ಲಾಹೋರ್‌: ಪಾಕಿಸ್ತಾನದಲ್ಲಿ ಹಿಂದೂ ಸೇರಿ ಅಲ್ಪಸಂಖ್ಯಾತರ ಮೇಲೆ ದೌರ್ಜನ್ಯ ನಿರಂತರ. ಈಗ ಇನ್ನೊಂದು ಕ್ರೌರ್ಯ ಬೆಳಕಿಗೆ ಬಂದಿದೆ. ಇಲ್ಲಿನ ಪಂಜಾಬ್‌ ಪ್ರಾಂತ್ಯದಲ್ಲಿ ಇಬ್ಬರು ಹಿಂದೂ ಬಾಲಕಿಯರ ಮೇಲೆ ಅತ್ಯಾಚಾರವಾಗಿದೆ. ಇವರಿಬ್ಬರೂ ಸೋದರಿಯರು ಆಗಿದ್ದು, ಇಬ್ಬರು ಪುರುಷರಿಂದ ಅತ್ಯಾಚಾರಕ್ಕೀಡಾಗಿದ್ದಾರೆ. ಸಂತ್ರಸ್ತೆಯಲ್ಲಿ ಇಬ್ಬರಲ್ಲಿ ಒಬ್ಬಳಿಗೆ 16ವರ್ಷವಾಗಿದ್ದು, ಇನ್ನೊಬ್ಬಾಕೆಗೆ 17 ವರ್ಷ ವಯಸ್ಸು.
ಲಾಹೋರ್‌ನಿಂದ 300ಕಿಮೀ ದೂರದಲ್ಲಿರುವ ಫೋರ್ಟ್‌ ಅಬ್ಬಾಸ್‌ನ ಬಹವಾಲ್‌ನಗರದ ನಿವಾಸಿಗಳು. ಜೂ.5ರಂದು ಮುಂಜಾನೆ 5ಗಂಟೆಗೆ ಸೋದರಿಯರಿಬ್ಬರೂ ಬಹಿರ್ದೆಸೆಗೆ ಸಮೀಪದ ಹೊಲದ ಬಳಿ ಹೋಗಿದ್ದರು. ಆಗ ಇಬ್ಬರು ಪುರುಷರು ಅಪ್ರಾಪ್ತೆಯರಿಗೆ ಬಂದೂಕು ತೋರಿಸಿ, ಗುಂಡು ಹಾರಿಸುವುದಾಗಿ ಹೆದರಿಸಿ ರೇಪ್‌ ಮಾಡಿದ್ದಾರೆ ಎಂದು ಸ್ಥಳೀಯ ಪೊಲೀಸ್‌ ಅಧಿಕಾರಿ ಇರ್ಶಾದ್‌ ಯಾಕೂಬ್‌ ಹೇಳಿದ್ದಾಗಿ ಪಿಟಿಐ ವರದಿ ಮಾಡಿದೆ.
ಆರೋಪಿಗಳಾದ ಉಮೇರ್‌ ಅಷ್ಫಾಕ್‌ ಮತ್ತು ಕಶೀಫ್‌ ಅಲಿ ಇಬ್ಬರೂ ಕೃತ್ಯ ಎಸಗಿ ಅಲ್ಲಿಂದ ಓಡಿ ಹೋಗಿದ್ದರು. ಇದರಲ್ಲಿ ಕಶೀಫ್‌ ಒಂದು ಪ್ರಭಾವಿ ಕುಟುಂಬಕ್ಕೆ ಸೇರಿದಾತ. ಹಾಗಾಗಿ ಸ್ಥಳೀಯರು ಒಂದಷ್ಟು ಜನ ಸೇರಿ ಪ್ರಕರಣವನ್ನು ಮುಚ್ಚಿಹಾಕಲು ಪ್ರಯತ್ನಿಸಿದ್ದರು. ಸಂತ್ರಸ್ತೆಯರ ಕುಟುಂಬದೊಂದಿಗೆ ಈ ಬಗ್ಗೆ ಮಾತುಕತೆಯನ್ನೂ ನಡೆಸಿದ್ದರು. ಆದರೆ ಹುಡುಗಿಯರ ತಂದೆ ಅದನ್ನು ಕೇಳುವ ಸ್ಥಿತಿಯಲ್ಲಿ ಇರಲಿಲ್ಲ. ಇಬ್ಬರ ವಿರುದ್ಧವೂ ದೂರು ಕೊಟ್ಟಿದ್ದಾರೆ. ಅದರ ಅನ್ವಯ ಕ್ರಮ ಕೈಗೊಳ್ಳಲಾಗಿದೆ. ಆದರೆ ಉಮೇರ್‌ನನ್ನು ಮಾತ್ರ ಬಂಧಿಸಲು ಸಾಧ್ಯವಾಗಿದ್ದು, ಕಶೀಫ್‌ ನಿರೀಕ್ಷಣಾ ಜಾಮೀನು ಪಡೆದಿದ್ದಾನೆ ಎಂದೂ ಪೊಲೀಸ್‌ ಅಧಿಕಾರಿ ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: 25 ವರ್ಷ ಹಿಂದೆ ಪಾಕಿಸ್ತಾನಿ ಬ್ಯಾಟರ್‌ ಬೌಲ್ಡ್‌ ಆಗಿದ್ದು ಈಗ ಏಕೆ ಟ್ರೆಂಡ್‌ ಆಗುತ್ತಿದೆ?