ಮಂಡ್ಯ: ಹಾಸನ ಜಿಲ್ಲೆಯಲ್ಲಿ ಕೃಷ್ಣೇ ಗೌಡ ಎಂಬ ಗ್ರಾನೈಟ್ ಉದ್ಯಮಿಯನ್ನು ಕೊಲೆ ಮಾಡಿದ ಬೆನ್ನಿಗೇ ಇದೀಗ ಮಂಡ್ಯದ ಮದ್ದೂರಿನಲ್ಲಿ ಜೆಡಿಎಸ್‌ ಮುಖಂಡರೊಬ್ಬರನ್ನು (JDS leader) ದೇವಸ್ಥಾನದಲ್ಲೇ ಕೊಲೆ ಮಾಡುವ ಪ್ರಯತ್ನ (Murder attempt in temple) ನಡೆದಿದೆ. ಶನಿವಾರ ಬೆಳಗ್ಗೆ ಪ್ರಸಿದ್ಧ ಹೊಳೆ ಆಂಜನೇಯಸ್ವಾಮಿ ದೇವಾಲಯದಲ್ಲಿ (Maddur Hole Anjaneya swamy temple) ಜೆಡಿಎಸ್‌ ಮುಖಂಡ ಅಪ್ಪು ಗೌಡ ಅವರ ಕೊಲೆ ಯತ್ನ ನಡೆದಿದೆ. ಆದರೆ, ಅದೃಷ್ಟವಶಾತ್‌ ಅವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಅಪ್ಪು ಗೌಡ ಅವರು ಮಂಡ್ಯ ಜಿಲ್ಲೆಯ ಮದ್ದೂರಿನ ಲೀಲಾವತಿ ಬಡಾವಣೆ ನಿವಾಸಿಯಾಗಿದ್ದು, ನಾಯಕನಾಗಿ ಸ್ಥಳೀಯವಾಗಿ ಜನಪ್ರಿಯತೆ ಹೊಂದಿದ್ದರು. ಅಪ್ಪು ಗೌಡ ಅವರು ಇತ್ತೀಚಿನವರೆಗೆ ಕಾಂಗ್ರೆಸ್‌ನಲ್ಲಿದ್ದರು. ಕಳೆದ ಚುನಾವಣೆ ಸಂದರ್ಭದಲ್ಲಿ ಜೆಡಿಎಸ್‌ ಸೇರಿದ್ದರು. ಅವರು ಶನಿವಾರ ಮುಂಜಾನೆ ಹೊಳೆ ಆಂಜನೇಯ ಸ್ವಾಮಿ ದೇವಸ್ಥಾನಕ್ಕೆ ಬಂದಿದ್ದಾಗ ಅವರ ಕೊಲೆ ಯತ್ನ ನಡೆದಿದೆ. ಇಬ್ಬರು ಅಪರಿಚಿತರು ಬಂದು ಅಪ್ಪು ಗೌಡ ಅವರ ಹೊಟ್ಟೆಗೆ ಡ್ಯಾಗರ್‌ನಿಂದ ಚುಚ್ಚಿದ್ದಾರೆ. ದಾಳಿ ಮಾಡುವ ದೃಶ್ಯಗಳು ಸಿಸಿ ಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ದಾಳಿ ನಡೆದಿದ್ದು ಹೇಗೆ?
ಅಪ್ಪು ಗೌಡ ಅವರು ಕಾರಿನಲ್ಲಿ ದೇವಸ್ಥಾನಕ್ಕೆ ಬಂದು ದೇವರ ದರ್ಶನ ಮುಗಿಸಿ ಹೊರಗೆ ಬರುತ್ತಿದ್ದಂತೆಯೇ ಕಾದು ಕುಳಿತಿದ್ದ ಇಬ್ಬರು ಡ್ಯಾಗರ್‌ ಮತ್ತು ಲಾಂಗ್‌ ಹಿಡಿದುಕೊಂಡು ನುಗ್ಗಿದ್ದಾರೆ. ಒಬ್ಬ ಡ್ಯಾಗರ್‌ನಿಂದ ಅಪ್ಪು ಗೌಡ ಅವರಿಗೆ ಚುಚ್ಚೇ ಬಿಟ್ಟಿದ್ದಾನೆ. ಆತನ ದಾಳಿಯಿಂದ ಅಪ್ಪು ಗೌಡರು ಕೆಳಗೆ ಉರುಳಿಬಿದ್ದಿದ್ದಾರೆ.
ಈ ನಡುವೆ ಅಪ್ಪು ಗೌಡರ ಜತೆಗಿದ್ದ ಗೆಳೆಯರು ಓಡಿ ಬಂದ ಹಿನ್ನೆಲೆಯಲ್ಲಿ ದುಷ್ಕರ್ಮಿಗಳಿಗೆ ಸ್ವಲ್ಪ ದಿಕ್ಕೆಟ್ಟಂತೆ ಕಂಡರು. ಅಪ್ಪು ಗೌಡರ ಹುಡುಗರು ಅವರನ್ನು ಓಡಿಸಿದರು. ಈ ನಡುವೆ, ಒಬ್ಬಾತ ತನ್ನ ಕೈಯಲ್ಲಿದ್ದ ಲಾಂಗ್‌ನ್ನು ಅಲ್ಲೇ ಬಿಟ್ಟು ಪರಾರಿಯಾಗಿದ್ದಾನೆ.
