ಬೆಂಗಳೂರು: ಸೋಮವಾರ ಅಯೋಧ್ಯೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ನಡೆದ ರಾಮ ಮಂದಿರದ (Ayodhya Ram Mandir) ‘ಪ್ರಾಣ ಪ್ರತಿಷ್ಠಾ’ (Pran Prathistha) ಕಾರ್ಯಕ್ರಮದಲ್ಲಿ ಎಲ್ಲರೂ ಮಂತ್ರ ಮುಗ್ಧಗೊಂಡದ್ದು ಶಿಲ್ಪಿ ಅರುಣ್ ಯೋಗಿರಾಜ್ ರಚಿಸಿದ ಬಾಲ ರಾಮನ (Ram Lalla Idol) ಮೂರ್ತಿಯ ಕಣ್ಣುಗಳನ್ನು ನೋಡಿ. ಅವು ಎಷ್ಟು ನೈಜವಾಗಿದ್ದವು ಎಂದರೆ, ರಾಮನ ಮುಖದ ಮಂದಹಾಸವನ್ನು ಕಂಡು ದೇಶದ ಕೋಟ್ಯಂತರ ಜನ ಭಾವಪರವಶರಾದರು.
ರಾಮ್ ಲಲ್ಲಾನ ಈ ಸುಂದರ ಮತ್ತು ದೈವಿಕವಾದ ಮಂದಹಾಸಭರಿತ ಮುಖ, ಕರುಣೆ ಹಾಗೂ ಲಾಸ್ಯ ತುಂಬಿದ ಕಣ್ಣುಗಳ ರಹಸ್ಯವೇನು? ಈ ಮುದ್ದು ಮುಖ ಐದು ವರ್ಷದ ಮುಗ್ಧ ಬಾಲಕನ ಮುಖದಂತೆ ಕಾಣುತ್ತಿರುವುದರ ಹಿಂದಿನ ನಿಗೂಢತೆ ಏನು? ಈ ರಹಸ್ಯವನ್ನು ಅರುಣ ಯೋಗಿರಾಜ್ (Arun Yogiraj) ಅವರ ಪತ್ನಿ ಬಿಡಿಸಿಟ್ಟಿದ್ದಾರೆ.
“ಇದು ಅವರ (ಅರುಣ್) ಕೈಯಲ್ಲಿರುವ ಮ್ಯಾಜಿಕ್. ಮೊದಲು ಮೂರ್ತಿ ಹೇಗಿರಬೇಕು ಎಂಬುದರ ಕುರಿತು ನಮಗೆ ತಿಳಿಸಲಾಯಿತು. ಉಳಿದದ್ದೆಲ್ಲ ಅವರ ಕಲ್ಪನೆ” ಎಂದಿದ್ದಾರೆ ಅರುಣ ಪತ್ನಿ ವಿಜೇತಾ. ಈ ಕೆಲಸಕ್ಕೆ ತೊಡಗಿದಂದಿನಿಂದ ಅರುಣ್ ಯೋಗಿರಾಜ್, ಮಕ್ಕಳನ್ನು ಸತತವಾಗಿ ಗಮನಿಸಲು ಆರಂಭಿಸಿದರಂತೆ. ಅದಕ್ಕಾಗಿ ಪುಟ್ಟ ಮಕ್ಕಳಿರುವ ಶಾಲೆಗಳಿಗೆ ಹೋಗಿ ಕುಳಿತು, ಮಕ್ಕಳ ಮುಖ, ಚಲನವಲಗಳನ್ನು ನೋಡುತ್ತಾ ಅಭ್ಯಸಿಸಿದರಂತೆ!
ಅರುಣ್ ಯೋಗಿರಾಜ್, ಜಿ.ಎಲ್ ಭಟ್ ಮತ್ತು ಸತ್ಯನಾರಾಯಣ ಪಾಂಡೆ ಅವರಿಗೆ ದೇವಾಲಯದ ಟ್ರಸ್ಟ್ ಕೆಲವು ಮಾನದಂಡಗಳನ್ನು ನೀಡಿ ಮೂರ್ತಿ ರಚಿಸುವ ಹೊಣೆ ನೀಡಿತ್ತು. ನಗುತ್ತಿರುವ ಮುಖ, ದೈವಿಕ ನೋಟ, 5 ವರ್ಷದ ಸ್ವರೂಪ, ರಾಜಕುಮಾರ/ಯುವರಾಜನ ನೋಟ ಇರಬೇಕು ಎಂಬುದು ಮಾನದಂಡಗಳಾಗಿದ್ದವು. ಶಿಲ್ಪಕಲೆಯ ಮೊದಲ ಹಂತವೆಂದರೆ ಅದನ್ನು ಕಾಗದದ ಮೇಲೆ ಚಿತ್ರಿಸುವುದು.
