ದಾರಿಯಲ್ಲಿ ಹೋಗುತ್ತಿದ್ದಾಗ ಒಂದು ಬೀದಿ ನಾಯಿ ಅಟ್ಟಿಸಿಕೊಂಡು ಬಂದರೇ ನಮ್ಮ ಜೀವ ಬಾಯಿಗೆ ಬಂದ ಹಾಗೇ ಆಗುತ್ತಿರುತ್ತದೆ, ಅಂಥದ್ದರಲ್ಲಿ ಯಾವುದಾದರೂ ಕಾಡು ಪ್ರಾಣಿ ದಾಳಿ ಮಾಡಲು ಅಟ್ಟಿಸಿಕೊಂಡು ಬಂದರೆ ಏನಾಗಬೇಡ !. ಆಯುಷ್ಯ ಗಟ್ಟಿ ಇದ್ದರೆ ಮಾತ್ರ ಪ್ರಾಣ ಉಳಿಯುತ್ತದೆ ಎನ್ನಬೇಕಷ್ಟೇ. ಆದರೆ ಈ ವ್ಯಕ್ತಿ ಅದೇನಾದನೋ ಗೊತ್ತಿಲ್ಲ, ಕರಡಿಯಿಂದ ತಪ್ಪಿಸಿಕೊಳ್ಳಲು ಮರವೇರಿಯಂತೂ ಕುಳಿತಿದ್ದ, ಕರಡಿಯೂ ಮರ ಹತ್ತಿ, ಆತನಿಗಿಂತ ಸ್ವಲ್ಪ ಕೆಳಗೆ ಕುಳಿತಿತ್ತು..!
ಕರಡಿಗಳು ಬುದ್ಧಿವಂತ ಪ್ರಾಣಿಗಳು ಎಂದು ಅನೇಕ ವನ್ಯಜೀವಿ ಜೀವಶಾಸ್ತ್ರಜ್ಞರೇ ಹೇಳಿದ್ದಾರೆ. ಕರಡಿಗಳು ಮರ ಕೂಡ ಏರಬಲ್ಲವು. ಮಾನವರಿಗೆ ಅಷ್ಟು ಬೇಗ ಹಾನಿ ಮಾಡುವುದಿಲ್ಲವಾದರೂ, ಅವುಗಳ ದಾಳಿ ಮಾರಣಾಂತಿಕವೇ ಸೈ. ಕರಡಿ ದಾಳಿಯಿಂದ ಅದೆಷ್ಟೋ ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೊವೊಂದು ವೈರಲ್ ಆಗಿದೆ. ಕರಡಿಯೊಂದು ವ್ಯಕ್ತಿಯೊಬ್ಬನನ್ನು ಟಾರ್ಗೆಟ್ ಮಾಡಿದೆ. ಆತ ಅದರಿಂದ ತಪ್ಪಿಸಿಕೊಳ್ಳಲು ಒಂದು ಮರ ಏರಿದ್ದಾನೆ. ಆದರೆ ಕರಡಿಯಿಂದ ಪಾರಾಗಲು ಮರ ಏರುವುದು ವ್ಯರ್ಥ. ಯಾಕೆಂದರೆ ಕರಡಿಯೂ ಕೂಡ ಅದೇ ಮರ ಹತ್ತಿ, ‘ನಿನ್ನನ್ನು ಬಿಡುವುದಿಲ್ಲ’ ಎಂಬ ಭಾವದಲ್ಲಿ ಕುಳಿತಿದೆ. ಮುಖ್ಯ ರಸ್ತೆಯ ಪಕ್ಕದ ಕಾಡಿನಲ್ಲಿ ಇದು ನಡೆದದ್ದು. ಆ ಮಾರ್ಗದಲ್ಲಿ ಕಾರಿನಲ್ಲಿ ಹೋಗುತ್ತಿದ್ದ ಪ್ರಯಾಣಿಕನೊಬ್ಬನ ಮೊಬೈಲ್ನಲ್ಲಿ ದೃಶ್ಯ ಸೆರೆಯಾಗಿದೆ. ಅದೀಗ ವೈರಲ್ ಆಗಿದೆ.
ವಿಡಿಯೊ ಅತ್ಯಂತ ಚಿಕ್ಕದಾಗಿದ್ದು ಆ ವ್ಯಕ್ತಿ ಮುಂದೇನಾದ? ಕರಡಿಯಿಂದ ಹೇಗೆ ತಪ್ಪಿಸಿಕೊಂಡ? ಎಂಬುದು ಗೊತ್ತಾಗಿಲ್ಲ. ವಿಡಿಯೊ ಮಾಡಿದವ ಆ ದೃಶ್ಯವನ್ನು ನೋಡಿಯೂ ಮುಂದೆ ಚಲಿಸಿದ್ದು ಗೊತ್ತಾಗುತ್ತದೆ. ವಿಡಿಯೊಕ್ಕೆ 1.6 ಮಿಲಿಯನ್ಗಳಷ್ಟು ವೀವ್ಸ್ ಬಂದಿದೆ. ದೃಶ್ಯ ಶಾಕ್ ತರುವಂತಿದೆ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ.