ಹೊಸದಿಲ್ಲಿ: ಭಾರತೀಯ ರಿಸರ್ವ್ ಬ್ಯಾಂಕ್ (RBI News) ಗವರ್ನರ್ ಶಕ್ತಿಕಾಂತ ದಾಸ್ (Shaktikant Das) ಶುಕ್ರವಾರ ಹೊಸ ಯುಪಿಐ (UPI) ಆಧಾರಿತ ನಗದು ಠೇವಣಿ (cash depossit) ಸೌಲಭ್ಯದ ಪ್ರಸ್ತಾಪವನ್ನು ಪ್ರಕಟಿಸಿದರು. 2024-25ರ ಹಣಕಾಸು ವರ್ಷದ ಮೊದಲ ಹಣಕಾಸು ನೀತಿ ಹೇಳಿಕೆಯ ಅನಾವರಣ ಸಂದರ್ಭದಲ್ಲಿ ಈ ಘೋಷಣೆ ಬಂದಿದೆ.
UPI ಅನ್ನು ಪ್ರಾಥಮಿಕವಾಗಿ ಪೀರ್-ಟು-ಪೀರ್ ವಹಿವಾಟುಗಳು, ಬಿಲ್ ಪಾವತಿಗಳು, ವ್ಯಾಪಾರಿ ವಹಿವಾಟುಗಳು ಮತ್ತು ಇತರ ಡಿಜಿಟಲ್ ಪಾವತಿಗಳಿಗಾಗಿ ಬಳಸಲಾಗುತ್ತದೆ. ಇನ್ನು ಮುಂದೆ, ಎಟಿಎಂ/ಡೆಬಿಟ್ ಕಾರ್ಡ್‌ನ ಬದಲಿಗೆ ನಿಮ್ಮ ಯುಪಿಐ ಬಳಸಿಯೂ ನಗದು ಠೇವಣಿ ಯಂತ್ರಗಳಲ್ಲಿ (ಸಿಡಿಎಂಗಳು) ಹಣವನ್ನು ಠೇವಣಿ ಮಾಡಲು ನಿಮಗೆ ಸಾಧ್ಯವಾಗುತ್ತದೆ.
UPI ಭಾರತದಲ್ಲಿ ಅದರ ಅನುಕೂಲತೆ, ವೇಗ ಮತ್ತು ಕಾರ್ಯಸಾಧ್ಯತೆಯಿಂದಾಗಿ ಹೆಚ್ಚಿನ ಜನಪ್ರಿಯತೆಯನ್ನು ಗಳಿಸಿದೆ. ಇದು ದೇಶದಲ್ಲಿ ಡಿಜಿಟಲ್ ಪಾವತಿಗಳ ಬೆಳವಣಿಗೆಗೆ ಕೊಡುಗೆ ನೀಡಿದೆ. ಭವಿಷ್ಯದಲ್ಲಿ ಈ ವ್ಯವಸ್ಥೆ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದರ ಕುರಿತು RBI ಹೆಚ್ಚಿನ ವಿವರಗಳನ್ನು ಬಿಡುಗಡೆ ಮಾಡುವ ಸಾಧ್ಯತೆಯಿದೆ.
ನಗದು ಠೇವಣಿಗಾಗಿ UPI
ಬ್ಯಾಂಕ್ ಶಾಖೆಗಳಲ್ಲಿ ನಗದು-ಹ್ಯಾಂಡ್ಲಿಂಗ್ ಲೋಡ್ ಅನ್ನು ಕಡಿಮೆ ಮಾಡಲು, ಬ್ಯಾಂಕ್‌ಗಳಿಂದ ನಿಯೋಜಿಸಲಾದ ಸಿಡಿಎಂಗಳು ಗ್ರಾಹಕರ ಅನುಕೂಲವನ್ನು ಹೆಚ್ಚಿಸಿವೆ. ನಗದು ಠೇವಣಿ ಸೌಲಭ್ಯ ಪ್ರಸ್ತುತ ಡೆಬಿಟ್ ಕಾರ್ಡ್‌ಗಳ ಬಳಕೆಯ ಮೂಲಕ ಮಾತ್ರ ಲಭ್ಯವಿದೆ. “UPIಯ ಜನಪ್ರಿಯತೆ ಮತ್ತು ಸ್ವೀಕಾರವನ್ನು ಪರಿಗಣಿಸಿ, ATMಗಳಲ್ಲಿ ಕಾರ್ಡ್‌ಲೆಸ್‌ ಅಥವಾ UPI ಬಳಕೆಯ ಮೂಲಕ ನಗದು ಠೇವಣಿ ಸೌಲಭ್ಯವನ್ನು ಸುಲಭಗೊಳಿಸಲು ಈಗ ಪ್ರಸ್ತಾಪಿಸಲಾಗಿದೆ. ಶೀಘ್ರದಲ್ಲೇ ಕಾರ್ಯಾಚರಣೆಯ ಸೂಚನೆಗಳನ್ನು ನೀಡಲಾಗುವುದು,” ಎಂದು ಗವರ್ನರ್ ಹೇಳಿದ್ದಾರೆ.
