ಪರ್ಸ್, ಮೊಬೈಲ್ಗಳೆಲ್ಲ ಕಳೆದು ಹೋಗುವುದು ಸಾಮಾನ್ಯ. ನಾವೆಷ್ಟೇ ಎಚ್ಚರಿಕೆಯಿಂದ ಇದ್ದರೂ, ಒಂದಲ್ಲ ಒಂದು ಸಲ ಕಣ್ತಪ್ಪಿನಿಂದ ಇಂಥ ವಸ್ತುಗಳು ಕಳೆದು ಹೋಗುತ್ತವೆ. ಅದು ವಾಪಸ್ ಸಿಕ್ಕವರು ಅದೃಷ್ಟವಂತರು, ಸಿಕ್ಕ ಪರ್ಸ್/ಮೊಬೈಲ್ ಅಥವಾ ಇನ್ಯಾವುದೇ ವಸ್ತುಗಳನ್ನು ವಾಪಸ್ ತಂದುಕೊಟ್ಟವರು ಹೃದಯವಂತರು ಎಂದೇ ಹೇಳಬೇಕು. ಹೀಗೆ ಭಾರತಕ್ಕೆ ಬಂದು, ಕಳೆದುಕೊಂಡ ಪರ್ಸ್ನ್ನು ವಾಪಸ್ ಪಡೆದ ಖುಷಿಯನ್ನು ಯುಎಸ್ ಮಹಿಳೆಯೊಬ್ಬರು ತಮ್ಮ ಇನ್ಸ್ಟಾಗ್ರಾಂ ಪೇಜ್ನಲ್ಲಿ ಹಂಚಿಕೊಂಡಿದ್ದಾರೆ.
ನಾನು ರೈಲಿನಲ್ಲಿ ಪ್ರಯಾಣಿಸಿದೆ. ಆದರೆ ರೈಲು ಇಳಿಯುವಾಗ ಪರ್ಸ್ ಮರೆತುಹೋದೆ. ಇನ್ನೇನು ಮಾಡುವುದು ಎಂದು ಗಾಬರಿಯಲ್ಲಿದ್ದಾಗಲೇ, ನನ್ನ ಇನ್ಸ್ಟಾಗ್ರಾಂಗೆ ಸಂದೇಶವೊಂದು ಬಂತು. ‘ನನ್ನ ಹೆಸರು ಚಿರಾಗ್, ನಿಮ್ಮ ಪರ್ಸ್ ಸಿಕ್ಕಿದೆ. ಅದರಲ್ಲಿ ನಿಮ್ಮ ಎಟಿಎಂ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್ ಮತ್ತಿತರ ಡಾಕ್ಯುಮೆಂಟ್ಗಳ ಇವೆ. ನಾನು ಇರುವ ಸ್ಥಳ ನಿಮಗೆ ಹೇಳುತ್ತೇನೆ, ಬಂದು ತೆಗೆದುಕೊಳ್ಳಿ’ ಎಂದು ಮೆಸೇಜ್ ಇತ್ತು. ನಾವಲ್ಲಿಗೆ ಹೋದರೆ, ಒಂದು ಅಂಗಡಿಯಲ್ಲಿ ಇದ್ದ ಚಿರಾಗ್, ನನ್ನ ಪರ್ಸ್ ವಾಪಸ್ ಕೊಟ್ಟರು. ನನಗೆ ಅವರು ಮಾಡಿದ ಸಹಾಯಕ್ಕೆ ಟಿಪ್ಸ್ ಕೊಡಲು (ಹಣ) ಮುಂದಾದೆ. ಆದರೆ ಅವರು ತೆಗೆದುಕೊಳ್ಳಲೇ ಇಲ್ಲ. ನಿಜಕ್ಕೂ ಅವರ ಸಹಾಯ ಮಾಡುವ ಮನೋಭಾವ, ಅವರಲ್ಲಿರುವ ದಯೆ ನನ್ನ ಹೃದಯಸ್ಪರ್ಶಿಸಿತು’ ಎಂದು ಆ ಮಹಿಳೆ ಹೇಳಿಕೊಂಡಿದ್ದಾರೆ. ವಿಡಿಯೊವನ್ನೂ ಕೂಡ ಪೋಸ್ಟ್ ಮಾಡಿದ್ದಾರೆ.
ಭಾರತ ನಿಜಕ್ಕೂ ಸುಂದರವಾದ ದೇಶ. ಭಾರತದ ಬಗ್ಗೆ ಹಲವು ನೆಗೆಟಿವ್ ಸುದ್ದಿಗಳನ್ನು ಕೇಳುತ್ತಿರುತ್ತೇವೆ. ಆದರೆ ವಾಸ್ತವದಲ್ಲಿ ಹಾಗಿಲ್ಲ. ಇದೇ ಅಮೆರಿಕದಲ್ಲಿ ಇದ್ದರೆ ಜನ ಅಲ್ಲಿ ಹೇಗೆ ವ್ಯವಹಾರ ಮಾಡುತ್ತಿದ್ದರು ಎಂಬುದೂ ನನ್ನ ಕಣ್ಮುಂದೆ ಬಂತು. ನನ್ನ ಪರ್ಸ್ ಸಿಕ್ಕಿದ್ದು ಖುಷಿಯಾಯಿತು. ಚಿರಾಗ್ಗೆ ತುಂಬ ಧನ್ಯವಾದ ಎಂದಿದ್ದಾರೆ. ವಿಡಿಯೊ ನೋಡಿದ ನೆಟ್ಟಿಗರು ಚಿರಾಗ್ ಅವರನ್ನು ಹೊಗಳಿದ್ದಾರೆ. ಚಿರಾಗ್ನ ಸಹಾಯ ಮಾಡುವ ಮನಸ್ಥಿತಿ ನೋಡಿ ನಿಜಕ್ಕೂ ಖುಷಿಯಾಯಿತು ಎಂದು ಒಬ್ಬರು ಕಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು ‘ಭಾರತ ಎಂದರೇ ಹೀಗೆ, ನೀವಿಲ್ಲಿ ಸಂತೋಷದಿಂದ ನಿಮ್ಮ ಪ್ರವಾಸ ಮುಂದುವರಿಸಿ’ ಎಂದು ಹೇಳಿದ್ದಾರೆ.