ಅವನ ಎದೆಯಲ್ಲಿ ಅವಳ ಹೆಸರ ಹಚ್ಚೆ; ಏನಿದು ಲವ್‌ ಜಿಹಾದ್‌ ಆರೋಪ?
ಬೆಂಗಳೂರಿನ ಹೊಸಗುಡ್ಡದಹಳ್ಳಿ ನಿವಾಸಿ ಅಜಿತ್ ಹಾಗೂ ಕೆಂಗೇರಿ ಉಪನಗರ ಯುವತಿ ನಡುವೆ ಮೂರು ವರ್ಷದ ಹಿಂದೆ ಮದುವೆಯಾಗಿತ್ತು. ಅವರಿಬ್ಬರು ಅಜಿತ್ ಮತ್ತು ಯುವತಿ ಶಾಲೆಯಲ್ಲಿ ಕಲಿಯುತ್ತಿದ್ದ ಕಾಲದಿಂದಲೇ ಪ್ರೀತಿ ಮಾಡುತ್ತಿದ್ದರು ಎನ್ನಲಾಗಿದೆ. ಇಬ್ಬರೂ ಮದುವೆ ಮಾಡಿಕೊಳ್ಳಬೇಕು ಎಂದು ನಿರ್ಧರಿಸಿದಾಗ ಹುಡುಗಿ ಮನೆಯವರಿಂದ ವಿರೋಧ ಎದುರಾಗಿತ್ತು. ಕೊನೆಗೆ ಮನೆಯವರ ವಿರೋಧವನ್ನು ಲೆಕ್ಕಿಸದೆ 2020ರ ಆಗಸ್ಟ್‌ನಲ್ಲಿ ಮದುವೆ ಮಾಡಿಕೊಂಡಿದ್ದರು. ಶ್ರೀರಾಮಪುರ ಸಬ್ ರಿಜಿಸ್ಟ್ರಾರ್‌ ಕಚೇರಿಯಲ್ಲಿ ಮದುವೆ ನೋಂದಣಿ ಆಗಿತ್ತು.
ಇದೆಲ್ಲ ಆಗಿ ಮೂರು ವರ್ಷ ಆಗಿದೆ. ಇದರ ನಡುವೆ ಇವರ ನಡುವೆ ಮೂರನೇ ವ್ಯಕ್ತಿಯ ಪ್ರವೇಶವಾಗಿದೆ. ಆ ವ್ಯಕ್ತಿಯೇ ಸಲ್ಮಾನ್.
ಸಲ್ಮಾನ್ ದೂರದವನೇನೂ ಅಲ್ಲ. ಅಜಿತ್ ಮತ್ತು ಸಲ್ಮಾನ್ ಸಣ್ಣ ವಯಸ್ಸಿನಿಂದಲೂ ಪರಿಚಿತರೇ. ಮತ್ತು ಜತೆಯಾಗಿ ಕೆಲಸ ಮಾಡುತ್ತಿದ್ದರು. ಅಜಿತ್ ತನ್ನ ಪತ್ನಿಗೆ ಸಲ್ಮಾನ್‌ನನ್ನು ಪರಿಚಯಿಸಿದ ಬಳಿಕವೇ ಈ ಕುಟುಂಬದಲ್ಲಿ ಅಲ್ಲೋಲಕಲ್ಲೋಲ ಶುರುವಾಗಿದೆ ಎನ್ನುವುದು ಗಂಡ ಅಜಿತ್‌ನ ಆರೋಪ. ಆದರೆ, ನನಗೆ ಸಲ್ಮಾನ್‌ನನ್ನು ಪರಿಚಯ ಮಾಡಿಸಿದ್ದೇ ಅಜಿತ್ ಎನ್ನುವುದು ಪತ್ನಿಯ ಹೇಳಿಕೆ.
