ನವ ದೆಹಲಿ: ಆರ್ಥಿಕ ಬಿಕ್ಕಟ್ಟನ್ನು ನಿಭಾಯಿಸಲು ಶ್ರೀಲಂಕಾ ಸರ್ಕಾರಕ್ಕೆ 2022ರಲ್ಲಿ ಒದಗಿಸಲಾದ 8,269 ಕೋಟಿ ರೂ (1 ಬಿಲಿಯನ್ ಡಾಲರ್) ಸಾಲ ಸೌಲಭ್ಯವನ್ನು ಇನ್ನೊಂದು ವರ್ಷಕ್ಕೆ ಮುಂದುವರಿಸಲಾಗಿದೆ. ಶ್ರೀಲಂಕಾ ಸರಕಾರದ ಮನವಿಯ ಮೇರೆಗೆ ಈ ಪ್ರಕ್ರಿಯೆಯನ್ನು ನಡೆಸಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಶ್ರೀಲಂಕಾ ಆರ್ಥಿಕ ಬಿಕ್ಕಟ್ಟಿಗೆ ಒಳಗಾದ ಸಂದರ್ಭದಲ್ಲಿ ಅಗತ್ಯ ವಸ್ತುಗಳನ್ನು ಖರೀದಿಸಲು ಹಾಗೂ ವಿತರಿಸಲು ಮಾರ್ಚ್ 2022ರಲ್ಲಿ ಭಾರತ ಸರಕಾರ ಸಾಲ ಸೌಲಭ್ಯವನ್ನು ನೀಡಿತ್ತು. ಆ ಒಪ್ಪಂದಕ್ಕೆ ತಿದ್ದುಪಡಿ ಮಾಡಲಾಗಿದ್ದು ಶ್ರೀಲಂಕಾದ ಹಣಕಾಸು ರಾಜ್ಯ ಸಚಿವ ಶೆಹಾನ್ ಸೆಮಾಸಿಂಘೆ ಅವರ ಸಮ್ಮುಖದಲ್ಲಿ ಸಹಿ ಹಾಕಲಾಗಿದೆ.
ಭಾರತವು ಕಳೆದ ವರ್ಷ ಶ್ರೀಲಂಕಾಕ್ಕೆ ಆಹಾರ, ಇಂಧನ ಮತ್ತು ಔಷಧಗಳನ್ನು ಖರೀದಿಸಲು ಸುಮಾರು 4 ಬಿಲಿಯನ್ ಡಾಲರ್ ಮೌಲ್ಯದ ಆರ್ಥಿಕ ಸಹಾಯವನ್ನು ನೀಡಿತ್ತು. ಭಾರತವು ಶ್ರೀಲಂಕಾದ ಜನರಿಗೆ ತನ್ನ ಬದ್ಧತೆಯನ್ನು ಮತ್ತೊಂದು ಬಾರಿ ಖಾತರಿಪಡಿಸಿದೆ. ಮಾನ್ಯ ಸಚಿವ ಶೆಹಾನ್ ಅವರ ಉಪಸ್ಥಿತಿಯಲ್ಲಿ ಇಂದು ತಿದ್ದುಪಡಿ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಈ ಒಪ್ಪಂದವು ಔಷಧ, ಆಹಾರ ಮತ್ತು ಇತರ ಅಗತ್ಯ ವಸ್ತುಗಳ ಖರೀದಿಗೆ 8,269 ಕೋಟಿ ರೂ. ಸಾಲವನ್ನು ಮೂಲ ಅವಧಿಯ ನಂತರ ಇನ್ನೂ ಒಂದು ವರ್ಷ ಬಳಸಲು ಅನುವು ಮಾಡಿಕೊಟ್ಟಿದೆ ಶ್ರೀಲಂಕಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಟ್ವೀಟ್ ಮಾಡಿದೆ.
ಇದನ್ನೂ ಓದಿ : ಶಾಂಘೈ ಸಹಕಾರ ಸಂಘದ ಸಭೆ ವರ್ಚುಯಲ್ ರೂಪದಲ್ಲಿ ನಡೆಸಲು ಭಾರತ ಹಠಾತ್ ನಿರ್ಧಾರ
ಶ್ರೀಲಂಕಾ ಸರ್ಕಾರದ ಮನವಿಗೆ ಪ್ರತಿಕ್ರಿಯೆಯಾಗಿ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ಮೂಲಕ ಸಾಲ ಸೌಲಭ್ಯವನ್ನು ವಿಸ್ತರಿಸಲಾಗಿದೆ. ಇದು ಕಳೆದ ವರ್ಷ ಭಾರತ ಒದಗಿಸಿದ 4 ಬಿಲಿಯನ್ ಡಾಲರ್ನ ಭಾಗವಾಗಿದೆ. ತಿದ್ದುಪಡಿ ಮಾಡಿದ ಒಪ್ಪಂದಕ್ಕೆ ಸಹಿ ಹಾಕಿದ ವೇಳೆ ಶ್ರೀಲಂಕಾದ ಹಣಕಾಸು ಸಚಿವಾಲಯ ಮತ್ತು ಭಾರತೀಯ ಹೈಕಮಿಷನ್ನ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು, ಎಸ್ಬಿಐ ಅಧಿಕಾರಿಗಳು ವರ್ಚುಯಲ್ ಮೂಲಕ ಪಾಲ್ಗೊಂಡರು.
ಕಳೆದ ವರ್ಷದಿಂದ ಭಾರತ ನೀಡಿರುವ ಸಾಲ ಸೌಲಭ್ಯವನ್ನು ಶ್ರೀಲಂಕಾ ಸರ್ಕಾರ, ಆದ್ಯತೆಗಳಿಗೆ ಅನುಗುಣವಾಗಿ ಇಂಧನ, ಔಷಧಿಗಳು, ಆಹಾರ ಪದಾರ್ಥಗಳು ಮತ್ತು ಕೈಗಾರಿಕಾ ಕಚ್ಚಾ ವಸ್ತುಗಳ ಖರೀದಿಗೆ ಬಳಸುತ್ತಿದೆ.
ನೆರೆಹೊರೆಯವರಿಗೆ ಅದ್ಯತೆ ಎಂಬ ನೀತಿಗೆ ಅನುಗುಣವಾಗಿ ಈ ನೆರವು ನೀಡಲಾಗಿದೆ ಎಂದು ಕೊಲಂಬೊದಲ್ಲಿನ ಭಾರತೀಯ ರಾಯಭಾರ ಕಚೇರಿ ತಿಳಿಸಿದೆ. ಶ್ರೀಲಂಕಾಕ್ಕೆ ಭಾರತದ ನಿರಂತರ ಬೆಂಬಲ ನೀಡಲಾಗುತ್ತದೆ. ಶ್ರೀಲಂಕಾದ ಜನರೊಂದಿಗೆ ನಿಲ್ಲುವ ನಮ್ಮ ಬದ್ಧತೆಗೆ ಮುಂದುವರಿಯಲಿದೆ ಎಂದು ಟ್ವೀಟ್ನಲ್ಲಿ ಬರೆಯಲಾಗಿದೆ.