ತುರಿಮಣೆ ನಮ್ಮೆಲ್ಲರ ಅಡುಗೆ ಮನೆಗಳಲ್ಲಿ ಇರುವ ಒಂದು ಸರಳ ಸಾಧನ. ಚೀಸ್‌ನಿಂದ ಹಿಡಿದು ತರಕಾರಿಗಳವರೆಗೆ ಹಲವು ಆಹಾರ ಪದಾರ್ಥಗಳನ್ನು ತುರಿಯುವ ಕ್ರಿಯೆ ಅಡುಗೆಯ ಭಾಗವೂ ಹೌದು. ಹೆಚ್ಚು ಕಡಿಮೆ ನಿತ್ಯವೂ ಬಳಸುವ ಈ ಸಾಧನ ಕೆಲವೊಮ್ಮೆ ಅಂದುಕೊಂಡ ಹಾಗೆ ಕೆಲಸ ಮಾಡುವುದಿಲ್ಲ. ತೊಳೆದಿಟ್ಟ ತುರಿಮಣೆಯ ತೂತುಗಳಲ್ಲಿ ತುಣುಕುಗಳು ಸಿಕ್ಕಿ ಹಾಕಿಕೊಂಡೋ ಏನೋ ತುರಿಮಣೆ ಬಡ್ಡಾಗಿಬಿಡುತ್ತದೆ. ಅಂದುಕೊಂಡ ಹಾಗೆ ವೇಗವಾಗಿ ತುರಿಯಲು ಆಗುವುದಿಲ್ಲ. ಯಾಕೆಂದರೆ, ಅದನ್ನು ಸರಿಯಾಗಿ ಯಾವಾಗಲೂ ಕೆಲಸ ಮಾಡುತ್ತಿರುವಂತೆ ನೋಡಿಕೊಳ್ಳುವುದೂ ಕೂಡಾ ಒಂದು ಕಲೆ. ಹಾಗಾದರೆ ತುರಿಮಣೆಗಳು ಸರಿಯಾಗಿ ಇಟ್ಟುಕೊಳ್ಳುವುದು ಹೇಗೆ ಅಂತೀರಾ? ಇಲ್ಲಿ ಕೇಳಿ.
- ನಿಮ್ಮ ತುರಿಮಣೆಯನ್ನು ಬಳಸಿದ ತಕ್ಷಣ ತೊಳೆದಿಡಿ. ಬಹಳ ಹೊತ್ತು ಸಿಂಕ್‌ನಲ್ಲಿ ಹಾಗೆಯೇ ಬಿಡಬೇಡಿ. ಸಣ್ಣ ಪುಟ್ಟ ಕಣಗಳು, ತುರಿದ ವಸ್ತುವಿನ ಉಳಿದ ತುಂಡುಗಳು ತುರಿಮಣೆಯ ತೂತುಗಳ ಮಧ್ಯದಲ್ಲಿ ಸಿಕ್ಕಿಹಾಕಿಕೊಂಡಿರುತ್ತವೆ. ತಕ್ಷಣ ತೊಳೆಯದಿದ್ದರೆ ಅದು ಅಲ್ಲೇ ಗಟ್ಟಿಯಾಗಿ ಬಿಟ್ಟು ಹಾಗೆಯೇ ಉಳಿಯಬಹುದು. ಆಮೇಲೆ ತೊಳೆದರೂ ಸುಲಭವಾಗಿ ಹೋಗದು. ಸ್ವಲ್ಪ ಬಿಸಿ ನೀರಿನಲ್ಲಿ ಅಥವಾ ಜೋರಾಗಿ ಹರಿವ ನೀರಿಗೆ ವಿರುದ್ಧ ದಿಕ್ಕಿನಲ್ಲಿ ಒಡ್ಡಿ ಹಿಡಿಯಬಹುದು. ಅಳಿದುಳಿದ ತುಣುಕುಗಳೂ ರಭಸಕ್ಕೆ ಸಿಕ್ಕಿ ತೊಳೆದು ಹೋಗುತ್ತದೆ.
- ತುರಿಮಣೆಗಾಗಿಯೇ ಒಂದು ಬ್ರಷ್‌ ಅನ್ನು ತೆಗೆದಿಡಿ. ಈ ಬ್ರಷ್‌ನಿಂದ ಅಥವಾ ಯಾವುದಾದರೂ ಸ್ಪಾಂಜ್‌ ಸಹಾಐದಿಂದ ತುರಿಮಣೆಯನ್ನು ಸ್ವಚ್ಛಗೊಳಿಸಿ. ಉಗುರಿನ ಸಹಾಯದಿಂದ ಅಥವಾ ಕೈಯಲ್ಲೇ ತೊಳೆಯಲು ಹೋಗಬೇಡಿ. ಹರಿತವಾದ ಭಾಗಗಳಿಂದ ಕೈಗೆ ಗಾಯವೂ ಆಗಬಹುದು.
- ಯಾವಾಗಲೂ ಒಂದೇ ದಿಕ್ಕಿನಿಂದ ತುರಿಯಿರಿ. ಇದರಿಂದ ತೂತಿನೊಳಗೆ ತುರಿದ ಭಾಗಗಳು ಸಿಕ್ಕಿ ಹಾಕುವುದಿಲ್ಲ. ದಿಕ್ಕು ಬದಲಾಯಿಸುತ್ತಿದ್ದರೆ, ತೂತಿನೊಳಗೆ ಸಣ್ಣ ತುಣುಕುಗಳು ಸಿಕ್ಕಿಹಾಕಿಕೊಳ್ಳುತ್ತವೆ.
