ಕೆಲವು ಮಕ್ಕಳು ತುಂಬ ಚುರುಕಾಗಿರುತ್ತಾರೆ. ತಮ್ಮ ಸಮಯಪ್ರಜ್ಞೆ-ಸಾಹಸದ ಪ್ರವೃತ್ತಿಯ ಕಾರಣಕ್ಕೇ ಸುದ್ದಿಯಾಗುತ್ತಾರೆ. ಅವರಿಗೇ ಗೊತ್ತಿಲ್ಲದಂತೆ ಅವರು ಒಂದು ಮಹತ್ಕಾರ್ಯ ಮಾಡಿಬಿಡುತ್ತಾರೆ. ಅಂಥವರ ಸಾಲಿಗೆ ಈಗ ಯುಎಸ್ನ 7ನೇ ತರಗತಿಯ ಹುಡುಗನೊಬ್ಬ ಸೇರಿದ್ದಾನೆ. ಶಾಲಾ ಬಸ್ನಲ್ಲಿ ತೆರಳುತ್ತಿದ್ದಾಗ, ಚಾಲಕ ಪೂರ್ತಿ ಸುಸ್ತಾಗಿ ಎಚ್ಚರ ತಪ್ಪುತ್ತಾರೆ. ಆಗ ಈ ಹುಡುಗ ಹಿಂದಿನಿಂದ ಓಡಿ ಬಂದು, ಬಸ್ನ ಸ್ಟೀರಿಂಗ್ ಹಿಡಿದು ನಿಯಂತ್ರಿಸುತ್ತಾನೆ. ಬಳಿಕ ಬಸ್ನ್ನು ನಿಲ್ಲಿಸುತ್ತಾನೆ. ಈ ಮೂಲಕ ಬಹುದೊಡ್ಡ ಅಪಾಯವೊಂದನ್ನು ತಪ್ಪಿಸಿದ್ದಾನೆ. ಅದರ ವಿಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ (Viral Video) ಆಗುತ್ತಿದೆ.
Warren Consolidated Schools (ಜಿಲ್ಲಾ ಶಾಲೆಗಳ ಒಕ್ಕೂಟ)ನ ಯೂಟ್ಯೂಬ್ನಲ್ಲಿ ವಿಡಿಯೊ ಬಿಡುಗಡೆ ಮಾಡಲಾಗಿದೆ. ಆ ಶಾಲಾ ಬಸ್ನ ಡ್ರೈವರ್ ಸೀಟ್ನ ಮೇಲ್ಭಾಗದಲ್ಲಿರುವ ಸಿಸಿಟಿವಿ ಕ್ಯಾಮರಾದಲ್ಲಿ ದೃಶ್ಯ ಸೆರೆಯಾಗಿದೆ. ಚಾಲಕ ಬಸ್ ಡ್ರೈವ್ ಮಾಡುತ್ತಿರುತ್ತಾನೆ. ಆದರೆ ಸ್ವಲ್ಪ ಹೊತ್ತಿನ ಬಳಿಕ ಅವನು ಅಸ್ವಸ್ಥನಾದಂತೆ ಕಾಣುತ್ತಾನೆ. ತನ್ನ ಟೊಪ್ಪಿ ತೆಗೆದು ಗಾಳಿ ಬೀಸಿಕೊಳ್ಳುತ್ತಾನೆ. ಏನನ್ನೋ ಸೇವಿಸುತ್ತಾನೆ. ಆದರೆ ಬರುಬರುತ್ತ ಅವನು ಇನ್ನಷ್ಟು ಅಸ್ವಸ್ಥಗೊಂಡು, ಎಚ್ಚರ ತಪ್ಪುತ್ತಾನೆ. ಕೂಡಲೇ ಹಿಂದಿನಿಂದ ಓಡಿಬಂದ ದಿಲ್ಲಾನ್ ರೀವ್ಸ್ ಎಂಬ 7ವರ್ಷದ ಬಾಲಕ ಮೊದಲು ಬಸ್ನ ಸ್ಟೀರಿಂಗ್ ಹಿಡಿದುಕೊಳ್ಳುತ್ತಾನೆ. ನಂತರ ಆ ಗಾಡಿಯನ್ನು ಸುರಕ್ಷಿತವಾಗಿ ನಿಲ್ಲಿಸುತ್ತಾನೆ. ಅಷ್ಟಾದ ಮೇಲೆ ಹಿಂದಕ್ಕೆ ತಿರುಗಿನಿಂತು ತನ್ನ ಸಹಪಾಠಿಗಳ ಬಳಿ ‘ಯಾರಾದರೂ ಕೂಡಲೇ 911 (ತುರ್ತು ಸೇವೆ)ನಂಬರ್ಗೆ ಕರೆ ಮಾಡಿ ಎನ್ನುತ್ತಾನೆ. ಇವಿಷ್ಟೂ ಘಟನೆಯಾಗಿದ್ದು ಬುನರ್ಟ್ ರಸ್ತೆ ಬಳಿ ಇರುವ ಮೇಸೋನಿಕ್ ಬೌಲೆವಾರ್ಡ್ ಎಂಬಲ್ಲಿ ಎಂದು ವರದಿಯಾಗಿದೆ.
ಘಟನೆ ಬಗ್ಗೆ ಮಾಹಿತಿ ಪಡೆಯುತ್ತಿದ್ದಂತೆ ಪೊಲೀಸ್ ಅಧಿಕಾರಿ ರಾಬರ್ಟ್ ಲಿವರ್ನೊಯಿಸ್ ಅವರು ತಮ್ಮ ತಂಡದೊಂದಿಗೆ ಅಲ್ಲಿಗೆ ತೆರಳಿದ್ದಾರೆ. ಆ ಡ್ರೈವರ್ನ್ನು ಆಸ್ಪತ್ರೆಗೆ ದಾಖಲು ಮಾಡಿ, ಮಕ್ಕಳನ್ನು ಅವರವರ ಮನೆಗೆ ಸುರಕ್ಷಿತವಾಗಿ ಮುಟ್ಟಿಸಿದ್ದಾರೆ. ಬಸ್ನಲ್ಲಿ 66 ಮಕ್ಕಳು ಇದ್ದರು ಎಂದು ಹೇಳಲಾಗಿದೆ. ದಿಲ್ಲಾನ್ ರೀವ್ಸ್ ಸಾಹಸ ಸೋಷಿಯಲ್ ಮೀಡಿಯಾಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗಿದೆ. ಆತನ ತಂದೆ-ತಾಯಿ ತುಂಬ ಹೆಮ್ಮೆ ವ್ಯಕ್ತಪಡಿಸಿದ್ದಾರೆ ‘ಪುಟ್ಟ ಹೀರೋ’ ಎಂದು ಬಣ್ಣಿಸಿದ್ದಾರೆ.
ಇಲ್ಲಿದೆ ನೋಡಿ, ವೈರಲ್ ವಿಡಿಯೊ