ಅಜಿತ್ ಮತ್ತು ಸಲ್ಮಾನ್ ಜತೆಯಾಗಿ ಒಂದೇ ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿದ್ದರು. ಹಾಗಂತ, ಆರಂಭದಲ್ಲಿ ಸಲ್ಮಾನ್‌ಗೆ ಅಜಿತ್‌ನ ಪತ್ನಿಯ ಪರಿಚಯವಿರಲಿಲ್ಲ. ಒಂದು ಸಾರಿ ಅಜಿತ್ ಮತ್ತು ಸಲ್ಮಾನ್ ಕೆಲಸದ ನಿಮಿತ್ತ ತಮಿಳುನಾಡಿಗೆ ಹೋಗಿದ್ದ. ಅಜಿತ್ ಕುಮಾರ್‌ ಬಳಿ ಮೊಬೈಲ್‌ ಫೋನ್‌ ಇಲ್ಲದ ಕಾರಣ ಅವನು ಸಲ್ಮಾನ್‌ನ ಫೋನ್‌ ಮೂಲಕ ಪತ್ನಿಯನ್ನು ಸಂಪರ್ಕಿಸುತ್ತಿದ್ದ. ಜತೆಗೆ ತನಗೆ ಏನಾದರೂ ಹೇಳಬೇಕಾಗಿದ್ದರೆ ಸಲ್ಮಾನ್‌ಗೆ ಫೋನ್‌ ಮಾಡಿ ಹೇಳು ಎಂದು ಹೇಳಿದ್ದ. ಹಾಗೆ ಅವರಿಬ್ಬರ ನಡುವೆ ಫೋನ್‌ ಸಂಪರ್ಕ ಹುಟ್ಟಿಕೊಂಡಿತ್ತು. ಹಾಗಂತ ಸಲ್ಮಾನ್ ಏಕಾಏಕಿಯಾಗಿ ಮೇಲೆ ಬಿದ್ದು ಸಂಪರ್ಕ ಮಾಡುತ್ತಿರಲಿಲ್ಲ ಎಂದು ಅಜಿತ್ ಕೂಡಾ ಹೇಳುತ್ತಾನೆ.
ಅಜಿತ್ ಮನೆಗೆ ಬರಲು ಶುರು ಮಾಡಿದ್ದ ಸಲ್ಮಾನ್
ಒಮ್ಮೆ ಫೋನ್‌ ಮೂಲಕ ಸಂಪರ್ಕಕ್ಕೆ ಸಿಕ್ಕಿ ಅಜಿತ್‌ನ ಹೆಂಡತಿಯ ಜತೆ ಆರಾಮವಾಗಿ ಮಾತನಾಡುವಷ್ಟು ಸಲುಗೆ ಬೆಳೆಯಿತೋ ಬಳಿಕ ಊರಿಗೆ ಬಂದ ಆತ ಅಜಿತ್‌ನ ಮನೆಗೆ ಬರಲು ತೊಡಗಿದ್ದ. ಅವನು ಬರುತ್ತಿದ್ದ ಅನ್ನುವುದಕ್ಕಿಂತಲೂ ಅಜಿತನೇ ಆತನನ್ನು ಮನೆಗೆ ಕರೆಸಿಕೊಳ್ಳುತ್ತಿದ್ದ. ಯಾಕೆಂದರೆ, ಗಂಡ-ಹೆಂಡತಿಯರ ನಡುವೆ ಆಗಾಗ ಹುಟ್ಟಿಕೊಳ್ಳುತ್ತಿದ್ದ ಜಗಳಗಳಿಗೆ ಸಲ್ಮಾನ್‌ನೇ ಸಂಧಾನಕಾರನಾಗುತ್ತಿದ್ದ!
ಅಜಿತ್‌ನ ಪತ್ನಿಯನ್ನು ತಂಗಿ ತಂಗಿ ಎಂದೇ ಕರೆಯುತ್ತಿದ್ದ ಸಲ್ಮಾನ್. ಅವರಿಬ್ಬರ ನಡುವೆ ಜಗಳವಾದಾಗ ಅಜಿತನ ಪತ್ನಿ ಮೊದಲು ಸಲ್ಮಾನ್‌ಗೆ ದೂರು ಹೇಳುತ್ತಿದ್ದಳು. ಅವನು ಅಜಿತ್‌ನಿಗೆ ಬುದ್ಧಿ ಹೇಳುತ್ತಿದ್ದ. ಅಲ್ಲಲ್ಲಿಗೆ ಸಮಸ್ಯೆ ಪರಿಹಾರವಾಗುತ್ತಿತ್ತು.
