ಸೂರ್ಯನು ಮಕರ ರಾಶಿಯನ್ನು ಪ್ರವೇಶಿಸುವ ಶುಭ ಸಂದರ್ಭವನ್ನು ಮಕರ ಸಂಕ್ರಾಂತಿಯಾಗಿ (Makar Sankranti 2023) ಆಚರಣೆ ಮಾಡಲಾಗುತ್ತದೆ. ಈ ಬಾರಿ ಸೂರ್ಯನು ಜನವರಿ 14ರ ರಾತ್ರಿ ಮಕರ ರಾಶಿಗೆ ಪ್ರವೇಶಿಸುವ ಕಾರಣ, ಉದಯ ತಿಥಿ ಅಂದರೆ ಜನವರಿ 15ರಂದು ಮಕರ ಸಂಕ್ರಾಂತಿ ಆಚರಿಸಲಾಗುತ್ತದೆ.
ಜನವರಿ 15ರ ಭಾನುವಾರ ಬೆಳಗ್ಗೆ 7:15 ರಿಂದ ಸಂಜೆ 5: 46ರ ವರೆಗೂ ಸಂಕ್ರಾಂತಿ ಇರುತ್ತದೆ. ಸಂಕ್ರಾಂತಿ ಸ್ನಾನ ಮತ್ತು ದಾನಗಳಿಗೆ ಬೆಳಗ್ಗೆ 7:15 ರಿಂದ 9ಗಂಟೆಯ ವರೆಗೂ ಶುಭ ಮುಹೂರ್ತವಿರುತ್ತದೆ. ಈ ಬಾರಿ ಭಾನುವಾರ ಸಂಕ್ರಾಂತಿ ಬಂದಿರುವುದು ವಿಶೇಷವಾಗಿದೆ. ‘ಆದಿತ್ಯೋ ಭಾನುಃ’ ಎಂಬಂತೆ ಸೂರ್ಯದೇವನ ಆರಾಧನೆಗೆ ಭಾನುವಾರ ಶ್ರೇಷ್ಠವಾದ ವಾರವಾಗಿದೆ. ಜೊತೆಗೆ ಸಂಕ್ರಾಂತಿಯು ಇದೇ ದಿನ ಬಂದಿರುವ ಕಾರಣ ಸೂರ್ಯನಿಗೆ ಅರ್ಘ್ಯ ನೀಡಿ, ಸಂಕ್ರಾಂತಿಯನ್ನು ಆಚರಿಸುವುದರಿಂದ ಪುಣ್ಯಫಲ ದುಪ್ಪಟ್ಟಾಗುತ್ತದೆ.
ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುವುದರಿಂದ ಕೆಲವು ರಾಶಿಯವರಿಗೆ ಅದೃಷ್ಟ ಖುಲಾಯಿಸಲಿದೆ. ವೃತ್ತಿ ಕ್ಷೇತ್ರದಲ್ಲಿ ಉತ್ತಮ ಅವಕಾಶಗಳು ಸಿಗಲಿದೆ. ಅಷ್ಟೇ ಅಲ್ಲದೆ, ಆರ್ಥಿಕ ಲಾಭವೂ ಉಂಟಾಗಲಿದೆ.
ಈ ರಾಶಿಗಳಿಗೆ ಶುಭ
ಸೂರ್ಯನು ಮಕರ ರಾಶಿ ಪ್ರವೇಶಿಸುವಾಗ ವಾತಾವರಣದಲ್ಲಿ ಕೆಲವು ಬದಲಾವಣೆಗಳೂ ಆಗಲಿದ್ದು, ಉಷ್ಣತೆಯೂ ಹೆಚ್ಚಲಿದೆ. ಧಾರ್ಮಿಕ ದೃಷ್ಟಿಯಿಂದ ಇದನ್ನು ಒಂದು ಹಬ್ಬವಾಗಿ ಎಲ್ಲೆಡೆ ಆಚರಿಸಲಾಗುತ್ತದೆ. ಸೂರ್ಯನ ಗೋಚಾರದಿಂದ ಈ ಕೆಳಗಿನಿ ರಾಶಿಯ ವ್ಯಕ್ತಿಗಳಿಗೆ ಸಕಾರಾತ್ಮಕ ಪರಿಣಾಮ ಬೀರುವುದಲ್ಲದೆ, ಲಕ್ಷ್ಮೀ ಕೃಪೆಯೂ ಪ್ರಾಪ್ತವಾಗುತ್ತದೆ.