- ಪಾತ್ರೆ ತೊಳೆವ ಡಿಟರ್ಜೆಂಟ್‌ ನೀರಿನಲ್ಲಿ ಕೊಂಚ ಹೊತ್ತು ಮುಳುಗಿಸಿಡಿ. ಅದಕ್ಕೆ ಬಿಸಿ ನೀರು ಹಾಕಿ. ಕೂಡಲೇ ತೆಗೆಯಬೇಡಿ. ಕೆಲವು ಗಂಟೆಗಳ ನಂತರ ನಿಮ್ಮ ತುರಿಮಣೆ ಹೊಸತರಂತೆ ಫಳಪಳಿಸುತ್ತದೆ.
- ಹಲ್ಲುಜ್ಜವ ಬ್ರಷ್‌ ಒಂದನ್ನು ಇದಕ್ಕಾಗಿಯೇ ಇಡಿ. ಹಲ್ಲುಜ್ಜುವ ಬ್ರಷ್‌ ಸಣ್ಣದಾಗಿರುವುದರಿಂದ ಇದು ತುರಿಮಣೆಯ ಸಂದಿಗೊಂದಿಗಳಲ್ಲಿ ಸಿಕ್ಕಿಹಾಕಿಕೊಂಡ ತುಣುಕುಗಳನ್ನೆಲ್ಲ ತೆಗೆದುಹಾಕುತ್ತದೆ. ಒಂದು ಟೂತ್‌ಬ್ರಷ್‌ ಅನ್ನು ಪೂರ್ತಿಯಾಗಿ ಅಡುಗೆ ಕೋಣೆಯ ಕೆಲಸಕ್ಕಾಗಿಯೇ ಮೀಸಲಿಡಿ.
- ನಿಂಬೆಹಣ್ಣನ್ನು ಬಳಸಬಹುದಾದ ಸಂದರ್ಭಗಳಲ್ಲಿ ಬಳಸಿ. ಇಂತಹ ಸಮಯದಲ್ಲಿ ನಿಂಬೆಹಣ್ಣು ಬಹಳವಾಗಿ ಬಳಕೆಯಾಗುತ್ತದೆ. ಇದರಲ್ಲಿರುವ ಆಸಿಡ್‌ ಅಂಶವು ಪಾತ್ರೆಯೂ ಸೇರಿದಂತೆ ಹಲವು ವಸ್ತುಗಳನ್ನು ಕ್ಲೀನ್‌ ಮಾಡಲು ಬಳಕೆಯಾಗುತ್ತದೆ. ತುರಿಮಣೆಯ ಒಳಗೆ ಸಿಕ್ಕಿ ಹಾಕಿಕೊಂಡ ಕೊಳೆ ತೆಗೆಯಲೂ ಕೂಡಾ ಇದು ಸಹಾಯ ಮಾಡುತ್ತದೆ.
- ಬೇಕಿಂಗ್‌ ಸೋಡಾಕ್ಕೆ ಕೊಂಚ ನೀರು ಸೇರಿಸಿ ಪೇಸ್ಟ್‌ ಮಾಡಿ ತುರಿಮಣೆಯ ತುರಿದ ಭಾಗಕ್ಕೆ ಹಚ್ಚಿ ಸ್ವಲ್ಪ ಗಂಟೆಗಳ ಕಾಲ ಹಾಗೆಯೇ ಬಿಡಿ. ಇದು ಕೂಡಾ ಅಂಟಿ ಹಿಡಿದ ಕೊಳಕುಗಳನ್ನು ತೆಗೆಯಲು ಸಹಾಯ ಮಾಡುತ್ತದೆ.
- ಡಿಶ್‌ವಾಶರ್‌ ಮೂಲಕವೂ ತೊಳೆಯಬಹುದು. ಬಹುತೇಕ ಇಂದಿನ ತುರಿಮಣೆಗಳೆಲ್ಲವೂ ಸ್ಟೈನ್‌ಲೆಸ್‌ ಸ್ಟೀಲ್‌ನಲ್ಲಿ ಮಾಡಿರುವುದರಿಂದ ಡಿಶ್‌ವಾಶರ್‌ನಲ್ಲಿ ತೊಳೆಯುವುದಕ್ಕೆ ಏನೂ ಅಡ್ಡಿಯಿಲ್ಲ.
- ತೊಳೆದ ಮೇಲೆ ಈ ತುರಿಮಣೆಯನ್ನು ಗಾಳಿಯಾಡಲು ಬಿಡಿ. ಕೂಡಲೇ ಒಳಗೆ ಎತ್ತಿಡಬೇಕು. ಇದರಲ್ಲಿ ಸಣ್ಣ ತೂತುಗಳಿರುವುದರಿಂದ ಕೊಂಚ ಹೊತ್ತು ಹಾಗೆಯೇ ಆರಲು ಬಿಡುವುದರಿಂದ ತುರಿಮಣೆ ಸ್ವಚ್ಛವಾಗಿರುತ್ತದೆ.
ಇದನ್ನೂ ಓದಿ: Health Tips for Winter: ಚಳಿಗಾಲದಲ್ಲಿ ನ್ಯುಮೋನಿಯಾ, ಶ್ವಾಸಕೋಶದ ಸಮಸ್ಯೆಗಳಿಂದ ದೂರ ಇರಲು ಹೀಗೆ ಮಾಡಿ…