ಅಹಮದಾಬಾದ್: ಐಪಿಎಲ್ 16ನೇ ಆವೃತ್ತಿಯ ಫೈನಲ್ ಪಂದ್ಯ ಮೀಸಲು ದಿನಕ್ಕೆ ಮುಂದೂಡಿಕೆಯಾಗಿದೆ. ಮೇ 29 ಸೋಮವಾರ ಮೀಸಲು ದಿನ. ಅಂದು ಪೂರ್ಣ 20 ಓವರ್ಗಳ ಪಂದ್ಯ ನಡೆಯುವ ನಿರೀಕ್ಷೆಯಿದೆ. ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಗುಜರಾತ್ ಟೈಟನ್ಸ್ ತಂಡಗಳ ನಡುವೆ ಪ್ರಶಸ್ತಿ ಸುತ್ತಿನ ಪಂದ್ಯ ಆಯೋಜನೆಗೊಂಡಿತ್ತು. ಆದರೆ, ರಾತ್ರಿ 11 ಗಂಟೆಯವರೆಗೂ ಮಳೆ ನಿರಂತರವಾಗಿ ಗುಡುಗು ಸಹಿತ ಮಳೆ ಸುರಿದ ಕಾರಣ ಪಂದ್ಯವನ್ನು ಮುಂದೂಡಿಕೆ ಮಾಡಲು ರೆಫರಿ ಸೂಚಿಸಿದರು.
ಐಪಿಎಲ್ನ 16 ವರ್ಷಗಳ ಸುದೀರ್ಘ ಇತಿಹಾಸದಲ್ಲಿ ಮೊದಲ ಬಾರಿಗೆ ಋತುವಿನ ಚಾಂಪಿಯನ್ ತಂಡವನ್ನು ನಿರ್ಧರಿಸಲು ಮೀಸಲು ದಿನದ ಮೊರೆ ಹೋಗಲಾಯಿತು. ಸೋಮವಾರವೂ ಮಳೆ ಸುರಿಯುವ ಮುನ್ಸೂಚನೆಯಿದ್ದು , ಅದು ನಿಜವಾದರೆ ಚಾಂಪಿಯನ್ಗಳ ನಿರ್ಧಾರ ಮತ್ತಷ್ಟು ಕ್ಲಿಷ್ಟವಾಗಬಹುದು.
UPDATE from Ahmedabad🚨#IPL2023Final #CSKvGT #WhistlePodu #Yellove 🦁💛 pic.twitter.com/lGWLOmOVlm
— Chennai Super Kings (@ChennaiIPL) May 28, 2023
ಭಾನುವಾರ ಸಂಜೆ ಸಂಜೆ 7 ರಿಂದ ರಾತ್ರಿ 11 ರವರೆಗೆ ಅಭಿಮಾನಿಗಳು, ಆಟಗಾರರು, ಕ್ರಿಕೆಟ್ ತಜ್ಞರು ಫಲಿತಾಂಶದ ನಿರೀಕ್ಷೆಯಲ್ಲಿದ್ದರು. ರಾತ್ರಿ 9 ಗಂಟೆಗೆ ಒಂದು ಬಾರಿ ಮಳೆ ನಿಂತಾಗಲೂ ಪಂದ್ಯ ನಡೆಯುವ ಸೂಚನೆ ದೊರೆಯಿತು. ಪಿಚ್ಗೆ ಹೊದಿಸಲಾಗಿದ್ದ ಟಾರ್ಪಾಲ್ ಕವರ್ಗಳನ್ನು ಹೊರಕ್ಕೆ ತೆಗೆಯಲಾಗಿತ್ತು. ಆಟಗಾರರೂ ವಾರ್ಮ್ಅಪ್ಗಾಗಿ ಮೈದಾನಕ್ಕೆ ಇಳಿದಿದ್ದರು. ಈ ಸಕಾರಾತ್ಮಕ ವಾತಾವರಣ ಹಚ್ಚು ಹೊತ್ತು ಇರಲಿಲ್ಲ. ತುಂತುರು ಮಳೆ ದೊಡ್ಡ ದೊಡ್ಡ ಹನಿಯಾಗಿ ಪರಿವರ್ತನೆಗೊಂಡಿತು. ನಾಲ್ಕು ಗಂಟೆಗಳ ದೀರ್ಘ ಕಾಯುವಿಕೆ ಬಳಿಕ ಮುಂದೂಡಿಕೆ ನಿರ್ಧಾರ ಕೈಗೊಳ್ಳಲಾಯಿತು.
