ರೈಡ್ ಕ್ಯಾನ್ಸಲ್​ ಮಾಡಲು ಉಬರ್​ ಚಾಲಕ ಕೊಟ್ಟ ಕಾರಣವನ್ನು ಮೆಚ್ಚಿಕೊಂಡ ಯುವತಿ; ನೆಟ್ಟಿಗರಿಂದಲೂ ಹೊಗಳಿಕೆ

ಉಬರ್​, ಓಲಾ ಕ್ಯಾಬ್​​ಗಳನ್ನು ಬುಕ್ ಮಾಡಿಯಾದ ಮೇಲೆ ಕೆಲವೊಮ್ಮೆ ನಾವು ಅದನ್ನು ಕ್ಯಾನ್ಸಲ್​ ಮಾಡುತ್ತೇವೆ. ಈ ಕ್ಯಾಬ್​​ಗಳನ್ನು ಬುಕ್ ಮಾಡಿಯಾದ ಮೇಲೆ ನಾವು ಆ್ಯಪ್​ ನೋಡಿ ಡ್ರೈವರ್ ನಮ್ಮ ಲೊಕೇಶನ್​ ತಲುಪುವ ಸಮಯ ಸೇರಿ, ಚಾಲಕ ಬರುತ್ತಿರುವ ಮಾರ್ಗವನ್ನೆಲ್ಲ ತಿಳಿದುಕೊಳ್ಳಬಹುದು. ಹೀಗೆ ಕೆಲವೊಮ್ಮ ವಾಹನ ಬುಕ್ ಮಾಡಿಯಾದ ಮೇಲೆ, ಚಾಲಕನ ಸಮಯ ನಮಗೆ ಸರಿ ಹೊಂದದೆ ಇದ್ದರೆ, ಆತ ಬರಲು ವಿಳಂಬ ಮಾಡಿದರೆ ಅಥವಾ ಲೊಕೇಶನ್​ ತಲುಪಿದ ಮೇಲೆ ನಾವು ಹತ್ತಬೇಕಾದ ಕ್ಯಾಬ್​ ಸ್ವಚ್ಛವಾಗಿಲ್ಲದೆ ಇದ್ದರೆ, ನಾವು ಬುಕ್ಕಿಂಗ್​ನ್ನು ಕ್ಯಾನ್ಸಲ್​ ಮಾಡುತ್ತೇವೆ ಮತ್ತು ನಾವೇಕೆ ಕ್ಯಾಬ್​ ಕ್ಯಾನ್ಸಲ್​ ಮಾಡುತ್ತಿದ್ದೇವೆ ಎಂಬುದಕ್ಕೆ ಕಾರಣವನ್ನೂ ಕೊಡುತ್ತೇವೆ.

ಇನ್ನೊಂದು ಕಡೆ ಕ್ಯಾಬ್​ ಡ್ರೈವರ್​ಗಳಿಗೂ ಈ ಕ್ಯಾನ್ಸಲ್​ ಎಂಬ ಆಯ್ಕೆ ಇರುತ್ತದೆ. ಅವರೂ ಕೂಡ ಒಮ್ಮೊಮ್ಮೆ ನಮ್ಮ ರೈಡ್​ ರಿಕ್ವೆಸ್ಟ್​​ನ್ನು ಒಪ್ಪಿಕೊಂಡು ಸ್ವಲ್ಪ ಸಮಯದ ಬಳಿಕ ಅದನ್ನು ರದ್ದುಗೊಳಿಸುವುದನ್ನು ನೋಡಿದ್ದೇವೆ. ಕೆಲವು ಡ್ರೈವರ್​ಗಳು ತಮ್ಮ ಕಸ್ಟಮರ್​ಗೆ ಕರೆ ಮಾಡಿಕೊಂಡು, ಹೋಗಬೇಕಾದ ಸ್ಥಳ ಯಾವುದೆಂದು ಕೇಳಿ ಬಳಿಕ ಕ್ಯಾನ್ಸಲ್​ ಮಾಡುತ್ತಾರೆ. ಅವರೇಕೆ ನಮ್ಮ ರೈಡ್​ ಮನವಿ ತಿರಸ್ಕರಿಸಿದರು ಎಂಬುದೇ ನಮಗೆ ಅರ್ಥವಾಗುವುದಿಲ್ಲ.

