ಪ್ರೀತಿ ಎಂಬ ಮಾಯೆಯಲ್ಲಿ ಬಿದ್ದವರಿಗೆ ದೂರವಾಗುವ ನೋವು ಗೊತ್ತಿರುತ್ತದೆ. ಇಬ್ಬರೂ ಸೇರಿ ನಿರ್ಧರಿಸಿದ್ದೇ ಇರಬಹುದು ಅಥವಾ ಕೆಲವು ಘಟನೆಗಳು ಇಬ್ಬರನ್ನು ದೂರಾಗಿಸಿದ್ದಿರಬಹುದು, ಏನೇ ಇರಲಿ, ದೂರವಾಗುವುದೆಂದರೆ ನೋವಿನ ವಿಚಾರವೇ. ಪ್ರೀತಿಸಿದ ವ್ಯಕ್ತಿ ತನ್ನ ಜೀವನವನ್ನು ರೂಪಿಸಿಕೊಳ್ಳಲು ಬಿಟ್ಟು ತಾನು ತನ್ನ ದಾರಿ ಹಿಡಿಯುವುದು ಕೂಡಾ ಸಂಕಟವೇ. ಈ ನೋವಿನಿಂದ ಹೊರಬರಲು ಎಲ್ಲರಿಗೂ ಒಂದಿಷ್ಟು ಕಾಲ ಬೇಕಾಗುತ್ತದೆ. ಆದರೆ ಚೀನಾದಲ್ಲಿ ಯಾವುದೋ ಮನಸ್ತಾಪದಿಂದ ತನ್ನ ಪ್ರೀತಿಗೆ ಗುಡ್‌ಬೈ ಹೇಳಿ ಹೋದ ತನ್ನ ಪ್ರಿಯತಮೆಯನ್ನು ಬಿಡಲಾಗದೆ, ಆಕೆಯ ಬಳಿ ಕ್ಷಮೆ ಕೋರಿ ಯುವಕನೊಬ್ಬ ತಪಸ್ಸನ್ನೇ ಮಾಡಿದ್ದಾನೆ!
ಹೌದು, ಈ ಕಲಿಯುಗದಲ್ಲೂ ತಪಸ್ಸೇ ಎಂದು ಹುಬ್ಬೇರಿಸಬೇಡಿ. ಈಗ ಪ್ರೀತಿ ಗೀತಿಗೆಲ್ಲ ಹೆಚ್ಚು ಅರ್ಥವಿಲ್ಲ ಎಂದು ಸಿನಿಕತನದ ಮಾತಾಡಬೇಡಿ. ಇಲ್ಲೊಬ್ಬ ಚೀನೀ ಯುವಕ ತನ್ನ ಪ್ರೀತಿಗಾಗಿ ಏನು ಮಾಡಲೂ ಸಿದ್ಧ ಎಂಬುದನ್ನು ಮಾಡಿ ತೋರಿಸಿದ್ದಾನೆ. 21 ಗಂಟೆಗಳ ಕಾಲ ಮೊಣಕಾಲಿನ ಮೇಲೆ ಮಳೆಯಲ್ಲೇ ನಿಂತು ತನ್ನ ಹುಡುಗಿಯ ಬಳಿ ಬಿಟ್ಟು ಹೋಗಬೇಡ ಎಂದು ಮೌನವಾಗಿ ಗೋಗರೆದಿದ್ದಾನೆ. ಆದರೂ ಅವನ ತಪಸ್ಸು ಫಲಿಸಿಲ್ಲ. ಆತನ ಹುಡುಗಿ ಮರಳಲಿಲ್ಲ.
ಡಾಝೋ ಎಂಬಲ್ಲಿನ ಕಟ್ಟಡವೊಂದರ ಹೊರಗಡೆ ಈತ 21 ಗಂಟೆಗಳ ಕಾಲ ಚಳಿ ಮಳೆಯೆನ್ನದೆ ಮೊಣಕಾಲೂರಿ ತನ್ನ ಬಿಟ್ಟುಹೋದ ಹುಡುಗಿಗಾಗಿ ಹೂಗುಚ್ಛವನ್ನು ಹಿಡಿದು ಯುವಕನೊಬ್ಬ ಕಾದಿದ್ದು ಇದೀಗ ಭಾರೀ ಸುದ್ದಿಯಾಗಿದೆ. ಮಾರ್ಚ್‌ 28ರಂದು ಮಧ್ಯಾಹ್ನ ಒಂದು ಗಂಟೆಗೆ ಹೀಗೆ ಕೂತವನು ಮಾರನೇ ದಿನ 10 ಗಂಟೆಯವರೆಗೆ ಅದೇ ಭಂಗಿಯಲ್ಲಿ ಮೊಣಕಾಲಿನಲ್ಲೇ ನಿಂತಿದ್ದಾನೆ. ತನ್ನ ಹುಡುಗಿ ಮನಸ್ಸು ಬದಲಾಯಿಸಿ ಮತ್ತೆ ತನ್ನ ಬಳಿಗೆ ಬಂದೇ ಬರುತ್ತಾಳೆ ಎಂಬ ನಂಬಿಕೆಯಲ್ಲಿ ಈತ ಕಾದಿದ್ದನಂತೆ!
ಇದನ್ನೂ ಓದಿ: Viral Science: ಪುರುಷರ ಆಯುಸ್ಸು 141 ವರ್ಷಗಳಾದರೆ, ಮಹಿಳೆಯರದ್ದು 130 ವರ್ಷವಂತೆ!