ಇದನ್ನೂ ಓದಿ : IPL 2023 : ಎರಡನೇ ಮಗಳು ಹುಟ್ಟಿದ ಸಂತಸ ಹಂಚಿಕೊಂಡ ಅಂಬಾಟಿ ರಾಯುಡು
ರಾತ್ರಿ 10:30 ರ ಸುಮಾರಿಗೆ ಮೀಸಲು ದಿನದ ಸಾಧ್ಯತೆಯ ಚರ್ಚೆ ಆರಂಭಗೊಂಡಿತ್ತು. ಫೀಲ್ಡ್ ಅಂಪೈರ್ಗಳಾದ ನಿತಿನ್ ಮೆನನ್ ಮತ್ತು ರಾಡ್ ಟಕರ್ ಅವರು ಪರಿಸ್ಥಿತಿಗಳನ್ನು ಉದ್ದೇಶಿಸಿ ಮಾತನಾಡಿ, ಇಷ್ಟೊಂದು ಮಳೆಯಾದರೆ ಆಟವಾಡಿಸಲು ಮೈದಾನ ಅನುಕೂಲಕರವಾಗಿರುವುದಿಲ್ಲ ಎಂದು ಹೇಳಿದರು. ಈ ವೇಳೆಯೇ ಮುಂದೂಡಿಕೆ ನಿರ್ಧಾರವಾಯಿತು.
ರಾತ್ರಿ 9 ಗಂಟೆ ಸುಮಾರಿಗೆ ಮಳೆ ಕಡಿಮೆಯಾದಾಗ, ಪರಿಷ್ಕೃತ ಆಟದ ಪರಿಸ್ಥಿತಿಗಳನ್ನು ವಿವರಿಸಲಾಯಿತು. ಒಂದು ವೇಳೆ ರಾತ್ರಿ 9.35ಕ್ಕೆ ಮುಂಚಿತವಾಗಿ ಫೈನಲ್ ಪಂದ್ಯ ಆರಂಭವಾಗಿದ್ದರೆ 20 ಓವರ್ಗಳ ಪೂರ್ಣ ಪಂದ್ಯ ನಡೆಯುತ್ತಿತ್ತು. ರಾತ್ರಿ 9:45 ಕ್ಕೆ ಪ್ರಾರಂಭವಾಗಿದ್ದರೆ ತಲಾ 19 ಓವರ್ಗಳ ಪಂದ್ಯ ನಡೆಯುತ್ತಿತ್ತು. ರಾತ್ರಿ 10 ಗಂಟೆಗಾಧರೆ 17 ಓವರ್ಗಳ ಪಂದ್ಯ ಮತ್ತು ರಾತ್ರಿ 10:15 ಮತ್ತು 10:30 ರವರೆ ಪ್ರತಿ ತಂಡಕ್ಕೆ 15 ಓವರ್ಗಳ ಪಂದ್ಯ ನಡೆಸುವ ತೀರ್ಮಾನ ಕೈಗೊಳ್ಳಲಾಗಿತ್ತು. 12:06ಕ್ಕೆ ಆರಂಭಗೊಂಡಿದ್ದರೆ ಐದು ಓವರ್ಗಳ ಶೂಟೌಟ್ ಮೂಲಕ ವಿಜೇತರ ನಿರ್ಧಾರವಾಗುತ್ತಿತ್ತು. ಅಚ್ಚರಿ ಎಂಬಂತೆ ರಾತ್ರಿ 10:50ಕ್ಕೆ ಮಳೆ ನಿಂತಿತು. ಆದರೆ, ಅಧಿಕಾರಿಗಳ ಆಸಕ್ತಿ ಮೀಸಲು ದಿನಕ್ಕೆ ಪಂದ್ಯವನ್ನು ಮುಂದೂಡುವುದಾಗಿತ್ತು.
ಮೀಸಲು ದಿನ (ಅಂದರೆ ಮೇ 29) ರದ್ದಾದರೆ, ಗುಜರಾತ್ ಟೈಟಾನ್ಸ್ ಐಪಿಎಲ್ 2023 ರ ಚಾಂಪಿಯನ್ ಆಗಲಿದೆ, ಏಕೆಂದರೆ ಗುಂಪು ಹಂತದ ನಂತರ ಚೆನ್ನೈ ಸೂಪರ್ ಕಿಂಗ್ಸ್ (2) ಗಿಂತ ಹೆಚ್ಚಿನ (1) ಸ್ಥಾನವನ್ನು ಗಳಿಸಿತ್ತು.