ಬಾಲಕಿಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ಆರೋಪವನ್ನು ಚಿತ್ರದುರ್ಗ ಮುರುಘಾ ಮಠದ ಡಾ. ಶಿವಮೂರ್ತಿ ಮುರುಘಾ ಶರಣರು ಎದುರಿಸುತ್ತಿದ್ದಾರೆ. ಅವರ ವಿರುದ್ಧ ಪೋಕ್ಸೋ (ಲೈಂಗಿಕ ದೌರ್ಜನ್ಯದ ವಿರುದ್ಧ ಮಕ್ಕಳ ರಕ್ಷಣೆ- POCSO ACT) ಕಾಯಿದೆಯಡಿ ಪ್ರಕರಣ ದಾಖಲಾಗಿದೆ. ಈ ಹಿನ್ನೆಲೆಯಲ್ಲಿ ಪೋಕ್ಸೋ ಕಾಯಿದೆ ಎಂದರೇನು, ಯಾವುದು ಅಪರಾಧ, ಕಾಯಿದೆಯ ಲಕ್ಷಣಗಳೇನು, ಉದ್ದೇಶಗಳೇನು, ಯಾವಾಗ ಈ ಕಾಯಿದೆ ಅನ್ವಯವಾಗುತ್ತದೆ, ತಿದ್ದುಪಡಿಗಳೇನು ಎಂಬಿತ್ಯಾದಿ ಮಾಹಿತಿಯು ಇಲ್ಲಿದೆ….
ಏನಿದು ಪೋಕ್ಸೋ ಕಾಯಿದೆ?
2012ರ Protection of Children from Sexual Offences Act ಅನ್ನು ಸಂಕ್ಷಿಪ್ತವಾಗಿ ಪೋಕ್ಸೋ (POCSO ACT) ಕಾಯಿದೆ ಎಂದು ಕರೆಯಲಾಗುತ್ತಿದೆ. ಮಕ್ಕಳ ಹಿತರಕ್ಷಣೆಗಾಗಿ ಈ ಕಾಯಿದೆಯನ್ನು ಜಾರಿಗೆ ತರಲಾಯಿತು. ಅದರಲ್ಲೂ ವಿಶೇಷವಾಗಿ ಮಕ್ಕಳನ್ನು ಎಲ್ಲ ರೀತಿಯ ಲೈಂಗಿಕ ದೌರ್ಜನ್ಯ, ಅಪರಾಧಗಳಿಂದ ಪಾರು ಮಾಡುವುದು ಕಾಯಿದೆಯ ಮುಖ್ಯ ಉದ್ದೇಶವಾಗಿದೆ. ಈ ಕಾಯಿದೆ ಯಾವುದೇ ಲಿಂಗತಾರತಮ್ಯ ಮಾಡುವುದಿಲ್ಲ. ಬಾಲಕಿ ಮತ್ತು ಬಾಲಕ ಇಬ್ಬರನ್ನು ಲೌಂಗಿಕ ದೌರ್ಜನ್ಯದ ಸಂತ್ರಸ್ತರು ಎಂದು ಪರಿಗಣಿಸುತ್ತದೆ.
ಯಾವುದರಿಂದ ರಕ್ಷಣೆ?: ಬಾಲಕಿ/ಬಾಲಕ ವಿರುದ್ಧ ಲೈಂಗಿಕ ದೌರ್ಜನ್ಯ, ಲೈಂಗಿಕ ಪೀಡನೆ, ಪೋರ್ನೋಗ್ರಫಿ, ಲೈಂಗಿಕ ಹಿಂಸೆಗಳಿಂದ ರಕ್ಷಣೆ ಮಾಡಲಾಗುತ್ತದೆ.