ವೃಷಭ: ಈ ರಾಶಿ ಮೇಲೆ ಸೂರ್ಯ ಗೋಚಾರದ ಪ್ರಭಾವ ಬೀರಲಿದ್ದು, ವಿಶೇಷ ಲಾಭವಾಗಲಿದೆ. ಉದ್ಯೋಗ ಮತ್ತು ವ್ಯಾಪಾರದಲ್ಲಿ ಯಶಸ್ಸು ದೊರೆಯಲಿದೆ. ಈ ಸಮಯದಲ್ಲಿ ಆದಾಯವೂ ವೃದ್ಧಿಸಲಿದೆ. ತುಂಬಾ ಸಮಯದಿಂದ ಅರ್ಧಕ್ಕೆ ನಿಂತಿದ್ದ ಕೆಲಸಗಳು ಪ್ರಗತಿ ಕಾಣಲಿದ್ದು, ಜಯ ಸಿಗಲಿದೆ. ಆತ್ಮವಿಶ್ವಾಸ ಸಹ ವೃದ್ಧಿಯಾಗಲಿದ್ದು, ತಂದೆಯ ಜೊತೆಗಿನ ಬಾಂಧವ್ಯ ಮತ್ತಷ್ಟು ಉತ್ತಮಗೊಳ್ಳಲಿದೆ. ಪಾಲುದಾರರ ಸಲಹೆಯಂತೆ ಕಾರ್ಯನಿರ್ವಹಿಸಿದರೆ ಲಾಭ ಮತ್ತಷ್ಟು ಹೆಚ್ಚಲಿದೆ. ಧಾರ್ಮಿಕ ಕಾರ್ಯಗಳಲ್ಲಿ ಆಸಕ್ತಿ ಹೆಚ್ಚಲಿದೆ. ವಿದೇಶಿ ಕಂಪನಿಯೊಂದಿಗೆ ಕೆಲಸ ಮಾಡಲು ಇಚ್ಛಿಸಿದರೆ ಈ ಸಮಯ ಅನುಕೂಲವಾಗಿದೆ. ಮೇಲಧಿಕಾರಿಗಳ ಜೊತೆ ಸಂಬಂಧ ಸುಧಾರಿಸಲಿದೆ.
ಮಿಥುನ: ಈ ರಾಶಿಯವರಿಗೆ ಈ ಸಮಯದಲ್ಲಿ ಅತ್ಯಂತ ಲಾಭವಾಗಲಿದೆ. ಕಾರ್ಯಸ್ಥಳದಲ್ಲಿ ಉತ್ತಮ ವಾತಾವರಣ ಲಭಿಸಲಿದೆ. ಇವರ ಕೆಲಸಕ್ಕೆ ಪ್ರಶಂಸೆ ಸಿಗಲಿದೆ. ವ್ಯಾಪಾರಸ್ಥ ವ್ಯಕ್ತಿಗಳಿಗೆ ವಿಶೇಷ ಲಾಭ ದೊರಕಲಿದೆ. ಆರ್ಥಿಕ ಸ್ಥಿತಿಯಲ್ಲೂ ಪ್ರಗತಿ ಕಾಣಬಹುದಾಗಿದೆ. ವೈವಾಹಿಕ ಸಂಬಂಧದಲ್ಲಿ ಸುಧಾರಣೆಯಾಗಲಿದ್ದು, ಪ್ರೇಮ ಜೀವನವು ಮೊದಲಿಗಿಂತಲೂ ಮಧುರವಾಗಲಿದೆ. ಈ ಸಂದರ್ಭದಲ್ಲಿ ನಿಮ್ಮ ಆರೋಗ್ಯದ ಬಗ್ಗೆ ಹೆಚ್ಚಿನ ನಿಗಾ ವಹಿಸಿ, ಸಾಧ್ಯವಾದಷ್ಟು ವಿಶೇಷ ಕಾಳಜಿಯನ್ನು ತೆಗೆದುಕೊಳ್ಳಿ. ಈ ರಾಶಿಯಲ್ಲಿ ಶನಿ ಮತ್ತು ಬುಧ ಗ್ರಹದ ಜೊತೆ ಸೂರ್ಯನ ಯುತಿಯಾಗಿರುವುದರಿಂದ ಆರೋಗ್ಯದಲ್ಲಿ ಸಮಸ್ಯೆಗಳು ಕಂಡುಬರುತ್ತವೆ. ಆರ್ಥಿಕ ವಿಷಯಗಳಲ್ಲಿ ಇತರರ ಮೇಲೆ ವಿಶ್ವಾಸ ಇಡದೇ ಇರುವುದೇ ಉತ್ತಮ. ನಿಮ್ಮ ಹತ್ತಿರದವರೇ ನಿಮಗೆ ವಂಚನೆ ಮಾಡುವ ಸಂಭವವಿದೆ.
