ಮುಂಬೈ, ಮಹಾರಾಷ್ಟ್ರ: ರಿಲಯನ್ಸ್ ಫೌಂಡೇಷನ್ (reliance foundation) ಮತ್ತು ಯುನೈಟೆಡ್ ಸ್ಟೇಟ್ಸ್ ಏಜೆನ್ಸಿ ಫಾರ್ ಇಂಟರ್ ನ್ಯಾಷನಲ್ ಡೆವಲಪ್‌ಮೆಂಟ್ (USAID) ವುಮೆನ್ ಕನೆಕ್ಟ್ ಚಾಲೆಂಜ್ ಇಂಡಿಯಾದ (WomenConnect Challenge India) ಎರಡನೇ ಸುತ್ತಿನ ವಿಜೇತರನ್ನು ಘೋಷಣೆ ಮಾಡಿದೆ. ಇದರ ಉದ್ದೇಶ ಏನೆಂದರೆ, ಭಾರತದಲ್ಲಿ ಲಿಂಗದ ಆಧಾರದಲ್ಲಿ ಡಿಜಿಟಲ್ ವಿಭಜನೆಯನ್ನು ತೊಡೆದು ಹಾಕುವುದು ಮತ್ತು ಜಾಗತಿಕ ಆರ್ಥಿಕತೆಯಲ್ಲಿ ಮಹಿಳೆಯರು ಪಾಲ್ಗೊಳ್ಳುವುದಕ್ಕೆ ಅವರನ್ನು ಸಶಕ್ತಗೊಳಿಸುವುದಾಗಿದೆ.
ತಂತ್ರಜ್ಞಾನದ ಸಂಪರ್ಕದಿಂದ ಮಹಿಳೆಯರನ್ನು ತಡೆಯುವಂಥ ಅಡೆತಡೆಗಳನ್ನು ನಿವಾರಿಸುವುದಕ್ಕೆ ಶ್ರಮಿಸುವುದಕ್ಕಾಗಿ ಸಂಸ್ಥೆಗಳಿಗೆ ರಿಲಯನ್ಸ್ ಫೌಂಡೇಷನ್ ಅನುದಾನವನ್ನು ನೀಡುತ್ತದೆ. ಒಟ್ಟು 260ಕ್ಕೂ ಹೆಚ್ಚು ಅರ್ಜಿದಾರರಲ್ಲಿ ಏಳು ಸಾಮಾಜಿಕ ವಲಯದ ಸಂಸ್ಥೆಗಳನ್ನು ಆಯ್ಕೆ ಮಾಡಲಾಗಿದೆ. ಅವುಗಳಿಗೆ ತಲಾ 1 ಕೋಟಿ ರೂಪಾಯಿಗಳವರೆಗೆ (ಅಂದಾಜು 1,20,000 ಅಮೆರಿಕನ್ ಡಾಲರ್) ಪ್ರಶಸ್ತಿ ನೀಡಲಾಗುತ್ತದೆ.
ಅಮೆರಿಕ ಸರ್ಕಾರವು ರಿಲಯನ್ಸ್ ಫೌಂಡೇಷನ್ ಜತೆಗೆ ಸಹಯೋಗ ಹೊಂದಿದೆ. ಈ ಮೂಲಕ ಮಹಿಳಾ ಉದ್ಯಮಿಗಳು, ರೈತರು, ಮಹಿಳಾ ನೇತೃತ್ವದ ಕಿರು ಉದ್ಯಮಗಳು ಮತ್ತು ಸಮೂಹ ಸಂಸ್ಥೆಗಳು ಮತ್ತು ಸ್ವ-ಸಹಾಯ ಗುಂಪುಗಳನ್ನು ತಲುಪಲು ಹಾಗೂ ಭಾರತದಾದ್ಯಂತ ತಜ್ಞರು ಮತ್ತು ವೈದ್ಯರಿಂದ ಮಾರ್ಗದರ್ಶನ ಬೆಂಬಲವನ್ನು ಒದಗಿಸಲು ಸಹಾಯ ಮಾಡುತ್ತದೆ.