ಮಕ್ಕಳ ಹಕ್ಕುಗಳ ವಿಶ್ವಸಂಸ್ಥೆಯ ಒಪ್ಪಂದಕ್ಕೆ (UNCRC) ಭಾರತವೂ ಸಹಿ ಮಾಡಿದೆ. ಸ್ನೇಹಿ ಕಾರ್ಯವಿಧಾನವನ್ನು ಖಚಿತಪಡಿಸಿಕೊಳ್ಳುವುದಕ್ಕಾಗಿಯೇ ಪೋಕ್ಸೋ ಕಾಯಿದೆಯನ್ನು ಜಾರಿಗೊಳಿಸಲಾಗಿದೆ. ಜತೆಗೆ ಭಾರತದ ಸಂವಿಧಾನದ 15 (3) ನೇ ವಿಧಿಯ ಅಗತ್ಯವನ್ನೂ ಈ ಕಾಯಿದೆ ಪೂರೈಸುತ್ತದೆ.
ಈ ಕಾಯಿದೆ ಲಕ್ಷಣಗಳೇನು?
- ಸ್ಪರ್ಶ ಆಧರಿತ, ಸ್ಪರ್ಶ-ರಹಿತ, ಬೇಧಕ(Penetrative), ಪೋರ್ನೋಗ್ರಫಿಕ್ ಕ್ರೈಮ್ ಸೇರಿ ಹಲವು ಅಪರಾಧಗಳ ಬಗ್ಗೆ ಇದು ವ್ಯಾಖ್ಯಾನ ಮಾಡುತ್ತದೆ. ಒಂದು ಸಣ್ಣ ಅನುಮಾನಕ್ಕೆ ಎಡೆ ಇಲ್ಲದಂತೆ ಈ ಕಾಯಿದೆಯಲ್ಲಿ ಎಲ್ಲವನ್ನೂ ವಿವರಿಸಲಾಗಿದೆ.
- ಸಂತ್ರಸ್ತ ಬಾಲಕ/ಬಾಲಕಿಗೆ ಪರಿಹಾರವನ್ನು ಒದಗಿಸುವುದನ್ನು ಖಾತ್ರಿಪಡಿಸುತ್ತದೆ.
- ಈ ಕಾಯಿದೆಗೆ ಸಂಬಂಧಿಸಿದ ಎಲ್ಲ ಪ್ರಕರಣಗಳನ್ನು ಪೋಕ್ಸೋ ನ್ಯಾಯಾಲಯಗಳು ಮಾತ್ರವೇ ವಿಚಾರಣೆ ನಡೆಸಬೇಕಾಗುತ್ತದೆ.
- INNOCENT TILL PROVEN GUILTY (ಅಪರಾಧ ಸಾಬೀತು ಆಗುವರೆಗೂ ಮುಗ್ದ) ಎಂಬ ತತ್ವ ಈ ಕಾಯಿದೆಗೆ ಅನ್ವಯವಾಗುವುದಿಲ್ಲ.
- ಪೋಕ್ಸೋ ಕಾಯಿದೆಯಡಿ ಒಮ್ಮೆ ಪ್ರಕರಣ ದಾಖಲಾದರೆ, ಆರೋಪಿ ಲೈಂಗಿಕ ಕ್ರಿಯೆ ನಡೆಸುವ ಉದ್ದೇಶ ಹೊಂದಿದ್ದ ಎಂದೇ ಪರಿಗಣಿಸಲಾಗುತ್ತದೆ.
- ಮಕ್ಕಳ ಸ್ನೇಹಿ ಪ್ರಕ್ರಿಯೆಗಳನ್ನು ಖಾತರಿಗೊಳಿಸುತ್ತದೆ.
- ಮನೆಯಲ್ಲೇ ಮಕ್ಕಳ ಮೇಲೆ ದೌರ್ಜನ್ಯ ನಡೆದಿದ್ದರೆ, ಸಂತ್ರಸ್ತ ಬಾಲಕ/ಬಾಲಕಿಯನ್ನು ಸ್ಥಳಾಂತರಿಸಿ, ಮಕ್ಕಳ ಕಲ್ಯಾಣ ಆಯೋಗವು ಅವರ ಕಾಳಜಿ ಮತ್ತು ರಕ್ಷಣೆಯನ್ನು ಮಾಡಬೇಕಾಗುತ್ತದೆ.