ಇತ್ತ ಹೊಟ್ಟೆಯ ಭಾಗಕ್ಕೆ ಎರಡು ಕಡೆ ಡ್ಯಾಗರ್‌ನಿಂದ ಇರಿಯಲ್ಪಟ್ಟ ಅಪ್ಪು ಗೌಡ ಅವರು ಓಡಿ ಹೋಗಿ ಕಾರಿನಲ್ಲಿ ಕುಳಿತಿದ್ದಾರೆ. ಅವರನ್ನು ಕೂಡಲೇ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದೆ. ಸ್ಥಳಕ್ಕೆ ಮದ್ದೂರು ಠಾಣೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಈ ನಡುವೆ ಕೊಲೆ ಯತ್ನ ನಡೆಸಿದವರು ಯಾರು ಎನ್ನುವ ಬಗ್ಗೆ ಚರ್ಚೆ ನಡೆಯುತ್ತಿದೆ. ಅಪ್ಪು ಗೌಡ ಅವರು ಸಮಾಜ ಸೇವಕರಾಗಿ ಹೆಸರಾಗಿದ್ದು, ಕೆಲವು ವಿರೋಧಿಗಳೂ ಇದ್ದಾರೆ ಎನ್ನಲಾಗಿದೆ. ಯಾರೋ ಅವರ ವಿರೋಧಿಗಳು ನೇರವಾಗಿ ಇಲ್ಲವೇ ಬೇರೆಯವರ ಮೂಲಕ ಈ ಕೃತ್ಯ ನಡೆಸಿರಬಹುದು ಎಂದು ಹೇಳಲಾಗಿದೆ. ಅಪ್ಪು ಗೌಡರ ಜತೆಗೆ ಅವರ ಕೆಲವು ಹುಡುಗರೇ ಇದ್ದ ಹಿನ್ನೆಲೆಯಲ್ಲಿ ಪ್ರಾಣಾಪಾಯ ತಪ್ಪಿದೆ. ಒಂದೊಮ್ಮೆ ಕೊಲೆ ಮಾಡಲು ಬಂದ ಹುಡುಗರು ವಿರೋಧಿ ಬಣದವರಾದರೆ ಈಗಾಗಲೇ ಗುರುತು ಗೊತ್ತಾಗಿರುತ್ತದೆ ಎಂದು ಅಭಿಪ್ರಾಯಪಡಲಾಗಿದೆ.
ಪೊಲೀಸರು ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: Murder Case: ಹಾಸನದಲ್ಲಿ ಎಚ್.ಡಿ.ರೇವಣ್ಣ ಆಪ್ತ, ಗ್ರಾನೈಟ್ ಉದ್ಯಮಿಯ ಭೀಕರ ಹತ್ಯೆ
ಅಪ್ಪು ಗೌಡ ಅವರ ಕೊಲೆ ಯತ್ನದ ದೃಶ್ಯಾವಳಿ
ಕೊಲೆಗೆ ಯತ್ನ ನಡೆಸಿದ ಇಬ್ಬರು ದುಷ್ಟರಲ್ಲದೆ, ಇನ್ನೂ ಕೆಲವು ಯುವಕರು ಟಾಟಾ ಸುಮೋದಲ್ಲಿ ಬಂದಿದ್ದರು ಎಂದು ಹೇಳಲಾಗಿದೆ. ಅಪ್ಪು ಗೌಡರ ಟೀಮ್‌ ಬೆನ್ನು ಹತ್ತುತ್ತಿದ್ದಂತೆಯೇ ಅವರೆಲ್ಲರೂ ಟಾಟಾ ಸುಮೋದಲ್ಲಿ ತಪ್ಪಿಸಿಕೊಂಡಿದ್ದಾರೆ.
ಕಳೆದ ಎರಡು ದಿನಗಳ ಹಿಂದೆ ಹಾಸನದಲ್ಲಿ ಜೆಡಿಎಸ್‌ ನಾಯಕ ಎಚ್.ಡಿ ರೇವಣ್ಣ ಅವರ ಆತ್ಮೀಯ, ಗ್ರಾನೈಟ್ ಉದ್ಯಮಿ ಕೃಷ್ಣೇ ಗೌಡ ಅವರನ್ನು ಬರ್ಬರವಾಗಿ ಕೊಲೆ ಮಾಡಲಾಗಿತ್ತು. ಇದೀಗ ಇನ್ನೊಬ್ಬ ಜೆಡಿಎಸ್‌ ಮುಖಂಡನ ಕೊಲೆ ಯತ್ನ ನಡೆದಿದೆ.