ಹೀಗಿರುವಾಗ ಬೆಂಗಳೂರಿನ ಉಬರ್​ ಡ್ರೈವರ್​​ ಒಬ್ಬ ಅತ್ಯಂತ ಪ್ರಾಮಾಣಿಕವಾಗಿ ಕಾರಣ ಕೊಟ್ಟು ಯುವತಿಯೊಬ್ಬಳ ರೈಡ್​ ರಿಕ್ವೆಸ್ಟ್​​ನ್ನು ರದ್ದುಗೊಳಿಸಿದ್ದಾನೆ. ಆ ಯುವತಿಯ ಹೆಸರು ಅಶ್ಮಿತಾ ಎಂದಾಗಿದ್ದು, ತಮಗಾದ ಅನುಭವವನ್ನು ಹೇಳಿಕೊಂಡಿದ್ದಾರೆ ಮತ್ತು ಚಾಲಕನ ಪ್ರಾಮಾಣಿಕತೆ ಮೆಚ್ಚುವಂಥದ್ದು ಎಂದಿದ್ದಾರೆ. ನಾನು ಊಬರ್​​ನಲ್ಲಿ ಕ್ಯಾಬ್​ ಬುಕ್​ ಮಾಡಿದಾಗ ಭರತ್​ ಎಂಬ ಚಾಲಕ ಅದನ್ನು ಸ್ವೀಕರಿಸಿದ. ಆದರೆ ಕೆಲವೇ ಹೊತ್ತಲ್ಲಿ ಆ್ಯಪ್​​ ಮೂಲಕ ನನಗೆ ಸಂದೇಶ ಕಳಿಸಿ, ‘ನಾನು ಈ ರೈಡ್​​ ಕ್ಯಾನ್ಸಲ್​ ಮಾಡುತ್ತಿದ್ದೇನೆ. ಯಾಕೆಂದರೆ ನನಗೆ ತುಂಬ ನಿದ್ದೆ ಬರುತ್ತಿದೆ’ ಎಂದು ಹೇಳಿದ. ಆತ ಪ್ರಾಮಾಣಿಕವಾದ ಕಾರಣವನ್ನೇ ಕೊಟ್ಟು ಕ್ಯಾನ್ಸಲ್​ ಮಾಡಿಕೊಂಡ ಎಂದಿದ್ದಾರೆ. ಹಾಗೇ, ಆತನ ಸಂದೇಶದ ಸ್ಕ್ರೀನ್​ಶಾಟ್​​ಗಳನ್ನೂ ಕಳಿಸಿದ್ದಾರೆ.

ಇದನ್ನೂ ಓದಿ: ವೈರಲ್‌ ನ್ಯೂಸ್ | ಅಧ್ಯಾಪಕರ ಮನೆಗೆ ಕನ್ನ ಹಾಕಿದ ಕಳ್ಳನ ಗುರುಭಕ್ತಿ ಹೀಗಿತ್ತು!

ಇದನ್ನು ನೋಡಿದ ನೆಟ್ಟಿಗರು ಆ ಡ್ರೈವರ್ ಬಗ್ಗೆ ಒಳ್ಳೆಯ ಮಾತುಗಳನ್ನಾಡಿದ್ದಾರೆ. ಹಾಗೇ, ತಮಗೆ ಆದ ಕೆಲವು ಕೆಟ್ಟ ಅನುಭವಗಳನ್ನೂ ಹಂಚಿಕೊಂಡಿದ್ದಾರೆ. ‘ನನಗೊಂದು ಕೆಟ್ಟ ಅನುಭವ ಆಗಿತ್ತು. ತಡರಾತ್ರಿ 3ಗಂಟೆ ಹೊತ್ತಿಗೆ ನಾನು ಕ್ಯಾಬ್​​ನಲ್ಲಿ ಹೋಗುತ್ತಿದ್ದೆ. ಆ ಡ್ರೈವರ್​ ಮಾರ್ಗ ಮಧ್ಯೆ ಗಾಡಿ ನಿಲ್ಲಿಸಿ, ನನಗೆ ನಿದ್ದೆ ಬರುತ್ತಿದೆ, ಮುಂದೆ ಹೋಗಲು ಸಾಧ್ಯವೇ ಆಗುತ್ತಿಲ್ಲ ಎಂದು ಗಾಡಿ ನಿಲ್ಲಿಸಿಯೇ ಬಿಟ್ಟಿದ್ದ. ಆದರೆ ಈ ಡ್ರೈವರ್ ಪ್ರಾಮಾಣಿಕ’ ಎಂದು ಒಬ್ಬರು ಕಮೆಂಟ್ ಬರೆದಿದ್ದಾರೆ. ಹಾಗೇ ಇನ್ನೊಬ್ಬರು ಕಮೆಂಟ್ ಮಾಡಿ, ‘ನಾನೊಂದು ದಿನ ಕ್ಯಾಬ್​ ಬುಕ್​ ಮಾಡಿದೆ. ಕ್ಯಾಬ್​ ಬುಕ್​ ಆಗಿ ಐದು ನಿಮಿಷವಾದರೂ ಆ ಚಾಲಕ ತನ್ನ ಜಾಗದಿಂದ ಕದಲಲಿಲ್ಲ. ನಾನು ಆತನಿಗೆ ಕರೆ ಮಾಡಿ ಪ್ರಶ್ನಿಸಿದರೆ, ನಾನು ನಿಮ್ಮ ಕರೆಗಾಗಿಯೇ ಕಾಯುತ್ತಿದ್ದೆ ಎಂದು ಹೇಳಿದ, ತೀರ ಬಾಲಿಶ ಅನ್ನಿಸಿಬಿಟ್ಟಿತು’ ಎಂದು ಹೇಳಿದ್ದಾರೆ.