ಪ್ರಮುಖ ತಜ್ಞರು ಮತ್ತು ಸಂಸ್ಥೆಗಳನ್ನು ಒಟ್ಟುಗೂಡಿಸಿದ ‘ಆಕ್ಸಿಲರೇಟಿಂಗ್ ಡಿಜಿಟಲ್ ಇನ್ ಕ್ಲೂಷನ್: ಬ್ರಿಡ್ಜಿಂಗ್ ದಿ ಜೆಂಡರ್ ಡಿಜಿಟಲ್ ಡಿವೈಡ್ ಇನ್ ಇಂಡಿಯಾ’ ಕಾರ್ಯಕ್ರಮದಲ್ಲಿ ವಿಜೇತರನ್ನು ಬುಧವಾರ ಘೋಷಿಸಲಾಯಿತು.
ಯುಎಸ್‌ಎಐಡಿ/ಭಾರತ ಮಿಷನ್ ನಿರ್ದೇಶಕಿ ವೀಣಾ ರೆಡ್ಡಿ ಮಾತನಾಡಿ, “ಜಗತ್ತನ್ನು ಸಂಪರ್ಕಿಸುವಂಥ ಕಾರ್ಯತಂತ್ರದ ಪ್ರಾಮುಖ್ಯವನ್ನು ಅಮೆರಿಕ ಗುರುತಿಸುತ್ತದೆ. ಡಿಜಿಟಲ್ ತಂತ್ರಜ್ಞಾನವು ಅಂತರ್ಗತ ಬೆಳವಣಿಗೆಯನ್ನು ಉತ್ತೇಜಿಸುವ, ಚೇತರಿಸಿಕೊಳ್ಳುವ ಮತ್ತು ಪ್ರಜಾಪ್ರಭುತ್ವದ ಸಮಾಜಗಳನ್ನು ಬೆಳೆಸುವ ಮತ್ತು ಅತ್ಯಂತ ದುರ್ಬಲರನ್ನು ಒಳಗೊಂಡಂತೆ ಎಲ್ಲರಿಗೂ ಅಧಿಕಾರ ನೀಡುವ ಭವಿಷ್ಯದ ಕಡೆಗೆ ಯುಎಸ್‌ಎಐಡಿ ಕಾರ್ಯ ನಿರ್ವಹಿಸುತ್ತದೆ. ಮೊದಲ ಸುತ್ತಿನ ದಿ ವುಮೆನ್ ಕನೆಕ್ಟ್ ಚಾಲೆಂಜ್ ಇಂಡಿಯಾದ ಯಶಸ್ಸಿನ ಮೇಲೆ ನಿರ್ಮಿಸಲು ಯುಎಸ್‌ಎಐಡಿ ಉತ್ಸುಕವಾಗಿದೆ. ಡಿಜಿಟಲ್ ಉಪಕರಣಗಳು, ವಿಶೇಷ ತರಬೇತಿ ಮತ್ತು ವ್ಯಾಪಾರ ಅವಕಾಶಗಳಿಗೆ ಸಂಪರ್ಕವನ್ನು ವಿಸ್ತರಿಸುವ ಮೂಲಕ ಡಿಜಿಟಲ್ ಅಂತರವನ್ನು ಕಡಿಮೆ ಮಾಡಲು ಎರಡನೇ ಸುತ್ತಿನ ಯೋಜನೆಗಳು ಪ್ರಗತಿಯನ್ನು ವೇಗಗೊಳಿಸುತ್ತವೆ,” ಎಂದಿದ್ದಾರೆ.