ನಗದು ಠೇವಣಿ ಯಂತ್ರಗಳು
ನಗದು ಠೇವಣಿ ಯಂತ್ರಗಳು ಅಥವಾ CDMಗಳು ನಿಮ್ಮ ಬ್ಯಾಂಕ್ ಖಾತೆಗೆ ನೇರವಾಗಿ ಹಣವನ್ನು ಠೇವಣಿ ಮಾಡಲು ಅನುಮತಿಸುವ ATMಗಳಾಗಿವೆ. ಶಾಖೆಯ ಸಮಯದಲ್ಲಿ ಟೆಲ್ಲರ್ ಅನ್ನು ಭೇಟಿ ಮಾಡದೆಯೇ ಹಣವನ್ನು ಠೇವಣಿ ಮಾಡಲು ಅವು ಅನುಕೂಲಕರ ಮಾರ್ಗವಾಗಿದೆ.
ಯೂನಿಫೈಡ್ ಪೇಮೆಂಟ್ಸ್ ಇಂಟರ್ಫೇಸ್ ಎಂಬುದು ನ್ಯಾಶನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್‌ಪಿಸಿಐ) ಅಭಿವೃದ್ಧಿಪಡಿಸಿದ ರಿಯಲ್‌ ಟೈಮ್‌ ಪಾವತಿ ವ್ಯವಸ್ಥೆ. ಫಲಾನುಭವಿಯ ಬ್ಯಾಂಕ್ ಖಾತೆಯ ವಿವರಗಳ ಅಗತ್ಯವಿಲ್ಲದೇ ಮೊಬೈಲ್ ಪ್ಲಾಟ್‌ಫಾರ್ಮ್‌ನಲ್ಲಿ ಎರಡು ಬ್ಯಾಂಕ್ ಖಾತೆಗಳ ನಡುವೆ ತ್ವರಿತ ಹಣ ವರ್ಗಾವಣೆಯನ್ನು ಇದು ಸುಗಮಗೊಳಿಸುತ್ತದೆ.
ಖಾತೆ ಸಂಖ್ಯೆ, IFSC ಕೋಡ್ ಇತ್ಯಾದಿ ಸಾಂಪ್ರದಾಯಿಕ ಬ್ಯಾಂಕಿಂಗ್ ವಿವರಗಳ ಅಗತ್ಯವಿಲ್ಲದೆ UPI ಪಾವತಿ ಪ್ರಕ್ರಿಯೆ ಸರಳಗೊಂಡಿದೆ. ವರ್ಚುವಲ್ ಪಾವತಿ ವಿಳಾಸಗಳು (VPAಗಳು), ಮೊಬೈಲ್ ಸಂಖ್ಯೆಗಳು ಅಥವಾ QR ಕೋಡ್‌ಗಳನ್ನು ಬಳಸಿಕೊಂಡು ಪಾವತಿಗಳನ್ನು ಮಾಡಲಾಗುತ್ತದೆ. ಪೀರ್-ಟು-ಪೀರ್ ವರ್ಗಾವಣೆಗಳಲ್ಲದೆ, ಯುಟಿಲಿಟಿ ಬಿಲ್‌ಗಳು, ಮೊಬೈಲ್ ರೀಚಾರ್ಜ್‌ಗಳು ಮತ್ತು ಆನ್‌ಲೈನ್ ಖರೀದಿಗಳನ್ನು ಪಾವತಿಸಲು UPI ಅನ್ನು ಬಳಸಬಹುದು.