ಚಿತ್ರ ಸಮರ್ಪಕವೆನಿಸಿದ ಬಳಿಕ ಅದನ್ನು ಶಿಲ್ಪಕ್ಕೆ ಇಳಿಸಲು ಅರುಣ್ ಯೋಗಿರಾಜ್ ಮುಂದಾದರು. ಶಿಲ್ಪ ಪ್ರಪಂಚದ ಪವಿತ್ರ ಗ್ರಂಥವಾದ ಶಿಲ್ಪಶಾಸ್ತ್ರದ ಪ್ರಕಾರ ಮುಖದ ವೈಶಿಷ್ಟ್ಯಗಳ (ಕಣ್ಣು, ಮೂಗು, ಗಲ್ಲದ, ತುಟಿಗಳು, ಕೆನ್ನೆಗಳು, ಇತ್ಯಾದಿ) ಅನುಪಾತವನ್ನು ರೂಪಿಸಲಾಗುತ್ತದೆ. ಶಿಲ್ಪಶಾಸ್ತ್ರವು ಶಿಲ್ಪಕಲೆ, ಚಿತ್ರಕಲೆ, ದೇವಾಲಯದ ವಾಸ್ತುಶಿಲ್ಪ, ಪ್ರತಿಮಾಶಾಸ್ತ್ರ ಮತ್ತು ಪಟ್ಟಣ ಯೋಜನೆ ಸೇರಿದಂತೆ ವ್ಯಾಪಕ ಶ್ರೇಣಿಯ ವಿಷಯಗಳನ್ನು ಒಳಗೊಂಡಿದೆ.
“ಯೋಗಿರಾಜ್ ಮುಖ ಮತ್ತು ದೇಹದ ವೈಶಿಷ್ಟ್ಯಗಳನ್ನು ಅಧ್ಯಯನ ಮಾಡಲು ಶಿಲ್ಪಶಾಸ್ತ್ರದ ಜೊತೆಗೆ ಮಾನವ ಅಂಗರಚನಾಶಾಸ್ತ್ರದ ಪುಸ್ತಕಗಳನ್ನೂ ಓದುತ್ತಿದ್ದರು. ಇದು ಮೂರ್ತಿಯನ್ನು ತುಂಬಾ ನೈಜವಾಗಿ ಕಾಣುವಂತೆ ಮಾಡಿದ ಪ್ರಮುಖ ಅಂಶ. ಅರುಣ್ ಪುಟ್ಟ ಮಕ್ಕಳನ್ನು ನೋಡಲು ಶಾಲೆಗಳಿಗೆ ಹೋಗುತ್ತಿದ್ದರು. ಮಕ್ಕಳು ಹೇಗೆ ನಗುತ್ತಾರೆ ಎಂಬುದನ್ನು ಆಳವಾಗಿ ಸಂಶೋಧಿಸಿದರು ಮತ್ತು ಗಮನಿಸಿದರು” ಎಂದು ವಿಜೇತಾ ಹೇಳುತ್ತಾರೆ.
“ರಾಮನ ವಿಗ್ರಹದ ಮುಖದ ಆಕಾರವು ದುಂಡಾಗಿರುತ್ತದೆ. ಇದನ್ನು ದಕ್ಷಿಣ ಭಾರತದ ಶಿಲ್ಪಗಳಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತದೆ. ಹೋಲಿಸಿದರೆ, ಉತ್ತರದ ಶಿಲ್ಪಗಳು ಹಲವಾರು ತೀಕ್ಷ್ಣವಾದ ವೈಶಿಷ್ಟ್ಯಗಳನ್ನು ಹೊಂದಿವೆ. ಒಡಿಶಾ ಮತ್ತು ಬಂಗಾಳದ ಕೆಲವು ಶಿಲ್ಪಗಳು ಅಂತಹ ದುಂಡಗಿನ ಮುಖಗಳನ್ನು ಹೊಂದಿವೆ” ಎಂದು ದೆಹಲಿಯ ಡಾ.ಬಿ.ಆರ್.ಅಂಬೇಡ್ಕರ್ ವಿಶ್ವವಿದ್ಯಾನಿಲಯದ ಹೆರಿಟೇಜ್ ರಿಸರ್ಚ್ ಅಂಡ್ ಮ್ಯಾನೇಜ್‌ಮೆಂಟ್ ಸ್ಕೂಲ್‌ನ ಅಧ್ಯಾಪಕರಾದ ಶೈಲೇಂದ್ರ ಕುಮಾರ್ ಹೇಳುತ್ತಾರೆ.
