ನವ ದೆಹಲಿ: ಕಳೆದ ಮೇ ೬ರಂದು ಇಂಗ್ಲೆಂಡ್‌ನಲ್ಲಿ ಪತ್ತೆಯಾಗಿ ಈಗ ಜಗತ್ತಿನ ೨೦ಕ್ಕೂ ಅಧಿಕ ದೇಶಗಳಲ್ಲಿ ಹರಡಿರುವ ಮಂಕಿ ಪಾಕ್ಸ್‌ ವೈರಸ್ ಭಾರತಕ್ಕೂ ಪ್ರವೇಶ ಮಾಡಿರುವ ಸಂಶಯಗಳಿವೆ. ವಿದೇಶದಿಂದ ಕೇರಳಕ್ಕೆ ಬಂದ ವ್ಯಕ್ತಿಯೊಬ್ಬರಲ್ಲಿ ಕೆಲವು ಸಂಶಯಿತ ಲಕ್ಷಣಗಳು ಕಾಣಿಸಿಕೊಂಡಿವೆ. ಜಗತ್ತಿನಲ್ಲಿ ಈಗಾಗಲೇ ೧೩೦೦೦ಕ್ಕಿಂತ ಹೆಚ್ಚು ಪ್ರಕರಣಗಳು ಈ ವರ್ಷ ದಾಖಲಾಗಿವೆ. ೧೩ ಸಾವುಗಳೂ ಸಂಭವಿಸಿವೆ. ಹಾಗಿದ್ದರೆ ಈ ರೋಗ ನಮ್ಮ ಮನೆಗೂ ಬಂದರೆ ಏನು ಮಾಡಬಹುದು, ಬರದಂತೆ ಹೇಗೆ ತಡೆಯಬಹುದು ಎಂಬ ಬಗ್ಗೆ ಕೆಲವು ಮಾಹಿತಿಗಳು ಇಲ್ಲಿವೆ.
ಏನಿದು ಮಂಕಿಪಾಕ್ಸ್‌?
ಮೈಮೇಲೆ ಗುಳ್ಳೆಗಳು ಏಳುವ ಸಿಡುಬು ರೋಗ ಕೇಳಿದ್ದೇವಲ್ಲಾ.. ಅದೇ ಜಾತಿಗೆ ಸೇರಿದ ರೋಗ ಇದು. ಇದರ ಮೂಲ ಜೂನೋ ವೈರಸ್. ಆಫ್ರಿಕಾದ ಉಷ್ಣವಲಯದ ಭಾಗಗಳಲ್ಲಿ ಇದು ಹೆಚ್ಚು. ಅಲ್ಲಿಂದ ಬೇರೆ ಕಡೆಗೆ ಹರಡುತ್ತದೆ. ಮಂಕಿಪಾಕ್ಸ್‌ ಎಂಬ ಹೆಸರಿದ್ದರೂ ಇದು ಸೋಂಕಿತ ಮಂಗಗಳ ಜತೆಗೆ ಅಳಿಲುಗಳು, ಇಲಿಗಳು ಮತ್ತು ಹೆಗ್ಗಣಗಳಂತಹ ದಂಶಕಗಳಲ್ಲಿ ಇದು ಹೆಚ್ಚು ಸಾಮಾನ್ಯವಾಗಿದೆ. ವೈರಸ್ ಅನ್ನು ಝೂನೋಟಿಕ್ ಎಂದು ಕರೆಯಲಾಗುತ್ತದೆ. ಮನುಷ್ಯರಲ್ಲಿ ಮೊದಲ ಬಾರಿ ಕಂಡುಬಂದಿದ್ದು ೧೯೭೦ರಲ್ಲಿ ಕಾಂಗೋ ಗಣರಾಜ್ಯದಲ್ಲಿ.
ಮನುಷ್ಯರಲ್ಲಿ ಹೇಗೆ ಹರಡುತ್ತದೆ?
- ರಕ್ತ, ವೀರ್ಯ ಮೊದಲಾದ ದ್ರವಗಳ ಮೂಲಕ, ಶೀತ, ಕಫದ ಮೂಲಕ ಹರಡಬಹುದು.
- ಒಬ್ಬರು ಮುಟ್ಟಿದ ಶೀತ, ಕಫ, ಕೆಮ್ಮಿನ ಬಟ್ಟೆಗಳ ಮೂಲಕ ಹರಡಬಹುದು.
- ಯಾವುದಾದರೂ ಗಾಯವಾಗಿದ್ದರೆ ಅದರ ಸ್ರಾವಗಳು ಇನ್ನೊಬ್ಬರಿಗೆ ತಗುಲಿದಾಗ
- ಸರಿಯಾಗಿ ಬೇಯಿಸದ ಪ್ರಾಣಿಗಳ ಮಾಂಸದ ಮೂಲಕ
- ಕಣ್ಣೀರಿನ ಮೂಲಕವೂ ಇದು ಹರಡಬಹುದು.
