ಮಣಿರತ್ನಂ ನಿರ್ದೇಶನದ ಪೊನ್ನಿಯಿನ್‌ ಸೆಲ್ವಂ ಚಿತ್ರದ ಮೂಲಕ ಮತ್ತೆ ಸುದ್ದಿಯಲ್ಲಿರುವ ಚಿರಯೌವನದ ೪೮ರ ಚೆಲುವೆ ಐಶ್ವರ್ಯಾ ರೈ ಬಚ್ಚನ್‌ ತಮ್ಮ ಮಾಸದ ಚೆಲುವಿನೊಂದಿಗೆ ತೆರೆಯ ಮೇಲೆ ಮಿಂಚುತ್ತಿದ್ದಾರೆ. ವಿಶ್ವಸುಂದರಿ ಪಟ್ಟವೇರಿ ಇಂದಿಗೂ ಅದೇ ಸೌಂದರ್ಯವನ್ನು ಉಳಿಸಿಕೊಂಡಿರುವ, ʻಬ್ಯೂಟಿ ವಿತ್‌ ಬ್ರೈನ್‌ʼ ಎಂದೇ ಹೆಸರಾಗಿರುವ ಐಶ್ ಚಿತ್ರರಂಗಕ್ಕೆ ಬಂದು ಇಷ್ಟು ವರ್ಷಗಳಾದರೂ ಇಂದಿಗೂ ತನ್ನ ಛಾಪನ್ನು ಉಳಿಸಿಕೊಂಡಿರುವುದು ಪೊನ್ನಿಯಿನ್‌ ಸೆಲ್ವಂ ಚಿತ್ರದ ಮೂಲಕ ಸಾಬೀತಾಗುತ್ತದೆ.
ಇನ್ನೂ ಹೊಳೆಯುವ ರಾಯಲ್‌ ಸೌಂದರ್ಯದಿಂದ ಮನಸೂರೆಗೊಳ್ಳುವ ಈ ಐಶ್ ಹೀಗೆ ಕಂಗೊಳಿಸಲು ಹೊಟ್ಟೆಗೇನು ತಿನ್ನುತ್ತಾರೆ ಎಂದು ತಮಾಷೆಯಾಗಿ ಜನಸಾಮಾನ್ಯರು ಕೇಳಬಹುದು. ಆದರೆ, ನಿಜವಾಗಿಯೂ ಆಹಾರದ ಬಗ್ಗೆ ವಿಪರೀತ ಕಾಳಜಿ ವಹಿಸುವ ಐಶ್ವರ್ಯಾ ರೈ ಬಚ್ಚನ್‌ ಅವರು ಇಷ್ಟಪಡುವ ಹಾಗೂ ದಿನನಿತ್ಯ ಆರೋಗ್ಯದ ದೃಷ್ಟಿಯಿಂದ ತಿನ್ನುವ ಆಹಾರಗಳೇನು ಎಂಬುದನ್ನು ಇಲ್ಲಿ ನೋಡೋಣ.
೧. ಐಶ್ವರ್ಯಾ ರೈ ಬಚ್ಚನ್‌ಗೆ ಮಂಗಳೂರು ಶೈಲಿಯ ಚಿಕನ್‌ ಕರಿ ಹಾಗೂ ಮೀನಿನ ಖಾದ್ಯಗಳು ಬಹಳ ಇಷ್ಟವಂತೆ. ಆದರೆ ಇವು ನಿತ್ಯದ ಸೇವನೆಯ ಲಿಸ್ಟಿನಲ್ಲಿ ಸೇರಿಸಿಲ್ಲ.
೨. ಐಶ್ ಅವರ ಬ್ಯೂಟಿ ಸೀಕ್ರೆಟ್‌ ಅಂದರೆ ತಪ್ಪಿಸದೆ ನಿತ್ಯ ಮಾಡುವ ಯೋಗ. ಈಕೆ ಪ್ರತಿನಿತ್ಯ ಜಿಮ್‌ ಮಾಡುವ ಮನಸ್ಥಿತಿಯವರಲ್ಲವಂತೆ. ಆದರೂ ವಾರದಲ್ಲಿ ಎರಡು ಬಾರಿ ಜಿಮ್‌ಗೆ ಹೋಗಿ ವ್ಯಾಯಾಮ ಮಾಡಿದರೆ, ವಾರಪೂರ್ತಿ ಮನೆಯಲ್ಲೇ ಯೋಗಾಭ್ಯಾಸವನ್ನು ತಪ್ಪದೆ ಮಾಡುತ್ತಾರಂತೆ.
ಇದನ್ನೂ ಓದಿ | Life lessons | ಹುಡುಗಿಯರೇ, 25ರೊಳಗೆ ನೀವು ಹೀಗಿದ್ದರೆ ಪ್ರಪಂಚ ಗೆದ್ದಂತೆ!
೩. ಐಶ್ವರ್ಯಾ ರೈ ಎಲ್ಲಿಗೇ ಶೂಟಿಂಗ್‌ಗೆಂದು ಹೋಗಲಿ, ಬೆಳಗ್ಗೆದ್ದ ಕೂಡಲೇ ಉಗುರು ಬೆಚ್ಚಗಿನ ನೀರಿಗೆ ನಿಂಬೆಹಣ್ಣು ಹಾಗೂ ಒಂದು ಚಮಚ ಜೇನುತುಪ್ಪ ಸೇರಿಸಿ ಕುಡಿಯುತ್ತಾರಂತೆ. ಇದು ದೇಹದ ಕಶ್ಮಲಗಳನ್ನೆಲ್ಲ ಹೊಡೆದೋಡಿಸುತ್ತದೆ ಎಂಬುದು ಅವರು ನಂಬಿಕೊಂಡು ಅನುಸರಿಸಿಕೊಂಡ ಬಂದ ಕಂಡುಕೊಂಡ ಸತ್ಯ.
