ಆತನ ಕಥೆ ಆರಂಭ ಆಗೋದು ಹೀಗೆ!
ಅವನು ನ್ಯೂಜಿಲೆಂಡ್‌ ದೇಶದವನು. ಹುಟ್ಟಿದ್ದು 1959ರ ಸೆಪ್ಟೆಂಬರ್ 27ರಂದು. ಆತನಿಗೆ ಬಾಲ್ಯದಿಂದ ಸಾಹಸಿ ಕ್ರೀಡೆಗಳಲ್ಲಿ ಆಸಕ್ತಿ. ಪರ್ವತಾರೋಹಣ, ಟ್ರೆಕ್ಕಿಂಗ್ ಇವೆಲ್ಲವೂ ಅವನ ಪ್ಯಾಶನ್ ಆಗಿದ್ದವು. ಅದಕ್ಕೆ ಹೊಂದಿಕೊಳ್ಳುವ ಉದ್ಯೋಗ ಅವನಿಗೆ ದೊರಕಿತ್ತು.
ಅವನ ದೇಶದಲ್ಲಿ ಹಿಮಾವೃತವಾದ ಶಿಖರದಲ್ಲಿ ಒಂದು ನ್ಯಾಷನಲ್ ಪಾರ್ಕ್ ಇತ್ತು. ಅದು ಸಮುದ್ರ ಮಟ್ಟದಿಂದ ಸಾಕಷ್ಟು ಎತ್ತರ ಇತ್ತು. ಅದರ ಹೆಸರು ಮೌಂಟ್ ಕುಕ್ ನ್ಯಾಷನಲ್ ಪಾರ್ಕ್. ಅದನ್ನು ಏರುವ ಆರೋಹಿಗಳಿಗೆ ರಕ್ಷಣೆ ನೀಡುವ ಪಡೆಯಲ್ಲಿ ಅವನಿಗೆ ಉದ್ಯೋಗ ದೊರಕಿತು. ಅತ್ಯಂತ ಕಡಿದಾದ ಹಿಮದ ಪರ್ವತ ಅದು!
ಆದರೆ 1982ರ ಒಂದು ದಿನ ನಡೆಯಬಾರದ್ದು ನಡೆದು ಹೋಯಿತು!
ರಕ್ಷಣಾ ಕಾರ್ಯಾಚರಣೆಯ ಭಾಗವಾಗಿ ಅವನು ಶಿಖರವನ್ನು ಏರುತ್ತಿರುವಾಗ ಭಾರಿ ಹಿಮಪಾತ ಆಯಿತು. ಅವನು ಮತ್ತು ಅವನ ಗೆಳೆಯ ಫಿಲಿಪ್ ಡೂಲ್ ಇಬ್ಬರೂ ಒಂದು ಹಿಮದ ಗುಹೆಯಲ್ಲಿ ಸಿಕ್ಕಿ ಹಾಕಿಕೊಂಡರು. ಒಟ್ಟು 47 ದಿನಗಳ ಕಾಲ ಅವರಿಗೆ ಬಾಹ್ಯ ಪ್ರಪಂಚದ ಸಂಪರ್ಕವೇ ಇರಲಿಲ್ಲ. ಆಹಾರ, ನಿದ್ರೆ, ವಿಶ್ರಾಂತಿ ಯಾವುದೂ ಇಲ್ಲ. ಅವರ ಎರಡೂ ಕಾಲುಗಳು ಸೊಂಟದವರೆಗೆ ಹಿಮದಲ್ಲಿ ಹೂತು ಹೋಗಿದ್ದವು! ಹಿಮಪಾತ ನಿಂತು ಅವರು ಗುಹೆಯಿಂದ ಹೊರಗೆ ಬಂದಾಗ ಏನೋ ಕೊಳೆತ ವಾಸನೆ ಬರಲು ಆರಂಭ ಆಯಿತು.
