ಹೊಸದಿಲ್ಲಿ: ದೀಪಾವಳಿಗೂ ಮುನ್ನವೇ ರಾಷ್ಟ್ರ ರಾಜಧಾನಿಯಲ್ಲಿ ಉಸಿರುಗುಟ್ಟುವ ಕಳಪೆ ವಾಯು (Delhi pollution) ಗುಣಮಟ್ಟ ಕಂಡುಬಂದಿದ್ದು, ವಾಯು ತುರ್ತುಸ್ಥಿತಿಯನ್ನು (air emergency) ಘೋಷಿಸಲಾಗಿದೆ. ಹೆಚ್ಚುತ್ತಿರುವ ಮಾಲಿನ್ಯದ (Air pollution) ಹಿನ್ನೆಲೆಯಲ್ಲಿ ದೆಹಲಿಯ ಎಲ್ಲಾ ಸರ್ಕಾರಿ ಮತ್ತು ಪ್ರಾಥಮಿಕ ಶಾಲೆಗಳಿಗೆ ಶುಕ್ರವಾರ ಮತ್ತು ಶನಿವಾರ ರಜೆ ನೀಡಲಾಗುವುದು ಎಂದು ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ (Delhi CM Arvind Kejriwal) ಘೋಷಿಸಿದ್ದಾರೆ.
ಅನಿವಾರ್ಯವಲ್ಲದ ಕಟ್ಟಡ ನಿರ್ಮಾಣ ಚಟುವಟಿಕೆಗಳ ಮೇಲೆ ದಿಲ್ಲಿ ಸರ್ಕಾರ ತಡೆ ಹಾಕಿದೆ. ದೆಹಲಿ, ಗುರುಗ್ರಾಮ್, ಫರಿದಾಬಾದ್, ಗಾಜಿಯಾಬಾದ್ ಮತ್ತು ಗೌತಮ್ ಬುಧ್ ನಗರದಲ್ಲಿ ಬಿಎಸ್-3 ಪೆಟ್ರೋಲ್ ಮತ್ತು ಬಿಎಸ್-4 ಡೀಸೆಲ್ ಕಾರುಗಳ ಓಡಾಟದ ಮೇಲೆ ನಿಷೇಧ ಹೇರಿದೆ. ಶುಕ್ರವಾರ ಬೆಳಿಗ್ಗೆ, ದೆಹಲಿಯ ಒಟ್ಟಾರೆ AQI ʼಅತ್ಯಂತ ಕಳಪೆ’ ವಿಭಾಗದಲ್ಲಿ 346ನಲ್ಲಿ ದಾಖಲಾಗಿದೆ.
ದೆಹಲಿ- ಎನ್‌ಸಿಆರ್ ಪರಿಸ್ಥಿತಿ ಹೇಗಿದೆ?
- ಸೊನ್ನೆ ಮತ್ತು 50ರ ನಡುವಿನ AQI ಒಳ್ಳೆಯದು, 51 ಮತ್ತು 100 ತೃಪ್ತಿದಾಯಕ, 101 ಮತ್ತು 200 ಮಧ್ಯಮ, 201 ಮತ್ತು 300 ಕಳಪೆ, 301 ಮತ್ತು 400 ಅತ್ಯಂತ ಕಳಪೆ, ಮತ್ತು 401 ಮತ್ತು 500 ತೀವ್ರ ಮತ್ತು 500ಕ್ಕಿಂತ ಹೆಚ್ಚು ಅಪಾಯಕಾರಿ ಎಂದು ಪರಿಗಣಿಸಲಾಗುತ್ತದೆ.
- ದೆಹಲಿಯ AQI ಇಲ್ಲಿಯವರೆಗೆ ತೀವ್ರವಾಗಿ ಬದಲಾಗಿದೆ. ವಿಜ್ಞಾನಿಗಳು ಗಾಳಿಯ ಗುಣಮಟ್ಟದಲ್ಲಿ ಮತ್ತಷ್ಟು ಹದಗೆಡುವ ಎಚ್ಚರಿಕೆ ನೀಡಿದ್ದಾರೆ. ಗುರುವಾರ ರಾತ್ರಿ 10 ಗಂಟೆಗೆ, AQI 422ಕ್ಕೆ ಇಳಿಯಿತು, ಇದು ಈ ಋತುವಿನ ಅತಿ ಕೆಟ್ಟ ದಾಖಲೆ. 24 ಗಂಟೆಗಳ ಸರಾಸರಿ AQI ಬುಧವಾರ 364, ಮಂಗಳವಾರ 359, ಸೋಮವಾರ 347, ಭಾನುವಾರ 325, ಶನಿವಾರ 304 ಮತ್ತು ಶುಕ್ರವಾರ 261.
