ಉಕ್ರೇನ್ನಲ್ಲಿ ಸೈನಿಕನೊಬ್ಬನ ಎದೆಯಿಂದ ಜೀವಂತ ಗ್ರೆನೇಡ್ನ್ನು ಹೊರತೆಗೆಯುವ ಮೂಲಕ ಮಿಲಿಟರಿ ವೈದ್ಯರೊಬ್ಬರು (Ukrainian Surgeon) ಈಗ ಹೀರೋ ಎನ್ನಿಸಿಕೊಂಡಿದ್ದಾರೆ. ಉಕ್ರೇನ್ ಮೇಲೆ ರಷ್ಯಾ ಆಕ್ರಮಣ ಮಾಡಿದಾಗಿನಿಂದಲೂ ಅಲ್ಲಿ ಎರಡೂ ದೇಶಗಳ ಸೈನಿಕರ ನಡುವೆ ದಾಳಿ-ಪ್ರತಿದಾಳಿ ನಡೆಯುತ್ತಿದೆ. ಈ ಯೋಧ ಉಕ್ರೇನ್ನ ಬಖ್ಮುತ್ ಎಂಬಲ್ಲಿ ರಷ್ಯಾ ಪಡೆ ವಿರುದ್ಧ ಹೋರಾಡುವಾಗ ದೇಹದೊಳಗೆ ಗ್ರೆನೇಡ್ ಹೊಕ್ಕಿ ಗಂಭೀರವಾಗಿ ಗಾಯಗೊಂಡಿದ್ದರು. ರಷ್ಯಾ ಸೈನಿಕರು ಗ್ರೆನೇಡ್ ಲಾಂಚರ್ನಿಂದ ಹಾರಿಸಿದ ಗ್ರೆನೇಡ್ ಸೀದಾ ಬಂದು ಇವರ ಎದೆಯನ್ನು ಸೀಳಿಕೊಂಡು ಹೋಗಿ ಕುಳಿತಿತ್ತು.
ಆ ಸೈನಿಕನ ದೇಹದೊಳಗೆ ಇದ್ದುದ್ದು ಜೀವಂತ ಗ್ರೆನೇಡ್ ಆಗಿದ್ದರಿಂದ ಅದು ಯಾವುದೇ ಕ್ಷಣದಲ್ಲೂ ಸಿಡಿಯಬಹುದಿತ್ತು. ಸರ್ಜರಿ ಮಾಡುವಾಗಲೂ ಅದು ಸ್ಫೋಟಗೊಳ್ಳುವ ಅಪಾಯ ಇದ್ದೇ ಇತ್ತು. ಆದರೆ ಮಿಲಿಟರಿ ಆಸ್ಪತ್ರೆಯಲ್ಲಿ ಸರ್ಜನ್ ಆಗಿರುವ ಮೇಜರ್ ಜನರಲ್ ಆ್ಯಂಡ್ರಿ ವರ್ಬಾ ಅವರು ಧೈರ್ಯವಾಗಿ ಆಪರೇಶನ್ ಮಾಡಿ ಜೀವಂತ ಗ್ರೆನೇಡ್ ಹೊರತೆಗೆದಿದ್ದಾರೆ. ಇದೊಂದು ಅತ್ಯಂತ ಅಪಾಯಕಾರಿ ಸರ್ಜರಿ ಆಗಿದ್ದರಿಂದ, ಇನ್ನಿಬ್ಬರು ಸೈನಿಕರೂ ಅಲ್ಲಿ ಉಪಸ್ಥಿತರಿದ್ದರು. ನಿಧಾನವಾಗಿ ಗ್ರೆನೇಡ್ ಹೊರತೆಗೆದು ಬಳಿಕ ಅದನ್ನು ನಿಷ್ಕ್ರಿಯಗೊಳಿಸಲಾಗಿದೆ. ಈ ಬಗ್ಗೆ ಉಕ್ರೇನ್ ಮಿಲಿಟರಿ ಆಸ್ಪತ್ರೆಯೇ ಹೇಳಿಕೆ ಬಿಡುಗಡೆ ಮಾಡಿದೆ.
ಹಾಗೇ, ಯೋಧನ ಎದೆಯಲ್ಲಿ ಗ್ರೆನೇಡ್ ಸೇರಿಕೊಂಡಿರುವುದನ್ನು ತೋರಿಸುವ ಎಕ್ಸ್ ರೇ ಚಿತ್ರವನ್ನೂ ಉಕ್ರೇನ್ ಮಿಲಿಟರಿ ಆಸ್ಪತ್ರೆ ಬಿಡುಗಡೆ ಮಾಡಿದೆ. ಹಾಗೇ, ಗಾಯಗೊಂಡ ಯೋಧನಿಗೆ ಚಿಕಿತ್ಸೆ ನೀಡಲಾಗುತ್ತಿದ್ದು, ಪುನರ್ವಸತಿ ಕೇಂದ್ರಕ್ಕೆ ಕಳಿಸಲಾಗಿದೆ. ವೈದ್ಯ ತನ್ನ ಪ್ರಾಣವನ್ನೂ ಒತ್ತೆಯಿಟ್ಟು ಆ ಗ್ರೆನೇಡ್ ಹೊರತೆಗೆದಿದ್ದನ್ನು ಅನೇಕರು ಶ್ಲಾಘಿಸಿದ್ದಾರೆ. ನೀವೇ ನಿಜವಾದ ಹೀರೋ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Viral News | 1987ರಲ್ಲಿ ಗೋಧಿ ಬೆಲೆ ಎಷ್ಟಿತ್ತು ಗೊತ್ತಾ? ಹಳೆ ದಾಖಲೆಯ ಫೋಟೊ ವೈರಲ್