಸಿದ ತಕ್ಷಣ ಹುಲಿ ತಲೆಯನ್ನೊಮ್ಮೆ ಕೊಡವಿಕೊಂಡು ನೀರು ಕುಡಿಯಲು ಮುಂದಾಗುತ್ತದೆ.
ಏಪ್ರಿಲ್‌ 19ರಂದು ಈ ವಿಡಿಯೊವನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳಲಾಗಿದೆ. ಅಂದಿನಿಂದ ಇಂದಿನವರೆಗೆ ವಿಡಿಯೊ 102 ಮಿಲಿಯನ್‌ಗೂ ಅಧಿಕ ಮಂದಿಯಿಂದ ವೀಕ್ಷಣೆಗೊಂಡಿದೆ. 7.5 ಮಿಲಿಯನ್‌ಗೂ ಅಧಿಕ ಮಂದಿ ವಿಡಿಯೊಗೆ ಲೈಕ್‌ ಮಾಡಿದ್ದಾರೆ. ಹಾಗೆಯೇ ಲಕ್ಷಾಂತರ ಮಂದಿ ವಿಡಿಯೊಗೆ ಕಾಮೆಂಟ್‌ಗಳ ಸುರಿಮಳೆಯನ್ನೇ ಸುರಿಸಿದ್ದಾರೆ. “ಅಬ್ಬಾ, ಹುಲಿ ಕೂಡ ಮುದ್ದಾಡುವ ಪ್ರಾಣಿಯಂತೆ ಕಂಡಿದ್ದು ಇದೊಂದೇ ವಿಡಿಯೊದಲ್ಲಿ”, “ಮುಂದೆ ಏನಾದರೂ ಹುಲಿ ನಮ್ಮ ಮೇಲೆ ಅಟ್ಯಾಕ್‌ ಮಾಡಿದರೆ ನಾವೇನು ಮಾಡಬೇಕು ಎನ್ನುವುದು ಗೊತ್ತಾಯಿತು” ಎನ್ನುವಂತಹ ಹಲವಾರು ಕಮೆಂಟ್‌ಗಳು ವಿಡಿಯೊಗೆ ಬಂದಿವೆ.