ಕುಡಿಸಿ ಚಾಲಕನ ʼಮೇಕೆʼ ಮಾಡಿದ ಮೇಕೆ ಮಂಜ, ಕಾರು ಅಪಹರಿಸಿ ಪರಾರಿ

ಬೆಂಗಳೂರು: ಕಾರ್ ಡ್ರೈವರ್‌ನನ್ನು ಒಂದೇ ರಾತ್ರಿಯಲ್ಲಿ ಪರಿಚಯಿಸಿಕೊಂಡು ಕಂಠಪೂರ್ತಿ ಕುಡಿಸಿದ ದಂಪತಿ ಕಾರು ದೋಚಿ ಪರಾರಿಯಾದ ಘಟನೆ ಯಲಹಂಕದಲ್ಲಿ ನಡೆದಿದೆ. ಆರೋಪಿ ಮಂಜ ಅಲಿಯಾಸ್‌ ಮೇಕೆ ಮಂಜ ಹಾಗೂ ಆತನ ಪತ್ನಿ ವೇದಾವತಿಯನ್ನು ಬಂಧಿಸಲಾಗಿದೆ.

ರಾತ್ರಿ ವೇಳೆ ಓಲಾ ಕಾರಿನ ಚಾಲಕನನ್ನು ಪರಿಚಯ ಮಾಡಿಕೊಂಡಿದ್ದ ಮೇಕೆ ಮಂಜ ಮತ್ತು ವೇದಾವತಿ, ಕಾರಿನಲ್ಲಿ ಸುತ್ತಾಡಿಸು ಎಂದು ಸಾಕಷ್ಟು ದುಡ್ಡು ಕೊಟ್ಟಿದ್ದರು. ನಂತರ ಯಲಹಂಕ ನ್ಯೂಟೌನ್ ಸಿಆರ್‌ಪಿಎಫ್ ಗ್ರೌಂಡ್ ಬಳಿ ಕರೆದೊಯ್ದು ಪಾರ್ಟಿ ಮಾಡೋಣ ಬಾ ಎಂದು ಕೂರಿಸಿ ಬೆಳಗಿನ ಜಾವದವರೆಗೂ ಕುಡಿಸಿದ್ದರು. ಕಾರ್ ಡ್ರೈವರ್‌ಗೆ ಕಂಠಪೂರ್ತಿ ಕುಡಿಸಿ, ಎಣ್ಣೆ ನಶೆಯಲ್ಲಿದ್ದ ಚಾಲಕನನ್ನು ಹೆದರಿಸಿ ಕಾರು ದೋಚಿ ಪರಾರಿಯಾಗಿದ್ದರು.

ಈ ಕುರಿತು ಯಲಹಂಕ ನ್ಯೂಟೌನ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ದಂಪತಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಮೇಕೆ ಮಂಜನ ಮೇಲೆ ಈ ಹಿಂದೆ ಕೊಲೆ ಯತ್ನ ಪ್ರಕರಣಗಳು ದಾಖಲಾಗಿದ್ದವು. ಉಳಿದುಕೊಳ್ಳಲು ಮನೆ ಕೂಡ ಇರದ ಈ ದಂಪತಿ ಕಳ್ಳತನ, ದರೋಡೆ ನಡೆಸುತ್ತಿದ್ದರು.

ಇದನ್ನೂ ಓದಿ | Attempt to Kidnap | ವಿಜಯಪುರದಲ್ಲಿ ಅಪ್ರಾಪ್ತನ ಅಪಹರಣಕ್ಕೆ ಯತ್ನ