ನೆರೆ ರಾಷ್ಟ್ರ ಪಾಕಿಸ್ತಾನದಲ್ಲಿ ತೀವ್ರತರನಾದ ಆರ್ಥಿಕ ಸಂಕಷ್ಟಕ್ಕೀಡಾಗಿದೆ. ಆಹಾರ ಬಿಕ್ಕಟ್ಟು ಮುಗಿಲು ಮುಟ್ಟಿದ್ದು, ಜನರು ಪರದಾಡುತ್ತಿದ್ದಾರೆ. ಈ ಮಧ್ಯೆ ವೈರಲ್ ಆದ ವಿಡಿಯೊವೊಂದು ಪಾಕ್ನಲ್ಲಿ ಎದುರಾಗಿರುವ ಆಹಾರ ಸಮಸ್ಯೆಯ ಭೀಕರತೆಯನ್ನು ಬಿಚ್ಚಿಟ್ಟಿದೆ. ಗೋಧಿ ಹಿಟ್ಟಿನ ಮೂಟೆಯನ್ನು ಹೊತ್ತು ಹೋಗುತ್ತಿರುವ ಟ್ರಕ್ ಹಿಂದೆ ಅನೇಕರು ಓಡುತ್ತಾರೆ. ಕೆಲವರು ಬೈಕ್ನಲ್ಲಿ ಆ ಲಾರಿಯನ್ನು ಹಿಂಬಾಲಿಸುತ್ತಿದ್ದಾರೆ. ಗೋಧಿ ಮೂಟೆಯನ್ನು ಹೇಗಾದರೂ ತಾವೇ ಪಡೆಯಬೇಕು ಎಂಬ ತುಡಿತ ಅದನ್ನು ಹಿಂಬಾಲಿಸುತ್ತಿರುವ ಪ್ರತಿಯೊಬ್ಬರಲ್ಲೂ ಕಾಣುತ್ತಿದೆ.
ಪಾಕ್ ಆಕ್ರಮಿತ ಕಾಶ್ಮೀರದ ಮಾನವ ಹಕ್ಕು ಹೋರಾಟಗಾರ, ಸದ್ಯ ಲಂಡನ್ನಲ್ಲಿ ನೆಲೆಸಿರುವ ಪ್ರೊಫೆಸರ್ ಸಜ್ಜದ್ ರಾಜಾ ಅವರು ವಿಡಿಯೊವನ್ನು ಟ್ವೀಟ್ ಮಾಡಿಕೊಂಡಿದ್ದಾರೆ. ‘ಹೀಗೆ ಟ್ರಕ್ ಹಿಂದೆ ಹೋಗುತ್ತಿರುವುದು ಮೋಟರ್ಸೈಕಲ್ ರ್ಯಾಲಿಯಲ್ಲ. ಗೋಧಿ ಹಿಟ್ಟು ತುಂಬಿರುವ ಲಾರಿಯನ್ನು ತಡೆದು ನಿಲ್ಲಿಸಲು ಅವರೆಲ್ಲ ಹೋಗುತ್ತಿದ್ದಾರೆ. ಒಂದಾದರೂ ಮೂಟೆ ಸಿಕ್ಕರೆ ಸಾಕು ಎಂಬ ಆಸೆಯಲ್ಲಿ ಹೀಗೆ ಹೋಗುತ್ತಿದ್ದಾರೆ. ಪಾಕಿಸ್ತಾನದಲ್ಲಿ ಜೀವನ ನಡೆಸಲು ಸಾಧ್ಯವಿದೆಯೇ?’ ಎಂದು ಅವರು ಕ್ಯಾಪ್ಷನ್ ಬರೆದಿದ್ದಾರೆ.
ಪಾಕಿಸ್ತಾನದಲ್ಲಿ ಇಡೀ ರಾಷ್ಟ್ರದಲ್ಲಿ ಎಲ್ಲ ಕಡೆ ಆಹಾರ ಬಿಕ್ಕಟ್ಟು ಎದುರಾಗಿದ್ದರೂ, ಪಾಕ್ ಆಕ್ರಮಿತ ಕಾಶ್ಮೀರ, ಬಲೂಚಿಸ್ತಾನ್ದಲ್ಲಂತೂ ಪರಿಸ್ಥಿತಿ ಇನ್ನಷ್ಟು ಕರುಣಾಜನಕವಾಗಿದೆ. ಸದ್ಯ ಪಾಕಿಸ್ತಾನದಲ್ಲಿ 15 ಕೆಜಿ ಹಿಟ್ಟಿನ ಬ್ಯಾಗ್ 2050 ರೂಪಾಯಿಗೆ ಮಾರಾಟವಾಗುತ್ತಿದೆ. ಸ್ವಲ್ಪ ದಿನಗಳ ಹಿಂದೆ ಖೈಬರ್ ಪಖ್ತುಂಖ್ವಾ ಪ್ರಾಂತ್ಯದಲ್ಲಿ ಜನರು ಪ್ಲಾಸ್ಟಿಕ್ ಬ್ಯಾಗ್ನಲ್ಲಿ ಎಲ್ಪಿಜಿ ಅನಿಲ ತುಂಬಿಸಿಕೊಂಡು ಹೋಗುತ್ತಿರುವ ದೃಶ್ಯ ವೈರಲ್ ಆಗಿತ್ತು. ಅಡುಗೆ ಅನಿಲ ಪೂರೈಕೆ ಸ್ಥಗಿತಗೊಂಡಿದ್ದೇ ಇದಕ್ಕೆ ಕಾರಣ. ಒಟ್ಟಾರೆ ಹೇಳಬೇಕು ಎಂದರೆ ಪಾಕ್ನಲ್ಲಿ ಹಸಿವು ಜನರನ್ನು ಕಿತ್ತು ತಿನ್ನುತ್ತಿದೆ. ಆಹಾರ ಕೈಗೆಟುಕದಂತಾಗಿದೆ.
ಇದನ್ನೂ ಓದಿ: Henley Passport Index | ಪಾಕಿಸ್ತಾನದ ಪಾಸ್‌ಪೋರ್ಟ್‌ಗೆ ಬೆಲೆಯೇ ಇಲ್ಲ! ಜಪಾನ್ ಪಾಸ್‌ಪೋರ್ಟ್ ಫುಲ್ ಸ್ಟ್ರಾಂಗ್