ಹೌದು! ಅವರ ಎರಡೂ ಕಾಲುಗಳು ಹಿಮದಲ್ಲಿ ಸಿಲುಕಿ ರಕ್ತ ಸಂಚಾರ ಇಲ್ಲದೆ ಕೊಳೆತು ಹೋಗಿದ್ದವು! ಅವರಿಬ್ಬರ ಎರಡೂ ಕಾಲುಗಳನ್ನು ವೈದ್ಯರು ಮೊಣಗಂಟಿನವರೆಗೆ ಕತ್ತರಿಸಿ ತೆಗೆಯಬೇಕಾಯ್ತು! ಆಗ ಮಾರ್ಕ್ ಇಂಗ್ಲಿಸ್ ವಯಸ್ಸು ಕೇವಲ 23!
ಒಂದೆಡೆ ಅಸಾಧ್ಯ ಯಮಯಾತನೆ! ಇನ್ನೊಂದೆಡೆ ಅಸಹನೀಯ ಪರಾವಲಂಬಿ ಬದುಕು!
ಒಂದೆಡೆ ಅಪಾರವಾದ ನೋವು. ಇನ್ನೊಂದೆಡೆ ನೂರಾರು ಕನಸುಗಳು ಛಿದ್ರವಾದ ಅನುಭವ. ಮಾರ್ಕ್ ಹತ್ತಾರು ವರ್ಷಗಳನ್ನು ಹಾಸಿಗೆಗೆ ಒರಗಿ ಕಳೆಯಬೇಕಾಯಿತು. ಆಗ ಅವನ ಹೆಂಡತಿ ಆನ್ನಿ ಆತನ ನೆರವಿಗೆ ನಿಂತಳು. ಈ ಅಸಹನೀಯ ಸ್ಥಿತಿಯಲ್ಲಿ ಕೂಡ ಆತನ ಕ್ರಿಯಾತ್ಮಕವಾದ ಮೆದುಳು ಹೊಸದಾಗಿ ಯೋಚನೆ ಮಾಡಲು ಆರಂಭ ಆಯಿತು. ಅದೇ ಸ್ಥಿತಿಯಲ್ಲಿ ಅವನು ತನ್ನ ದೇಶದ ಲಿಂಕನ್ ಯೂನಿವರ್ಸಿಟಿ ಮೂಲಕ ಬಯೋಕೆಮಿಸ್ಟ್ರಿಯಲ್ಲಿ ಪದವಿ ಸಂಪಾದನೆ ಮಾಡುತ್ತಾನೆ. ಹಲವು ಪುಸ್ತಕ ಓದುತ್ತಾನೆ. ಸಂಶೋಧನೆಗೆ ಇಳಿಯುತ್ತಾನೆ. ತನ್ನದೇ ಆದ ಉದ್ಯಮವನ್ನು ಆರಂಭ ಮಾಡುತ್ತಾನೆ.
ಕೃತಕ ಕಾಲು ಜೋಡಿಸಿ ಮತ್ತೆ ಸಾಹಸಗಳ ಆರಂಭ!
ಎರಡೂ ಕಾಲುಗಳಿಗೆ ಕೃತಕ ಕಾಲುಗಳನ್ನು ಜೋಡಿಸಿ ಮಾರ್ಕ್ ಮೊದಲು ನಡೆಯಲು ಕಲಿಯುತ್ತಾನೆ. ನಿಧಾನವಾಗಿ ಓಡಲು ಕಲಿಯುತ್ತಾನೆ. ಸಣ್ಣ ಪುಟ್ಟ ಬೆಟ್ಟಗಳನ್ನು ಮತ್ತೆ ಏರಲು ಆರಂಭ ಮಾರುತ್ತಾನೆ. ಸೈಕ್ಲಿಂಗ್ ಕಲಿಯುತ್ತಾನೆ. ತನ್ನ ಕಾಲುಗಳು ಕೃತಕ ಎಂಬುದನ್ನು ಪೂರ್ತಿ ಮರೆಯುತ್ತಾನೆ! ಹಿಮ ಪರ್ವತಗಳಲ್ಲಿ ಜಾರುವ ಸ್ಕೀಯಿಂಗ್ ಸ್ಪರ್ಧೆಯಲ್ಲಿ ಪಾಲುಗೊಳ್ಳುತ್ತಾನೆ! ತನ್ನ ಅದ್ಭುತ ಆತ್ಮವಿಶ್ವಾಸ ಮತ್ತು ಸಂಕಲ್ಪ ಶಕ್ತಿಯಿಂದ ಒಂದೊಂದೇ ಸಾಹಸಗಳನ್ನು ಮತ್ತೆ ಆರಂಭ ಮಾಡುತ್ತಾನೆ!
