ನವ ದೆಹಲಿ: ಸುಳ್ಳು ಸುದ್ದಿಗಳು ಹಾಗೂ ಸೋಶಿಯಲ್‌ ಮೀಡಿಯಾಗಳ ಈ ಯುಗದಲ್ಲಿ ಸತ್ಯ ಬಲಿಪಶು ಸ್ಥಾನದಲ್ಲಿದೆ. ಇಂದು ಜನತೆಯ ತಾಳ್ಮೆ ಹಾಗೂ ಸಹಿಷ್ಣುತೆಯ ಪ್ರಮಾಣ ಕಡಿಮೆಯಾಗಿದೆ ಎಂದು ಮುಖ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಅಮೆರಿಕನ್‌ ಬಾರ್‌ ಅಸೋಸಿಯೇಶನ್‌ನ (ABA) ಇಂಡಿಯಾ ಕಾನ್ಫರೆನ್ಸ್‌- 2023ನಲ್ಲಿ ʼಗ್ಲೋಕಲೈಸೇಷನ್‌ನ ಯುಗದಲ್ಲಿ ಕಾನೂನು: ಭಾರತ ಹಾಗೂ ಪಶ್ಚಿಮದ ಮುಖಾಮುಖಿʼ ವಿಚಾರದಲ್ಲಿ ಅವರು ಮಾತನಾಡುತ್ತ ಹೀಗೆಂದರು.
ಸುಳ್ಳು ಸುದ್ದಿಗಳ ಯುಗದಲ್ಲಿ ಸತ್ಯವು ಬಲಿಪಶುವಾಗಿದೆ. ಸಾಮಾಜಿಕ ಮಾಧ್ಯಮಗಳ ವ್ಯಾಪಕತೆಯಿಂದಾಗಿ ಯಾವುದೋ ಒಂದು ವಿಚಾರ ಸಂಪೂರ್ಣ ಸತ್ಯವೆಂದು ಸ್ಥಾಪಿಸಲ್ಪಡುತ್ತದೆ; ಆದರೆ ಅದನ್ನು ತರ್ಕಬದ್ಧ ವಿಜ್ಞಾನದ ಒರೆಯಲ್ಲಿ ಪರೀಕ್ಷಿಸುವವರೇ ಇರುವುದಿಲ್ಲ ಎಂದವರು ನುಡಿದರು.
ಮುಖ್ಯ ನ್ಯಾಯಮೂರ್ತಿ ಹೇಳಿದ ಇತರ ವಿಚಾರಗಳು ಹೀಗಿದ್ದವು:
ಜಾಗತೀಕರಣದ ಯುಗಕ್ಕೆ ನಾವು ಮುನ್ನುಗ್ಗುವ ಮೊದಲೇ ಭಾರತೀಯ ಸಂವಿಧಾನವು ಅನೇಕ ವಿಧಗಳಲ್ಲಿ ಜಾಗತೀಕರಣಕ್ಕೆ ತೆರೆದುಕೊಂಡ ಪ್ರಮುಖ ಉದಾಹರಣೆಯಾಗಿದೆ. ಅದನ್ನು ರಚಿಸಿದವರಿಗೇ ಬಹುಶಃ ಅದು ತಿಳಿದಿರಲಿಲ್ಲ.
ಈ ಹಿಂದೆ ನಾವು ಗೌಪ್ಯತೆಯ ಕಲ್ಪನೆಯನ್ನು ಹೊಂದಿರಲಿಲ್ಲ, ಇಂಟರ್ನೆಟ್ ಇರಲಿಲ್ಲ, ಅಲ್ಗಾರಿದಮ್‌ಗಳಿಂದ ನಿಯಂತ್ರಿಸಲ್ಪಡುವ ಜಗತ್ತಿನಲ್ಲಿ ನಾವು ವಾಸಿಸಲಿಲ್ಲ. ನಾವು ಸಾಮಾಜಿಕ ಮಾಧ್ಯಮವನ್ನು ಹೊಂದಿರಲಿಲ್ಲ. ಆದರೆ ಇಂದು ನಾವು, ನ್ಯಾಯಾಧೀಶರು ಸಹ, ಮಾಡುವ ಪ್ರತಿಯೊಂದಕ್ಕೂ, ನಿಮ್ಮ ದೃಷ್ಟಿಕೋನವನ್ನು ಒಪ್ಪದ ಯಾರೋ ಒಬ್ಬರಿಂದ ಟ್ರೋಲ್‌ಗೆ ತುತ್ತಾಗುವ ಆತಂಕ ಇದ್ದೇ ಇದೆ.
ಜಾಗತೀಕರಣ ಮತ್ತು ತಂತ್ರಜ್ಞಾನದ ಮಿತಿಮೀರಿದ ಆಗಮನದೊಂದಿಗೆ ಮಾನವೀಯತೆಯು ವಿಸ್ತರಿಸಿದಂತೆಯೇ ಇಂದು ಜನತೆ ತಾಳ್ಮೆ ಮತ್ತು ಸಹಿಷ್ಣುತೆಯ ಕೊರತೆಯನ್ನೂ ಹೊಂದಿದ್ದಾರೆ. ತಮಗಿಂದ ವಿಭಿನ್ನ ದೃಷ್ಟಿಕೋನಗಳನ್ನು ಸ್ವೀಕರಿಸಲು ಅವರು ಸಿದ್ಧರಿಲ್ಲ.