ಗೌಪ್ಯತೆ ಕಾಪಾಡಬೇಕು
ಪೋಕ್ಸೋ ಕಾಯಿದೆಯ ಸೆಕ್ಷನ್ 23ರ ಪ್ರಕಾರ, ಸಂತ್ರಸ್ತರ ಗುರುತನ್ನು ಬಿಟ್ಟುಕೊಡಬಾರದು. ಈ ಕಾಯಿದೆ ಅನುಸಾರ ಸ್ಥಾಪಿತವಾದ ವಿಶೇಷ ಕೋರ್ಟು ಅನುಮತಿ ಇಲ್ಲದ ಹೊರತು ಸಂತ್ರಸ್ತರ ಮಾಹಿತಿಯನ್ನು ಬಹಿರಂಗಪಡಿಸುವಂತಿಲ್ಲ. ಒಂದೊಮ್ಮೆ ಈ ಸೆಕ್ಷನ್ ಉಲ್ಲಂಘನೆಯಾದರೆ, ಶಿಕ್ಷಾರ್ಹ ಅಪರಾಧ ಎನಿಸಿಕೊಳ್ಳುತ್ತದೆ. ಒಳ್ಳೆಯ ಕಾರಣಕ್ಕಾದರೂ ಮಾಹಿತಿ ಬಹಿರಂಗ ಮಾಡಿದ್ದರೂ ಶಿಕ್ಷೆ ತಪ್ಪುವುದಿಲ್ಲ. ಮಾಧ್ಯಮಗಳು ಮಾತ್ರವಲ್ಲದೇ ಸೋಷಿಯಲ್ ಮೀಡಿಯಾಗಳಲ್ಲೂ ಮಾಹಿತಿ ಸೋರಿಕೆಯಾಗುವಂತಿಲ್ಲ.
ಮಕ್ಕಳ ಸ್ನೇಹಿ ವಿಚಾರಣಾ ಪ್ರಕ್ರಿಯೆ
-ಪೋಕ್ಸೋ ಕಾಯಿದೆಯು ಮಕ್ಕಳ ಸ್ನೇಹಿ ವಿಚರಣಾ ಪ್ರಕ್ರಿಯೆಗಳನ್ನು ಖಚಿತಪಡಿಸುತ್ತದೆ.ಸಂತ್ರಸ್ತ ಮಕ್ಕಳನ್ನು
-ವಿಚಾರಣೆಗೊಳಪಡಿಸುವ ಪೊಲೀಸ್ ಅಧಿಕಾರಿ ಸಮವಸ್ತ್ರ ಧರಿಸುವಂತಿಲ್ಲ.
-ವಿಚಾರಣೆ ಸಂದರ್ಭದಲ್ಲಿ ಸಂತ್ರಸ್ತ ಬಾಲಕ/ಬಾಲಕಿ ಆರೋಪಿಯ ಸಂಪರ್ಕಕ್ಕೆ ಬರದಂತೆ ನೋಡಿಕೊಳ್ಳಬೇಕು.
-ಮಗುವನ್ನು ರಾತ್ರಿ ವೇಳೆ ಪೊಲೀಸ್ ಠಾಣೆಯಲ್ಲಿ ಇರಿಸಿಕೊಳ್ಳುವಂತಿಲ್ಲ.
-ಮಗುವಿನ ಮಾಹಿತಿ ಗೌಪ್ಯತೆಯನ್ನುತನಿಖಾಧಿಕಾರಿ ಕಾಪಾಡಬೇಕು.
-ಮಗು ಯಾರನ್ನು ನಂಬುತ್ತದೆಯೋ ಅಂಥವರ ಸಮ್ಮುಖದಲ್ಲೇ ಹೇಳಿಕೆಯನ್ನು ದಾಖಲಿಸಿಕೊಳ್ಳಬೇಕು. ಉದಾಹರಣೆಗೆ ತಂದೆ ತಾಯಿ ಸಮ್ಮುಖದಲ್ಲಿ.
-ಎಲೆಕ್ಟ್ರಾನಿಕ್ ಸಾಧನಗಳಾದ ಆಡಿಯೋ ಮತ್ತು ವಿಡಿಯೋಗಳ ಮೂಲಕ ಹೇಳಿಕೆಯನ್ನು ದಾಖಲಿಸಿಕೊಳ್ಳಬೇಕು.
