Viral News: ಬೈಕ್‌, ಕಾರು, ಜೀಪ್‌ಗಳಲ್ಲಿ ಸ್ಟಂಟ್‌ ಮಾಡುತ್ತ ಡ್ರೈವ್‌ ಮಾಡುವವರನ್ನು ನಾವು ನೋಡಿದ್ದೇವೆ. ವೃತ್ತಿಪರರನ್ನು ನೋಡಿ, ಅರ್ಧಂಬರ್ಧ ತಿಳಿದುಕೊಂಡವರೆಲ್ಲ ಸ್ಟಂಟ್‌ ಮಾಡಲು ಹೋಗಿ ಅಪಾಯ ಮೈಮೇಲೆ ಎಳೆದುಕೊಂಡ ಉದಾಹರಣೆಗಳೂ ಸಾಕಷ್ಟಿವೆ. ಒಂದಷ್ಟು ಜನರಂತೂ ಹುಚ್ಚು ಸಾಹಸ ಮಾಡಿ ಪ್ರಾಣವನ್ನೂ ಕಳೆದುಕೊಂಡಿದ್ದಾರೆ. ಹೀಗಾಗಿ ರಸ್ತೆಯ ಮೇಲೆ ಯಾವುದೇ ವಾಹನದ ಮೇಲೆ ಸ್ಟಂಟ್‌ ಮಾಡುವವರ ಮೇಲೆ ಪೊಲೀಸರು ಕಣ್ಣಿಟ್ಟಿರುತ್ತಾರೆ. ಇಷ್ಟು ಪೀಠಿಕೆ ಯಾಕೆಂದರೆ, ಉತ್ತರ ಪ್ರದೇಶದ ನೊಯ್ಡಾದಲ್ಲೊಬ್ಬ ವ್ಯಕ್ತಿ ಮಹೀಂದ್ರಾ ಥಾರ್‌ ಮೇಲೆ ಕುಳಿತು ಸ್ಟಂಟ್‌ ಮಾಡುತ್ತ ಚಲಾಯಿಸಿ ಇದೀಗ ಪೊಲೀಸರಿಂದ ಅರೆಸ್ಟ್‌ ಆಗಿದ್ದಾನೆ. ಆತ ಕ್ಷಮಾಪಣೆಯನ್ನೂ ಕೇಳಿದ್ದಾನೆ.
ಉತ್ತರ ಪ್ರದೇಶ ಪೊಲೀಸರು ಆ ವ್ಯಕ್ತಿಯ ಸ್ಟಂಟ್‌ನ ವಿಡಿಯೋವನ್ನೂ ಶೇರ್‌ ಮಾಡಿಕೊಂಡಿದ್ದಾರೆ. ಡ್ರೈವಿಂಗ್‌ ಸೀಟ್‌ನಲ್ಲಿ ಕುಳಿತಿರುವ ಈತ ಎಡಗೈಯ್ಯಯಲ್ಲಿ ಸ್ಟೇರಿಂಗ್‌ ಹಿಡಿದಿದ್ದರೆ, ಬಲಗೈನಲ್ಲಿ ಬೇಸ್‌ಬಾಲ್‌ ಬ್ಯಾಟ್‌ ಹಿಡಿದಿದ್ದಾನೆ. ಆ ಬೇಸ್‌ಬಾಲ್‌ ಬ್ಯಾಟ್‌ನ್ನು ಜೀಪ್‌ನ ಕಿಟಕಿಯ ಹೊರಗೆ ಹಿಡಿದು ಎಲ್ಲರಿಗೂ ತೋರಿಸುತ್ತ ವಾಹನ ಓಡಿಸುತ್ತಿರುವುದು ವಿಡಿಯೋದಲ್ಲಿ ಕಾಣಿಸುತ್ತದೆ. ಈತ ವಿಡಿಯೋವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ನೋಡಿದ ಪೊಲೀಸರು ತಕ್ಷಣ ಕಾರ್ಯಪ್ರವೃತ್ತರಾಗಿ ಆತನನ್ನು ಬಂದಿಸಿದ್ದಾರೆ. ಹಾಗೇ, ಮಹೀಂದ್ರಾ ಥಾರ್‌ನ್ನು ಜಪ್ತಿಮಾಡಿ ಟೋಯಿಂಗ್‌ ಮೂಲಕ ತೆಗೆದುಕೊಂಡು ಹೋಗಿದ್ದಾರೆ.
ಇದನ್ನೂ ಓದಿ: Viral Video: ಭಯ ಹುಟ್ಟಿಸುವ ಮದುವೆ; ಹೂವಲ್ಲ, ಹಾವಿನ ಹಾರ ಹಾಕಿಕೊಂಡ ವಧು-ವರ
ಜೈಲಿನಲ್ಲಿ ನಿಂತ ವ್ಯಕ್ತಿ ಕ್ಷಮೆ ಕೇಳುತ್ತಿದ್ದಾನೆ. ಇನ್ನೆಂದೂ ಇಂಥ ಸಾಹಸ ಮಾಡುವುದಿಲ್ಲ, ನನ್ನನ್ನು ಬಿಟ್ಟುಬಿಡಿ ಎಂದು ಮನವಿ ಮಾಡಿದ್ದಾನೆ. ವಿಡಿಯೋ ಹಂಚಿಕೊಂಡಿರುವ ಉತ್ತರ ಪ್ರದೇಶ ಪೊಲೀಸರು, ʼಯಾರು ರೋಡ್‌ ಮೇಲೆ ಸ್ಟಂಟ್‌ ಮಾಡುತ್ತಾರೋ, ಅವರನ್ನು ನಾವು ಹಂಟ್‌ ಮಾಡುತ್ತೇವೆ. ನಿಮ್ಮ ವಾಹನವನ್ನು ವಶಕ್ಕೆ ಪಡೆಯುತ್ತೇವೆ ಮತ್ತು ನೀವು ಲಾಕ್‌ ಅಪ್‌ ಸೇರುತ್ತೀರಿʼ ಎಂದು ಕ್ಯಾಪ್ಷನ್‌ ಬರೆದಿದ್ದಾರೆ. ಈ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದ್ದು, ಉತ್ತರ ಪ್ರದೇಶ ಪೊಲೀಸರನ್ನು ಜನರು ಹೊಗಳುತ್ತಿದ್ದಾರೆ.
ಇದನ್ನೂ ಓದಿ: Viral News: ಆಕೆ 36 ವರ್ಷ ಪುರುಷ ವೇಷದಲ್ಲಿ ಬದುಕಿದರು, ಎಲ್ಲವೂ ಮಗಳಿಗಾಗಿ!