ಲಕ್ನೋ: ಮದುವೆಯ ಆಡಂಬರ ಕಡಿಮೆಯಾಯಿತು, ಅಡುಗೆ ಸರಿಯಿಲ್ಲ ಹೀಗೆ ಅನೇಕ ಕಾರಣಗಳಿಗೆ ಮಂಟಪಗಳಲ್ಲೇ ಮದುವೆ ಮುರಿದು ಬೀಳುವುದನ್ನು ನೋಡಿರುತ್ತೇವೆ. ಆದರೆ ಇದೀಗ ಉತ್ತರ ಪ್ರದೇಶದಲ್ಲಿ ವರನೊಬ್ಬ ವಧುವಿನ ಕೋಣೆಗೆ ತೆರಳಿದ ಎನ್ನುವ ಕಾರಣಕ್ಕೇ (Viral News) ಮದುವೆ ಮುರಿದುಬಿದ್ದಿದೆ!
ಹೌದು. ಉತ್ತರ ಪ್ರದೇಶದ ಚಿತ್ರಕೂಟದಲ್ಲಿ ಇಂತದ್ದೊಂದು ಘಟನೆ ನಡೆದಿದೆ. ಮದುವೆ ದಿಬ್ಬಣ ತೆಗೆದುಕೊಂಡು ವರನ ವಧುವಿನ ಊರಿಗೆ ಬಂದಿದೆ. ಬಂದ ತಕ್ಷಣ ಮಾಲೆ ಬದಲಾವಣೆ ಆಗಿದೆ. ಅದಾದ ನಂತರ ವಧು ಆಕೆಯ ಕೋಣೆಯಲ್ಲಿದ್ದಾಗ ವರ ಪದೇ ಪದೆ ಆಕೆಯ ಕೋಣೆಗೆ ತೆರಳಿದ್ದಾನೆ. ಈ ವಿಚಾರದಲ್ಲಿ ವರನ ತಂದೆಯೇ ಆತನಿಗೆ ಎಚ್ಚರಿಕೆ ನೀಡಿದರೂ ವರ ತಂದೆಯ ಮಾತು ಕೇಳಿಲ್ಲ.
ಇದನ್ನೂ ಓದಿ: Viral Video : ಐದು ವರ್ಷದ ಬಾಲಕನೇ ಪೊಲೀಸರಿಗೆ ಮುಖ್ಯಸ್ಥ! ವೈರಲ್‌ ಆಯ್ತು ಈ ವಿಶೇಷ ವಿಡಿಯೊ
ವರ ವಧುವಿನ ಕೋಣೆಗೆ ಹೋಗುವುದು ಹೆಚ್ಚಾದ ಹಿನ್ನೆಲೆ ವರನ ತಂದೆ ಆತನ ಕೆನ್ನೆಗೆ ಬಾರಿಸಿದ್ದಾರೆ. ಸಿಟ್ಟಿನಿಂದ ವರ ಕೂಡ ಆತನ ತಂದೆಗೆ ಬಾರಿಸಿದ್ದಾನೆ. ಈ ಜಗಳ ವಧುವಿನ ಕಿವಿಗೂ ಬಿದ್ದಿದ್ದು, ಆಕೆ ಮದುವೆಯನ್ನೇ ಬೇಡವೆಂದು ಪಟ್ಟು ಹಿಡಿದು ಕುಳಿತಿದ್ದಾಳೆ. ಸೊಸೆಯನ್ನು ಕರೆದುಕೊಂಡು ಹೋಗಬೇಕಿದ್ದ ದಿಬ್ಬಣ ಮದುವೆ ಇಲ್ಲದೆ ವಾಪಸು ಹೋಗಿದೆ. ಎರಡೂ ಕುಟುಂಬಗಳು ಪರಸ್ಪರ ಒಪ್ಪಿಕೊಂಡು ಮದುವೆ ಮುರಿದುಕೊಂಡಿದ್ದಾಗಿ ವರದಿಯಾಗಿದೆ.