-ಅಗತ್ಯ ಇದ್ದರೆ ಅನುವಾದಕರು ಮತ್ತು ವ್ಯಾಖ್ಯಾನಕಾರರ ಸಾಹಯವನ್ನು ಪಡೆದುಕೊಳ್ಳಬೇಕು.
-ವಿಚಾರಣೆ ವೇಳೆ ನಿಯಮಿತವಾಗಿ ವಿರಾಮಗಳನ್ನು ತೆಗೆದುಕೊಳ್ಳಬೇಕು.
-ವಿಚಾರಣಾ ಕೋರ್ಟ್‌ಗೆ ಪದೇ ಪದೇ ಮಗುವನ್ನು ಕರೆಯಬಾರದು, ಈ ಬಗ್ಗೆ ವಿಶೇಷ ಕೋರ್ಟ್ ನಿಗಾವಹಿಸಬೇಕಾಗುತ್ತೆ.
-ವಿಚಾರಣೆ ವೇಳೆ ಸಂತ್ರಸ್ತ ಮಗುವಿಗೆ ಆಕ್ರಮಣಕಾರಿ ಪ್ರಶ್ನೆಗಳನ್ನು ಕೇಳುವಂತಿಲ್ಲ.
ಕೇಸ್ ವಿಲೇವಾರಿ ಅವಧಿ?
ಪೋಕ್ಸೋ ಕಾಯಿದೆಯ ಸೆಕ್ಷನ್ 35ರ ಪ್ರಕಾರ, ಪ್ರಕರಣದ ವಿಚಾರಣೆಗೆ ನಿರ್ದಿಷ್ಟ ಅವಧಿಯನ್ನು ನಿಗದಿಪಡಿಸಲಾಗಿದೆ. ಮಗುವಿನ ಹೇಳಿಕೆ ದಾಖಲು: ಅಪರಾಧ ನಡೆದಿದೆ ಎಂಬುದು ಗೊತ್ತಾದ ದಿನ(ಕೇಸ್ ದಾಖಲಾದ)ದಿಂದ 30 ದಿನಗಳ ಒಳಗೆ ಹೇಳಿಕೆಯನ್ನು ದಾಖಲಿಸಿಕೊಳ್ಳಬೇಕು.ಅಪರಾಧ ನಡೆದಿದೆ ಎಂದು ಗೊತ್ತಾದ ದಿನದಿಂದ ಒಂದು ವರ್ಷದೊಳಗೆ ವಿಚಾರಣೆಯನ್ನು ಪೂರ್ಣಗೊಳಿಸಬೇಕು.
ತಿದ್ದುಪಡಿ ಬಳಿಕ ಶಿಕ್ಷೆಯ ಪ್ರಮಾಣ…
- ಪೋಕ್ಸೋ ಕಾಯಿದೆಯಡಿಯ ಅಪರಾಧಿಗಳಿಗೆ ಕಠಿಣ ಶಿಕ್ಷೆನೀಡಲಾಗುತ್ತದೆ. 2019ರ ತಿದ್ದುಪಡಿಯ ಬಳಿಕ ಶಿಕ್ಷೆ ಇನ್ನಷ್ಟು ಕಠಿಣಗೊಳಿಸಲಾಗಿದೆ. ಈ ಕಾಯಿದೆಯಡಿ ಗರಿಷ್ಠ ದಂಡದೊಂದಿಗೆ ಕಠಿಣ ಜೀವಾವಧಿ ಶಿಕ್ಷೆಯನ್ನು ವಿಧಿಸಬಹುದಾಗಿದೆ. ಮಕ್ಕಳ ಮೇಲಿನ ಲೈಂಗಿಕ ಬೇಧಕ ಅಪರಾಧಕ್ಕೆ ಕಾಯಿದೆಯಡಿ ಶಿಕ್ಷೆಯನ್ನು ನಿಗದಿಪಡಿಸಲಾಗಿದೆ. ಈ ಅಪರಾಧಕ್ಕೆ ಆರೋಪಿಗೆ 10 ವರ್ಷಕ್ಕಿಂತ ಕಡಿಮೆ ಇಲ್ಲದ ಜೀವಾವಧಿ ಶಿಕ್ಷೆ ಖಚಿತ ಮತ್ತು ಅದನ್ನು ವಿಸ್ತರಿಸಲೂಬಹುದು. ಈ ಕನಿಷ್ಠ ಶಿಕ್ಷೆಯನ್ನು20 ವರ್ಷಗಳವರೆಗೂ ಹೆಚ್ಚಿಸಬಹುದಾಗಿದೆ.