ಚಿಲ್ಲರೆ ನೇರ ಹೂಡಿಕೆದಾರರಿಗೆ ಹೊಸ ಮೊಬೈಲ್ ಆಪ್‌
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಶುಕ್ರವಾರ ತನ್ನ ಚಿಲ್ಲರೆ ನೇರ ಹೂಡಿಕೆದಾರರಿಗಾಗಿ ಹೊಸ ಮೊಬೈಲ್ ಅಪ್ಲಿಕೇಶನ್ ಬಿಡುಗಡೆ ಮಾಡುವುದಾಗಿ ಘೋಷಿಸಿದೆ. ಈಗ ಅಸ್ತಿತ್ವದಲ್ಲಿರುವ, ಅದಕ್ಕೆ ಮೀಸಲಾದ ಪೋರ್ಟಲ್ ಹೊರತುಪಡಿಸಿ, ಹೂಡಿಕೆದಾರರು ತಡೆರಹಿತ ಹೂಡಿಕೆಗಾಗಿ ಅಪ್ಲಿಕೇಶನ್ ಅನ್ನು ಬಳಸಬಹುದು.
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ ಚಿಲ್ಲರೆ ನೇರ ಯೋಜನೆಯು ಚಿಲ್ಲರೆ ಹೂಡಿಕೆದಾರರಿಗೆ ನೇರವಾಗಿ ಸರ್ಕಾರಿ ಸೆಕ್ಯುರಿಟಿಗಳನ್ನು ಖರೀದಿಸಲು ಮತ್ತು ಮಾರಾಟ ಮಾಡಲು ಅನುವು ಮಾಡಿಕೊಡುತ್ತದೆ. ಇದು ಏಜೆಂಟ್‌ಗಳ ಅಗತ್ಯವನ್ನು ನಿವಾರಿಸುತ್ತದೆ. ಈ ಯೋಜನೆಯನ್ನು G-Sec ಹೂಡಿಕೆಗಳಿಗೆ ವೈಯಕ್ತಿಕ ಹೂಡಿಕೆದಾರರ ಪ್ರವೇಶವನ್ನು ಸರಳಗೊಳಿಸಲು 2020ರಲ್ಲಿ ಪರಿಚಯಿಸಲಾಗಿದೆ.
ಇತರ ಹೂಡಿಕೆ ಅಪ್ಲಿಕೇಶನ್‌ಗಳಂತೆಯೇ ಇದು ಹೂಡಿಕೆಗಳನ್ನು ಸುಲಭವಾಗಿ ಖರೀದಿಸಲು, ಮಾರಾಟ ಮಾಡಲು, ನಿಮ್ಮ ಪೋರ್ಟ್‌ಫೋಲಿಯೊ ಕಾರ್ಯಕ್ಷಮತೆಯನ್ನು ಟ್ರ್ಯಾಕ್ ಮಾಡಲು, ನಿಮ್ಮ ಸ್ಮಾರ್ಟ್‌ಫೋನ್ ಅಥವಾ ಟ್ಯಾಬ್ಲೆಟ್‌ನಿಂದ ಮಾರುಕಟ್ಟೆ ಡೇಟಾವನ್ನು ಪ್ರವೇಶಿಸಲು ಅನುಮತಿಸುತ್ತದೆ. ಇದು ಹೂಡಿಕೆಯನ್ನು ಹಿಂದೆಂದಿಗಿಂತಲೂ ಹೆಚ್ಚು ಅನುಕೂಲಕರ ಮಾಡುತ್ತದೆ. ರಿಟೇಲ್ ಡೈರೆಕ್ಟ್ ಸ್ಕೀಮ್‌ಗಾಗಿ ಹೂಡಿಕೆದಾರರಿಗೆ ಬಳಕೆದಾರ ಸ್ನೇಹಿ ಇಂಟರ್ಫೇಸ್ ಅನ್ನು ಒದಗಿಸುತ್ತದೆ.
ಇದನ್ನೂ ಓದಿ: RBI News: ಚಿಲ್ಲರೆ ನೇರ ಹೂಡಿಕೆದಾರರಿಗೆ ಆರ್‌ಬಿಐನಿಂದ ಹೊಸ ಮೊಬೈಲ್ ಆ್ಯಪ್