- ಇದು ಲೈಂಗಿಕವಾಗಿ ಹರಡುತ್ತದೆಯಾದರೂ ಅದೇ ಹೆಸರಿನಲ್ಲಿ ಗುರುತಿಸಲಾಗಿಲ್ಲ. ವೀರ್ಯದ ಮೂಲಕ ಹರಡುವ ಸಾಧ್ಯತೆ ಹೆಚ್ಚು. ಅದರಲ್ಲೂ ಸಲಿಂಗ ಕಾಮಿಗಳಲ್ಲಿ ಹೆಚ್ಚು ಅಪಾಯ.
ಏನೇನು ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ?
- ಪ್ರಮುಖವಾಗಿ ಮೈಯಲ್ಲಿ ಗುಳ್ಳೆಗಳು ಏಳುತ್ತವೆ. ಮೊದಲು ಸಣ್ಣಗೆ ಕೆಂಪಾಗಿ ಕಾಣಿಸಿಕೊಂಡು ಬಳಿಕ ದೊಡ್ಡದಾಗಿ ಕೀವಾಗುತ್ತದೆ.
- ಹೆಣ್ಣು, ಗಂಡಿನ ಜನನಾಂಗ ಭಾಗಗಳಲ್ಲಿ, ಗುದ ದ್ವಾರದ ಸುತ್ತಲೂ ಕಾಣಿಸಿಕೊಳ್ಳುತ್ತದೆ.
- ಕೆಲವರಿಗೆ ಗುಳ್ಳೆಗಳು ಕಾಣಿಸಿಕೊಳ್ಳುವ ಕೆಲವು ದಿನ ಮೊದಲೇ ಜ್ವರ ಬರುತ್ತದೆ. ಕೆಲವರಿಗೆ ಬರುವುದಿಲ್ಲ.
- ಗುದದ್ವಾರದ ಬಳಿ ಕಾಣಿಸಿಕೊಳ್ಳುವ ನೋವು ಮತ್ತು ಕೀವನ್ನು ಇದರ ಲಕ್ಷಣ ಎಂದು ಪರಿಗಣಿಸಬಹುದು.
ಇತರ ಸಾಮಾನ್ಯ ಲಕ್ಷಣಗಳು
ಜ್ವರ, ಆಯಾಸ, ತಲೆ ನೋವು, ಮಾಂಸ ಖಂಡಗಳಲ್ಲಿ ನೋವು, ಚಳಿ, ಬೆನ್ನು ನೋವು, ಗಂಟಲು ನೋವು, ಒಣ ಕೆಮ್ಮು, ಉಸಿರಾಟದ ತೊಂದರೆ.
ರೋಗ ಬಂದರೆ ಏನಾಗುತ್ತದೆ?
- ಮೊದಲ ಒಂದೆರಡು, ಮೂರು ದಿನ ಜ್ವರ ಬರುತ್ತದೆ. ಆಮೇಲೆ ಮೊದಲು ಮುಖದಲ್ಲಿ ಸಣ್ಣ ಗುಳ್ಳೆಗಳು ಕಾಣಿಸಿಕೊಳ್ಳುತ್ತವೆ. ಬಳಿಕ ದೇಹದ ಇತರ ಭಾಗಗಳಲ್ಲಿ ಕಾಣಿಸಿಕೊಳ್ಳಲು ಶುರುವಾಗುತ್ತದೆ.
- ಹೆಚ್ಚಾಗಿ, ಕೈ, ಪಾದ, ತೋಳು, ಕಾಲುಗಳಲ್ಲಿ ಸಣ್ಣ ಕೆಂಪು ಗಾಯ ಕಾಣಿಸಿಕೊಂಡು ಬಳಿಕ ಊದಿಕೊಳ್ಳುತ್ತದೆ. ನಂತರ ಕೀವಾಗುತ್ತದೆ. ಕೆಲವೊಮ್ಮೆ ೧೫೦ರಷ್ಟು ಗುಳ್ಳೆಗಳು ಕಾಣಿಸಿಕೊಳ್ಳಬಹುದು.
- ಒಮ್ಮೆ ಸಮಸ್ಯೆ ಕಾಣಿಸಿಕೊಂಡರೆ ಅದು ಗುಣವಾಗಲು ಕೆಲವರಿಗೆ ೨೧ ದಿನಗಳೇ ಬೇಕು.
ಮಂಕಿ ಪಾಕ್ಸ್‌ ಬಂದೇ ಬಿಟ್ಟರೆ ಏನು ಮಾಡೋಣ?
– ದಿನಕ್ಕೆ ಎರಡು ಬಾರಿ ಜ್ವರ ಎಷ್ಟಿದೆ ಎಂದು ಚೆಕ್‌ ಮಾಡಬೇಕು, ಜ್ವರ ತಲೆಗೇರದಂತೆ ತಣ್ಣಗಿನ ಬಟ್ಟೆ ಇಡಬಹುದು.