- ಗುರುವಾರದ PM2.5ರ ಸಾಂದ್ರತೆಯು ಪ್ರತಿ ಘನ ಮೀಟರ್‌ಗೆ 60 ಮೈಕ್ರೋಗ್ರಾಂಗಳ ಸುರಕ್ಷಿತ ಮಿತಿಯನ್ನು ಅನೇಕ ಸ್ಥಳಗಳಲ್ಲಿ ಏಳರಿಂದ ಎಂಟು ಪಟ್ಟು ಮೀರಿದೆ.
- ಗುರುವಾರ ದೆಹಲಿಯಲ್ಲಿ ಪಿಎಂ 2.5 ಮಾಲಿನ್ಯದ 25%ರಷ್ಟು ಸ್ಟುಬಲ್ (ಕೃಷಿ ಕೂಳೆ) ದಹನದ ಹೊಗೆಯನ್ನು ಹೊಂದಿದೆ ಎಂದು ಪುಣೆಯ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟ್ರಾಪಿಕಲ್ ಮೆಟಿಯರಾಲಜಿಯ ಮಾದರಿ ಆಧಾರಿತ ಅಧ್ಯಯನವು ಬಹಿರಂಗಪಡಿಸಿದೆ. ಇದು ಇಂದು 35%ಕ್ಕೆ ಏರಬಹುದು.
- ಅಕ್ಟೋಬರ್ 2023ರಲ್ಲಿ ದೆಹಲಿಯ ಗಾಳಿಯ ಗುಣಮಟ್ಟ 2020ರಿಂದ ಕೆಟ್ಟದಾಗಿದೆ ಮತ್ತು ಈ ವರ್ಷದ ಅಕ್ಟೋಬರ್‌ನಲ್ಲಿ ಮಳೆಯಾಗಿಲ್ಲ. ಅಕ್ಟೋಬರ್ 2022 (129 ಮಿಮೀ) ಮತ್ತು ಅಕ್ಟೋಬರ್ 2021 (123 ಮಿಮೀ) ಗೆ ವ್ಯತಿರಿಕ್ತವಾಗಿ ಅಕ್ಟೋಬರ್ 2023ರಲ್ಲಿ ಕೇವಲ 5.4 ಮಿಮೀ ಮಳೆ ದಾಖಲಾಗಿದೆ.
- ನವೆಂಬರ್ 1ರಿಂದ ನವೆಂಬರ್ 15ರ ನಡುವೆ ದೆಹಲಿಯ ವಾಯುಮಾಲಿನ್ಯವು ಅತಿಯಾಗಿ ಕೆಡುತ್ತದೆ. ಪಂಜಾಬ್ ಮತ್ತು ಹರಿಯಾಣದ ರೈತರು ಉರಿಸುವ ಕೃಷಿ ತ್ಯಾಜ್ಯದಿಂದ ಇದು ಹೆಚ್ಚಾಗುತ್ತದೆ. ಈ ವರ್ಷ ಸೆಪ್ಟೆಂಬರ್ 15ರಿಂದ ಪಂಜಾಬ್ ಮತ್ತು ಹರಿಯಾಣ ಎರಡರಲ್ಲೂ ಹುಲ್ಲು ಸುಡುವಿಕೆ ಕಡಿಮೆಯಾಗಿದೆ. ಆದರೆ ಕಳೆದ ಕೆಲವು ದಿನಗಳಲ್ಲಿ ಗಮನಾರ್ಹ ಹೆಚ್ಚಳ ಕಂಡುಬಂದಿದೆ.
- ಹದಗೆಡುತ್ತಿರುವ ವಾಯು ಗುಣಮಟ್ಟ ಸೂಚ್ಯಂಕದ ಹಿನ್ನೆಲೆಯಲ್ಲಿ ಗುರುಗ್ರಾಮ್‌ನಲ್ಲಿ ಸೆಕ್ಷನ್ 144 ಜಾರಿಗೊಳಿಸಲಾಗಿದೆ. ನೋಯ್ಡಾ ಮತ್ತು ಗ್ರೇಟರ್ ನೋಯ್ಡಾ ಕೂಡ ಶುಕ್ರವಾರದಿಂದ ಪ್ರಾರಂಭವಾಗುವ GRAP III ನಿರ್ಬಂಧಗಳ ಅಡಿಯಲ್ಲಿ ಬರುತ್ತವೆ.
