ಹೊಸದಿಲ್ಲಿ: 1949ರ ನವೆಂಬರ್‌ 26ರಂದು ಸಂವಿಧಾನವನ್ನು (constitution) ಸ್ವೀಕರಿಸಿದ ದಿನಾಂಕವನ್ನು ಹಾಗೆಯೇ ಇರಿಸಿಕೊಂಡು ಅದರ ಪೀಠಿಕೆಯನ್ನು (Preamble) ತಿದ್ದುಪಡಿ (amendment) ಮಾಡಬಹುದೇ ಎಂದು ಸುಪ್ರೀಂ ಕೋರ್ಟ್ (supreme court) ಶುಕ್ರವಾರ ಪ್ರಶ್ನಿಸಿದೆ.
ನ್ಯಾಯಮೂರ್ತಿಗಳಾದ ಸಂಜೀವ್ ಖನ್ನಾ ಮತ್ತು ದೀಪಂಕರ್ ದತ್ತಾ ಅವರ ಪೀಠವು ಸಂವಿಧಾನದ ಪೀಠಿಕೆಯಿಂದ “ಸಮಾಜವಾದಿ” ಮತ್ತು “ಜಾತ್ಯತೀತ” ಪದಗಳನ್ನು ಅಳಿಸಲು ಕೋರಿರುವ ಮಾಜಿ ರಾಜ್ಯಸಭಾ ಸಂಸದ ಸುಬ್ರಮಣಿಯನ್ ಸ್ವಾಮಿ ಮತ್ತು ವಕೀಲ ವಿಷ್ಣು ಶಂಕರ್ ಜೈನ್ ಅವರಿಗೆ ಪ್ರಶ್ನೆಯನ್ನು ಕೇಳಿದೆ.
“ಅಕಾಡೆಮಿಕ್‌ ಉದ್ದೇಶಕ್ಕಾಗಿ ಕೇಳುತ್ತಿರುವುದೇನೆಂದರೆ, ಸಂವಿಧಾನದ ಸ್ವೀಕಾರದ ದಿನಾಂಕವನ್ನು ಬದಲಾಯಿಸದೆ ಮುನ್ನುಡಿಯನ್ನು ಬದಲಾಯಿಸಬಹುದೇ? ಇಲ್ಲ ಎಂದಾದರೆ, ಹೌದು, ಪೀಠಿಕೆಯನ್ನು ತಿದ್ದುಪಡಿ ಮಾಡಬಹುದು. ಅದರಲ್ಲಿ ಯಾವುದೇ ಸಮಸ್ಯೆ ಇಲ್ಲ” ಎಂದು ನ್ಯಾಯಮೂರ್ತಿ ದತ್ತಾ ಹೇಳಿದರು.
ಅದಕ್ಕೆ ಉತ್ತರಿಸಿದ ಸ್ವಾಮಿ, “ಇದು ಈ ವಿಷಯದಲ್ಲಿ ನಿಖರವಾದ ಪ್ರಶ್ನೆಯಾಗಿದೆ” ಎಂದರು. ನ್ಯಾಯಮೂರ್ತಿ ದತ್ತಾ ಅವರು, “ಬಹುಶಃ ಇದು ನಾನು ನೋಡಿದ್ದರಲ್ಲೆಲ್ಲ ದಿನಾಂಕದೊಂದಿಗೆ ಇರುವ ಏಕೈಕ ಪೀಠಿಕೆ. ʼನಾವು ಈ ಸಂವಿಧಾನವನ್ನು ನಮಗೆ ಈ ದಿನಾಂಕದಂದು ನೀಡುತ್ತೇವೆʼ ಮೂಲತಃ ಈ ಎರಡು ಪದಗಳು (ಸಮಾಜವಾದಿ ಮತ್ತು ಸೆಕ್ಯುಲರ್) ಇರಲಿಲ್ಲ” ಎಂದರು.
“ಭಾರತದ ಸಂವಿಧಾನದ ಪೀಠಿಕೆಯು ನಿರ್ದಿಷ್ಟ ದಿನಾಂಕದೊಂದಿಗೆ ಇರುತ್ತದೆ. ಆದ್ದರಿಂದ ಚರ್ಚೆಯಿಲ್ಲದೆ ಅದನ್ನು ತಿದ್ದುಪಡಿ ಮಾಡಲು ಸಾಧ್ಯವಿಲ್ಲ” ಎಂದು ಜೈನ್ ಹೇಳಿದರು. ಸ್ವಾಮಿ ಮಧ್ಯಪ್ರವೇಶಿಸಿ, 42ನೇ ತಿದ್ದುಪಡಿ ಕಾಯಿದೆಯನ್ನು ತುರ್ತು ಪರಿಸ್ಥಿತಿ ವೇಳೆ (1975-77) ಅಂಗೀಕರಿಸಲಾಯಿತು ಎಂದು ಹೇಳಿದರು.
