ಇತ್ತೀಚೆಗೆ ಪ್ರತಿಷ್ಠಿತ ಕಂಪನಿಯ ಉದ್ಯೋಗಿಯೊಬ್ಬರಿಗೆ ಉಸಿರಾಟದ ತೊಂದರೆ, ಎದೆನೋವು ಎದುರಾಯಿತು. ವೈದ್ಯರು ಪರಿಶೀಲಿಸಿ, ಇದು ʼಪಲ್ಮನರಿ ಎಂಬೋಲಿಸಂʼ ಎಂದರು. ಹಾಗಂದರೆ ಶ್ವಾಸಕೋಸದ ನಾಳದಲ್ಲಿ ಉಂಟಾದ ಒಂದು ಬ್ಲಾಕ್. ಇದು ಉಂಟಾದುದು ಕಾಲಿನಲ್ಲಿ ಸೃಷ್ಟಿಯಾದ ಒಂದು ಬ್ಲಡ್‌ ಕ್ಲಾಟ್‌ (ಹೆಪ್ಪುಗಟ್ಟಿದ ರಕ್ತ) ನಿಂದ. ಕಂಪ್ಯೂಟರ್‌ನ ಮುಂದೆ ಬಹುಕಾಲ ಕೂತಿರುವುದು ಇದಕ್ಕೆ ಕಾರಣವಿರಬಹುದು ಎಂದು ವೈದ್ಯರು ಊಹಿಸಿದರು.
ಬಹುಕಾಲ ಚಲನೆಯಿಲ್ಲದೆ ಒಂದೇ ಕಡೆ ಕುಳಿತಿರುವುದನ್ನು ರೂಢಿ ಮಾಡಿಕೊಂಡರೆ ಡೀಪ್‌ ವೇಯ್ನ್‌ ಥ್ರೋಂಬೋಸಿಸ್‌ (DVT) ಉಂಟಾಗಬಹುದು. ಇದು ತೊಡೆ ಹಾಗೂ ಕಾಲಿನ ದೊಡ್ಡ ರಕ್ತನಾಳಗಳನ್ನು ಬಾಧಿಸುತ್ತದೆ. ನಂತರ ಈ ರಕ್ತದ ಹೆಪ್ಪುಗಟ್ಟಿದ ಬಿಂದುಗಳು ಶ್ವಾಸಕೋಶ, ಹೃದಯಕ್ಕೂ ಪ್ರಯಾಣ ಬೆಳೆಸುತ್ತವೆ. ಇದರಿಂದ ಉಸಿರಾಟದ ಸಮಸ್ಯೆ, ಎದೆನೋವು ಉಂಟಾಗಬಹುದು. ಸರಿಯಾದ ಕಾಲಕ್ಕೆ ಡಯಾಗ್ನೋಸಿಸ್‌ ಆಗದಿದ್ದರೆ ಸಾವು ಕೂಡ ಸಂಭವಿಸಬಹುದು.
ಹೆಚ್ಚಿನ ಯುವಜನ ಇಂದು ಬಿಂಜ್‌ ವಾಚಿಂಗ್‌ (ಗಂಟೆಗಟ್ಟಲೆ ಕುಳಿತಲ್ಲೇ ಇದ್ದು ವೆಬ್‌ ಶೋ ನೋಡುವುದು) ರೂಡಿಸಿಕೊಂಡಿದ್ದಾರೆ. ಇದು ಅಪಾಯಕರ. ಕೆಲವೊಮ್ಮೆ ವಿಮಾನದಲ್ಲಿ ಬಹುಕಾಲ ಕುಳಿತಿದ್ದಾಗಲೂ (ಇದಕ್ಕೆ ಕೋಚ್‌ ಕ್ಲಾಸ್‌ ಸಿಂಡ್ರೋಮ್‌ ಅನ್ನುತ್ತಾರೆ), ಸರ್ಜರಿಗೆ ಒಳಗಾಗಿ ಹಾಸಿಗೆಯಲ್ಲೇ ಇದ್ದಾಗಲೂ ಇದು ಸಂಭವಿಸಬಹುದು. ಬೊಜ್ಜು ಇದ್ದವರು, ಗರ್ಭನಿರೋಧಕ ಗುಳಿಗೆ ಸೇವಿಸುವವರು, ಕೆಲವು ವಂಶವಾಹಿ ಸಮಸ್ಯೆಗಳು ಇರುವವರಲ್ಲಿ ಇದರ ರಿಸ್ಕ್‌ ಹೆಚ್ಚಿರಬಹುದು. ಈ ಎಚ್ಚರಿಕೆ ಕುಳಿತು ಕೆಲಸ ಮಾಡುವವರಿಗೆ ಮಾತ್ರವಲ್ಲ. ಒಂದೇ ಕಡೆ ಕುಳಿತು ಅಥವಾ ಆರಾಮದಾಯಕವಲ್ಲದ ಭಂಗಿಯಲ್ಲಿ ಅರೆ ಮಲಗಿಕೊಂಡು ಟಿವಿ ಶೋಗಳನ್ನು ವೀಕ್ಷಿಸುತ್ತಲೇ ಇರುವವರಿಗೂ ಅನ್ವಯ.