– ಜ್ವರ, ಚಳಿ, ಸಣ್ಣ ಕೆಂಪು ಗಾಯ ಕಂಡರೆ ಎಲ್ಲರಿಂದ ದೂರ ಉಳಿಯುವುದು ಉತ್ತಮ.
– ಗಾಯ ಗುಳ್ಳೆಯಾಗಿ ಪರಿವರ್ತನೆಯಾದರೆ ಕೂಡಲೇ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
ಚಿಕಿತ್ಸೆ ಹೇಗೆ?
ಮಂಕಿ ಪಾಕ್ಸ್‌ಗೆ ಮುಖ್ಯವಾಗಿ ಬೇಕಾಗುವುದು ವಿಶ್ರಾಂತಿ, ಸಾಕಷ್ಟು ಪ್ರಮಾಣದಲ್ಲಿ ನೀರು ಮತ್ತು ವೈದ್ಯರು ಕೊಡುವ ಔಷಧ. ವೈದ್ಯರು ವೈರಲ್‌ ನಿಯಂತ್ರಣ ಔಷಧ ಮತ್ತು ಸಿಡುಬಿಗೆಂದು ನಿಗದಿಯಾಗಿರುವ ವ್ಯಾಕ್ಸಿನಿಯಾ ಗಾಮಾ ಗ್ಲೋಬ್ಯುಲಿನ್‌ ಕೊಡಬಹುದು.
– ಇತ್ತೀಚೆಗಷ್ಟೇ ಅಂದರೆ ೩-೫ ವರ್ಷಕ್ಕೆ ಮೊದಲು ಸಿಡುಬಿನ ಲಸಿಕೆ ಪಡೆದಿದ್ದರೆ ಮಂಕಿ ಪಾಕ್ಸ್‌ ಹೆಚ್ಚು ಗಂಭೀರವಾಗುವುದಿಲ್ಲ. ಹೀಗಾಗಿ ಮಕ್ಕಳಿಗೆ ಹೆಚ್ಚು ಆತಂಕವಿಲ್ಲ.
ಬಾರದಂತೆ ತಡೆಯುವುದು ಹೇಗೆ?
– ಇದು ಪ್ರಾಣಿಗಳ ಮೂಲಕ ಹರಡುವುದರಿಂದ ಪ್ರಾಣಿಗಳಿಂದ ಸ್ವಲ್ಪ ದೂರವಿರುವುದು ಉತ್ತಮ.
– ಸೋಂಕಿ ವ್ಯಕ್ತಿಗಳಿಂದ ದೂರವಿರಿ.
– ಕೈ ಮತ್ತು ಮುಖವನ್ನು ಆಗಾಗ ತೊಳೆದುಕೊಳ್ಳುವುದು ಉತ್ತಮ
_ಮುಖಕ್ಕೆ ಮಾಸ್ಕ್‌ ಮತ್ತು ಕೈಗಳಿಗೆ ಗ್ಲೌಸ್‌ (ಅಗತ್ಯವಿದ್ದಾಗ) ಬಳಸಿ
ಸಲಿಂಗಕಾಮಿಗಳಿಗೆ ಆತಂಕ ಯಾಕೆ?
ಸಲಿಂಗಕಾಮಿಗಳು, ಹೆಚ್ಚಿನ ಲೈಂಗಿಕ ಸಂಪರ್ಕಗಳನ್ನು ಹೊಂದಿರುವವರು ಈ ರೋಗದ ಬಗ್ಗೆ ಹೆಚ್ಚು ಎಚ್ಚರವಾಗಿರಬೇಕು. ʼʼಯುರೋಪ್‌ನಲ್ಲಿ ಎರಡು ಇವೆಂಟ್‌ಗಳಲ್ಲಿ ದೈಹಿಕವಾಗಿ ಅತ್ಯಂತ ನಿಕಟವಾಗಿ ಪಾಲ್ಗೊಂಡವರಲ್ಲಿ ಇದು ಹಬ್ಬಿದೆʼʼ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಎಮರ್ಜೆನ್ಸಿ ವಿಭಾಗದ ಮಾಜಿ ಮುಖ್ಯಸ್ಥ ಡಾ.ಡೇವಿಡ್‌ ಹೈಮನ್‌ ಹೇಳಿದ್ದಾರೆ. ʼʼಈ ಕಾಯಿಲೆ ಯಾರಿಗೂ ಬರಬಹುದು. ಆದರೆ ಈಗಾಗಲೇ ಬಂದವರನ್ನು ಪರೀಕ್ಷಿಸಲಾಗಿ, ಅವರಲ್ಲಿ ಹೆಚ್ಚಿನವರು ಗೇಗಳು ಎಂಬುದು ಕಂಡುಬಂದಿದೆ!