ಹೊಸದಿಲ್ಲಿ: ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರಾದ ಬಿಲ್ ಗೇಟ್ಸ್ (Bill Gates) ಅವರೊಂದಿಗೆ ನಿನ್ನೆ ನಡೆಸಿದ ಸಂವಾದದ ಸಂದರ್ಭ ಪ್ರಧಾನ ಮಂತ್ರಿ ನರೇಂದ್ರ ಮೋದಿ (PM Narendra Modi) ಧರಿಸಿದ್ದು, ಮರುಬಳಕೆ (recycling) ಸಾಮಗ್ರಿಗಳಿಂದ ಮಾಡಿದ ಜಾಕೆಟ್! ಅದು ಪ್ಲಾಸ್ಟಿಕ್ ಬಾಟಲಿ ತ್ಯಾಜ್ಯ ಬಟ್ಟೆಯ (Waste Bottles) ತುಣುಕುಗಳಿಂದ ತಯಾರಿಸಿದ್ದು ಎಂದು ಗೊತ್ತಾಗಿದೆ.
ಮತ್ತು, ಪ್ರಧಾನಿಯವರು ಚರ್ಚಿಸಿದ್ದು ಕೂಡ ಮರುಬಳಕೆಯ ಪ್ರಾಮುಖ್ಯತೆಯ ಬಗ್ಗೆಯೇ ಆಗಿತ್ತು. “ಮರುಬಳಕೆ ಭಾರತೀಯರ ಸ್ವಭಾವಕ್ಕೆ ಅಂತರ್ಗತವಾಗಿದೆ” ಎಂದು ಪ್ರಧಾನಿ ಗೇಟ್ಸ್‌ಗೆ ಹೇಳಿದರು. ಅವರು ಧರಿಸಿದ ತೋಳಿಲ್ಲದ ಸದ್ರಿ ಅಥವಾ ನೆಹರು ಜಾಕೆಟ್‌ನ ಉದಾಹರಣೆಯನ್ನು ನೀಡಿದರು. ಅದನ್ನು ಮರುಬಳಕೆಯ ಪ್ಲಾಸ್ಟಿಕ್ ಬಾಟಲಿ ತ್ಯಾಜ್ಯ ಮತ್ತು ಟೈಲರ್ ಅಂಗಡಿಗಳಲ್ಲಿ ಉಳಿದ ಬಟ್ಟೆಯ ತುಣುಕುಗಳಿಂದ ತಯಾರಿಸಲಾಗುತ್ತದೆ ಎಂದು ಅವರು ಹೇಳಿದರು.
ಜಾಕೆಟ್‌ನತ್ತ ಬೊಟ್ಟು ಮಾಡಿದ ಮೋದಿ, “ಇದು ವಿಶೇಷವಾದುದು. ಈ ಜಾಕೆಟ್‌ನ ಫ್ಯಾಬ್ರಿಕ್‌ನಲ್ಲಿ ಶೇಕಡಾ 30-40ರಷ್ಟು ಮರುಬಳಕೆಯ ಪ್ಲಾಸ್ಟಿಕ್ ಬಾಟಲಿಗಳಿವೆ” ಎಂದರು. ಕಳೆದ ವರ್ಷ, ಸಂಸತ್ ಅಧಿವೇಶನದ ವೇಳೆಯಲ್ಲಿ, ಮರುಬಳಕೆಯ ಪ್ಲಾಸ್ಟಿಕ್ ಬಾಟಲಿಗಳಿಂದ ಮಾಡಿದ ತೋಳಿಲ್ಲದ ಜಾಕೆಟ್ ಅನ್ನು ಪ್ರಧಾನಿ ಧರಿಸಿದ್ದರು. ಆ ಸಮಯದಲ್ಲೂ ಮೋದಿ ರಾಜ್ಯಸಭೆಯಲ್ಲಿ ಕೂರುತ್ತಿದ್ದಂತೆ ತಿಳಿ ನೀಲಿ ಬಣ್ಣದ “ಸದ್ರಿ” ಜಾಕೆಟ್ ಹಲವರ ಗಮನ ಸೆಳೆದಿತ್ತು.