“ರಾಮ್ ಲಲ್ಲಾನ ಸೌಂದರ್ಯವನ್ನು ನೋಡುವುದನ್ನು ನಿಲ್ಲಿಸಲು ಸಾಧ್ಯವಿಲ್ಲ. ಮುಂಗುರುಳುಗಳು, ಉಬ್ಬಿದ ಕೆನ್ನೆಗಳು, ಅತೀಂದ್ರಿಯ ನಗು ಮತ್ತು ದೈವಿಕ ಸೆಳೆತ ಅದರಲ್ಲಿದೆ” ಎಂದು ಎಕ್ಸ್‌ನಲ್ಲಿ ಇತಿಹಾಸಕಾರ ಮತ್ತು ಲೇಖಕ ವಿಕ್ರಂ ಸಂಪತ್ ಪೋಸ್ಟ್‌ ಮಾಡಿದ್ದಾರೆ.
ಇದನ್ನೂ ಓದಿ: Ram Mandir: ರಾಮ ಮಂದಿರದ ಸಮೀಪದಲ್ಲೇ ಇನ್ನೂ 13 ದೇವಾಲಯಗಳ ನಿರ್ಮಾಣ
51 ಇಂಚು ಎತ್ತರವೇ ಯಾಕೆ?
ರಾಮ್ ಲಲ್ಲಾ ವಿಗ್ರಹದ 51 ಇಂಚಿನ ಎತ್ತರವನ್ನು ಕೂಡ ವೈಜ್ಞಾನಿಕವಾಗಿ ಆಯ್ಕೆ ಮಾಡಲಾಗಿದೆ. “ಈ ಎತ್ತರದಲ್ಲಿ ಪ್ರತಿ ವರ್ಷ ರಾಮನವಮಿ ದಿನದಂದು ಮಧ್ಯಾಹ್ನ ಸೂರ್ಯನ ಕಿರಣಗಳು ರಾಮಲಲ್ಲಾನ ಹಣೆಯ ಮೇಲೆ ಬೀಳುತ್ತವೆ. ಇದು ಅಯೋಧ್ಯೆಯ ರಾಮಮಂದಿರದ ವಿಶಿಷ್ಟ ಲಕ್ಷಣ. ಪ್ರತಿ ವರ್ಷವೂ ಈ ದಿನದಂದು ಸೂರ್ಯನ ಕಿರಣಗಳು ರಾಮಲಲ್ಲಾನ ಮುಖವನ್ನು
ಬೆಳಗಿಸುತ್ತವೆ” ಎಂದು ವಿಜೇತಾ ಹೇಳುತ್ತಾರೆ.
ಕೃಷ್ಣಶಿಲೆಯೇ ಯಾಕೆ?
ವಿಗ್ರಹವನ್ನು ಕೆತ್ತಲು ಕೃಷ್ಣಶಿಲೆಯನ್ನೇ ಬಳಸಿರುವುದು ಅದರ ರಾಸಾಯನಿಕ ಸಂಯೋಜನೆಗಾಗಿ. ಕೃಷ್ಣಶಿಲೆಯು ಆಮ್ಲ, ಶಾಖ ಮತ್ತು ಪ್ರತಿಕೂಲ ಹವಾಮಾನಕ್ಕೆ ಪ್ರತಿಕ್ರಿಯಿಸುವುದಿಲ್ಲ. ಹಾಲನ್ನು ಬಳಸಿ ಅಭಿಷೇಕವನ್ನು ಮಾಡಿದಾಗ, ಕಲ್ಲು ಹಾಲಿನ ಅಂಶಗಳಿಗೆ ಪ್ರತಿಕ್ರಿಯಿಸುವುದಿಲ್ಲ. ಆದ್ದರಿಂದ ಅಭಿಷೇಕ ಮಾಡಿದ ಹಾಲನ್ನು ಯಾವುದೇ ಅತಂಕವಿಲ್ಲದೆ ಪ್ರಸಾದವಾಗಿ ಸೇವಿಸಬಹುದು. ಕೃಷ್ಣಶಿಲೆಯು 1000 ವರ್ಷಗಳಿಗೂ ಹೆಚ್ಚು ಕಾಲ ಉಳಿಯುತ್ತದೆ.
“ಶಿಲ್ಪವನ್ನು ಕೆತ್ತಲು ಆಯ್ಕೆಯಾದ ನಾನು ಭೂಮಿಯ ಮೇಲಿನ ಅತ್ಯಂತ ಅದೃಷ್ಟಶಾಲಿ ವ್ಯಕ್ತಿ ಎಂದು ಭಾವಿಸುತ್ತೇನೆ” ಎಂದು ಅರುಣ್ ಯೋಗಿರಾಜ್ ಹೇಳಿದ್ದರು.
ಇದನ್ನೂ ಓದಿ: Ram Mandir: ಅಯೋಧ್ಯೆ ರಾಮ ಮಂದಿರದೊಳಗೆ ಎರಡನೇ ದಿನವೇ ಹನುಮಾನ್‌ ಪ್ರವೇಶ!