- ಬೇಧಕ ಲೈಂಗಿಕ ದೌರ್ಜನ್ಯ(Penetrative sexual assault). ಈ ಅಪರಾಧಕ್ಕೆ ಕನಿಷ್ಠ 7 ವರ್ಷಗಳಿಂದ 10 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಹೆಚ್ಚಿಸಲಾಗಿದೆ. 16 ವರ್ಷದೊಳಗಿನ ಮಗುವಿನ ಮೇಲೆ ಬೇಧಕ ಲೈಂಗಿಕ ದೌರ್ಜನ್ಯ ನಡೆಸಿದರೆ, ಅಪರಾಧಿಗೆ ದಂಡಸಹಿತ 20 ವರ್ಷಗಳ ಜೈಲು ಶಿಕ್ಷೆಯಿಂದ ಜೀವಾವಧಿ ಶಿಕ್ಷೆಯನ್ನು ವಿಧಿಸಬಹುದಾಗಿದೆ.
- ತ್ರೀವ್ರ ಬೇಧಕ ಲೈಂಗಿಕ ದೌರ್ಜನ್ಯ (Aggravated penetrative sexual assault). ತೀವ್ರ ಬೇಧಕ ಲೈಂಗಿಕ ದೈರ್ಜನ್ಯಕ್ಕೆ ಇದ್ದ 10 ವರ್ಷಗಳ ಶಿಕ್ಷೆಯನ್ನು 20 ವರ್ಷಗಳವರೆಗೂ ಹೆಚ್ಚಿಸಲಾಗಿದೆ. ಗರಿಷ್ಠ ಜೀವಾವಧಿ ಶಿಕ್ಷೆಯಿಂದ ಮರಣ ದಂಡನೆ ಕೂಡ ವಿಧಿಸಬಹುದು.
- ಅಶ್ಲೀಲ ಚಿತ್ರಗಳಲ್ಲಿ ಮಗುವನ್ನು ಬಳಸುವುದು (Pornographic Purposes). ಈ ಅಪರಾಧದಲ್ಲಿ ಆರೋಪಿಗೆ ಕನಿಷ್ಠ ಐದು ವರ್ಷ ಜೈಲು ಶಿಕ್ಷೆ ವಿಧಿಸಲಾಗುತ್ತದೆ. ಒಂದೊಮ್ಮೆ ಬೇಧಕ ಲೈಂಗಿಕ ದೌರ್ಜನ್ಯ ನಡೆದಿದ್ದರೆ ಗರಿಷ್ಠ 20 ವರ್ಷಗಳ ವರೆಗೆ ಶಿಕ್ಷೆ ವಿಧಿಸಬಹುದು.
- ಅಶ್ಲೀಲ ಸಾಮಗ್ರಿಗಳ ಸಂಗ್ರಹ ಅಪರಾಧಕ್ಕೆ ಕನಿಷ್ಠ 3 ವರ್ಷಗಳವರೆಗೆ ಇದ್ದ ಶಿಕ್ಷೆಯನ್ನು 5 ವರ್ಷಗಳವರೆಗೆ ಹೆಚ್ಚಿಸಲಾಗಿದೆ.
ಇದನ್ನೂ ಓದಿ | ಬಾಲಕಿ ಮೇಲೆ ಲೈಂಗಿಕ ದೌರ್ಜನ್ಯ; ಆರೋಪಿಗೆ 20 ವರ್ಷ ಜೈಲು, ₹50 ಸಾವಿರ ದಂಡ