ಬೆಂಗಳೂರು: ಕಳ್ಳರು ಒಂದಿಲ್ಲೊಂದು ಸುಳಿವು ಬಿಟ್ಟೇ ಹೋಗಿರುತ್ತಾರೆ ಎನ್ನುವ ಮಾತಿದೆ. ಆದರೆ ಇಲ್ಲಿ ಕಳ್ಳ ತಾನು ಕಳ್ಳತನ ಮಾಡಿದ ಮದ್ಯದ ಬಾಟಲಿಗಳನ್ನೇ ಬಿಟ್ಟು ಹೋಗಬೇಕಾಗಿ ಬಂದಿದೆ. ಕಳ್ಳ ಜಾಣ್ಮೆ ತೋರಿಸಲು ಹೋಗಿ ಮೂರ್ಖನಾದ ವಿಡಿಯೊವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್‌ (Viral Video) ಆಗುತ್ತಿದೆ.
ಕಳ್ಳನೊಬ್ಬ ಮದ್ಯದ ಅಂಗಡಿಗೆ ಸಾಮಾನ್ಯ ಗ್ರಾಹಕನಂತೆ ಹೋಗುತ್ತಾನೆ. ತನಗೆ ಬೇಕಾದ ದೊಡ್ಡದೊಂದು ಮದ್ಯದ ಬಾಟಲಿಯನ್ನು ಎತ್ತಿಕೊಳ್ಳುತ್ತಾನೆ. ಅಲ್ಲಿಂದ ನೇರವಾಗಿ ಬಿಲ್ಲಿಂಗ್‌ ಕೌಂಟರ್‌ನತ್ತ ಹೋಗುವಂತೆ ಮಾಡುವ ಆತ ಅಲ್ಲಿ ಬಿಲ್‌ ಮಾಡಿಸದೆಯೇ ಮುಖ್ಯ ದ್ವಾರದ ಕಡೆ ಓಡುತ್ತಾನೆ.
ಇದನ್ನೂ ಓದಿ: Viral Video : ಗಡಿ ದಾಟಿ ಭಾರತಕ್ಕೆ ನುಗ್ಗಿದ ಬಾಂಗ್ಲಾ ಯೋಧರು! ಅಟ್ಟಾಟಿಸಿಕೊಂಡು ಒದ್ದೋಡಿಸಿದ ಹಳ್ಳಿಗರು
ಮುಖ್ಯ ದ್ವಾರ ಮುಚ್ಚಿರುವುದು ಆತನಿಗೆ ಅಲ್ಲಿಗೆ ಹೋದ ನಂತರವೇ ತಿಳಿಯುತ್ತದೆ. ಅದನ್ನು ತೆರೆಯಲೆಂದು ಸಾಕಷ್ಟು ಪ್ರಯತ್ನ ಮಾಡುತ್ತಾನಾದರೂ ಅದರ ರಿಮೋಟ್‌ ಬಿಲ್ಲಿಂಗ್‌ ಮಾಡಿಸುವ ಸಿಬ್ಬಂದಿ ಬಳಿ ಇರುತ್ತದೆಯಾದ್ದರಿಂದ ಬಾಗಿಲನ್ನು ತೆರೆಯಲು ಸಾಧ್ಯವಾಗುವುದಿಲ್ಲ. ಸಿಟ್ಟು ಮತ್ತು ಬೇಜಾರಿನಿಂದ ಕಳ್ಳ ಕದ್ದ ಮದ್ಯವನ್ನು ವಾಪಸು ಬಿಲ್ಲಿಂಗ್‌ ಕೌಂಟರ್‌ ಬಳಿ ತಂದಿರಿಸುತ್ತಾನೆ. ನಂತರ ಮುಖ್ಯ ಬಾಗಿಲ ಬಳಿ ಹೋದಾಗ ಸಿಬ್ಬಂದಿ ಅದರ ಲಾಕ್‌ ತೆಗೆಯುತ್ತಾಳೆ. ಆತ ನಿರಾಸೆಯಿಂದ ಹೊರ ನಡೆಯುತ್ತಾನೆ.
ಈ ವಿಡಿಯೊವನ್ನು ದಿ ಬಾಟೆಲ್‌ ಒ ಬೀಚ್‌ಬೋರೊ ಹೆಸರಿನ ಮದ್ಯದಂಗಡಿ ತನ್ನ ಫೇಸ್‌ಬುಕ್‌ ಖಾತೆಯಲ್ಲಿ ಹಂಚಿಕೊಂಡಿದೆ. ಯಾರಿಗಾದರೂ ಈತ ಗೊತ್ತೇ ಎಂದು ವಿಡಿಯೊದಲ್ಲಿ ಕೇಳಲಾಗಿದೆ. ಈ ವಿಡಿಯೊ ಈಗಾಗಲೇ ಫೇಸ್‌ಬುಕ್‌ನಲ್ಲಿ 25 ಸಾವಿರಕ್ಕೂ ಅಧಿಕ ಮಂದಿಯಿಂದ ವೀಕ್ಷಣೆಗೊಂಡಿದೆ. ಸಾವಿರಾರು ಮಂದಿ ವಿಡಿಯೊಗೆ ಲೈಕ್‌ ಮಾಡಿದ್ದಾರೆ. ಹಾಗೆಯೇ ತರೇವಾರು ಕಾಮೆಂಟ್‌ಗಳನ್ನೂ ಮಾಡಿದ್ದಾರೆ. ಕಳ್ಳ ಸೋತಿದ್ದರ ಬಗ್ಗೆ ಅನೇಕರು ಮಾತನಾಡಿದ್ದರೆ, ಸಿಬ್ಬಂದಿಯ ರಕ್ಷಣೆ ಬಗ್ಗೆ ಅನೇಕರು ಕಾಳಜಿ ವ್ಯಕ್ತಪಡಿಸಿದ್ದಾರೆ.