ಕಟಕ: ಈ ರಾಶಿಯ ವ್ಯಕ್ತಿಗಳಿಗೆ ಸೂರ್ಯ ಗ್ರಹದ ಗೋಚಾರವು ಬಹಳವೇ ಶುಭವಾಗುತ್ತದೆ. ಈ ರಾಶಿಯವರಿಗೆ ಸಂಗಾತಿಯಿಂದ ಸಂಪೂರ್ಣ ಸಹಯೋಗ ಲಭಿಸಲಿದೆ. ಉದ್ಯೋಗದ ವಿಷಯದಲ್ಲಿ ಈ ಗೋಚಾರವು ಅತ್ಯಂತ ಶುಭ ಪರಿಣಾಮವನ್ನು ತಂದುಕೊಡಲಿದೆ. ಈ ಸಮಯದಲ್ಲಿ ಉದ್ಯೋಗದ ಹೊಸ ಅವಕಾಶಗಳು ಲಭಿಸುವ ಸಾಧ್ಯತೆ ಇದೆ. ವ್ಯಾಪಾರದಲ್ಲಿ ತುಂಬಾ ಸಮಯದಲ್ಲಿ ಬರಬೇಕಿದ್ದ ಹಣ ಈ ಅವಧಿಯಲ್ಲಿ ಸಿಗಲಿದೆ. ಸಂಗಾತಿಯ ನಿರೀಕ್ಷೆಯಲ್ಲಿರುವವರಿಗೆ ಈ ಅವಧಿಯಲ್ಲಿ ಇಷ್ಟಾರ್ಥ ಸಿದ್ಧಿಸಲಿದೆ. ವ್ಯಾಪಾರದಲ್ಲಿ ಹೊಸ ಯೋಜನೆಗಳು ಕೈಗೂಡಲಿದೆ.
ಮಕರ: ಸೂರ್ಯನು ಮಕರ ರಾಶಿಗೇ ಪ್ರವೇಶ ಮಾಡುವುದರಿಂದ ಈ ರಾಶಿಯವರಿಗೆ ವಿಶೇಷ ಲಾಭ ಸಿಗಲಿದೆ. ಅಲ್ಲದೆ, ಜೀವನದಲ್ಲಿ ಧನಾತ್ಮಕ ಅಂಶವೂ ಹೆಚ್ಚಲಿದ್ದು, ಹಳೆ ಸಮಸ್ಯೆಗಳಿಗೆ ಸಮಾಧಾನವೂ ಲಭ್ಯವಾಗಲಿದೆ. ಕಾಯಿಲೆಗಳು ದೂರವಾಗಿ, ಯಶಸ್ಸಿಗೆ ದಾರಿ ತೆರೆಯುತ್ತದೆ. ವ್ಯಾಪಾರ ಮಾಡುವಾಗ ಬಹಳವೇ ಎಚ್ಚರದಿಂದ ಇರಬೇಕು. ಎಲ್ಲರನ್ನೂ ಕಣ್ಣು ಮುಚ್ಚಿ ನಂಬಬಾರದು. ಹೀಗೆ ಮಾಡಿದಲ್ಲಿ ವಂಚನೆಗೊಳಗಾಗುವ ಸಾಧ್ಯತೆಯೇ ಹೆಚ್ಚಿದೆ. ಸಂಗಾತಿಯ ಸಹಕಾರ ಸಿಗಲಿದೆ. ಉದ್ಯೋಗದಲ್ಲಿರುವವರಿಗೆ ವಿಪುಲ ಅವಕಾಶಗಳು ಲಭ್ಯವಾಗಲಿದೆ.
ಇದನ್ನೂ ಓದಿ | Yearly Horoscope 2023 | ಹೊಸ ವರ್ಷದಲ್ಲಿ ಯಾವೆಲ್ಲಾ ಗ್ರಹಗಳ ಸಂಚಾರವಿರಲಿದೆ? ದ್ವಾದಶ ರಾಶಿಗಳ ಮೇಲೆ ಪರಿಣಾಮವೇನು?