ನಾಗ್ಪುರ: ರಸ್ತೆಯಲ್ಲಿ ವಾಹನ ಸವಾರರು ಕೆಲವೊಮ್ಮೆ ಸಣ್ಣಪುಟ್ಟ ವಿಚಾರಕ್ಕೆ ಹೊಡೆದಾಟ ಮಾಡಿಕೊಳ್ಳುತ್ತಾರೆ (Road Rage). ಪರಸ್ಪರ ವಾಹನ ಡಿಕ್ಕಿ ಹೊಡೆಯಿತು ಎಂದೋ, ಯಾರೋ ಅಡ್ಡಬಂದರು ಎಂಬ ಕಾರಣಕ್ಕೋ ..ಬೈಗುಳ, ಹೊಡೆದಾಟ ಸಾಮಾನ್ಯ. ಆದರೆ ಮಹಾರಾಷ್ಟ್ರದ ನಾಗ್ಪುರದಲ್ಲಿ ಬಿಎಸ್ಎಫ್ ನಿವೃತ್ತ ಯೋಧನೊಬ್ಬ ಮಹಿಳೆ ತನ್ನ ಟ್ಯಾಕ್ಸಿಯನ್ನು ಓವರ್ಟೇಕ್ ಮಾಡಿದರು ಎಂಬ ಕಾರಣಕ್ಕೆ ಆಕೆಗೆ ಥಳಿಸಿದ್ದಾನೆ. ಈ ವಿಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದೆ.
ಆರೋಪಿ ಹೆಸರು ಶಿವ ಶಂಕರ್ ಶ್ರೀವಾತ್ಸವ್ ಎಂದಾಗಿದ್ದು, ಜರಿಪಟ್ಕಾ ಪ್ರದೇಶದ ಭೀಮ್ ಚೌಕ್‌ ಬಳಿ ಕಾರಿನಲ್ಲಿ ಹೋಗುತ್ತಿದ್ದ. ಆಗ ಮಹಿಳೆಯೊಬ್ಬರು ದ್ವಿಚಕ್ರವಾಹನದಲ್ಲಿ ಆ ಕಾರನ್ನು ಹಿಂದಿಕ್ಕಿ ಮುಂದೆ ಹೋದರು. ಅದನ್ನು ನೋಡಿದ ಶಿವಶಂಕರ್ ಜೋರಾಗಿ ಕಾರು ಓಡಿಸಿ, ಮಹಿಳೆಯ ಸ್ಕೂಟರ್ಗೆ ಸ್ವಲ್ಪವೇ ತಾಗಿಸಿದ. ಇನ್ನೇನು ಸ್ಕೂಟರ್ ಬೀಳಬೇಕು ಎಂಬಷ್ಟರಲ್ಲಿ ಆಕೆ ಅದು ಹೇಗೋ ಗಾಡಿ ನಿಯಂತ್ರಿಸಿಕೊಂಡರು. ಅಷ್ಟೇ ಅಲ್ಲ, ಕಾರಿನ ಫೋಟೋ ಕ್ಲಿಕ್ಕಿಸಿಕೊಳ್ಳಲು ಮೊಬೈಲ್ ತೆಗೆದರು. ಅಷ್ಟರಲ್ಲಿ ಕಾರಿನಿಂದ ಇಳಿದು ಬಂದ ಶಿವಶಂಕರ್ ಶ್ರೀವಾತ್ಸವ್ ಮಹಿಳೆಯನ್ನು ಎಳೆದು, ಹೊಡೆದಿದ್ದಾನೆ. ಕೂದಲು ಹಿಡಿದು ಎಳೆದಾಡಿದ್ದಾನೆ. ಅಲ್ಲಿದ್ದವರೆಲ್ಲ ಸೇರಿ ಅವನಿಂದ ಮಹಿಳೆಯನ್ನು ಕಾಪಾಡಿದ್ದಾರೆ. ಆತನನ್ನು ಪೊಲೀಸರು ಸ್ಟೇಶನ್ಗೆ ಕರೆದುಕೊಂಡು ಹೋಗಿದ್ದಾರೆ. ಮಹಿಳೆ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ಇದನ್ನೂ ಓದಿ: Viral Video : ವಧುವಿಗೆ ಮಾಲೆ ಹಾಕುತ್ತಿದ್ದಂತೆಯೇ ಹೌಹಾರಿದ ವರ! ತರ್ಲೆ ಸ್ನೇಹಿತರಿದ್ದರೆ ಹೀಗೇ ಆಗುವುದು
ಶಿವಸೇನೆ ಉದ್ಧವ್ ಠಾಕ್ರೆ ಬಣದ ನಾಯಕಿ ಶಿಲ್ಪಾ ಬೋಧ್ಖೆ ಅವರು ವಿಡಿಯೊವನ್ನು ಶೇರ್ ಮಾಡಿ ‘ಇದು ನಾಚಿಕೆಗೇಡಿನ ಘಟನೆ. ಮಹಿಳೆಯೊಬ್ಬಳು ತನ್ನ ಕಾರನ್ನು ಓವರ್ಟೇಕ್ ಮಾಡಿದಳು ಎಂಬ ಕಾರಣಕ್ಕೇ ಆಕೆಯ ಮೇಲೆ ಈ ವ್ಯಕ್ತಿ ಹಲ್ಲೆ ನಡೆಸಿದ್ದಾನೆ. ಗೃಹ ಮಂತ್ರಿ ದೇವೇಂದ್ರ ಫಡ್ನವೀಸ್ ಅವರೇ, ಇತ್ತೀಚೆಗಷ್ಟೇ ಇಲ್ಲೆಲ್ಲ ಮಹಿಳಾ ದಿನಾಚರಣೆಯನ್ನು ಆಚರಣೆ ಮಾಡಲಾಯಿತು. ಆದರೆ ಇಲ್ನೋಡಿ, ಮಹಿಳೆಯರಿಗೆ ಎಷ್ಟು ಗೌರವ ಸಿಗುತ್ತಿದೆ, ಅವರೆಷ್ಟು ಸುರಕ್ಷಿತರಾಗಿದ್ದಾರೆ ಎಂಬುದನ್ನು’ ಎಂದು ಕ್ಯಾಪ್ಷನ್ ಬರೆದಿದ್ದಾರೆ.