ಇಂಡಿಯನ್ ಆಯಿಲ್ ಕಾರ್ಪೊರೇಶನ್‌ನ (ಐಒಸಿ) ʼಅನ್‌ಬಾಟಲ್ಡ್’ ಉಪಕ್ರಮದ ಉತ್ಪನ್ನವಾದ ಜಾಕೆಟ್ ಅನ್ನು ಬೆಂಗಳೂರಿನಲ್ಲಿ ನಡೆದ ಇಂಡಿಯಾ ಎನರ್ಜಿ ವೀಕ್‌ನಲ್ಲಿ ಪ್ರಧಾನ ಮಂತ್ರಿಯವರಿಗೆ ನೀಡಲಾಗಿತ್ತು. ಏಕಬಳಕೆಯ ಪ್ಲಾಸ್ಟಿಕ್ ಅನ್ನು ತೊಡೆದುಹಾಕಲು ಮೋದಿಯವರ ಉತ್ತೇಜನಕ್ಕೆ ಅನುಗುಣವಾಗಿ IOC, ಚಿಲ್ಲರೆ ಗ್ರಾಹಕ ಪರಿಚಾರಕರು ಮತ್ತು ಮರುಬಳಕೆಯ ಪಾಲಿಡಿಸ್ಕ್ಯೂಸ್ಟರ್ (rPET) ಮತ್ತು ಹತ್ತಿಯಿಂದ ತಯಾರಿಸಿದ LPG ವಿತರಣಾ ಸಿಬ್ಬಂದಿಗೆ ಸಮವಸ್ತ್ರವನ್ನು ಪರಿಚಯಿಸಿದೆ.
ಭಾರತೀಯ ಜನತಾ ಪಾರ್ಟಿ (ಬಿಜೆಪಿ) ನಾಯಕರು ಮೋದಿಯವರ ಉಡುಪಿನ ಆಯ್ಕೆಯನ್ನು ಶ್ಲಾಘಿಸಿದ್ದು, ಹವಾಮಾನ ಬದಲಾವಣೆ ಮತ್ತು ಜಾಗತಿಕ ತಾಪಮಾನ ಪರಿಹರಿಸುವ ನಿಟ್ಟಿನಲ್ಲಿ ಇದೊಂದು ನವೀನ ವಿಧಾನ ಎಂದು ಶ್ಲಾಘಿಸಿದರು. ಸಂಸದೀಯ ವ್ಯವಹಾರಗಳ ಸಚಿವ ಪ್ರಲ್ಹಾದ್ ಜೋಶಿ ಅವರು, “ಮೋದಿ ಜಿ ಕೇವಲ ಮಾತನಾಡುವುದಿಲ್ಲ, ಅವರು ನಡೆಯಲ್ಲೂ ಅದನ್ನು ಆಚರಿಸುತ್ತಾರೆ. ಹವಾಮಾನ ಪ್ರಜ್ಞೆಯನ್ನು ಉತ್ತೇಜಿಸಲು ಇದು ಉತ್ತಮ ಮಾರ್ಗವಾಗಿದೆ,” ಎಂದರು.
ಕೇಂದ್ರ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರು ತಮ್ಮ ವಾರ್ಡ್‌ರೋಬ್ ಆಯ್ಕೆಗಳ ಮೂಲಕ ಪರಿಸರ ಸ್ನೇಹಿ ಅಭ್ಯಾಸಗಳನ್ನು ಉತ್ತೇಜಿಸುತ್ತಿರುವ ಪ್ರಧಾನಿಯನ್ನು ಶ್ಲಾಘಿಸಿದರು. “ಪರಿಸರವನ್ನು ರಕ್ಷಿಸಲು ಮತ್ತು ಸಂರಕ್ಷಿಸಲು ವೈಯಕ್ತಿಕ ಮತ್ತು ಸಾಮುದಾಯಿಕ ಕ್ರಮಗಳನ್ನು ಕೈಗೊಳ್ಳಲು ಭಾರತವು ಜಾಗತಿಕ ಸಾಮೂಹಿಕ ಚಳುವಳಿಯನ್ನು ಮುನ್ನಡೆಸಲಿದೆ” ಎಂದು ಪುರಿ ಟ್ವೀಟ್ ಮಾಡಿದ್ದಾರೆ.
