ಬೆಂಗಳೂರು: ಕಳೆದ ಹತ್ತು ದಿನಗಳಿಂದ ತಲೆಮರೆಸಿಕೊಂಡಿದ್ದು ಈಗ ಬಂಧನಕ್ಕೆ ಒಳಗಾಗಿರುವ ಕುಖ್ಯಾತ ಕ್ರಿಮಿನಲ್‌ ಸ್ಯಾಂಟ್ರೋ ರವಿಯ (Santro Ravi Case) ಇನ್ನಷ್ಟು ಬಣ್ಣ ಬಣ್ಣದ ಕಥೆಗಳು ಹೊರಬೀಳುತ್ತಿವೆ. ದಲಿತ ಮಹಿಳೆಯೊಬ್ಬರ ಮೇಲೆ ಅತ್ಯಾಚಾರ ಮತ್ತು ವಂಚನೆ ನಡೆಸಿದ ಆರೋಪದಲ್ಲಿ ಬಂಧಿತನಾಗಿರುವ ಸ್ಯಾಂಟ್ರೋ ರವಿ ಹುಡುಗಿಯರನ್ನು ಪೂರೈಸುವ ಕಿಂಗ್‌ಪಿನ್‌ ಆಗಿದ್ದ. ೨೫ ವರ್ಷಗಳ ಹಿಂದಿನಿಂದಲೇ ಹುಡುಗಿಯರನ್ನು ಬಳಸಿಕೊಂಡು ಹೈಟೆಕ್‌ ವೇಶ್ಯಾವಾಟಿಕೆ ನಡೆಸುತ್ತಿದ್ದ ಸ್ಯಾಂಟ್ರೊ ರವಿ ಮೈಸೂರು ಮತ್ತು ಬೆಂಗಳೂರಿನಲ್ಲಿ ಹೋಟೆಲ್‌, ರೆಸಾರ್ಟ್‌, ದೊಡ್ಡ ದೊಡ್ಡ ಮನೆಗಳನ್ನು ಬಳಸಿಕೊಂಡು ವೇಶ್ಯಾವಾಟಿಕೆ ನಡೆಸುತ್ತಿದ್ದ. ಆತ ರಾಜಕಾರಣಿಗಳು ಮತ್ತು ಅಧಿಕಾರಿಗಳಿಗೂ ಹೆಣ್ಣು ಮಕ್ಕಳನ್ನು ಪೂರೈಸುತ್ತಿದ್ದ ಎನ್ನಲಾಗಿದೆ. ತಾನು ಮದುವೆಯಾದ ಎರಡನೇ ಪತ್ನಿಯನ್ನೇ ಅಧಿಕಾರಿಗಳ ಬಳಿಗೆ ಕಳುಹಿಸಿ ಅವರ ವಿಶ್ವಾಸ ಸಂಪಾದಿಸುತ್ತಿದ್ದ. ಬಳಿಕ ಅವರನ್ನು ಬಳಸಿಕೊಂಡು ತನ್ನೆಲ್ಲ ಕೆಲಸಗಳನ್ನು ಮಾಡಿಸಿಕೊಳ್ಳುತ್ತಿದ್ದ.
ಈ ರೀತಿ ವೇಶ್ಯಾವಾಟಿಕೆಯ ದಂಧೆಯ ನಾನಾ ನಮೂನೆಗಳನ್ನು ೨೫ ವರ್ಷದ ಹಿಂದೆಯೇ ತೋರಿಸಿದ್ದ ಆತ ರಾಜ್ಯ, ದೇಶ ಮತ್ತು ಬೇರೆ ದೇಶಗಳ ಹುಡುಗಿಯರನ್ನೂ ಈ ದಂಧೆಯಲ್ಲಿ ಬಳಸುತ್ತಿದ್ದ ಎಂದು ಹೇಳಲಾಗಿದೆ. ಹೀಗೆ ತಾನು ಬಳಸಿಕೊಳ್ಳುವ ಹುಡುಗಿಯರ ಗುಂಪಿಗೆ ಬೇರೆ ಬೇರೆ ಕೋಡ್ ವರ್ಡ್‌ಗಳನ್ನು ನೀಡುತ್ತಿದ್ದ ಎನ್ನಲಾಗಿದೆ. ಹುಡುಗಿಯರಿಗೆ ಟಾಪ್ ಮಾಡೆಲ್‌ ಕಾರುಗಳ ಹೆಸರಲ್ಲಿ ಕೋಡ್ ವರ್ಡ್ ಇಡುತ್ತಿದ್ದ ಎನ್ನಲಾಗಿದೆ.
ಬೆನ್ಜ್, ಜಾಗ್ವಾರ್, ಆಡಿ, ಬಿಎಂಡಬ್ಲ್ಯು ಸೇರಿದಂತೆ ಕಾರುಗಳ ಹೆಸರಿನಲ್ಲಿ ಅವರನ್ನು ಗುರುತಿಸುತ್ತಿದ್ದ. ಅದೇ ರೀತಿ ಪ್ರಪಂಚದ ಟಾಪ್ ಬ್ರ್ಯಾಂಡ್ ವಾಚ್‌ಗಳ ಹೆಸರಲ್ಲಿ ಅವರನ್ನು ಗುರುತಿಸುತ್ತಿದ್ದ ಎನ್ನಲಾಗಿದೆ.