ಈ ವಿಷಯದ ಬಗ್ಗೆ ವಿವರವಾದ ಚರ್ಚೆಯ ಅಗತ್ಯವಿದೆ ಎಂದು ಪೀಠ ಹೇಳಿತು ಮತ್ತು ಎರಡೂ ಅರ್ಜಿಗಳ ವಿಚಾರಣೆಯನ್ನು ಏಪ್ರಿಲ್ 29ಕ್ಕೆ ಮುಂದೂಡಿತು. ಸೆಪ್ಟೆಂಬರ್ 2, 2022ರಂದು, ಸುಪ್ರೀಂ ಕೋರ್ಟ್ ಸ್ವಾಮಿಯವರ ಮನವಿಯನ್ನು ಮತ್ತೊಂದು ಬಾಕಿ ಉಳಿದಿರುವ, ಬಲರಾಮ್ ಸಿಂಗ್ ಮತ್ತು ಇತರರು ಸಲ್ಲಿಸಿದ ಅರ್ಜಿಯೊಂದಿಗೆ ವಿಚಾರಣೆಗಾಗಿ ಸೇರಿಸಿತ್ತು.
ಸ್ವಾಮಿ ಮತ್ತು ಸಿಂಗ್ ಇಬ್ಬರೂ ಪೀಠಿಕೆಯಿಂದ “ಸಮಾಜವಾದಿ” ಮತ್ತು “ಜಾತ್ಯತೀತ” ಪದಗಳನ್ನು ಅಳಿಸಲು ಕೋರಿದ್ದಾರೆ. 1976ರಲ್ಲಿ ಇಂದಿರಾ ಗಾಂಧಿ ಸರ್ಕಾರ ಮಂಡಿಸಿದ 42ನೇ ಸಾಂವಿಧಾನಿಕ ತಿದ್ದುಪಡಿಯ ಅಡಿಯಲ್ಲಿ ಸಂವಿಧಾನದ ಪೀಠಿಕೆಯಲ್ಲಿ ʼಸಮಾಜವಾದಿ’ ಮತ್ತು ʼಜಾತ್ಯತೀತ’ ಪದಗಳನ್ನು ಸೇರಿಸಲಾಯಿತು.
ತಿದ್ದುಪಡಿಯು ಮುನ್ನುಡಿಯಲ್ಲಿನ ಭಾರತದ ವಿವರಣೆಯನ್ನು “ಸಾರ್ವಭೌಮ, ಪ್ರಜಾಪ್ರಭುತ್ವ ಗಣರಾಜ್ಯ”ದಿಂದ “ಸಾರ್ವಭೌಮ, ಸಮಾಜವಾದಿ, ಜಾತ್ಯತೀತ, ಪ್ರಜಾಸತ್ತಾತ್ಮಕ ಗಣರಾಜ್ಯ” ಎಂದು ಬದಲಾಯಿಸಿತ್ತು. “ಪೀಠಿಕೆಯನ್ನು ಬದಲಾಯಿಸಲಾಗದು, ತಿದ್ದುಪಡಿ ಮಾಡಲಾಗದು ಅಥವಾ ರದ್ದುಗೊಳಿಸಲಾಗದು” ಎಂದು ಸ್ವಾಮಿ ತಮ್ಮ ಅರ್ಜಿಯಲ್ಲಿ ಪ್ರತಿಪಾದಿಸಿದ್ದಾರೆ.
ಪೀಠಿಕೆಯು ಸಂವಿಧಾನದ ಅಗತ್ಯ ಲಕ್ಷಣಗಳನ್ನು ಮಾತ್ರವಲ್ಲದೆ ಏಕೀಕೃತ ಸಮಗ್ರ ಸಮುದಾಯವನ್ನು ರಚಿಸಲು ಅದನ್ನು ಅಳವಡಿಸಿಕೊಂಡ ಮೂಲಭೂತ ಷರತ್ತುಗಳನ್ನು ಸಹ ಸೂಚಿಸುತ್ತದೆ ಎಂದು ಅವರು ತಮ್ಮ ಅರ್ಜಿಯಲ್ಲಿ ತಿಳಿಸಿದ್ದಾರೆ.