ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಬಸವನಗುಡಿಯ ಕಡಲೆಕಾಯಿ ಪರಿಷೆಯಲ್ಲಿ (kadalekai parishe 2023) ತಾರೆಯರ ಕಲರವ ಹೆಚ್ಚಾಗಿದೆ. ಅದರಲ್ಲೂ ಈ ಬಾರಿ ಕಿರುತೆರೆ-ಬೆಳ್ಳಿತೆರೆ ತಾರೆಯರು ಅತ್ಯುತ್ಸಾಹದಿಂದ ಸಂಜೆ ವೇಳೆ ಭೇಟಿ ನೀಡಿರುವುದು ಮಾತ್ರವಲ್ಲ, ತಮ್ಮದೇ ಆದ ಸ್ನೇಹಿತರ ಟೀಮ್‌ನೊಂದಿಗೆ ಬಿಂದಾಸ್ ಆಗಿ ಜನರ ಮಧ್ಯೆ ಓಡಾಡಿದ್ದಾರೆ. ಸ್ಟ್ರೀಟ್ ಶಾಪಿಂಗ್ ಹಾಗೂ ಸ್ಟ್ರೀಟ್ ಪುಡ್ ಸವಿಯುತ್ತಾ, ಎಕ್ಸಿಬೀಷನ್‌ನ್ನಲ್ಲಿ ಮಕ್ಕಳಂತೆ ಆಟವಾಡುತ್ತಾ ಎಂಜಾಯ್ ಮಾಡಿದ್ದಾರೆ.
ಕಿರುತೆರೆ ನಟ-ನಟಿಯರ ಬಿಂದಾಸ್ ಎಂಜಾಯ್ಮೆಂಟ್
ಭೂಮಿಗೆ ಬಂದ ಭಗವಂತ ಸೀರಿಯಲ್‌ನ ಟೀಮ್‌ನ ಬಹುತೇಕ ನಟ-ನಟಿಯರು ಕಡಲೆಕಾಯಿ ಪರಿಷೆಯಲ್ಲಿ ಶ್ರೀ ಸಾಮಾನ್ಯರಂತೆ ಕುಟುಂಬದೊಂದಿಗೆ ಪಾಲ್ಗೊಂಡು ಜಾತ್ರೆಯ ಅನುಭವ ಪಡೆದಿದ್ದಾರೆ. ನಟ ನವೀನಕೃಷ್ಣ, ಬಾಲನಟಿ ಅಂಕಿತಾ ಜಯ್ರಾಮ್ ಫ್ಯಾಮಿಲಿ, ಕೃತಿಕಾ ಹಾಗೂ ಸಹ ನಟನಟಿಯರು ಕೂಡ ಒಟ್ಟೊಟ್ಟಿಗೆ ಈ ಕಡಲೆಕಾಯಿ ಪರಿಷೆಗೆ ಭೇಟಿ ಕೊಟ್ಟು, ಅಕ್ಕ-ಪಕ್ಕದ ಬೀದಿಗಳನ್ನು ಬಿಂದಾಸ್ ಆಗಿ ಅಲೆದು, ಸ್ಟ್ರೀಟ್ ಶಾಪಿಂಗ್, ಸ್ಟ್ರೀಟ್ ಫುಡ್ ಸೇವಿಸುತ್ತಾ, ಎಕ್ಸಿಬೀಷನ್‌ನ್ನಲ್ಲಿ ನಾನಾ ಗೇಮ್‌ಗಳನ್ನು ಆಡುತ್ತಾ ಎಂಜಾಯ್ ಮಾಡಿದ್ದಾರೆ. ಅಷ್ಟು ಮಾತ್ರವಲ್ಲದೇ, ಫೋಟೋ ಕ್ಲಿಕ್ಕಿಸಿ ಪರಿಷೆಯ ಸಂಭ್ರಮದ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡು, ನಮ್ಮ ಸಂಸ್ಕೃತಿ ಹಾಗೂ ಸಾಂಸ್ಕೃತಿಕ ಜಾತ್ರೆಯ ಬಗ್ಗೆ ಅಭಿಮಾನಿಗಳೊಂಡಿಗೆ ಹಂಚಿಕೊಂಡಿದ್ದಾರೆ.