ರಿಲಯನ್ಸ್ ಫೌಂಡೇಷನ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಜಗನ್ನಾಥ ಕುಮಾರ್ ಮಾತನಾಡಿ, “ಲಿಂಗ ಆಧಾರಿತ ಡಿಜಿಟಲ್ ವಿಭಜನೆಯನ್ನು ತೊಡೆಯಲು ನಾವು ಕೆಲಸ ಮಾಡಲು ಬದ್ಧರಾಗಿದ್ದೇವೆ. ವುಮೆನ್‌ಕನೆಕ್ಟ್ ಚಾಲೆಂಜ್ ಇಂಡಿಯಾದ ಮೊದಲ ಸುತ್ತಿನಲ್ಲಿ ಬೆಂಬಲಿಸಲಾದ ಡಿಜಿಟಲ್ ಸೇರ್ಪಡೆಗೆ ನವೀನ ವಿಧಾನಗಳ ಮೂಲಕ ನಾವು ಇದನ್ನು ನೋಡಿದ್ದೇವೆ. ಡಿಜಿಟಲ್ ಸಬಲೀಕರಣವು ಒದಗಿಸುವ ಪ್ರಯೋಜನಗಳನ್ನು ಸಂಪರ್ಕಿಸುವುದಕ್ಕೆ ಸಾಧ್ಯವಾದಾಗ ಮಹಿಳೆಯರು ವರ್ಧಿತ ಜೀವನೋಪಾಯ, ಉದ್ಯಮಶೀಲತೆ ಮತ್ತು ಕಲಿಕೆಯ ಅವಕಾಶಗಳೊಂದಿಗೆ ಅಭಿವೃದ್ಧಿ ಹೊಂದುವುದನ್ನು ಕಂಡಿದ್ದೇವೆ. ವುಮೆನ್‌ಕನೆಕ್ಟ್ ಚಾಲೆಂಜ್ ಇಂಡಿಯಾ ಎರಡನೇ ಸುತ್ತಿನ ಮೂಲಕ ಯುಎಸ್‌ಎಐಡಿ ಸಹಭಾಗಿತ್ವದಲ್ಲಿ ರಿಲಯನ್ಸ್ ಫೌಂಡೇಷನ್ 3,50,000ಕ್ಕೂ ಹೆಚ್ಚು ಮಹಿಳೆಯರು ಮತ್ತು ಅವರ ಸಮುದಾಯಗಳ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುವ ವೇಗವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ,” ಎಂದಿದ್ದಾರೆ.
ಇದನ್ನೂ ಓದಿ: Reliance Foundation Scholarship: ಪದವಿಪೂರ್ವ ಹಂತದ 5000 ವಿದ್ಯಾರ್ಥಿಗಳಿಗೆ ರಿಲಯನ್ಸ್ ಫೌಂಡೇಷನ್ ವಿದ್ಯಾರ್ಥಿವೇತನ
ಎರಡನೇ ಸುತ್ತಿನ ವಿಜೇತರು: ಗೋಟ್ ಟ್ರಸ್ಟ್, ಎಂ.ಎಸ್. ಸ್ವಾಮಿನಾಥನ್ ರೀಸರ್ಚ್ ಫೌಂಡೇಷನ್, ಮಂಜರಿ ಫೌಂಡೇಷನ್, ಡಿಜಿಟಲ್ ಎಂಪವರ್‌ಮೆಂಟ್ ಫೌಂಡೇಷನ್, ಸೆವೆನ್ ಸಿಸ್ಟರ್ಸ್ ಡೆವಲಪ್‌ಮೆಂಟ್ ಅಸಿಸ್ಟೆನ್ಸ್, ಆಕ್ಸೆಸ್ ಡೆವಲಪ್ ಮೆಂಟ್ ಸರ್ವೀಸಸ್, ಯುಗಾಂತರ್. ವುಮೆನ್‌ಕನೆಕ್ಟ್ ಚಾಲೆಂಜ್ ಇಂಡಿಯಾ ಕುರಿತು ಇನ್ನಷ್ಟು ತಿಳಿದುಕೊಳ್ಳಲು www.womenconnectindia.com ಜಾಲತಾಣಕ್ಕೆ ಭೇಟಿ ನೀಡಬಹುದು.
ಮಹಿಳೆಯ ವಿಷಯಕ್ಕೆ ಸಂಬಂಧಿಸಿದಂತೆ ಇನ್ನಷ್ಟು ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.