೪. ಬೆಳಗ್ಗಿನ ತಿಂಡಿಗೆ ಐಶ್ ಹೆಚ್ಚೇನೂ ಸೇವಿಸುವುದಿಲ್ಲ. ತುಂಬ ಸರಳವಾದ ಬ್ರೌನ್‌ ಬ್ರೆಡ್‌ ಟೋಸ್ಟ್‌ ಜೊತೆಗೆ ಒಂದು ಬೌಲ್‌ನಲ್ಲಿ ಬೇಯಿಸಿದ ಓಟ್‌ಮೀಲನ್ನು ಸೇವಿಸುತ್ತಾರಂತೆ. ಇದಕ್ಕಿಂತ ಹೆಚ್ಚೇನನ್ನೂ ಬ್ರೇಕ್‌ಫಾಸ್ಟ್‌ಗೆ ತಿನ್ನುವುದಿಲ್ಲವಂತೆ.
೫. ಮಧ್ಯಾಹ್ನದೂಟವೂ ಅಷ್ಟೇ. ಬಹುತೇಕ ಸಿಂಪಲ್. ರೋಟಿ ಜೊತೆಗೆ ದಾಲ್‌ ತಡ್ಕಾ ಹಾಗೂ ಒಂದಿಷ್ಟು ಬೇಯಿಸಿದ ತರಕಾರಿಯನ್ನು ತಿನ್ನುವುದನ್ನು ರೂಢಿ ಮಾಡಿಕೊಂಡಿದ್ದಾರಂತೆ.
೬. ರಾತ್ರಿಯೂಟಕ್ಕೆ ಕೆಲವೊಮ್ಮೆ ಒಂದು ಸಣ್ಣ ತುಂಡು ಗ್ರಿಲ್‌ ಮಾಡಿದ ಮೀನು, ಕೇವಲ ಒಂದು ಕಪ್‌ ಅನ್ನ ಜೊತೆಗೊಂದಿಷ್ಟು ಬೇಯಿಸಿದ ತರಕಾರಿ. ಅಷ್ಟೇ. ರಾತ್ರಿಯೂಟ ಆದಷ್ಟೂ ಬೇಗ ಮಾಡಬೇಕು ಹಾಗೂ ಅಷ್ಟೇ ಲೈಟ್‌ ಆಗಿರಬೇಕು ಎಂಬುದನ್ನು ನಂಬಿ ನಡೆಯುತ್ತಾರಂತೆ ರೈ.
ಇದನ್ನೂ ಓದಿ | ಇದು ಅಪ್ಪ ಮಗಳ ಕಥೆ | ಸಿಂಗಲ್‌ ಅಪ್ಪ ಮಗಳಿಗೆ ಅಡುಗೆ ಕಲಿಸಿದ್ದೇ ಈಗ ಸಮಸ್ಯೆ!
೭. ಈ ಎಲ್ಲವುಗಳ ಮಧ್ಯೆ ಆಗಾಗ ತುಂಬ ನೀರು ಕುಡಿದು ದೇಹವನ್ನು ಸದಾ ಹೈಡ್ರೇಟೆಡ್‌ ಆಗಿಡುತ್ತಾರಂತೆ ಐಶ್. ಜೊತೆಗೆ ಹಣ್ಣು ತರಕಾರಿಗಳು ಯಥೇಚ್ಛವಾಗಿ ಪ್ರತಿದಿನ ಹೊಟ್ಟೆ ಸೇರುತ್ತವಂತೆ. ಸರಿಯಾದ ಆಹಾರ ಸೇವನೆಯೇ ದೇಹಸಿರಿ ಹಾಗೂ ಚರ್ಮದ ಆರೋಗ್ಯದ ಮೂಲ ಮಂತ್ರ ಎಂಬುದನ್ನು ನಂಬುವವರಂತೆ. ಸೌಂದರ್ಯದ ಗುಟ್ಟು ಅಡಗಿರುವುದೇ ನಾವು ತಿನ್ನುವ ಆಹಾರದಲ್ಲಿ ಎಂಬುದನ್ನು ನಂಬುವ ಐಶ್ ಆ ಬಗ್ಗೆ ಹೆಚ್ಚು ಕಾಳಜಿ ವಹಿಸುತ್ತಾರಂತೆ. ಸಿಂಪಲ್ ಆದ ಆದರೆ ಕಟ್ಟುನಿಟ್ಟಿನ ಈ ಆಹಾರ ಕ್ರಮವನ್ನು ಐಶ್ ಚಾಚೂ ತಪ್ಪದೆ ಪಾಲಿಸುತ್ತಾರಂತೆ. ಅದಕ್ಕಾಗಿಯೇ ೪೮ ವರ್ಷ ವಯಸ್ಸಾದರೂ ಈಗಲೂ ತೆರೆಯ ಮೇಲೆ ಅದೇ ರಾಯಲ್‌ ಲುಕ್‌ನೊಂದಿಗೆ ಗಮನ ಸೆಳೆಯುತ್ತಾರೆ! ಪೊನ್ನಿಯಿನ್‌ ಸೆಲ್ವಂ ನೋಡಿ ಐಶ್‌ಗೆ ಐಶ್ ಅಲ್ಲದೆ ಬೇರ್ಯಾರು ಸಾಟಿ ಎನ್ನುತ್ತಿದ್ದಾರಂತೆ!