2000ರಲ್ಲಿ ಒಲಿಂಪಿಕ್ಸ್ ಮೆಡಲ್ ಬಂತು!
2000ರ ಸಿಡ್ನಿ ಪಾರಾ ಒಲಿಂಪಿಕ್ಸ್ ಕೂಟದಲ್ಲಿ ಸೈಕ್ಲಿಂಗ್ ಸ್ಪರ್ಧೆಯಲ್ಲಿ ಭಾಗವಹಿಸಿ ಮಾರ್ಕ್ ಇಂಗ್ಲಿಸ್ ಬೆಳ್ಳಿಯ ಪದಕ ಗೆದ್ದುಕೊಂಡಾಗ ಆತನ ಬಗ್ಗೆ ಲೀಡಿಂಗ್ ಪತ್ರಿಕೆಗಳು ಬಹು ದೊಡ್ಡ ಸ್ಟೋರಿ ಬರೆಯುತ್ತವೆ. ಇಡೀ ಜಗತ್ತು ಮಾರ್ಕ್ ಸಾಧನೆಗಳನ್ನು ದೊಡ್ಡದಾಗಿ ಗಮನಿಸಲು ಆರಂಭ ಮಾಡುತ್ತದೆ. ಮುಂದಿನ ವರ್ಷ ಆತ ಅಂತಾರಾಷ್ಟ್ರೀಯ ಸ್ಕೀಯಿಂಗ್ ಸ್ಪರ್ಧೆಯಲ್ಲಿ ಭಾಗವಹಿಸಿ ಬಹು ದೊಡ್ಡ ಸಾಧನೆ ದಾಖಲು ಮಾಡುತ್ತಾನೆ. 2002ರಲ್ಲಿ ತನ್ನ ಕಾಲು ಕತ್ತರಿಸಲು ಕಾರಣವಾದ ಮೌಂಟ್ ಕುಕ್ ಹಿಮ ಪರ್ವತವನ್ನು ಮತ್ತೆ ಏರುತ್ತಾನೆ! ಎರಡು ವರ್ಷಕ್ಕೊಮ್ಮೆ ಹೊಸ ಹೊಸ ದಾಖಲೆಗಳನ್ನು ಮಾಡುತ್ತಾ ಎಲ್ಲರೂ ವಿಸ್ಮಯ ಪಡುವಂತೆ ಮಾಡುತ್ತಾನೆ!
2004ರಲ್ಲೀ ‘ ಚೋ ಓಯು ‘ ಶಿಖರ ಒಲಿಯಿತು!
ಮಾರ್ಕ್ ಸಾಧನೆಗೆ ಈಗ ಮಿತಿಯೇ ಇರಲಿಲ್ಲ. 2004ರ ತನ್ನ ಹುಟ್ಟುಹಬ್ಬದ ದಿನ ಜಗತ್ತಿನ ಆರನೇ ಅತೀ ಎತ್ತರದ ಶಿಖರ ‘ಚೋ ಓಯೂ’ ಅವನು ಗೆದ್ದಾಗಿತ್ತು! ಕೃತಕ ಕಾಲುಗಳಿಂದ ಆತ ಆ ಶಿಖರ ಏರಿದ ಜಗತ್ತಿನ ಮೊದಲ ವ್ಯಕ್ತಿಯಾಗಿ ದಾಖಲೆ ಬರೆದಿದ್ದ!
ಇನ್ನೊಂದೇ ಶಿಖರ ಬಾಕಿ, ಅದು ಮೌಂಟ್ ಎವರೆಸ್ಟ್!