ಈ ನಡುವೆ ಏಪ್ರಿಲ್‌ನಲ್ಲಿ ಅಜಿತ್‌ನ ಹೆಂಡತಿ ಜಗಳ ಮಾಡಿಕೊಂಡು ತವರಿಗೆ ಹೋಗಿದ್ದಳು. ಅಜಿತ್ ಹಲವು ಬಾರಿ ಹೋಗಿ ಕರೆದರೂ ಬಂದಿರಲಿಲ್ಲ. ಆಗ ಅಜಿತ್ ಮನೆಯ ಬಳಿ ಹೋಗಿ ಆಕೆಗೆ ಹಲ್ಲೆ ಮಾಡಿದ್ದ. ಆ ಸಂದರ್ಭದಲ್ಲೇ ಅವನ ಮೊಬೈಲ್‌ಗೆ ಒಂದು ಫೋಟೋ ಬಂದಿತ್ತು. ಅದರಲ್ಲಿ ಇದ್ದದ್ದು ಸಲ್ಮಾನ್ ಮತ್ತು ಅಜಿತ್ ಕುಮಾರನ ಪತ್ನಿ!
ಸಲ್ಮಾನ್ ಮತ್ತು ಅಜಿತ್‌ನ ಪತ್ನಿ ಅರೆಬೆತ್ತಲಾಗಿ ಬೆಡ್‌ ಮೇಲೆ ಇರುವ ಆ ಚಿತ್ರವನ್ನು ಯಾರೋ ಅಜಿತ್‌ನಿಗೆ ಕಳುಹಿಸಿದ್ದರು. ಆಗ ಅಜಿತ್‌ನಿಗೆ ತನ್ನ ಹೆಂಡತಿ ಯಾಕೆ ಇಷ್ಟೆಲ್ಲ ಜಗಳ ಮಾಡುತ್ತಿದ್ದಾಳೆ, ಮನೆ ಬಿಟ್ಟು ಹೋಗಿದ್ದೇಕೆ ಎನ್ನುವ ವಿಚಾರದಲ್ಲಿ ಅನುಮಾನಗಳು ಮೂಡಿದವು.
ಅಂದ ಹಾಗೆ ಈ ಫೋಟೊಗಳನ್ನು ಸಲ್ಮಾನ್ ತನ್ನ ಹಲವು ಗೆಳೆಯರಿಗೆ ತೋರಿಸಿದ್ದ ಎನ್ನಲಾಗುತ್ತಿದೆ. ತಾನು ಮತ್ತು ಅಜಿತನ ಹೆಂಡತಿ ಹೇಗಿದ್ದೇವೆ ನೋಡಿ ಎಂದು ಗೆಳೆಯರ ಮುಂದೆ ಜಂಭ ಕೊಚ್ಚಿಕೊಳ್ಳುತ್ತಿದ್ದ. ಅವಳಿಗಾಗಿ ನಾನು ಲಕ್ಷಾಂತರ ರೂ. ಖರ್ಚು ಮಾಡುತ್ತಿದ್ದೇನೆ ಎಂದು ಹೇಳಿಕೊಳ್ಳುತ್ತಿದ್ದ ಎನ್ನಲಾಗಿದೆ. ಹಾಗೆ ಯಾರಿಗೋ ಕಳುಹಿಸಿದ ಒಂದು ಫೋಟೊ ಅಜಿತನಿಗೆ ಸಿಕ್ಕಿತ್ತು.
