ನವದೆಹಲಿ: ತನ್ನ ಸಂಗಾತಿಯನ್ನು 35 ಭಾಗಗಳಾಗಿ ಕತ್ತರಿಸಿ, 18 ದಿನಗಳ ಕಾಲ ದಿಲ್ಲಿಯ ವಿವಿಧೆಡೆ ಎಸೆದ ವ್ಯಕ್ತಿಯೊಬ್ಬನನ್ನು ದಿಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತನ ಹೆಸರು ಅಫ್ತಾಬ್ ಅಮೀನ್ ಪೂನಾವಾಲಾ. ಈತ ತನ್ನ ಲಿವ್ ಇನ್ ಪಾರ್ಟನರ್ ಶ್ರದ್ಧಾಳನ್ನು ಭೀಕರವಾಗಿ ಕೊಲೆ ಮಾಡಿದ್ದಾನೆ(Delhi Crime).
ದಿಲ್ಲಿ ಪೊಲೀಸರ ಪ್ರಕಾರ, ಅಫ್ತಾಬ್ ಮತ್ತು ಶ್ರದ್ಧಾ ಇಬ್ಬರು ಲಿವ್ ಇನ್ ರಿಲೇಷನ್‌ಶಿಪ್‌ನಲ್ಲಿದ್ದರು. ಮೇ 18ರಂದು ಇಬ್ಬರ ಮಧ್ಯೆ ಜಗಳವಾಗಿದೆ. ಆಗ ಸಿಟ್ಟಿಗೆದ್ದ ಅಫ್ತಾಬ್, ಶ್ರದ್ಧಾಳನ್ನು ಕೊಲೆ ಮಾಡಿ, ದೇಹವನ್ನು 35 ಭಾಗಗಳಾಗಿ ಕತ್ತರಿಸಿ ಫ್ರಿಡ್ಜ್‌ನಲ್ಲಿಟ್ಟಿದ್ದಾನೆ. ಸುಮಾರು 18 ದಿನಗಳ ಬಳಿಕ ಮಧ್ಯ ರಾತ್ರಿ 2ಕ್ಕೆ ಮನೆಯಿಂದ ಹೊರಟು ದಿಲ್ಲಿಯ ವಿವಿಧೆಡೆ ಶವದ ತುಣುಕುಗಳನ್ನು ಎಸಿದಿದ್ದಾನೆ.
26 ವರ್ಷದ ಶ್ರದ್ಧಾ ಮುಂಬೈನಲ್ಲಿ ಬಹುರಾಷ್ಟ್ರೀಯ ಕಂಪನಿಯ ಕಾಲ್‌ ಸೆಂಟರ್‌ನಲ್ಲಿ ಕೆಲಸ ಮಾಡುತ್ತಿದ್ದಳು. ಅಲ್ಲಿ ಈ ಅಫ್ತಾಬ್‌ನ ಪರಿಚಯವಾಗಿ ಡೇಟಿಂಗ್ ಮಾಡುತ್ತಿದ್ದಳು. ಆದರೆ, ಈ ಸಂಬಂಧಕ್ಕೆ ಶ್ರದ್ಧಾಳ ಕುಟುಂಬ ಒಪ್ಪಿಗೆ ನೀಡಲಿಲ್ಲ. ಬಳಿಕ ಇಬ್ಬರೂ ಮುಂಬೈನಿಂದ ದಿಲ್ಲಿಗೆ ಓಡಿ ಬಂದು, ಮೆಹ್ರುಲಿ ಪ್ರದೇಶದ ಫ್ಲ್ಯಾಟ್‌ನಲ್ಲಿ ವಾಸವಾಗಿದ್ದರು.
ಆದರೆ, ಕೆಲವು ದಿನಗಳ ನಂತರ ಶ್ರದ್ಧಾ ಫೋನ್ ಸ್ವೀಕರಿಸುವುದನ್ನು ನಿಲ್ಲಿಸಿದ ಬಳಿಕ ಅವರ ಕುಟುಂಬಸ್ಥರಿಗೆ ಅನುಮಾನ ಬಂದಿದೆ. ಅದೇ ಕಾರಣಕ್ಕೆ ಶ್ರದ್ಧಾಳ ತಂದೆ ವಿಕಾಸ್ ಮದಾನ್ ಅವರು ನವೆಂಬರ್ 8ರಂದು ದಿಲ್ಲಿಗೆ ಆಗಮಿಸಿ, ಶ್ರದ್ಧಾ ವಾಸವಿದ್ದ ಫ್ಲ್ಯಾಟ್‌ಗೆ ಹೋಗಿದ್ದಾರೆ. ಫ್ಲ್ಯಾಟ್ ಲಾಕ್ ಆಗಿದ್ದು ಕಂಡಿದ್ದಾರೆ. ಬಳಿಕ ಅವರು ಸೀದಾ ಪೊಲೀಸ್ ಸ್ಟೇಷನ್‌ಗೆ ದೂರು ಸಲ್ಲಿಸಿದ್ದಾರೆ. ಶ್ರದ್ಧಾಳ ತಂದೆಯ ದೂರು ಆಧರಿಸಿ ದಿಲ್ಲಿ ಪೊಲೀಸರು, ಅಫ್ತಾಬ್‌ನನನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಿದಾಗ ಇಡೀ ಘಟನೆಯ ಮಾಹಿತಿಯ ಬಯಲಾಗಿದೆ.
ಇದನ್ನೂ ಓದಿ | Delhi Triple Murder | 10 ದಿನಗಳ ಹಿಂದೆ ಆಗಿದ್ದ ಅವಮಾನಕ್ಕೆ ಸೇಡು; ಮನೆಗೆ ನುಗ್ಗಿ ದಂಪತಿ, ಕೆಲಸದಾಕೆಯ ಬರ್ಬರ ಹತ್ಯೆ