ನಾನು ಹೇಳುತ್ತಾ ಹೋಗುವುದು ಸುಲಭ! ಆದರೆ ಕೃತಕ ಕಾಲುಗಳಿಂದ ಬ್ಯಾಲೆನ್ಸ್ ಮಾಡಿ, ಕ್ಲಿಫ್ ಹ್ಯಾಂಗರ್ ಮೂಲಕ ದೇಹವನ್ನು ಎತ್ತಿ ಹಿಮಶಿಖರ ಏರುವುದು ಖಂಡಿತ ಸುಲಭ ಅಲ್ಲ! ಆದರೆ ಎಣೆಯಿಲ್ಲದ ಇಚ್ಛಾಶಕ್ತಿಗೆ ಅಸಾಧ್ಯ ಯಾವುದು?
2006 ರಲ್ಲಿ ಜಗತ್ತಿನ ಅತೀ ಎತ್ತರದ ಶಿಖರ ಮೌಂಟ್ ಎವರೆಸ್ಟ್ ಏರುವ ಪ್ರಯತ್ನ ಆರಂಭ ಆಯಿತು. ಕನಸು ದೊಡ್ಡದು ಇತ್ತು! ಆದರೆ ಸವಾಲುಗಳು ಶಿಖರದಷ್ಟೆ ಎತ್ತರ ಇತ್ತು!
ಅದುವರೆಗೆ ಕಾಲಿಲ್ಲದ ವ್ಯಕ್ತಿ ಯಾರೂ ಆ ಶಿಖರ ಏರಿರಲಿಲ್ಲ! ಅದರಿಂದ ನೋಂದಣಿ ತುಂಬಾ ಕಷ್ಟ ಆಯಿತು. ಶೆರ್ಪಾಗಳು ತರಬೇತು ಕೊಡಲು ಹಿಂದೆ ಮುಂದೆ ನೋಡಿದರು. ರೆಸ್ಕ್ಯೂ ಸಪೋರ್ಟ್ ದೊರೆಯಲಿಲ್ಲ! ಕೊನೆಗೆ ತನಗೆ ಏನಾದರೂ ನಾನೇ ಹೊಣೆ ಎಂದು ಬರೆದು ಸಹಿ ಮಾಡಿಕೊಟ್ಟ ಮೇಲೆ ಅನುಮತಿ ದೊರೆಯಿತು!
ಆ 47 ದಿನಗಳ ಆರೋಹಣ..!
2006 ಏಪ್ರಿಲ್ ತಿಂಗಳಲ್ಲಿ ಆತನ ಸಾಹಸ ಆರಂಭ ಆಯಿತು. ಕೃತಕ ಕಾಲುಗಳಲ್ಲಿ ಏರುವುದು ಬಹಳ ಕಷ್ಟ ಆಗುತ್ತಿತ್ತು. ಅದರಲ್ಲೂ ಆಗ ಆತನಿಗೆ 47 ವರ್ಷ ದಾಟಿತ್ತು! ಮನಸು ಹೇಳಿದ್ದನ್ನು ದೇಹ ಕೇಳುತ್ತಿರಲಿಲ್ಲ! ಆದರೆ ಗೆಲ್ಲಬೇಕು ಎನ್ನುವ ಹಂಬಲ ಇದೆಯಲ್ಲ, ಅದಕ್ಕೆ ಸೋಲಿದೆಯಾ?
6400 ಮೀಟರ್ ಎತ್ತರ ಏರಿ ನಿಂತಾಗ ಆತನ ಒಂದು ಕಾಲಿನ ಕೃತಕ ಕಾಲು ಅರ್ಧ ತುಂಡಾಯಿತು! ಆತನ ಜೊತೆಗೆ ಇದ್ದ ಶೇರ್ಫಾಗಳು ಸಾಕು, ಹಿಂದೆ ಹೋಗೋಣ ಎಂದರು! ಆದರೆ ಮಾರ್ಕ್ ಕೇಳಲೇ ಇಲ್ಲ. ಕೃತಕ ಕಾಲನ್ನು ಮತ್ತೆ ಫಿಟ್ ಮಾಡುವ ಎಲ್ಲ ಪ್ರಯತ್ನಗಳು ಸೋತವು! ಕೊನೆಗೆ ಬೇಸ್ ಕ್ಯಾಂಪನಿಂದ ಇನ್ನೊಂದು ಕೃತಕ ಕಾಲು ತರಿಸಿ ಜೋಡಿಸಿದ ನಂತರ ಆತನ ಪ್ರಯಾಣ ಮುಂದುವರೆಯಿತು!