ಈ ಫೋಟೊವನ್ನು ಮುಂದಿಟ್ಟು ಪತ್ನಿಯನ್ನು ಪ್ರಶ್ನಿಸಿದಾಗ ಅಜಿತ್‌ನ ಪತ್ನಿ ʻʻನನಗೆ ನಿನ್ನ ಜತೆ ಬದುಕಲು ಮನಸಿಲ್ಲ. ನನಗೆ ಡೈವೋರ್ಸ್‌ ಬೇಕುʼ ಎಂದು ಬೇಡಿಕೆ ಮಂಡಿಸಿದ್ದಳು. ಅದರ ಜತೆಗೆ ಕಳೆದ ಮೂರು ವರ್ಷಗಳಿಂದ ಅಜಿತ್ ನನಗೆ ಸಿಕ್ಕಾಪಟ್ಟೆ ಹಿಂಸೆ ಕೊಡುತ್ತಿದ್ದಾನೆ. ಅವನಿಂದ ಮುಕ್ತಿ ಬೇಕು ಎಂದು ಹೇಳುತ್ತಿದ್ದಾಳೆ. ಜತೆಗೆ ನನಗೆ ಸಲ್ಮಾನ್‌ನೇ ಬೇಕು ಎನ್ನುತ್ತಿದ್ದಾಳೆ ಅಂತಾನೆ ಅಜಿತ್!
ಸಲ್ಮಾನ್ ಬ್ರೇನ್‌ ವಾಷ್‌ ಮಾಡುತ್ತಾನೆ, ಲವ್‌ ಜಿದಾಹ್‌ ಇದು
ಸಲ್ಮಾನ್ ಪ್ರವೇಶ ಆಗುವವರೆಗೆ ನಮ್ಮ ಸಂಸಾರ ಈ ತರ ಇರಲಿಲ್ಲ. ಸಣ್ಣಪುಟ್ಟ ಜಗಳಗಳು ಇದ್ದರೂ ಈ ಮಟ್ಟಕ್ಕೆ ಹೋಗಿರಲಿಲ್ಲ. ನನ್ನ ಹೆಂಡತಿಯನ್ನು ತಂಗಿ ತಂಗಿ ಎಂದು ಹೇಳಿಕೊಂಡು ಆತ್ಮೀಯತೆ ಬೆಳೆಸಿಕೊಂಡ ಸಲ್ಮಾನ್ ಈಗ ಆಕೆಯ ಬ್ರೇನ್‌ ವಾಷ್‌ ಮಾಡಿ ನನ್ನಿಂದ ದೂರ ಮಾಡಿದ್ದಾನೆ. ಆಕೆಯನ್ನು ಕೇಳಿದರೆ ನನಗೆ ನೀನು ಬೇಡವೇ ಬೇಡ, ಸಲ್ಮಾನ್ ಜತೆಗೇ ಇರುತ್ತೇನೆ ಎನ್ನುತ್ತಿದ್ದಾಳೆ. ಹೀಗಾಗಿ ಇದೊಂದು ಲವ್‌ ಜಿಹಾದ್‌ ಎಂದು ಅಜಿತ್ ಆರೋಪಿಸುತ್ತಿದ್ದಾನೆ. ನನ್ನ ಹೆಂಡತಿಯನ್ನು ಬುಟ್ಟಿಗೆ ಹಾಕಿಕೊಂಡು ಆಕೆಯ ಜತೆ ಅಕ್ರಮ ಸಂಪರ್ಕವನ್ನು ಹೊಂದಿ, ಅದರ ಚಿತ್ರಗಳನ್ನು ವೈರಲ್‌ ಮಾಡುತ್ತಿರುವುದರ ಹಿಂದೆ ಲವ್‌ ಜಿಹಾದ್‌ ಸಂಚಿದೆ ಎನ್ನುವುದು ಅಜಿತ್ ಆರೋಪ.
