ಹೈದರಾಬಾದ್: ನಗರದ 48 ವರ್ಷದ ವ್ಯಕ್ತಿಯೊಬ್ಬ ತನ್ನ ಪ್ರೇಯಸಿಯನ್ನು ಕೊಂದು 6 ತುಂಡುಗಳಾಗಿ ಕತ್ತರಿಸಿ ಫ್ರಿಜ್‌ನಲ್ಲಿ ಅಡಗಿಸಿಟ್ಟು ಬರ್ಬರತೆ ಮೆರೆದಿದ್ದಾನೆ. ವಾಸನೆ ಬರತೊಡಗಿ ಪರಿಶೀಲಿಸಿದಾಗ ಕೃತ್ಯ ಹೊರಬಿದ್ದಿದೆ.
ಪಾತಕಿಯನ್ನು ಚಂದ್ರಮೋಹನ್‌ ರೆಡ್ಡಿ (48) ಎಂದು ಗುರುತಿಸಲಾಗಿದೆ. ಯರ್ರಂ ಅನುರಾಧ ರೆಡ್ಡಿ (55) ಎಂಬಾಕೆಯ ಜತೆಗೆ ಈತ ಅಕ್ರಮ ಸಂಬಂಧ ಹೊಂದಿದ್ದ. ಸುಮಾರು 7 ಲಕ್ಷ ರೂಪಾಯಿಗಳಷ್ಟು ಸಾಲವನ್ನು ಈತ ಆಕೆಯ ಬಳಿ ಮಾಡಿದ್ದು, ಆಕೆ ಮರಳಿ ಕೇಳಿದಾಗ ಆಕೆಯನ್ನು ಕೊಂದು ಹಾಕಿದ್ದಾನೆ.
ಪ್ರಕರಣ ಬಯಲಿಗೆ ಬಂದುದು ಹೀಗೆ: ಮೊದಲಿಗೆ ಆಕೆಯ ಕತ್ತರಿಸಿದ ತಲೆ ಕಸದ ತೊಟ್ಟಿಯಲ್ಲಿ ಕಂಡುಬಂದಿತ್ತು. ಇದರ ಹಿಂದೆ ಹೋದ ಪೊಲೀಸರಿಗೆ ಪಾತಕಿ ಸಿಕ್ಕಿಬಿದ್ದಿದ್ದ. ದೇಹದ ಇತರ ಭಾಗಗಳು ಫ್ರಿಜ್‌ನಲ್ಲಿ ಕಂಡುಬಂದಿದ್ದವು. ಇನ್ನಿತರ ಹಲವು ಭಾಗಗಳನ್ನು ಕತ್ತರಿಸಿ ಸೂಟ್‌ಕೇಸ್‌ನಲ್ಲಿ ತುಂಬಿಸಿಟ್ಟಿದ್ದ. ಚೂರಿಯಿಂದ ಇರಿದು ಆಕೆಯನ್ನು ಕೊಂದಿದ್ದ ಪಾತಕಿ, ಕಲ್ಲು ಕತ್ತರಿಸುವ ಯಂತ್ರದಿಂದ ದೇಹದ ಭಾಗಗಳನ್ನು ಕತ್ತರಿಸಿದ್ದ.
ಷೇರ್‌ ಮಾರುಕಟ್ಟೆಯಲ್ಲಿ ಹಣ ತೊಡಗಿಸಿದ್ದ ಈತ, ಪ್ರೇಯಸಿ ಅನುರಾಧ ಬಳಿ 7 ಲಕ್ಷ ರೂ. ಹಣ ಪಡೆದಿದ್ದ. ಆಕೆ ಈತನ ಮನೆಯ ಕೆಳಮಹಡಿಯಲ್ಲಿ ವಾಸವಾಗಿದ್ದಳು. ಪತಿಯನ್ನು ಕಳೆದುಕೊಂಡಿದ್ದ ಈಕೆಯೊಂದಿಗೆ ಸುಮಾರು 15 ವರ್ಷಗಳಿಂದ ಈತ ಅಕ್ರಮ ಸಂಬಂಧ ಹೊಂದಿದ್ದ ಎನ್ನಲಾಗಿದೆ. ಇದೀಗ ಪೊಲೀಸರ ಕಸ್ಟಡಿಯಲ್ಲಿದ್ದಾನೆ.
ಇದನ್ನೂ ಓದಿ: Murder case: ಶೀಲ ಶಂಕಿಸಿ ಪತ್ನಿಯ ಕೊಲೆ ಮಾಡಿದ ಶಿಕ್ಷಕ; ಮನೆಗೆ ಬೀಗ ಹಾಕಿ ಪರಾರಿ