2006 ಮೇ 15ರಂದು ಮೌಂಟ್ ಎವರೆಸ್ಟ್ ಶಿಖರ ಆತನ ಪಾದಗಳ ಕೆಳಗಿತ್ತು!
ಅದಮ್ಯ ಉತ್ಸಾಹ, ದಣಿವು ಇಲ್ಲದ ಚೇತನ ಮತ್ತು ಎಂದೂ ಸೋಲನ್ನು ಒಪ್ಪಿಕೊಳ್ಳದ ಮನಸ್ಥಿತಿಯ ಮುಂದೆ ಮೌಂಟ್ ಎವರೆಸ್ಟ್ ಅಂದು ಶರಣಾಗಿತ್ತು! ಮೇ 15ರಂದು ಇಡೀ ಶಿಖರವೆ ಮಾರ್ಕ್ ಇಂಗ್ಲಿಸ್ ಕಾಲ ಕೆಳಗಿತ್ತು! ಎರಡೂ ಕಾಲುಗಳಿಲ್ಲದೆ ಕೃತಕ ಕಾಲುಗಳಿಂದ ಮೌಂಟ್ ಎವರೆಸ್ಟ್ ಏರಿದ ಜಗತ್ತಿನ ಮೊದಲ ವ್ಯಕ್ತಿಯಾಗಿ ಆತನ ಹೆಸರು ದಾಖಲಾಗಿತ್ತು!
ಮುಂದೆ ಅವನು ಮೋಟಿವೇಶನಲ್ ಸ್ಪೀಕರ್ ಆಗಿ ಬದಲಾಗುತ್ತಾನೆ! ಆವನ ಮಾತುಗಳ ವಿಡಿಯೊ ನೋಡುವಾಗ, ಕೇಳುವಾಗ ರೋಮಾಂಚನ ಆಗುತ್ತದೆ. ಆತ ಹಲವಾರು ಬಾರಿ ಭಾರತಕ್ಕೂ ಬಂದು ಹಲವು ಕಡೆ ಭಾಷಣ ಮಾಡಿ ಹೋಗಿದ್ದಾನೆ. ತನ್ನ ಸಾಹಸದ ಮೇಲೆ ನಾಲ್ಕು ಪುಸ್ತಕಗಳನ್ನು ಬರೆದಿದ್ದಾನೆ. ‘ನೋ ಲೆಗ್ಸ್ ಆನ್ ಎವರೆಸ್ಟ್’ ಆತನ ಅತ್ಯಂತ ಜನಪ್ರಿಯ ಪುಸ್ತಕ.
ತನ್ನ ಅದ್ಭುತ ಆತ್ಮವಿಶ್ವಾಸ ಮತ್ತು ಸಾಹಸಗಳ ಮೂಲಕ ಮಾರ್ಕ್ ಇಂಗ್ಲಿಸ್ ನಮಗೆಲ್ಲ ಪ್ರೇರಣೆ ಆಗಿ ನಿಲ್ಲುತ್ತಾನೆ.
ಇದನ್ನೂ ಓದಿ | ರಾಜ ಮಾರ್ಗ | ಬಲಗಾಲು ಕತ್ತರಿಸುವಾಗ ಆಕೆ ಚೀರಿ ಚೀರಿ ಕೇಳಿದ್ದು ಒಂದೇ ಪ್ರಶ್ನೆ: ಡಾಕ್ಟರ್‌ ನಾನು ಮತ್ತೆ ಡ್ಯಾನ್ಸ್‌ ಮಾಡಬಹುದಾ?