ತಂತ್ರಜ್ಞಾನದ ಹೊರತಾಗಿ ಇಂದು ಕಾನೂನು ವೃತ್ತಿಯನ್ನು ಎದುರಿಸುವ ಪ್ರಮುಖ ಸಮಸ್ಯೆಗಳಿವೆ. ಅವುಗಳಲ್ಲಿ ಮುಖ್ಯವಾದುದು ವಕೀಲ ವೃತ್ತಿಯ ಸುಧಾರಣೆ. ಅನೇಕ ವಿಧಗಳಲ್ಲಿ, ನಮ್ಮ ವೃತ್ತಿಯು ಇನ್ನೂ ಪಿತೃಪ್ರಧಾನವಾಗಿದೆ. ನಮ್ಮ ವೃತ್ತಿಯು ಬಂಧುತ್ವ ಮತ್ತು ಸಮುದಾಯದ ಸಂಬಂಧಗಳ ಮೇಲೆ ನಿರ್ಮಿಸಲ್ಪಟ್ಟಿದೆ.
2001ರ ಭಯೋತ್ಪಾದಕ ದಾಳಿಯು ಜಗತ್ತಿನ ಇತಿಹಾಸದಲ್ಲಿ ಒಂದು ಮಹತ್ವದ ಕ್ಷಣ. ಜಾಗತೀಕರಣ ತನ್ನದೇ ಆದ ಅಸಮಾಧಾನಕ್ಕೆ ಕಾರಣವಾಗಿದೆ. ಪ್ರಪಂಚದಾದ್ಯಂತ ಇದು ಉಂಟುಮಾಡಿದ ತಲ್ಲಣಕ್ಕೆ ಹಲವಾರು ಕಾರಣಗಳಿವೆ. 2001ರ ಉಗ್ರ ದಾಳಿ ಜಾಗತಿಕ ಸಮಾಜಕ್ಕೆ ಭಾರತದ ಎದುರಿಸುತ್ತಿದ್ದ ಕಟುವಾದ ವಾಸ್ತವವನ್ನು ಕಾಣಿಸಿತು. ಅದಕ್ಕೂ ಮೊದಲು ಮತ್ತು ನಂತರವೂ ಭಾರತ ಭಯೋತ್ಪಾದನೆಯ ಎದುರಿಸಿದೆ.
ದೇಶದಲ್ಲಿ ನಾವು ಇನ್ನಷ್ಟು ಹೆಚ್ಚಿನ ಮಹಿಳಾ ನ್ಯಾಯಾಧೀಶರನ್ನು ಹೊಂದಲು ಸಾಧ್ಯವಿಲ್ಲವೇ? ಒಳಗೊಳ್ಳುವಿಕೆ ಮತ್ತು ವೈವಿಧ್ಯತೆಯ ವಿಷಯದಲ್ಲಿ ನಮ್ಮ ನ್ಯಾಯಾಂಗ ಎರಡು ದಶಕಗಳ ಹಿಂದಿದೆ. ಮಹಿಳೆಯರು ಕಾನೂನು ವೃತ್ತಿಯಲ್ಲಿ ಪ್ರವೇಶಿಸಲು ಮತ್ತು ಅಭಿವೃದ್ಧಿ ಹೊಂದಲು ಸಮಾನ ಅವಕಾಶಗಳು ಇನ್ನಷ್ಟು ಬೇಕಿವೆ. ಹೀಗಾಗದಿದ್ದರೆ 2023ರಲ್ಲಿ ಮಹಿಳೆಯರು ಸುಪ್ರೀಂ ಕೋರ್ಟ್ ನ್ಯಾಯಾಧೀಶರಾಗುವ ಯಾವುದೇ ಪವಾಡ ಸಾಧ್ಯವಿಲ್ಲ. ನಾವು ನ್ಯಾಯಾಂಗದಲ್ಲಿ ಹೆಚ್ಚು ವೈವಿಧ್ಯಮಯವಾಗಿರುವ ಭವಿಷ್ಯವನ್ನು ರೂಪಿಸಬೇಕಾದರೆ ಹೆಚ್ಚು ವೈವಿಧ್ಯಮಯ ಅಡಿಪಾಯವನ್ನು ರಚಿಸಬೇಕಾಗಿದೆ.
ಭಾರತದ ಜಿಲ್ಲಾ ನ್ಯಾಯಾಂಗದಲ್ಲಿ ಇತ್ತೀಚಿನ ನೇಮಕಾತಿಗಳ ಅಂಕಿಅಂಶಗಳ ಪ್ರಕಾರ, ಅನೇಕ ರಾಜ್ಯಗಳಲ್ಲಿ, 50 ಪ್ರತಿಶತಕ್ಕಿಂತ ಹೆಚ್ಚು ಮಹಿಳೆಯರು ಇದ್ದಾರೆ ಎಂದು ಸೂಚಿಸಿದೆ. ಮತ್ತು ಅದಕ್ಕೆ ಕಾರಣ ಭಾರತದಲ್ಲಿ ಶಿಕ್ಷಣದ ಹರಡುವಿಕೆ.
ಇದನ್ನೂ ಓದಿ: Medical education: ನೀಟ್‌ ಕೇಸ್‌ಗಳ ಸಂಖ್ಯೆ ಹೆಚ್ಚಳವು ವೈದ್ಯಕೀಯ ಶಿಕ್ಷಣ ಸುಧಾರಣೆ ಅಗತ್ಯ ಬಿಂಬಿಸಿದೆ: ಸಿಜೆಐ ಚಂದ್ರಚೂಡ್