ಮುಂಬೈ: ಪ್ರೇಮಿಗಳಿಗೆ ಪ್ರಪೋಸ್‌ ಎನ್ನುವುದೊಂದು ದೊಡ್ಡ ವಿಚಾರ. ಅದಕ್ಕೆಂದೇ ಎಷ್ಟೋ ದಿನಗಳ ತಯಾರಿ ಮಾಡಿಕೊಳ್ಳುವವರೂ ಇದ್ದಾರೆ. ಅದೇ ರೀತಿ ಈ ಒಬ್ಬ ಪ್ರೇಮಿ ತನ್ನ ಪ್ರಿಯತಮೆಗೆ ಸರ್ಪೈಸ್‌ ಆಗಿ ಪ್ರಪೋಸ್‌ ಮಾಡಲೆಂದು ಮಾಡಿದ ಕೆಲಸ ನೆಟ್ಟಿಗರಿಗೆ (Viral Video) ಮೆಚ್ಚುಗೆಯಾಗಿದೆ.
ಇದನ್ನೂ ಓದಿ: Viral video | ಹೊರೆ ಹೊತ್ತ ಕೈಗಳು, ತಾನಾಗಿಯೇ ಚಲಿಸುವ ಸೈಕಲು! ಇವನ ದುಡಿಮೆಯೇ ಸರ್ಕಸ್
ಯುವತಿಯೊಬ್ಬಳು ಲಂಡನ್‌ನಿಂದ ಮುಂಬೈಗೆ ಹೊರಟಿದ್ದಳು. ಆ ವಿಮಾನ ಹೈದರಾಬಾದ್‌ ಮೂಲಕ ಹಾದು ಹೊರಟಿತ್ತು. ಹೈದರಾಬಾದ್‌ನಿಂದ ವಿಮಾನ ಟೇಕ್‌ ಆಫ್‌ ಆದ ಕೆಲ ಕ್ಷಣದಲ್ಲೇ ಯುವಕನೊಬ್ಬ ಯುವತಿಯ ಬಳಿ ಬರುತ್ತಾನೆ. “ನಾನು ನಿನ್ನ ಜತೆ ಜೀವನದುದ್ದಕ್ಕೂ ನಡೆಯಬಯಸುತ್ತೇನೆ. ನನ್ನೊಂದಿಗೆ ನಡೆಯುವೆಯಾ?” ಎಂದು ಬರೆದಿರುವ ಪೋಸ್ಟರ್‌ ಅನ್ನು ಯುವತಿಯ ಮುಂದೆ ಹಿಡಿದಿದ್ದಾನೆ. ಅದನ್ನು ನೋಡಿದ ತಕ್ಷಣ ಯುವತಿಗೆ ಆಶ್ಚರ್ಯವೋ ಆಶ್ಚರ್ಯ. ಮುಂಬೈನಲ್ಲಿರುವ ಪ್ರಿಯಕರ ಇದ್ದಕ್ಕಿದ್ದಂತೆ ಈ ರೀತಿ ತಾನು ಸಂಚರಿಸುತ್ತಿದ್ದ ವಿಮಾನದಲ್ಲೇ ಬಂದು ಪ್ರಪೋಸ್‌ ಮಾಡಿದ್ದನ್ನು ಕಂಡು ಖುಷಿಯಿಂದ ಸೀಟಿನಿಂದ ಎದ್ದು ಪ್ರಿಯಕರನ ಎದುರು ಬಂದು ನಿಂತಿದ್ದಾಳೆ.
ಪ್ರಿಯತಮೆ ತನ್ನೆದುರು ಬಂದ ನಂತರ ಆತ ಮಂಡಿಯೂರಿ ಉಂಗುರವನ್ನು ಕೊಟ್ಟು ಆಕೆಗೆ ಪ್ರಪೋಸ್‌ ಮಾಡಿದ್ದಾನೆ. ಈ ಎಲ್ಲ ದೃಶ್ಯವನ್ನು ಸಹ ಪ್ರಯಾಣಿಕರೊಬ್ಬರು ವಿಡಿಯೊ ಮಾಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೊ ಭಾರೀ ವೈರಲ್‌ ಆಗಿದೆ.
ಇದನ್ನೂ ಓದಿ: Viral Video | ಜತೆಯಾಗಿ, ಅತ್ಯಂತ ಅಪಾಯಕಾರಿಯಾಗಿ ಬುಲೆಟ್ ಬೈಕ್ನಲ್ಲಿ ಹೊರಟ ಸತಿ-ಪತಿ!
ಅಂದ ಹಾಗೆ ಈ ಘಟನೆ ಜ.2ರಂದು ನಡೆದಿರುವುದು. ಯುವಕ ಪ್ರಿಯತಮೆಗೆ ಪ್ರಪೋಸ್‌ ಮಾಡಬೇಕೆಂದೇ ಮುಂಬೈನಿಂದ ಹೈದರಾಬಾದ್‌ ಹಾಗೂ ಹೈದರಾಬಾದ್‌ನಿಂದ ಮುಂಬೈಗೆ ವಿಮಾನದ ಟಿಕೆಟ್‌ ಬುಕ್‌ ಮಾಡಿಕೊಂಡಿದ್ದ. ಏರ್‌ ಇಂಡಿಯಾ ಸಿಬ್ಬಂದಿ ಸಹಾಯದೊಂದಿಗೆ ಬೇರೆ ಪ್ರಯಾಣಿಕರಿಗೆ ತೊಂದರೆಯುಂಟಾಗದಂತೆ ಪ್ರೀತಿ ನಿವೇದನೆ ಮಾಡಿದ್ದಾನೆ. ಈ ವಿಚಾರದಲ್ಲಿ ಏರ್‌ ಇಂಡಿಯಾ ಅಧಿಕಾರಿಗಳೂ ಸಹ ಸಂತಸವನ್ನು ವ್ಯಕ್ತಪಡಿಸಿದ್ದಾರೆ.