ಬೆಳ್ಳಿ ತೆರೆ ನಟ-ನಟಿಯರ ವಿಸಿಟ್
ಇನ್ನು ಬೆಳ್ಳಿ ತೆರೆಯ ನಟ-ನಟಿಯರು ಕೂಡ ಕಡಲೆ ಕಾಯಿ ಪರಿಷೆಯಲ್ಲಿ ಪಾಲ್ಗೊಂಡು ಸುತ್ತಾಡಿದ್ದಾರೆ. ಕೆಲವರು ವೇಷ ಮರೆಸಿಕೊಂಡು ಎಂಜಾಯ್ ಮಾಡಿದರೇ, ಮತ್ತೆ ಕೆಲವರು ಖುಲ್ಲಂಖುಲ್ಲಾ ಜನರ ಮಧ್ಯೆಯೇ ಯಾವ ಹಮ್ಮು ಬಿಮ್ಮು ಇಲ್ಲದೇ ಓಡಾಡಿಕೊಂಡು, ಸ್ಟ್ರೀಟ್ ಶಾಪಿಂಗ್ ಮಾಡುತ್ತಾ ಎಂಜಾಯ್ ಮಾಡಿದ್ದಾರೆ. ಇವರಲ್ಲಿ ನಟಿ ಸೋನು ಗೌಡ, ಸಂಯುಕ್ತ ಹೊರನಾಡು, ಬ್ರೋ ಗೌಡ, ಬಾಲಾಜಿ ಮನೋಹರ್ ಸೇರಿದ್ದಾರೆ.
ಸಿಟಿಯಲ್ಲಿ ಹಳ್ಳಿ ಜಾತ್ರೆಯ ಅನುಭವ
“ಬಸವನಗುಡಿ ಕಡಲೆಕಾಯಿ ಪರಿಷೆಯಲ್ಲಿ ಸ್ಟ್ರೀಟ್ ಶಾಪಿಂಗ್ ಮಾಡುವುದೇ ಒಂಥರ ಖುಷಿ. ಇನ್ನು ಸ್ಟ್ರೀಟ್ ಫುಡ್ ಸವಿಯುವುದು ಜನರ ಮಧ್ಯೆ ಓಡಾಡುವುದು ಹಳ್ಳಿಯ ಜಾತ್ರೆಯ ಅನುಭವ ನೀಡುತ್ತದೆ “ ಎನ್ನುವ ನಟಿ ಸೋನು ಗೌಡ ಹಾಗೂ ಅಂಕಿತಾರಂತೆ ಸಾಕಷ್ಟು ಕಲಾವಿದರು ಈಗಾಗಲೇ ಸುದ್ದಿಯಿಲ್ಲದೇ ಪರಿಷೆಗೆ ಬಂದು ಹೋಗಿದ್ದಾರಂತೆ.
ಒಟ್ನಲ್ಲಿ, ಕಡಲೆಕಾಯಿ ಪರಿಷೆ ಬೆಂಗಳೂರಿನ ಹಳೆ ಸೊಗಡನ್ನು ಇನ್ನು ಕಾಪಾಡಿಕೊಂಡಿದೆ ಎನ್ನಬಹುದು.
(ಲೇಖಕಿ : ಫ್ಯಾಷನ್ ಪತ್ರಕರ್ತೆ)
ಇದನ್ನೂ ಓದಿ: Fashion News: ರ‍್ಯಾಂಪ್‌ ಕಳೆ ಹೆಚ್ಚಿಸಿದ ವಜ್ರಾಭರಣಗಳ ಫ್ಯಾಷನ್ ಶೋ!