ಅಧಿಕಾರಿಗಳ ಪ್ರಕಾರ, IOC ಗ್ರಾಹಕ ಅಟೆಂಡೆಂಟ್‌ಗೆ ನೀಡುವ ಸಮವಸ್ತ್ರದ ಪ್ರತಿ ಸೆಟ್ ಸುಮಾರು 28 ಬಳಸಿದ PET ಬಾಟಲಿಗಳನ್ನು ಮರುಬಳಕೆ ಮಾಡುತ್ತದೆ. ಸಾರ್ವಜನಿಕ ವಲಯದ ಉದ್ಯಮವಾದ IOC, ಮರುಬಳಕೆಯ ಪಾಲಿಯೆಸ್ಟರ್‌ನಿಂದ ಮಾಡಲಾದ ಸುಸ್ಥಿರ ಉಡುಪುಗಳನ್ನು ನೀಡುವ ಬ್ರ್ಯಾಂಡ್‌ನ ʼಅನ್‌ಬಾಟಲ್ಡ್’ನೊಂದಿಗೆ ಈ ಉಪಕ್ರಮವನ್ನು ವಿಸ್ತರಿಸಿದೆ.
ಆರೋಗ್ಯ ಸಚಿವ ಮನ್ಸುಖ್ ಮಾಂಡವಿಯಾ ಅವರು ಸುಸ್ಥಿರ ಜೀವನದ ಮಹತ್ವವನ್ನು ಒತ್ತಿಹೇಳುತ್ತಾ, ಎಲ್ಲರಿಗೂ ಜೀವನ ಪಾಠ ಎಂದು ಮೋದಿಯವರ ಕ್ರಮದ ಮಹತ್ವವನ್ನು ಎತ್ತಿ ತೋರಿಸಿದ್ದಾರೆ. ಬಿಜೆಪಿ ನಾಯಕ ರಾಜ್ಯವರ್ಧನ್ ರಾಥೋಡ್ ಅವರೂ ಇದನ್ನು ಪ್ರತಿಧ್ವನಿಸಿದ್ದು, ಮೋದಿಯವರ ಆಯ್ಕೆಯು ಪರಿಸರ ಸ್ನೇಹಿ ಜೀವನಶೈಲಿಯು ಫ್ಯಾಶನ್ ಆಗಬಹುದು ಎಂಬುದನ್ನು ತೋರಿಸುತ್ತದೆ ಎಂದು ಹೇಳಿದ್ದಾರೆ.
ಬಿಜೆಪಿಯ ರಾಷ್ಟ್ರೀಯ ವಕ್ತಾರ ಸಂಬಿತ್ ಪಾತ್ರ ಅವರು, ಪರಿಸರ ಪರ ಉಪಕ್ರಮಗಳಿಗೆ ಪ್ರಧಾನಿಯವರ ಬದ್ಧತೆಯನ್ನು ಎತ್ತಿ ತೋರಿಸಿದ್ದಾರೆ. ಮರುಬಳಕೆಯ ಪ್ಲಾಸ್ಟಿಕ್ ಬಾಟಲಿಯ ಜಾಕೆಟ್ ಈ ತತ್ವಕ್ಕೆ ಸಾಕ್ಷಿಯಾಗಿದೆ ಎಂದು ಉಲ್ಲೇಖಿಸಿದ್ದಾರೆ. ಏತನ್ಮಧ್ಯೆ, ಮತ್ತೊಬ್ಬ ವಕ್ತಾರ ಶೆಹಜಾದ್ ಪೂನವಾಲಾ ಅವರು, ಮೋದಿ ಅವರ ಸುಸ್ಥಿರ ಫ್ಯಾಷನ್ ಮತ್ತು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ಸಂಸತ್ತಿನಲ್ಲಿ ದುಬಾರಿ ಲೂಯಿ ವಿಟಾನ್ ಸ್ಕಾರ್ಫ್ ಧರಿಸಿದ್ದರ ನಡುವೆ ಹೋಲಿಕೆ ಮಾಡಿದ್ದಾರೆ.
ಇದನ್ನೂ ಓದಿ: Narendra Modi: ದಕ್ಷಿಣ ಭಾರತದ ಚಹಾ ಸೇರಿ ಬಿಲ್ ಗೇಟ್ಸ್‌ಗೆ ಮೋದಿ ಕೊಟ್ಟ ದೇಶೀಯ ಗಿಫ್ಟ್‌ಗಳಿವು