ಹೇಗಾಗುತ್ತದೆ?
ಕಾಲುಗಳನ್ನು ಅಲ್ಲಾಡಿಸದೆ ಕುಳಿತೇ ಇರುವುದರಿಂದ ಕಾಲುಗಳಲ್ಲಿ ರಕ್ತ ಪರಿಚಲನೆ ನಿಧಾನವಾಗುತ್ತದೆ. ಇದು ಹೆಪ್ಪುಗಟ್ಟುವಿಕೆಗೆ ಕಾರಣವಾಗುತ್ತದೆ. ದುರದೃಷ್ಟದ ವಿಷಯ ಎಂದರೆ, ಹೆಚ್ಚಿನವರಿಗೆ ಈ ಬ್ಲಡ್‌ ಕ್ಲಾಟ್‌ಗಳು ಹೃದಯ ಅಥವಾ ಶ್ವಾಸಕೋಶದತ್ತ ಚಲಿಸುವವರೆಗೂ ಗೊತ್ತೇ ಆಗುವುದಿಲ್ಲ.
DVT ಲಕ್ಷಣಗಳೇನು?
- ಇದನ್ನು ಹೊಂದಿರುವವರೆಲ್ಲಾ ಲಕ್ಷಣಗಳನ್ನು ತೋರ್ಪಡಿಸುತ್ತಾರೆ ಎಂದೇನೂ ಇಲ್ಲ.
- ಒಂದು ಕಾಲು ಅಥವಾ ತೋಳಿನಲ್ಲಿ ದಿಡೀರ್‌ ಬಾವು ಕಾಣಿಸಿಕೊಳ್ಳಬಹುದು.
- ಬಾತುಕೊಂಡ ಜಾಗದಲ್ಲಿ ಬೆಚ್ಚಗಿನ ಅಥವಾ ನೋವಿನ ಫೀಲಿಂಗ್‌ ಉಂಟಾಗುತ್ತದೆ.
- ನಡೆಯುವಾಗ ಅಥವಾ ನಿಂತುಕೊಂಡಿರುವಾಗ ಕಾಲಿನಲ್ಲಿ ನೋವು ಅಥವಾ ಸೆಳೆತ, ಮಿದುತನ ಕಾಣಿಸಿಕೊಳ್ಳುತ್ತೆ.
- ಚರ್ಮದ ಬಣ್ಣ ಮಸುಕಾಗುವುದು, ಕೆಂಪಾಗುವುದು ಉಂಟಾದೀತು.
- ಚರ್ಮದ ಹತ್ತಿರ ಇರುವ ರಕ್ತನಾಳಗಳು ಎದ್ದು ಕಾಣಿಸತೊಡಗುತ್ತವೆ.
ಶ್ವಾಸಕೋಶ ಬ್ಲಾಕ್‌ನ ಲಕ್ಷಣಗಳು
- ಉಸಿರಾಟದ ದಿಡೀರ್‌ ಕ್ಷಿಪ್ರತೆ, ವೇಗದ ಉಸಿರಾಟ
- ಕೆಮ್ಮು ಅಥವಾ ಚಲನೆಯೊಂದಿಗೆ ಉಂಟಾಗುವ ತೀವ್ರವಾದ ಎದೆನೋವು
- ಬೆನ್ನಿನಲ್ಲಿ ನೋವು
- ಕಫ ಇದ್ದ ಅಥವಾ ಇಲ್ಲದೆ ಕೆಮ್ಮು
- ಸಾಮಾನ್ಯಕ್ಕಿಂತ ಅಧಿಕ ಬೆವರುವಿಕೆ
- ತೀವ್ರ ಎದೆಬಡಿತ
- ತಲೆ ತಿರುಗುವಿಕೆ, ಮೂರ್ಛೆ
ನೀವೇನು ಮಾಡಬಹುದು?
- ಪ್ರತಿ ಅರ್ಧ ಗಂಟೆಗೊಮ್ಮೆ ಎದ್ದು ನಿಂತು ಕೈಕಾಲುಗಳನ್ನು ಅಲ್ಲಾಡಿಸುವುದು, ಒಂದು ಸಣ್ಣ ವಾಕ್‌ ಹೋಗಿ ಬರುವುದು.
- ಟಿವಿ ಶೋಗಳ ಜಾಹೀರಾತು ಬ್ರೇಕ್‌ಗಳಲ್ಲಿ ನಿಮ್ಮ ಕೈಕಾಲುಗಳಿಗೂ ಬ್ರೇಕ್‌ ಕೊಡುವುದು.
- ಉದ್ಯೋಗದ ಜಾಗದಲ್ಲಿ ಸಣ್ಣ ಬ್ರೇಕ್‌, ವಾಕ್‌ಗಳಿಗೆ ಅವಕಾಶ ಕಲ್ಪಿಸಿಕೊಳ್ಳುವುದು.
ಇದನ್ನೂ ಓದಿ: ಬೆಂಗಳೂರಿನಲ್ಲಿ ಡೆಂಘೆ, ಮಲೇರಿಯಾ ಹೆಚ್ಚಳ: ಪಾರಾಗಲು ಇಲ್ಲಿದೆ ಉಪಾಯ