ಯಾವ ಆರೋಪಗಳನ್ನೂ ನಿರಾಕರಿಸುತ್ತಿಲ್ಲ ಅಜಿತ್ ಪತ್ನಿ
ನಿಜವೆಂದರೆ ಅಜಿತ್ ಮಾಡುವ ಯಾವ ಆರೋಪಗಳನ್ನೂ ಅಜಿತ್ ಪತ್ನಿ ನಿರಾಕರಿಸುತ್ತಿಲ್ಲ. ಸಲ್ಮಾನ್‌ನನ್ನು ನನಗೆ ಪರಿಚಯ ಮಾಡಿಸಿದ್ದೇ ಅಜಿತ್. ಇವನ ಕಿರಿಕಿರಿಗಳನ್ನು ಅವನ ಬಳಿ ಹೇಳುತ್ತಿದ್ದೆ. ಅವನು ಇವನಿಗೆ ಬುದ್ಧಿ ಹೇಳುತ್ತಿದ್ದ. ನನಗೆ ಸಮಾಧಾನ ಹೇಳುತ್ತಿದ್ದ ಎನ್ನುತ್ತಾಳೆ. ಜತೆಗೆ ತಾವಿಬ್ಬರೂ ಮಂಚದ ಮೇಲೆ ಅರೆಬೆತ್ತಲೆಯಾಗಿದ್ದ ಸೆಲ್ಫಿ ತಾವು ಮಾಡಿದ ತಪ್ಪು ಎಂದು ನೇರವಾಗಿಯೇ ಒಪ್ಪಿಕೊಳ್ಳುತ್ತಾಳೆ. ಈ ನಡುವೆ ಸಲ್ಮಾನ್ ತನ್ನ ಹೆಸರನ್ನು ಎದೆಯ ಮೇಲೆ ಹಚ್ಚೆ ಹಾಕಿಸಿಕೊಂಡಿದ್ದನ್ನೂ ಆಕೆ ಸಮರ್ಥಿಸುತ್ತಾಳೆ.
ಇದನ್ನೂ ಓದಿ: Love Failure : ಪಾಗಲ್ ಪ್ರೇಮಿಯ ಹುಚ್ಚಾಟ; ಊರಿಗೆ ಹಬ್ಬಿದ ದ್ವೇಷದ ಜ್ವಾಲೆ
ಸಲ್ಮಾನ್ ಹೇಳುವುದೇನು?
ಈ ಘಟನಾವಳಿಗಳ ವಿಚಾರದಲ್ಲಿ ಸಲ್ಮಾನ್ ಖಾನ್‌ ಕೂಡಾ ವಿಸ್ತಾರ ನ್ಯೂಸ್‌ ಜತೆ ಮಾತನಾಡಿದ್ದಾನೆ. ಅವನು ಕೂಡಾ ಎಲ್ಲ ವಿಚಾರಗಳನ್ನು ಒಪ್ಪಿಕೊಳ್ಳುತ್ತಾನೆ. ಅಜಿತ್ ಮತ್ತು ಪತ್ನಿಯ ನಡುವಿನ ಜಗಳ, ಅದಕ್ಕೆ ಸಂಧಾನಕಾರನಾಗಿದ್ದು, ಆ ಅಶ್ಲೀಲ ಫೋಟೊ ವಿಚಾರವನ್ನು ಒಪ್ಪಿಕೊಳ್ಳುತ್ತಾನೆ. ಆದರೆ, ಅಜಿತ್‌ನ ಪತ್ನಿಯನ್ನು ಹಾರಿಸಿಕೊಂಡು ಹೋಗುವ ವಿಚಾರ ಯಾವುದೂ ಇಲ್ಲ. ಇದು ಲವ್‌ ಜಿಹಾದ್‌ ಏನೂ ಅಲ್ಲ ಎನ್ನುತ್ತಾನೆ.
ಅಜಿತ್‌ನ ಪತ್ನಿ ಮಾತ್ರ ನನಗೆ ಈ ಅಜಿತ್ ಜತೆಗಿನ ಸಂಬಂಧವೇ ಬೇಡ ಎಂದು ಹೇಳುತ್ತಿದ್ದು ಮುಂದೇನಾಗುತ್ತದೆ ಎಂದು ಕಾದು ನೋಡಬೇಕಾಗಿದೆ.
