ಯಾದಗಿರಿ: ಎರಡು ಕಾರು ಮುಖಾಮುಖಿ ಡಿಕ್ಕಿಯಾಗಿ ಐವರು ಮೃತಪಟ್ಟು, ಇಬ್ಬರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ (Car Accident) ತೆಲಂಗಾಣದ ನಾರಾಯಣ ಪೇಟೆ ಜಿಲ್ಲೆಯ ಮಕ್ತಲ್ ತಾಲೂಕಿನ ಜಕ್ಲೆರ್ ಗ್ರಾಮದ ಬಳಿ ಭಾನುವಾರ ನಡೆದಿದೆ.
ಯಾದಗಿರಿ ತಾಲೂಕಿನ ಸೈದಾಪುರ ಗ್ರಾಮದ ಮೌಲಾಲಿ, ಖಲೀಲ್ ಹಾಗೂ ಬಸಮ್ಮ ಮತ್ತು ಮಹಾರಾಷ್ಟ್ರ ಮೂಲದ ತಾಯಿ-ಮಗಳಾದ ಪ್ರಬೀತಾ, ಅಸ್ಮಿತಾ (7) ಮೃತರು. ಇಬ್ಬರು ಗಾಯಾಳುಗಳನ್ನು ಮಕ್ತಲ್ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ | Murder Case : ಎಣ್ಣೆ ಜಾಸ್ತಿ ಕುಡಿಯಲ್ಲ ಎಂದಿದ್ದಕ್ಕೆ ಕೊಲೆಯಾದ ಗೆಳೆಯ
ವಿಜಯಪುರದಲ್ಲಿ ಯುವತಿ ವಿಚಾರಕ್ಕೆ ಯುವಕನ ಬರ್ಬರ ಹತ್ಯೆ
ವಿಜಯಪುರ: ಹಾಡಹಗಲೇ ಚಾಕುವಿನಿಂದ ಇರಿದು ಯುವಕನ ಬರ್ಬರ ಹತ್ಯೆ ಮಾಡಿರುವ ಘಟನೆ ನಗರದ ಹಕೀಂ ಚೌಕ್ ಬಳಿ ಭಾನುವಾರ ನಡೆದಿದೆ. ಹತ್ಯೆಯಾದ ಯುವಕ ಮಹಾರಾಷ್ಟ್ರದ ಪುಣೆ ನಿವಾಸಿ ಎಂದು ತಿಳಿದುಬಂದಿದೆ. ಯುವತಿ ವಿಚಾರಕ್ಕೆ ಕೊಲೆ ನಡೆದಿದ್ದು, ಘಟನಾ ಸ್ಥಳಕ್ಕೆ ಪೊಲೀಸರು ಭೇಟಿ ಪರಿಶೀಲನೆ ನಡೆಸುತ್ತಿದ್ದಾರೆ.
ಪುಣೆ ನಗರದ ಹಡಪಸರ್ ಪ್ರದೇಶದ ಅಯಾನ್ ಶೇಖ್ (19) ಕೊಲೆಯಾದ ಯುವಕ. ವಿಜಯಪುರದ ಚಪ್ಪರಬಂದ್ ಕಾಲೋನಿಯ ಹುಸೇನ್ ನಂದಿಹಾಳ (22) ಕೊಲೆ ಆರೋಪಿ.
ಸ್ನೇಹಿತ ಶೊಯೇಬ್ ಎಂಬಾತನ ಮದುವೆಗಾಗಿ ಅಯಾನ್ ಶೇಖ್ ಆಗಮಿಸಿದ್ದ. ಪುಣೆ ಮೂಲದ ಮುಸ್ಕಾನ್ ಶೇಖ್ ಹಾಗೂ ಅಯಾನ್ ಶೇಖ್ ಪರಸ್ಪರ ಪ್ರೀತಿಸುತ್ತಿದ್ದರು. ಆದರೆ, ಮುಸ್ಕಾನ್‌ಗೆ ವಿಜಯಪುರ ಮೂಲದ ಆರೋಪಿ ಹುಸೇನ್ ನಂದಿಹಾಳ ಜತೆ ಎಂಗೇಜ್ಮೆಂಟ್ ಆಗಿತ್ತು.
ಮುಸ್ಕಾನ್ ಹಾಗೂ ಆಯಾನ್ ಪ್ರೀತಿ ಮಾಡುತ್ತಿದ್ದ ಕಾರಣ ಹುಸೇನ್ ಮನೆಯವರು ನಿಶ್ಚಿತಾರ್ಥ ಕಡಿದುಕೊಂಡಿದ್ದರು. ಆದರೆ ಹುಸೇನ್ ನಂದಿಹಾಳ ಮಾತ್ರ ಯುವತಿ ಮುಸ್ಕಾನ್‌ಳನ್ನು ಬಹಳ ಹಚ್ಚಿಕೊಂಡಿದ್ದ. ನಿಶ್ಚಿತಾರ್ಥ ಕ್ಯಾನ್ಸಲ್ ಮಾಡಿದ್ದರೂ ಮುಸ್ಕಾನ್ ಶೇಖ್‌ಳನ್ನು ಪ್ರೀತಿಸುತ್ತಿದ್ದ. ಹೀಗಾಗಿ ಮುಸ್ಕಾನ್‌ಳನ್ನು ಪ್ರೀತಿ ಮಾಡುತ್ತಿದ್ದ ಅಯಾನ್‌ನನ್ನು ಕೊಲೆ ಮಾಡಲು ನಿರ್ಧರಿಸಿದ್ದ ಎನ್ನಲಾಗಿದೆ.
ಇದನ್ನೂ ಓದಿ | Road Accident: ಬೈಕ್‌ ಸವಾರರಿಬ್ಬರ ಜೀವ ತೆಗೆದ ಅಪಘಾತ
ಅಯಾನ್ ಸ್ನೇಹಿತ ಪುಣೆ ಮೂಲದ ಶೋಯೇಬ್‌ಗೆ ವಿಜಯಪುರದ ಯುವತಿ ಜತೆ ಭಾನುವಾರ ಮದುವೆಯಿತ್ತು. ಮದುವೆಗೆ ಅಯಾನ್ ಬಂದೇ ಬರುತ್ತಾನೆ ಎಂದು ಕಾದು ಕುಳಿತಿದ್ದ. ನಿರೀಕ್ಷೆಯಂತೆ ವಿಜಯಪುರಕ್ಕೆ ಸ್ನೇಹಿತರೊಂದಿಗೆ ಅಯಾನ್ ಬಂದಿದ್ದಾಗ ಚಾಕುವಿನಿಂದ ಹಲ್ಲೆ ಮಾಡಿ ಪರಾರಿಯಾಗಿದ್ದಾನೆ. ಗಂಭೀರವಾಗಿ ಗಾಯಗೊಂಡಿದ್ದ ಅಯಾನ್, ಆಸ್ಪತ್ರೆಗೆ ಸಾಗಿಸುವ ವೇಳೆ ಮೃತಪಟ್ಟಿದ್ದಾನೆ. ಗೋಲಗುಂಬಜ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