- ದೆಹಲಿ ಮೆಟ್ರೋ 20 ಹೆಚ್ಚುವರಿ ರೈಲುಗಳನ್ನು ಓಡಿಸುತ್ತದೆ. ಏಕೆಂದರೆ ಜನರು ಕಾರುಗಳನ್ನು ಕೈಬಿಡಲು ಮತ್ತು ಮೆಟ್ರೋವನ್ನು ಬಳಸಲು ಪ್ರೋತ್ಸಾಹಿಸಲಾಗುತ್ತದೆ.
- GRAP III ರ ಅಡಿಯಲ್ಲಿ ದೆಹಲಿಯಲ್ಲಿ ನಿಷೇಧಿತಗೊಂಡಿರುವ ಚಟುವಟಿಕೆಗಳು ಇವು: ಕೆಡವುವ ಕೆಲಸಗಳು, ಯೋಜನಾ ಸೈಟ್‌ಗಳ ಒಳಗೆ ಅಥವಾ ಹೊರಗೆ ನಿರ್ಮಾಣ ಸಾಮಗ್ರಿಗಳನ್ನು ಲೋಡ್ ಮಾಡುವುದು ಮತ್ತು ಇಳಿಸುವುದು, ಕಚ್ಚಾ ವಸ್ತುಗಳನ್ನು ಹಸ್ತಚಾಲಿತವಾಗಿ ಅಥವಾ ಕನ್ವೇಯರ್ ಬೆಲ್ಟ್‌ಗಳ ಮೂಲಕ ವರ್ಗಾಯಿಸುವುದು, ಹಾರುಬೂದಿ, ಮಣ್ಣಿನ ರಸ್ತೆಗಳಲ್ಲಿ ವಾಹನಗಳ ಚಲನೆ, ಬ್ಯಾಚಿಂಗ್ ಪ್ಲಾಂಟ್‌ನ ಕಾರ್ಯಾಚರಣೆ, ಒಳಚರಂಡಿ ಲೈನ್ ಹಾಕುವಿಕೆ, ವಾಟರ್‌ಲೈನ್, ಡ್ರೈನೇಜ್ ಕೆಲಸ ಮತ್ತು ತೆರೆದ ಕಂದಕ ವ್ಯವಸ್ಥೆಯಲ್ಲಿ ವಿದ್ಯುತ್ ಕೇಬಲ್ ಹಾಕುವುದು, ಟೈಲ್ಸ್, ಕಲ್ಲುಗಳು ಮತ್ತು ಇತರ ನೆಲಹಾಸುಗಳನ್ನು ಕತ್ತರಿಸುವುದು ಮತ್ತು ಸರಿಪಡಿಸುವುದು, ಜಲನಿರೋಧಕ ಕೆಲಸ, ಪೇಂಟಿಂಗ್, ಪಾಲಿಶಿಂಗ್ ಮತ್ತು ವಾರ್ನಿಶಿಂಗ್ ಕೆಲಸಗಳು ಇತ್ಯಾದಿ, ರಸ್ತೆ ನಿರ್ಮಾಣ/ ದುರಸ್ತಿ ಪಾದಚಾರಿ ಮಾರ್ಗಗಳು ಇತ್ಯಾದಿಗಳನ್ನು ಸುಗಮಗೊಳಿಸುವುದು.
- ಸರ್ಕಾರವು ರಸ್ತೆಗಳ ಯಾಂತ್ರೀಕೃತ ಗುಡಿಸುವ ಆವರ್ತನವನ್ನು ಹೆಚ್ಚಿಸುತ್ತದೆ. ಧೂಳು ನಿವಾರಕಗಳೊಂದಿಗೆ ದೈನಂದಿನ ನೀರನ್ನು ಚಿಮುಕಿಸುವುದನ್ನು ಖಚಿತಪಡಿಸುತ್ತದೆ.
ಇದನ್ನೂ ಓದಿ: Air Pollution | ದೇಶದ ಮಾಲಿನ್ಯಯುಕ್ತ ನಗರಗಳ ಪೈಕಿ ಬೆಂಗಳೂರಿಗೆ ಆರನೇ ಸ್ಥಾನ!