ಈತನ ಈ ಅವತಾರ ನೋಡಿ ಸುತ್ತಮುತ್ತಲ ಜನರೆಲ್ಲ ಈತನ ಬಳಿ ನೆರೆದಿದ್ದಾರೆ. ಇಂತಹ ಕೆಲಸ ಎಲ್ಲ ಮಾಡಬೇಡ ಎಂದು ಕಿವಿ ಮಾತು ಹೇಳಿದ್ದಾರೆ. ಆದರೂ ಆತ ತನ್ನ ಪ್ರಯತ್ನ ಬಿಡಲು ಒಪ್ಪಲೇ ಇಲ್ಲ. ಬಹಳಷ್ಟು ಮಂದಿ ಈತನ ಜೊತೆ ಮಾತನಾಡಿ, ಮಂಡಿಯೂರಿ ಇಷ್ಟೆಲ್ಲ ಪ್ರಯತ್ನ ಮಾಡಬೇಡ. ನಿಮ್ಮ ಹುಡುಗಿ ಈ ಕಡೆ ತಿರುಗಿ ನೋಡೂ ಇಲ್ಲ. ನೀವು ಸುಮ್ಮನೆ ಇಲ್ಲಿ ಹೀಗೆಲ್ಲ ಕಷ್ಟಪಟ್ಟಿದ್ದಕ್ಕೆ ಕನಿಷ್ಟ ಗೌರವವೂ ಆಕೆ ಕೊಡುವುದಿಲ್ಲ ಎಂದಾದ ಮೇಲೆ ಹೀಗೆಲ್ಲ ಮಾಡಿ ಫಲವೇನು ಎಂದು ಈತನಿಗೆ ಕೆಲವರು ಸ್ಥಳದಲ್ಲಿ ಬುದ್ಧಿವಾದ ಹೇಳಿದ್ದಾರೆ. ಆದರೆ ಆತ ಯಾರ ಬುದ್ಧಿ ಮಾತಿಗೂ ಕಿವಿ ಕೊಡದೆ ಏಕೋಧ್ಯಾನದಲ್ಲಿ ಹೂಗುಚ್ಛ ಹಿಡಿದು ಮಂಡಿಯೂರಿ ಚಳಿ ಮಳೆಯೆನ್ನದೆ 21 ಗಂಟೆಗಳ ಕಾಲ ನಿಂತಿದ್ದಾನೆ. ಇಷ್ಟೆಲ್ಲ ಆದರೂ ಆತನ ಹುಡುಗಿ ಆತನೆಡೆಗೆ ನೋಡಲೂ ಇಲ್ಲವಂತೆ.
ಪರಿಸ್ಥಿತಿ ಕೈಮೀರಿ ಹೋಗುತ್ತಿದೆ ಎಂದರಿತ ಜನರು ಈ ಸುದ್ದಿಯನ್ನು ಪೊಲೀಸರಿಗೆ ಮುಟ್ಟಿಸಿದ್ದಾರೆ. ಆದರೆ, ಪೊಲೀಸರ ಮನವಿಗೂ ಈತ ಜಗ್ಗಲಿಲ್ಲ. ಇವನ್ನೆಲ್ಲ ಬಿಟ್ಟುಬಿಡಿ ಎಂದ ಪೊಲೀಸರ ಬಳಿ ಈತ, ನನ್ನ ಈ ಕೆಲಸ ಅಪರಾಧವೇ? ಅಪರಾಧವಲ್ಲ ಎಂದರೆ ನನ್ನನ್ನು ನನ್ನ ಪಾಡಿಗೆ ಬಿಟ್ಟುಬಿಡಿ ಎಂದಿದ್ದನಂತೆ.
ಈತ ಹಾಗೂ ಈತನ ಗರ್ಲ್‌ ಫ್ರೆಂಡ್‌ ಕೆಲವು ದಿನಗಳ ಹಿಂದಷ್ಟೇ ಯಾವುದೋ ಮನಸ್ತಾಪಕ್ಕೆ ಬ್ರೇಕಪ್‌ ಮಾಡಿಕೊಂಡಿದ್ದರು. ಈ ವಿಚಾರಕ್ಕೆ ಸಂಬಂಧಿಸಿ ಆತ ಆಕೆಯ ಬಳಿ ತನ್ನನ್ನು ಕ್ಷಮಿಸಿ ಮತ್ತೆ ಬಾ ಎಂದು ಹೂಗುಚ್ಛ ಹಿಡಿದು ಮಂಡಿಯೂರಿ 21 ಗಂಟೆಗಳ ಕಾಲ ನಿಂತಿದ್ದರು ಎಂದು ಪೊಲೀಸರು ವಿವರಿಸಿದ್ದಾರೆ. ಆದರೆ, ಚಳಿ, ಮಳೆಯ ಕಾರಣದಿಂದ ಈತನಿಗೆ ಹೆಚ್ಚು ಹೊತ್ತು ನಿಲ್ಲಲಾಗದೆ, ವಾಪಾಸು ಮರಳಬೇಕಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: Viral Video: ಬಿಜೆಪಿ ಶಾಸಕನನ್ನು ಎತ್ತಿಕೊಂಡು ಹೋಗಿ, ವಿಧಾನಸಭೆಯ ಹೊರಗೆ ಬಿಟ್ಟ ಮಾರ್ಷಲ್ಗಳು