ಆದರೆ, ಈ ಮಾಡೆಲ್‌ಗಳ ಹುಡುಗಿಯರನ್ನು ಎಲ್ಲರಿಗೂ ಪೂರೈಸಲಾಗುತ್ತಿರಲಿಲ್ಲ. ರೆಗ್ಯುಲರ್‌ ಮತ್ತು ಟಾಪ್ ಗಿರಾಕಿಗಳಿಗೆ ಮಾತ್ರ ಇಂಥವರ ಸೇವೆ ಲಭ್ಯವಾಗುತ್ತಿತ್ತು ಎನ್ನಲಾಗಿದೆ.
ಕೋಡ್ ವರ್ಡ್‌ಗಳು ಹೇಗಿರುತ್ತವೆ?
ಟೈಟನ್, ರ‍್ಯಾಡೋ, ರೋಲೆಕ್ಸ್, ಓಮೆಗಾ ಸೇರಿದಂತೆ ೭ ಟಾಪ್ ಬ್ರಾಂಡ್ ವಾಚ್‌ಗಳ ಹೆಸರನ್ನು ಹುಡುಗಿಯರಿಗೆ ಇಡುತ್ತಿದ್ದ ರವಿ. ಬಣ್ಣ ಹಚ್ಚೋ ತಾರೆಯರಿಗೆ ಅವರದ್ದೇ ಕೋಡ್ ಇತ್ತು. ಈ ರೀತಿ ವಾಚ್ ಕೋಡ್ ದಂಧೆ ಕಳೆದ ನಾಲ್ಕು ವರ್ಷಗಳಿಂದ ಚಲಾವಣೆಯಲ್ಲಿದೆ. ೧ ಲಕ್ಷದಿಂದ ೨೫ ಲಕ್ಷ ಮೌಲ್ಯದ ವಾಚ್ ಕೋಡ್‌ಗಳನ್ನು ಬಳಸಲಾಗಿದೆ. ಈ ಆಪರ್‌ ಗಂಟೆ, ದಿನದ ಲೆಕ್ಕದಲ್ಲಿ ರೆಗ್ಯುಲರ್‌ ಗಿರಾಕಿಗಳಿಗೆ ಮಾತ್ರ ಮೀಸಲಾಗಿತ್ತು ಎನ್ನಲಾಗಿದೆ.
ಈ ರೀತಿ ಕೋಡ್ ವರ್ಡ್ ಪಡೆಯುವ ಹುಡುಗಿಯರಲ್ಲಿ ಸ್ಯಾಂಡಲ್ ವುಡ್, ಬಾಲಿವುಡ್, ಮಾಡೆಲ್ಸ್ ಹಾಗೂ ಇಂಟರ್ ನ್ಯಾಷನಲ್ ಸುಂದರಿಯರು ಇದ್ದಾರೆ. ಇವರಿಗೆ ನೀಡಿದ ಟಾಪ್ ವಾಚ್‌ಗಳ ಕೋಡ್‌ಗಳು ಆಕರ್ಷಕವಾಗಿವೆ.
ಯಾರಿಗೆ ಯಾವ ಕೋಡ್ ವರ್ಡ್?
ಟೈಟಾನ್- ಚಿತ್ರರಂಗದ ಸಹ ನಟಿಯರು, ಸಣ್ಣಪುಟ್ಟ ಪಾತ್ರದ ನಟಿಯರು
ರ‍್ಯಾಡೋ- ಸ್ಯಾಂಡಲ್ ವುಡ್ ನ ಟಾಪ್ ನಟಿಯರು
ರೋಲೆಕ್ಸ್- ರ‍್ಯಾಂಪ್‌ ಮೇಲೆ ಸೊಂಟ ಬಳುಕಿಸೋ ಮಾಡೆಲ್ಸ್ ಮತ್ತು ಮುಂಬೈ ಯುವತಿಯರು.
ಒಮೇಗಾ- ಬಾಲಿವುಡ್ ನ ಪೋಷಕ, ಸಹನಟಿಯರು ಮತ್ತು ಪಾರ್ಟ್ ಟೈಂ ನಟಿಯರು.
ಟಿಸ್ಸಾಟ್- ಬಾಲಿವುಡ್ ನಟಿಯರು.
ಹ್ಯುಬ್ಲೊಟ್- ರಷ್ಯಾದಿಂದ ಕರೆಸಲ್ಪಡುವ ಯುವತಿಯರು
ಲೂಯಿಸ್ ಮೊಯಿನೆಟ್- ಇರಾನ್, ನೆದರ್ಲ್ಯಾಂಡ್ಸ್ ಸೇರಿದಂತೆ ಹಲವು ದೇಶದ ಯುವತಿಯರು.
ಇದನ್ನೂ ಓದಿ | Santro Ravi case | ಕುಖ್ಯಾತ ಕ್ರಿಮಿನಲ್‌ ಸ್ಯಾಂಟ್ರೋ ರವಿ ಕೊನೆಗೂ ಅರೆಸ್ಟ್‌, ಅಜ್ಞಾತ ಸ್ಥಳದಲ್ಲಿ ವಿಚಾರಣೆ